ꓟ‐ꓓ‐ꓡꓰ, ꓢꓽ‐ꓢꓶ‐ꓠ ꓘꓴꓽ ꓠꓯꓸꓼ ꓗꓪ ꓙꓳˍ ꓟ ꓢꓽ‐ꓢꓶ‐ꓠ ꓕꓲ ꓟ ꓡꓱꓸꓼ ꓗꓪ ꓪꓴ‐ꓢ ꓟꓬꓱꓽ ꓬꓰ ꓔꓬ ꓢꓴ ꓜꓴꓻ ꓑꓮꓲꓽ ꓦꓬꓼ ꓠꓬꓲ ꓔꓯ ꓟ‐ꓓ‐ꓡꓰ, ꓢꓽ‐ꓢꓶ‐ꓠ꓾ ꓑꓬꓲ‐ꓳꓳ‐ꓡꓪꓲꓠ ꓡꓳ ꓒꓱ ꓢꓲꓠ‐ꓡꓯ, ꓞꓳ ꓘ,꓾ ꓙꓲꓻ ꓫꓬ ꓢꓴ Padre Pio ꓪꓽ ꓘꓴ ꓦꓲ ꓗꓪ (2.2.2026) ꓠꓯꓼ ꓠꓯꓼ 11ꓽ00 ꓙꓵ, ꓕꓯ ꓔꓲꓺ ꓒ Bosco Nyi Nyi ꓡꓰ ꓧꓳꓽ ꓪꓴ. ꓟꓳ ꓢꓲ ꓠꓬꓲ ꓟꓲ‐ꓢ ꓪꓽ ꓘꓴ ꓙꓵ, ꓬꓰ ꓗꓷꓳ꓿
ꓟꓲ‐ꓢ ꓪꓽ ꓘꓴ ꓙꓵ, ꓟꓽ ꓪꓴ. ꓔꓴ ꓢꓰꓽ ꓕꓯ ꓪꓴ‐ꓢ ꓟꓬꓱꓽ ꓟꓯꓻ ꓢꓴ ꓐꓴ ꓐꓱ ꓶ ꓣꓱꓽ ꓞ,ˍ ꓟ ꓔꓱ, ꓕˍ ꓟ ꓓꓴ ꓚꓱ, ꓐꓴ ꓔꓯ ꓔꓲꓺ ꓒ Bosco Nyi Nyi ꓗꓪ ꓐꓰ ꓐꓯ ꓟ. ꓖꓶ ꓗꓷꓳ꓿ ꓖꓳ ꓗ ꓠꓯ. ꓢꓲꓽ ꓫꓬ ꓖꓳ ꓓꓱꓽ ꓔꓯ ꓒꓵꓽ ꓗ ꓬꓰˍ ꓟ꓾ ꓝꓴꓲ. ꓣꓷꓠˍ ꓟ꓾ ꓑꓶ,‐ꓡ (ꓚꓮꓠꓓꓡꓰ) ꓔꓯ ꓶꓼ ꓥꓳꓽ ꓙꓱꓽ ꓖꓶˍ ꓟ ꓔꓯ ꓝ. ꓢꓲ ꓬꓰ ꓗꓷꓳ꓿
ꓪꓴ‐ꓢ ꓟꓬꓱꓽ ꓟꓯꓻ ꓢꓴ ꓐꓴ ꓑꓮꓲꓽ (Feast of Religions) ꓑꓮꓲꓽ ꓔꓯ ꓕꓲ ꓘꓳꓼ ꓡꓰ ꓕꓲ ꓘꓳꓼ 2 ꓦ 2 ꓠꓬꓲ꓾ ꓢꓲ ꓒ ꓬꓰ‐ꓢꓴ ꓔꓯ ꓪꓽ ꓘꓴ ꓦꓲ ꓗꓪ ꓔꓲꓺ ꓖꓶˍ ꓟ ꓑꓮꓲꓽ ꓦꓬꓼ ꓠꓬꓲ ꓗꓪ ꓬꓰ ꓔꓬ ꓟ ꓥ ꓡꓳ꓿ ꓬꓲ ꓪꓴ. ꓢꓷ. ꓙ ꓟꓳ ꓙˍ ꓟ ꓠꓬ 1997 ꓘꓳꓼ ꓕꓯ ꓔꓲꓺ ꓒ ꓪ ꓔꓲ. Saint John Paul (2) ꓗꓪ ꓐꓰ ꓘꓴ ꓜꓲꓼ ꓞꓳ ꓗꓪ ꓡꓯꓼ ꓙꓱ ꓔˍ ꓟ ꓤꓶꓻ (Consecrated Vocations) ꓐꓱ ꓶ ꓪꓽ ꓘꓴ ꓠ, ꓟ꓾ ꓟꓬꓱ ꓓꓳꓽ ꓖꓶ ꓠ, ꓟ ꓐꓰ ꓕꓲ ꓤꓶꓻ ꓡꓱꓸꓼ ꓪꓴ‐ꓢ ꓔꓯ ꓔꓲꓺ ꓖꓶˍ ꓟ ꓤꓶꓻ ꓬꓲ ꓒꓵꓽ ꓶ ꓔꓯ ꓙꓽ ꓜꓲꓼ ꓠ, ꓟ ꓥ ꓢꓲ ꓠꓬꓲ꓾ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓥˍ ꓟꓲ ꓕꓱ ꓡꓱ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓘꓴ ꓔ ꓟꓶˍ ꓟ ꓬꓲ ꓬꓳ. ꓚꓰꓽˍ ꓟ ꓔꓯ ꓙꓽ ꓜꓲꓼ ꓠ, ꓟ ꓢꓯꓼ ꓖꓶ ꓠ, ꓟ ꓥ ꓡꓳ꓿
ꓟꓲ‐ꓢ ꓔꓲꓺ ꓓꓴ ꓠꓯꓸꓼ ꓗꓪ ꓔꓲꓺ ꓒ Bosco Nyi Nyi ꓡꓰ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓚˍ ꓟ ꓗꓪ ꓠꓬ꓾ “ꓣꓳ ꓑ ꓙꓽ ꓪˍ ꓟ꓾ ꓣꓳ ꓠ ꓠ, ꓪˍ ꓟ ꓕꓲ ꓟˍ ꓟ ꓬꓲ ꓢꓯꓼ ꓠꓬ ꓪꓴ‐ꓢ ꓢꓯꓼ ꓥ ꓢꓲ ꓠꓬꓲ ꓣꓳ ꓬꓰ ꓠ ꓔˍ ꓟ ꓕꓲ ꓟˍ ꓟ ꓟꓬꓱꓽ ꓥˍ ꓟꓲ ꓪꓴ‐ꓢ ꓬꓲ ꓠꓲ, ꓡꓶꓽ ꓔꓯ ꓡꓰꓽ ꓥ ꓡꓳ꓿
ꓔꓱ, ꓚꓵˍ ꓟ ꓪꓽ ꓘꓴˍ ꓟ ꓠꓯꓸꓼ ꓗꓪ ꓬꓲ ꓫꓱ, ꓒꓳ, ꓡꓶ. ꓙꓰˍ ꓟ ꓙꓳˍ ꓡꓳ꓿ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓐꓯ ꓑꓶ ꓠ, ꓟ ꓚꓲ. ꓛꓬ ꓠꓲ, ꓟ ꓙꓳˍ ꓕꓯ ꓠꓱ. ꓐꓯ ꓢꓴ ꓔꓯ ꓟꓽ ꓟ. ꓖꓶ ꓧꓶ. ꓕꓯ ꓡꓰ ꓚꓲ. ꓛꓬ ꓚꓳꓽ ꓚꓲ. ꓛꓬ ꓧꓶ. ꓕꓯ ꓟ. ꓟꓲꓽ ꓚꓺ ꓢꓲ꓾ ꓶꓼ ꓓꓳꓽ ꓫꓱ, ꓓꓳꓽ ꓖꓳ ꓟ ꓔꓯ ꓚꓲ. ꓛꓬ ꓤꓶꓻ ꓠꓯꓸꓼ ꓗꓪ ꓢꓯ. ꓔꓬ ꓠ, ꓟ ꓧꓶ. ꓕꓯ ꓢꓯꓼ ꓕꓵꓼ ꓠ ꓗ, ꓟ ꓥ ꓡꓳ꓾” ꓐꓰ ꓬꓲ ꓐꓯ ꓖꓶ ꓗꓷꓳ꓿
ꓝ. ꓢꓲ ꓪꓴ‐ꓢ ꓟꓬꓱꓽ ꓟꓯ ꓢꓴ ꓐꓴ ꓔꓯ ꓪꓴ‐ꓢ ꓐꓯ ꓘꓶꓽ ꓔꓱ, ꓕˍ ꓓꓴ ꓐꓯ ꓟ. ꓖꓶˍ ꓟ ꓠꓯꓸꓼ ꓗꓪ꓾ “ꓒꓴ ꓛˍ ꓟ꓾ ꓠ ꓡꓳ.ˍ ꓟ꓾ ꓙꓽ ꓣꓳˍ ꓟ꓾ ꓕꓱ ꓢ ꓫꓵꓽ ꓔꓯ ꓛꓳ ꓫꓱꓽ ꓔꓬ ꓟ ꓪꓴ‐ꓢ ꓟꓬꓱꓽ ꓟꓯꓻ ꓢꓴ ꓐꓴ ꓤꓶꓻ ꓠꓯꓸꓼ ꓗꓪ ꓪꓴ‐ꓢ ꓐꓯ ꓘꓶꓽ ꓔꓯ ꓙꓵꓻ ꓠꓲ, ꓒ ꓐꓲꓸꓼ ꓐꓰ ꓵꓻ ꓗꓴ. ꓠ, ꓟ꓾ ꓢꓳ ꓣꓴ ꓠ, ꓟ ꓬꓳ. ꓚꓰꓽˍ ꓡꓳ꓿ ꓪꓴ‐ꓢ ꓐꓯ ꓘꓶꓽ ꓔꓯ ꓔꓱ, ꓕ. ꓗꓷ ꓗ ꓠꓯ. ꓕꓯ ꓡꓰꓽ ꓚꓲ. ꓛꓬ ꓤꓶꓻ ꓗꓪ ꓐꓯ ꓘꓶꓽ ꓕꓱ ꓟ ꓔꓯ ꓛꓳ ꓫꓱꓽ ꓔꓬ ꓡ ꓟꓽ ꓛꓳ ꓫꓱꓽ ꓡ ꓐꓯˍ ꓟ ꓔꓯ ꓓꓵꓽ ꓙꓽ ꓠꓬꓲ ꓠ ꓗ, ꓡꓳ꓿
ꓪꓴ‐ꓢ ꓟꓬꓱꓽ ꓟꓯꓻ ꓢꓴ ꓚꓵ꓾ ꓪꓴ‐ꓢ ꓔꓯ ꓛꓳ ꓢꓴ ꓚꓵ ꓕꓲ ꓣꓳ ꓒꓬꓱꓼ ꓠꓲ, ꓫꓵˍ ꓕꓯ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓔꓱ, ꓕ. ꓘꓳ ꓣꓴ ꓢꓲ ꓤꓶꓻ ꓠꓯꓸꓼ ꓗꓪ ꓛꓳ ꓫꓱꓽ ꓠ ꓗ, ꓡꓳ꓿ ꓣꓳ ꓪꓴ‐ꓢ ꓟꓬꓱꓽ ꓬꓰ ꓪꓴ. ꓔꓴˍ ꓕꓯ ꓥˍ ꓟꓲ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓟ ꓗꓪ ꓐꓰ ꓪꓴ. ꓔꓴ ꓗꓷꓳ꓿ ꓪꓴ‐ꓢ ꓟꓬꓱꓽ ꓔꓯ ꓝ. ꓢꓲ ꓬꓰˍ ꓕꓯ ꓥˍ ꓟꓲ ꓪꓴ‐ꓢ ꓐꓯ ꓘꓶꓽ ꓠ ꓠ, ꓢꓲ ꓠꓬꓲ ꓬꓰ ꓠ ꓔˍ ꓟ ꓟꓬꓱꓽ ꓔꓯ ꓣꓱꓽ ꓬꓰ ꓠ ꓔˍ ꓟ ꓥ ꓡꓳ꓾” ꓐꓰ ꓐꓯˍ ꓡꓳ꓿
ꓢꓙꓮ ꓔꓲꓺ ꓟ ꓜꓴ ꓗꓪ ꓟ ꓔꓲꓺ ꓟ Sr. Regina Khaing ꓥˍ ꓟꓲ꓾ “ꓪꓴ‐ꓢ ꓟꓬꓱꓽ ꓟꓯꓻ ꓢꓴ ꓐꓴ ꓑꓮꓲꓽ ꓦꓬꓼ ꓠꓬꓲ ꓔꓯ ꓬꓰ ꓪˍ ꓟ ꓑꓶ. ꓓꓴ ꓪꓴ‐ꓢ ꓔꓯ ꓫ. ꓟꓳˍ ꓡꓳ꓿ ꓕꓱ ꓡꓱ ꓑꓮꓲꓽ ꓬꓰˍ ꓟ ꓗꓪ ꓐꓰ ꓚꓲ. ꓛꓬ ꓚꓳꓽ ꓚꓲ. ꓛꓬ ꓔꓯ ꓪꓴ‐ꓢ ꓔꓯ ꓔꓲꓺ ꓖꓶ ꓔ ꓡꓳ ꓐꓯˍ ꓟ ꓔꓯ ꓝꓮꓲ ꓓꓵꓽ ꓙꓽ ꓟꓶ ꓡꓰ ꓝꓲˍ ꓟˍ ꓡꓰ ꓐꓰ꓾ ꓪꓴ‐ꓢ ꓔꓯ ꓣꓳ ꓡꓰ ꓖꓶ ꓔ ꓟ ꓪꓵꓼ ꓘꓶꓽ ꓙꓳˍ ꓟ ꓡꓰ ꓔꓲꓺ ꓖꓶ ꓔꓬ ꓡ ꓐꓯˍ ꓟ ꓔꓯ ꓝ. ꓢꓲ ꓔꓱ, ꓕˍ ꓠꓬꓲ ꓟꓶ ꓡꓰ ꓝꓲˍ ꓡꓳ꓿
ꓪꓴ‐ꓢ ꓟꓬꓱꓽ ꓣꓱꓽ ꓜꓴꓻ ꓮ ꓙꓵꓽ ꓗꓪ ꓟ ꓪꓴ‐ꓢ ꓟꓬꓱꓽ ꓬꓰ ꓢꓴ ꓠꓬ ꓕꓲ ꓣꓳ ꓐꓰ ꓕꓲ ꓣꓳ ꓜꓲ ꓡꓯ ꓘꓳˍ ꓡꓳ꓾ ꓟꓳꓻ ꓡꓯ ꓘꓳˍ ꓡꓳ꓾ ꓪꓽ ꓘꓴ ꓙ ꓖꓶ ꓡꓯ ꓘꓳˍ ꓡꓳ꓾ ꓕꓱ ꓡꓱ ꓬꓰˍ ꓟ ꓗꓪ ꓐꓰ ꓕꓲ ꓣꓳ ꓐꓰ ꓕꓲ ꓣꓳ ꓪ ꓜꓲ ꓠꓵ ꓠꓲ, ꓙꓳ ꓡˍ ꓟˍ ꓡꓰ ꓐꓰ ꓘꓴ ꓜꓲꓼ ꓞꓳ ꓘꓴꓽ ꓠꓯꓸꓼ ꓗꓪ ꓥˍ ꓟꓲ ꓕꓲ ꓣꓳ ꓐꓰ ꓕꓲ ꓣꓳ ꓪ ꓜꓲ ꓬꓰ ꓙ ꓔꓳ, ꓙ ꓖꓶ ꓐ ꓡˍ ꓡꓳ꓿
ꓪꓴ‐ꓢ ꓟꓬꓱꓽ ꓟꓯꓻ ꓢꓴ ꓐꓴ ꓑꓮꓲꓽ ꓦꓬꓼ ꓠꓬꓲ ꓗꓪ ꓟ‐ꓓ‐ꓡꓰ, ꓢꓽ‐ꓢꓶ‐ꓠ ꓘꓴꓽ ꓗꓪ ꓟ ꓪꓴ‐ꓢ ꓟꓬꓱꓽ ꓟꓯꓻ ꓢꓴ (250) ꓣꓳ ꓑꓮꓲꓽ ꓗꓪ ꓔ, ꓗꓷ ꓟ ꓥ ꓡꓳ꓿
News From RVA Myanmar
