ꓬꓲꓼ ꓤ ꓠꓬꓲ ꓤ ꓐꓴꓳ ꓮ ꓙꓵꓽ ꓢꓴ ꓧꓪ. ꓧꓪ.꓾ ꓟꓲ ꓠꓯ ꓕꓱ ꓟ ꓗꓪ ꓠꓬ ꓢꓯ. ꓫꓵꓽ ꓢꓯ. ꓙꓰꓽ ꓮ ꓙꓵꓽ ꓡꓱꓸꓼ ꓠꓬꓲ ꓟꓳ ꓓꓴ ꓖꓳ ꓟ ꓔꓯ ꓮ ꓘꓶ. ꓠꓲ, ꓠꓵˍ ꓡꓳ꓿ ꓠꓬꓲ ꓟꓳ ꓓꓴ ꓖꓳ ꓟ ꓔꓯ ꓟꓳꓻ ꓡꓰˍ ꓕꓯ ꓮ ꓘꓶ. ꓠꓲ, ꓘꓪꓽ ꓫꓵˍ ꓡꓳ꓿ ꓠꓲ, ꓟ ꓗ, ꓛꓲꓽˍ ꓡꓳ꓿ ꓠꓯꓼ ꓠꓯꓼ ꓟꓲꓽ ꓟꓲ ꓓꓳ ꓡˍ ꓕꓯ ꓞꓳ ꓤˍ ꓡꓰꓽ ꓟꓽ ꓞꓲ꓾ ꓠꓬ, ꓫꓵꓽ ꓠꓬ, ꓙꓰꓽ꓾ ꓙꓱꓽ ꓤ ꓙꓱꓽ ꓟꓲ ꓮ ꓙꓵꓽ ꓡꓱꓸꓼ ꓗ, ꓛꓲꓽ ꓔꓬ ꓡꓳ꓿ ꓕꓲ ꓦꓬꓼ ꓡꓱꓸꓼ ꓠꓯ ꓞꓲ,ˍ ꓟ ꓘꓳ ꓗꓳ. ꓙꓰ ꓠꓬ ꓠꓯꓼ ꓠꓯꓼ ꓟꓲꓽ ꓟꓲ ꓓꓳ ꓡˍ ꓕꓯ ꓗ, ꓛꓲꓽˍ ꓡꓳ꓿ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓬꓲ ꓓꓻ ꓬꓲ ꓗ, ꓛꓲꓽ ꓠꓲ, ꓙꓳˍ ꓡꓳ꓿

ꓖꓳ ꓡꓱ ꓠꓬꓲ ꓞꓳ ꓤˍ ꓡꓰꓽ ꓟꓽ ꓞꓲ ꓮ ꓫꓵꓽ ꓥˍ ꓟꓲ ꓠꓬꓲ ꓟꓳ ꓓꓴ ꓐꓯˍ ꓟ ꓟꓽ ꓙꓳ ꓠꓬ ꓟꓲ ꓠꓯ ꓕꓱ ꓟ ꓗꓪ ꓢꓯ. ꓔꓬ ꓟꓽ ꓐ ꓡ ꓐꓯˍ ꓟ ꓣꓳ ꓡꓳ. ꓟꓳˍ ꓡꓳ꓿ ꓠꓬꓲ ꓟꓳ ꓓꓴ ꓐꓯˍ ꓟ ꓠꓬ ꓞꓳ ꓤ ꓐꓱ ꓶˍ ꓡꓰꓽ ꓟꓽ ꓞꓲ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓟ ꓢꓯ. ꓫꓵꓽ ꓢꓯ. ꓙꓰꓽ ꓮ ꓙꓵꓽ ꓡꓱꓸꓼ ꓮ ꓘꓶ. ꓬꓳ. ꓚꓰꓽˍ ꓫꓵꓽ ꓕꓲ ꓫꓵꓽ ꓥ ꓡꓳ꓿ ꓠꓬꓲ ꓟꓳ ꓓꓴ ꓟꓽ ꓙꓳ ꓠꓬ ꓞꓳ ꓤ ꓢꓯ. ꓟꓽ ꓐ ꓡ꓿ ꓮ ꓫꓵꓽ ꓥˍ ꓟꓲ ꓣꓳ ꓠꓬ ꓠꓬꓲ ꓟꓳ ꓓꓴ ꓘꓴꓽ ꓠꓯꓸꓼ ꓗꓪ ꓡꓰꓽ ꓧꓪ ꓜꓽ ꓧꓪ ꓓꓳꓻ꓾ ꓙꓰ ꓙꓰ ꓡ ꓡ ꓬꓰ ꓐ ꓡˍ ꓟ ꓥ ꓡꓳ꓿

ꓢꓲ, ꓜꓲ ꓢꓲ, ꓟꓲ ꓥˍ ꓟꓲ ꓟꓲꓽ ꓟꓲ ꓬꓲ. ꓠꓬꓲ ꓟꓳ ꓓꓴ ꓗꓪ ꓐꓰ ꓪꓴꓽ ꓡˍ ꓟ ꓟꓴ ꓡˍ ꓟ ꓙꓳˍ ꓡꓳ꓿ ꓖꓳ ꓡꓱ ꓠꓬꓲ ꓟꓲꓽ ꓟꓲ ꓗꓪ ꓐꓰ ꓓꓳ ꓡˍ ꓟ ꓠꓬꓲ ꓟꓳ ꓓꓴ꓾ ꓥ ꓠꓬ ꓚꓲ. ꓛꓬ ꓚꓳꓽ ꓚꓲ. ꓛꓬ ꓚꓲ ꓔ ꓟ ꓮ ꓔꓳ. ꓠꓬꓲ ꓟꓳ ꓓꓴ꓾ ꓮ ꓙꓵꓽ ꓡꓱꓸꓼ ꓞꓳ ꓤ ꓐꓱ ꓶ ꓟꓽ ꓙꓳ ꓟꓽ ꓓꓻ ꓟ꓾ ꓬꓳ. ꓚꓰꓽ ꓓꓰ ꓡꓰ ꓟ ꓥ ꓡꓳ꓿ ꓠꓬꓲ ꓟꓳ ꓓꓴ ꓟꓽ ꓙꓳ ꓠꓬ ꓞꓳ ꓤ ꓠꓬ ꓢꓯ. ꓔꓬ ꓟꓽ ꓐ ꓡ꓿

ꓖꓳ ꓡꓱ ꓠꓬꓲ ꓝꓴꓲ. ꓮ ꓘꓶ. ꓪꓴꓽ ꓢꓴ ꓔꓯ ꓐꓱ ꓓꓴꓽ ꓗꓪ ꓐꓱˍ ꓕꓯ ꓠꓬꓲ ꓟꓳ ꓓꓴ ꓟꓽ ꓙꓳ ꓟ ꓬꓲ ꓗꓳ, ꓗꓪ ꓧꓳꓽ ꓢꓲ ꓚꓵ. ꓔ ꓖꓶˍ ꓡꓳ꓿ ꓝꓴꓲ. ꓮ ꓘꓶ. ꓪꓴꓽ ꓢꓴ ꓔꓯ ꓝꓴꓲ. ꓖꓶˍ ꓟ ꓚꓱ, ꓥ ꓡꓳ꓿ ꓠꓬꓲ ꓟꓳ ꓓꓴ ꓮ ꓔꓲ. ꓤ ꓟꓲ ꓟꓽ ꓙꓳ꓿ ꓕꓲ ꓗꓳ, ꓡꓱꓸꓼ ꓠꓯ ꓞꓲ,ˍ ꓟ ꓗꓪ ꓗꓶ ꓔ ꓖꓶˍ ꓡꓳ꓿ ꓖꓳ ꓟ ꓕꓯꓽ ꓢꓲ ꓗꓪ ꓫ.ˍ ꓟ꓾ ꓖꓳ ꓟ ꓕꓯꓽ ꓢꓲ ꓞꓳ ꓤ ꓔꓯ ꓠꓲ, ꓟ ꓙꓬ ꓡꓰ ꓝꓲˍ ꓟ꓾ ꓞꓼ ꓞꓼ ꓫꓵꓻ ꓝꓲ ꓐ ꓡˍ ꓟ ꓟꓽ ꓙꓳ꓾ ꓐꓰ ꓢꓷ. ꓠꓲ, ꓙꓳ ꓢꓴ ꓐꓴ ꓡꓰ ꓐꓯ ꓔ ꓡꓳ꓿

ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ꓾ ꓮ ꓫꓵꓽ ꓠꓬꓲ ꓟꓳ ꓓꓴ ꓟꓽ ꓙꓳ ꓙꓳ ꓬꓲ ꓠꓽ ꓢꓴ.꓾ ꓦ ꓐ ꓬꓲ ꓟ ꓢꓴ. ꓔꓬ ꓕꓯ ꓞꓳ ꓤ ꓠꓬ ꓪꓴ. ꓙꓰˍ ꓡꓳ꓿ ꓕꓱ ꓡꓱ ꓫꓵꓽ ꓥ ꓡꓳ꓿ ꓠꓬꓲ ꓟꓳ ꓓꓴ ꓠꓬ ꓣꓳ ꓕꓲ ꓠꓬꓲ ꓕꓲ ꓠꓬꓲ ꓟꓶ ꓔꓬ ꓟ ꓦꓬꓼ ꓠꓬꓲ ꓗꓪ ꓕꓲ ꓖ ꓕꓲ ꓧꓪ, ꓒꓵꓽ ꓗ ꓟꓽ ꓚꓰ ꓟ ꓦꓬꓼ ꓠꓬꓲ ꓔꓳ, ꓜꓳꓽ ꓗꓴ.ˍ ꓡꓳ꓿

ꓥ ꓡꓳ꓾ ꓬꓲꓼ ꓤ ꓠꓬꓲ ꓤ ꓐꓴꓳ (ꓟ‐ꓕꓲ 5ꓽ13‐16) ꓗꓪ꓾ ꓢꓲ ꓒ ꓬꓰ‐ꓢꓴ ꓠꓬ “ꓠꓴ ꓪ ꓮ ꓙꓵꓽ ꓠꓬ ꓟꓲ ꓠꓯ ꓠꓬꓲ ꓟꓳ ꓓꓴ ꓥ ꓡꓳ꓿ ꓟꓲ ꓠꓯ ꓞꓼ ꓐꓳ ꓥ ꓡꓳ꓾” ꓐꓰ ꓣꓳ ꓔꓯ ꓢꓯꓼ ꓪ ꓖꓶ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓐꓯˍ ꓟ ꓮ ꓫꓵꓽ ꓬꓲ. ꓬꓲ ꓢꓲ ꓥ ꓡ꓿ ꓟꓲ ꓠꓯ ꓕꓱ ꓟ ꓗꓪ ꓠꓬ ꓣꓳ ꓟꓬ ꓢꓶꓽ ꓗꓪ ꓐꓰ ꓟꓳ ꓓˍ ꓟ ꓠꓬꓲ ꓟꓳ ꓓꓴ ꓙꓳˍ ꓟ ꓡꓰ ꓐꓰ꓾ ꓣꓳ ꓪꓴ. ꓠꓶ. ꓣꓳ ꓠꓲ, ꓟ  ꓠꓯꓸꓼ ꓘꓴꓽ ꓗꓪ ꓐꓰ ꓢꓷ. ꓔ ꓟ ꓠꓬꓲ ꓟꓳ ꓓꓴ ꓥˍ ꓟꓲ ꓙꓳˍ ꓡꓳ꓿ ꓣꓳ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ꓾ ꓙꓵꓻ ꓠꓲ, ꓟꓶ ꓢꓴ ꓠꓬ ꓟꓲ ꓠꓯ ꓕꓱ ꓟ ꓗꓪ ꓛꓳ ꓫꓱꓽˍ ꓕꓯ ꓠꓱ. ꓐꓯ ꓟꓽ ꓙꓵꓻ ꓢꓴ꓾ ꓟꓽ ꓢꓷ. ꓢꓴ꓾ ꓥ ꓠꓬ ꓠꓯ ꓞꓲ,ˍ ꓟ ꓘꓴꓽ ꓠꓯꓸꓼ ꓗꓪ ꓔꓬ ꓢꓴ ꓬꓲ ꓪ ꓛꓳ ꓫꓱꓽˍ ꓟ ꓡꓰ ꓐꓰ ꓣꓳ ꓟꓽ ꓫꓱ.꓿

ꓮ ꓡꓲꓳ ꓐꓯˍ ꓠꓬ ꓣꓳ ꓠꓬ ꓠꓬꓲ ꓟꓳ ꓓꓴ ꓥ ꓟ ꓢꓲ ꓒ ꓬꓰ‐ꓢꓴ ꓔꓯ ꓘꓳ ꓣꓴ ꓟꓶ ꓡꓰ ꓟ ꓑꓶ. ꓓꓴ ꓣꓳ ꓚꓲ. ꓛꓬ ꓥˍ ꓟꓲ ꓠꓱ. ꓐꓯ ꓢꓴ ꓐꓱ ꓶ ꓠꓬꓲ ꓟꓳ ꓓꓴ ꓥ ꓠ ꓔˍ ꓡꓳ ꓐꓰ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓕꓵꓼ ꓪ ꓖꓶ ꓔ ꓡꓳ꓿ ꓮ ꓡꓲ ꓐꓰ ꓠꓬꓲ ꓟꓳ ꓓꓴ ꓥ ꓡ꓿ ꓟꓲ ꓠꓯ ꓕꓱ ꓟ ꓗꓪ ꓠꓬ ꓪꓴ‐ꓢ ꓔꓯ ꓟꓽ ꓢꓷ.꓾ ꓪꓴ‐ꓢ ꓔꓯ ꓟꓽ ꓙꓵꓻ ꓢꓴ꓾ ꓜꓽ ꓠꓬꓲ ꓓꓳꓻ ꓠꓬꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓘꓶꓻ ꓙꓵ ꓠꓬꓲ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓖꓳꓼ ꓠꓬꓲ꓾ ꓔꓲ. ꓡꓯ ꓘꓳ ꓠꓬꓲ ꓢꓰꓼ ꓡꓯ ꓘꓳ ꓠꓬꓲ ꓕꓱ ꓡꓱ ꓫꓵꓽ ꓬꓰ ꓔꓬ ꓡꓳ꓿ ꓠꓲꓽ ꓢ‐ꓓꓯ ꓤ ꓠꓱ ꓐꓴ ꓠꓬ ꓕꓱ ꓡꓱ ꓬꓰ ꓔꓬ ꓡꓳ꓿

ꓖꓳ ꓡꓱ ꓐꓯˍ ꓥ ꓟꓲ ꓪꓴ‐ꓢ ꓔꓯ ꓙꓵꓻ ꓢꓴ ꓠꓬ ꓢꓲ ꓒ ꓬꓰ‐ꓢꓴ ꓗ ꓠꓯ. ꓖꓼ ꓢꓲ ꓠꓬꓲ ꓬꓲ ꓪ ꓐꓰ ꓟꓽ ꓫꓱ. ꓟ ꓠꓬꓲ ꓟꓳ ꓓꓴ ꓕꓲꓽ ꓟ ꓣꓳ ꓟ. ꓖꓶ ꓠ ꓔˍ ꓡꓳ ꓐꓰ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓢꓯꓼ ꓪ ꓖꓶ ꓔ ꓟ ꓥ ꓡꓳ꓿ ꓮ ꓡꓲ ꓐꓰ ꓟ. ꓖꓶ ꓠ ꓔˍ ꓡ꓿ ꓢꓲ ꓒ ꓬꓰ‐ꓢꓴ ꓬꓲ ꓙꓲˍ ꓟ꓾ ꓢꓲ ꓒ ꓬꓰ‐ꓢꓴ ꓬꓲ ꓠꓵꓻ ꓠꓲ, ꓣꓳ ꓠꓯꓸꓼ ꓗꓪ ꓓꓯ, ꓡˍ ꓕꓯ ꓠꓵꓻ ꓠꓲ, ꓖꓳ ꓟ ꓠꓱ. ꓐꓯ ꓢꓴ ꓔꓯ ꓟꓳ. ꓖꓶ ꓠ, ꓟ ꓣꓳ ꓬꓳ. ꓚꓰꓽˍ ꓡꓳ꓿

ꓣꓳ ꓠꓬ ꓟꓲ ꓠꓯ ꓞꓼ ꓐꓳ ꓥ ꓡꓳ ꓐꓯˍ ꓟ ꓠꓬ꓾ ꓣꓳ ꓠꓯꓸꓼ ꓗꓪ ꓢꓲ ꓒ ꓬꓰ‐ꓢꓴ ꓔꓬ ꓕꓯ ꓡꓰꓽ ꓣꓳ ꓠꓬ ꓟꓲ ꓠꓯ ꓞꓼ ꓐꓳ ꓐꓰ ꓐꓯ ꓐ ꓡˍ ꓡꓳ꓿ (1 ꓘꓳ‐ꓡꓱ‐ꓕꓴ 2ꓽ1‐5) ꓗꓪ ꓙꓲꓻ ꓫꓬ ꓢꓴ ꓒꓳ‐ꓡꓳ ꓠꓬ “ꓥꓪ ꓠꓬ ꓢꓲ ꓒ ꓬꓰ‐ꓢꓴ ꓚꓱ, ꓚꓳ. ꓗꓳ. ꓙꓰ ꓠꓬ ꓠꓱ. ꓐꓯ ꓮ ꓫꓵꓽ ꓟꓽ ꓢꓷ.꓿ ꓥꓪ ꓢꓷ.ˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓚꓱ, ꓕꓲ ꓟˍ ꓡꓰꓽ ꓢꓷ.ˍ ꓡꓳ꓾” ꓐꓰ ꓐꓯ ꓔ ꓡꓳ꓿

ꓥ ꓡꓳ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓐꓰ ꓠꓱ. ꓐꓯ ꓢꓴ ꓔꓯ ꓠꓬꓲ ꓟꓳ ꓓꓴ ꓣꓳ ꓖꓶ ꓠ ꓔˍ ꓡꓳ꓿ ꓢꓲ ꓒ ꓬꓰ‐ꓢꓴ ꓞꓳ ꓙꓳ ꓗꓳ. ꓙꓰ ꓟˍ ꓡꓰ ꓐꓰ ꓣꓳ ꓥˍ ꓟꓲ ꓠꓬꓲ ꓟꓳ ꓓꓴ ꓔꓯ ꓟ. ꓖꓶ ꓠ, ꓟ ꓐꓱ ꓶ ꓠꓬ ꓮ ꓙꓵꓽ ꓢꓴ ꓠꓬ ꓶꓻ ꓙꓳˍ ꓫꓵꓽ ꓡꓰꓽ ꓥ ꓡꓳ꓿ ꓣꓳ ꓟꓳ. ꓟꓳ ꓢꓶꓽ ꓔꓯ ꓠꓬꓲ. ꓗꓷˍ ꓕꓯ ꓬꓲ ꓬꓲꓻ ꓓꓳ ꓡˍ ꓡꓳ꓿ ꓕꓱ ꓟˍ ꓡꓰ ꓐꓰ ꓧꓪꓽ ꓗꓳꓼ ꓢꓶꓽ ꓔꓯ ꓠꓬꓲ. ꓗꓷˍ ꓠꓬ ꓧꓪꓽ ꓗꓳꓼ ꓢꓶꓽ ꓬꓲ ꓬꓲꓻ ꓓꓳ ꓡˍ ꓡꓳ꓿ ꓕꓱ ꓟ ꓠꓬ ꓙꓵꓻ ꓠꓲ, ꓕꓱ ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲ ꓤ ꓙꓵꓻ ꓠꓲ, ꓟꓶ ꓢꓴ ꓐꓴ ꓔꓯ ꓠꓬꓲ. ꓗꓷˍ ꓥˍ ꓟꓲ ꓣꓳ ꓠꓯꓸꓼ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓬꓲ ꓠꓵꓻ ꓠꓲ,꓾ ꓥ ꓠꓬ ꓙꓵꓻ ꓠꓲ,꓾ ꓠꓵꓻ ꓠꓲ, ꓕꓱ ꓡꓱ ꓫꓵꓽˍ ꓡꓰ ꓓꓳ ꓡ ꓠ ꓔˍ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓟꓳ ꓓꓻ ꓠ ꓛꓲ ꓟꓳ. ꓖꓶˍ ꓡꓳ꓿

ꓮ ꓡꓲꓳ ꓐꓯ ꓠꓬ ꓣꓳ ꓙꓲ‐ꓢꓴ ꓢꓲ ꓤ ꓬꓲ ꓡꓲꓽ ꓬꓲ ꓝꓳꓽ Christian Identity ꓐꓰ ꓐꓯˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓗ ꓠꓯ. ꓖꓼ ꓢꓲ ꓠꓬꓲ ꓬꓲ ꓤ ꓬꓲ ꓮ ꓟꓲꓽ ꓒꓬꓱꓼ ꓡ ꓠ, ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓢꓴ ꓡꓰ ꓘꓶꓻ ꓙꓵ꓾ ꓓꓶꓽ ꓔꓲ.꓾ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓢꓰꓼˍ ꓕꓯ ꓬꓲ ꓟꓷꓽ ꓠꓷ, ꓗꓪ ꓐꓰ ꓑꓱ,ˍ ꓟ ꓕꓲ ꓫꓵꓽˍ ꓟꓲ ꓟꓽ ꓓꓳ ꓡ꓿ ꓮ ꓡꓲ ꓘꓶ ꓛꓲ ꓫ. ꓙꓵˍ ꓥ ꓟꓲ ꓬꓲ ꓠꓲ, ꓟ ꓠꓯꓸꓼ ꓗꓪ ꓐꓰ ꓠꓵꓻ ꓠꓲ,ˍ ꓡꓰꓽ ꓓꓳ ꓡˍ ꓡꓳ꓿ “ꓐ, ꓐꓽꓳ꓾ ꓬꓲ ꓪ ꓬꓰˍ ꓟ ꓝꓴꓲ. ꓬꓲ ꓪ ꓟꓽ ꓢꓷ.꓿ ꓬꓲ ꓪ ꓔꓯ ꓖꓽ ꓖꓶ ꓡꓯ” ꓐꓯ ꓢꓲ ꓠꓬꓲ ꓠꓵꓻ ꓠꓲ, ꓐꓯ ꓘꓶꓽˍ ꓡꓰꓽ ꓓꓳ ꓡˍ ꓡꓳ꓿

ꓣꓳ ꓙꓲ‐ꓢꓴ ꓢꓲ ꓤ ꓙꓵꓻ ꓠꓲ, ꓟꓶ ꓢꓴ ꓐꓴ ꓥˍ ꓟꓲ ꓣꓳ ꓔꓯ ꓢꓴ ꓡꓰ ꓘꓶꓻ ꓙꓵ ꓡ ꓕꓯ ꓣꓳ ꓠꓯꓸꓼ ꓗꓪ ꓐꓰ ꓥꓶˍ ꓟ ꓟꓽ ꓙꓲꓻ ꓟ ꓓꓳ ꓡꓰˍ ꓟ ꓢꓶ. ꓟꓽ ꓞꓲ ꓪꓴ‐ꓢ ꓬꓲ ꓠꓵꓻ ꓠꓲ, ꓡꓰ ꓚꓲ. ꓛꓬ ꓟꓷꓽ ꓠꓷ, ꓘꓶꓽ ꓗꓪ ꓐꓰ ꓓꓳ ꓡ ꓠ ꓔˍ ꓡꓳ꓿ ꓕꓱ ꓟ ꓠꓬ ꓢꓻˍ ꓡ ꓐꓰ ꓐꓯ ꓕꓯ ꓟꓽ ꓢꓻ꓿ ꓖꓳ ꓡꓱ ꓐꓯ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓬꓲ ꓣꓱꓽ ꓛꓰꓽ ꓗꓪ ꓐꓰ ꓣꓳ ꓠꓬ ꓐ ꓡˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓚꓲ. ꓛꓬ ꓡꓰ ꓛꓳ ꓙꓳ ꓗꓳ. ꓙꓰ ꓟ ꓑꓶ. ꓓꓴ ꓣꓳ ꓥˍ ꓟꓲ ꓬꓲ ꓢꓯꓼ ꓪ ꓗꓪ ꓐꓰ ꓐ ꓡˍ ꓡꓳ꓿  

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓐꓰ ꓥꓪ ꓠꓬ ꓟꓲ ꓠꓯ ꓠꓬꓲ ꓟꓳ ꓓꓴ ꓥ ꓡꓳ꓿ ꓟꓲ ꓠꓯ ꓞꓼ ꓐꓳ ꓥ ꓡꓳ꓿ ꓚꓲ. ꓛꓬ ꓠꓯꓸꓼ ꓗꓪ ꓐꓰ ꓛꓵꓻˍ ꓞꓼ ꓐꓳ꓾ ꓡꓬꓽˍ ꓟ ꓣꓳꓺ ꓔꓬ ꓟ ꓠꓬꓲ ꓟꓳꓻ ꓓꓴ ꓒꓬꓱꓼ ꓡ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ꓿ ꓮ ꓙꓵꓽ ꓢꓴ ꓔꓯ ꓪꓴ‐ꓢ ꓡꓰ ꓶꓼ ꓥꓳꓽ ꓙꓱꓽ ꓖꓶ ꓝꓲ꓿