ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓬ ꓟꓽ ꓙꓵꓻ ꓕꓯ ꓠꓽ ꓛꓳ ꓫꓱꓽ ꓟꓽ ꓑꓶ. ꓐꓰ ꓐꓯˍ ꓟ ꓟ. ꓟꓲꓽ ꓗꓪ ꓐꓰ ꓠ ꓡꓳ. ꓓꓴ ꓥꓳ꓿ ꓟ. ꓟꓲꓽ ꓠꓬ ꓟ‐ꓘꓳ 6ꓽ7‐13 ꓗꓪ ꓟ ꓥꓳ꓿ ꓟ. ꓟꓲꓽ ꓬꓲ ꓕꓲꓽ ꓟꓴꓽ ꓠꓬ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓞꓲꓺ ꓠꓬꓲꓽ ꓣꓳ ꓔꓯ ꓠꓬꓲꓽ ꓣꓳ ꓠꓬꓲꓽ ꓣꓳ ꓐꓰ ꓝꓲ ꓩꓴ ꓗꓷˍ ꓡꓳ꓿ ꓖꓳ ꓕꓵꓼ ꓪꓽ ꓕꓲ ꓟˍ ꓟꓲ ꓖꓶˍ ꓡꓳ꓿
ꓕꓵꓼ ꓪꓽ ꓖꓳ ꓟ ꓠꓬ “ꓠꓴ ꓪ ꓕꓰ ꓡꓰ ꓓꓳ ꓙꓰˍ ꓕꓯ ꓙꓽ ꓥꓳꓽ ꓠꓽ ꓣꓱꓽ ꓛꓵˍ ꓡꓳ꓿ ꓖꓳ ꓡꓱ ꓦꓯˍ ꓦ ꓟꓲ ꓠꓱ. ꓐꓯ ꓜꓽ ꓓꓴ ꓑ ꓑ꓾ ꓒꓴ ꓫꓵ ꓗꓶ ꓔ ꓟ ꓓꓱꓼ ꓓꓴ ꓡꓯꓼ ꓫꓬ.꓾ ꓠꓱ. ꓐꓯ ꓮ ꓫꓵꓽ ꓟꓲ ꓕꓽ ꓔꓯ,꓿ ꓐꓵꓽ ꓞꓶꓻˍ ꓟꓲ ꓠꓬꓲꓽ ꓘꓳ, ꓕꓽ ꓔꓯ,꓿ ꓖꓪꓽ ꓓꓴˍ ꓟꓲ ꓕꓰ ꓡꓰ ꓕꓽ ꓔꓯ,꓿ ꓛꓲ ꓠꓲ ꓠꓽ ꓠꓲ ꓛꓵˍ ꓡꓳ꓾” ꓐꓰ ꓐꓯˍ ꓟ ꓟ. ꓟꓲꓽ ꓝꓲ. ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓕꓰ ꓡꓰ ꓐꓰ ꓐꓯˍ ꓟ ꓟ. ꓟꓲꓽ ꓝꓲ. ꓗꓪ ꓠꓬ ꓙꓽ ꓥꓳꓽ ꓐꓰ ꓛꓲ ꓠꓲ ꓕꓱ ꓠꓬꓲꓽ ꓙꓰꓽ ꓢꓲ ꓒ ꓬꓰ‐ꓢꓴ ꓠꓬ ꓔꓯ, ꓝꓲˍ ꓡꓳ꓿ ꓤꓰꓻ ꓞ, ꓟ ꓮ ꓙꓵꓽ ꓠꓽ ꓕꓽ ꓔꓯ, ꓐꓰ ꓐꓯˍ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓙꓽ ꓥꓳꓽ ꓐꓰ ꓛꓲ ꓠꓲ ꓔꓯ ꓔꓯ, ꓝꓲˍ ꓡ꓿ ꓙꓽ ꓥꓳꓽ ꓐꓯˍ ꓟ ꓬꓲ. ꓬꓲ ꓢꓲ ꓠꓬ ꓡꓱ. ꓐꓱꓽ ꓙꓰˍ ꓕꓯ ꓔꓳ, ꓓꓴ꓾ ꓢꓯꓼ ꓐꓽ ꓪꓴꓽ ꓧꓶˍ ꓕꓯ ꓔꓳ, ꓓꓴ꓾ ꓟꓽ ꓙꓲꓻ ꓟ ꓠꓱ. ꓐꓯ ꓛꓴꓽ ꓙꓳ ꓢꓴ ꓬꓲ ꓗꓳ.꓾ ꓪꓰ ꓕꓳ,꓾ ꓡꓽ ꓟ ꓐꓴ ꓡˍ ꓕꓯ ꓖꓼ ꓓꓴ ꓐꓱ ꓶ ꓣꓱꓽ ꓔꓬ ꓟ ꓙꓽ ꓥꓳꓽ ꓥ ꓡꓳ꓿
ꓛꓲ ꓠꓲ ꓐꓯˍ ꓟ ꓠꓬ ꓛꓲ ꓠꓲ ꓔꓯ ꓠꓲ ꓗꓷ ꓠꓬ ꓱˍ ꓟ ꓥ ꓟ ꓪꓴ. ꓠꓬꓲ ꓙ ꓣꓳꓽˍ ꓟ ꓠꓲ, ꓟ ꓔꓯ ꓐꓯˍ ꓟ ꓥ ꓡꓳ꓿ ꓛꓲ ꓠꓲ ꓟꓽ ꓠꓲ ꓔ ꓕꓯ ꓠꓽ ꓥꓪ ꓠꓽ ꓮ ꓫꓵꓽˍ ꓟꓲ ꓟꓽ ꓐ ꓡ꓿ ꓛꓲ ꓠꓲ ꓟꓽ ꓠꓲ ꓔ ꓠꓬ ꓥꓪ ꓠꓬ ꓫꓱꓽ ꓟꓽ ꓐ ꓡ꓾ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ “ꓙꓽ ꓥꓳꓽ ꓐꓰ ꓛꓲ ꓠꓲ ꓔꓯ,” ꓐꓯˍ ꓟ ꓬꓲ. ꓬꓲ ꓢꓲ ꓠꓬ ꓙ ꓣꓳꓽˍ ꓟ ꓠꓲ, ꓟ꓾ ꓥꓪ ꓠꓬ ꓮ ꓫꓵꓽˍ ꓟꓲ ꓟꓽ ꓐ ꓡ꓾ ꓮ ꓫꓵꓽˍ ꓟꓲ ꓬꓰ ꓐ ꓡˍ ꓟ ꓠꓬ ꓪꓴ‐ꓢ ꓥ ꓡꓳ꓿ ꓪꓴ‐ꓢ ꓠꓬ ꓥꓪ ꓙꓽ ꓥꓳꓽ ꓥ ꓡꓳ꓿ ꓪꓴ‐ꓢ ꓠꓬ ꓥꓪ ꓔꓯ ꓔꓳ, ꓖꓶ ꓢꓴ꓾ ꓪꓴ‐ꓢ ꓠꓬ ꓙꓽ ꓥꓳꓽˍ ꓡꓰ ꓐꓰ ꓥꓪ ꓔꓯ ꓣꓱꓽ ꓙ ꓖꓶ ꓢꓴ꓾ ꓝꓴꓲ. ꓙꓳ ꓢꓴ ꓔꓯ ꓖꓽ ꓖꓶ ꓢꓴ ꓙꓽ ꓥꓳꓽ ꓕꓲ ꓟˍ ꓡꓰ ꓐꓰ ꓥꓳ꓾ ꓐꓰ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿
ꓕꓱ ꓟ ꓑꓶ. ꓓꓴ ꓠꓬꓲ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓛꓳ ꓫꓱꓽ ꓢꓴ ꓠꓬ ꓙ ꓣꓳꓽˍ ꓟ ꓠꓲ, ꓟ ꓡꓰ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ ꓥ ꓡꓳ꓿ ꓮ ꓡꓲ ꓥˍ ꓟꓲ ꓙꓽ ꓥꓳꓽ ꓕꓱ ꓟ ꓡꓰ ꓪꓴ‐ꓢ ꓠꓬ ꓥꓪ ꓐꓰ ꓕꓲ ꓡꓰ, ꓔꓬ ꓡꓳ꓿ ꓥꓪ ꓔꓯ ꓬꓰ ꓙˍ ꓡꓳ꓾ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓬꓲ ꓝꓲ ꓓꓴ ꓐꓴ ꓞꓲꓺ ꓠꓬꓲꓽ ꓣꓳ ꓠꓬ ꓙ ꓣꓳꓽˍ ꓟ ꓠꓲ, ꓟ ꓡꓰ ꓙꓵꓻ ꓠꓲ, ꓙꓳˍ ꓟ ꓑꓶ. ꓓꓴ ꓛꓳ ꓫꓱꓽ ꓣꓱꓽ ꓬꓰ ꓐ ꓡˍ ꓟ ꓥ ꓡꓳ꓿
