ꓤ ꓠꓱ ꓤ ꓐꓴ ꓔꓯ ꓟꓽ ꓐꓯ ꓠ ꓗꓹ ꓟ (7) ꓚꓱꓹ
1ꓸ ꓞꓳ ꓟꓳꓽ ꓫꓸ ꓪꓽ ꓔꓯ ꓡꓰ ꓠꓽ ꓠꓹ ꓠ ꓡꓳ ꓥ꓾
ꓣꓳ ꓕꓱ ꓡꓱ ꓐꓯ ꓔꓬ ꓟ ꓦꓬꓼ ꓠꓬꓲ ꓟꓬ ꓡ ꓕꓯ ꓤ ꓠꓱ ꓤ ꓐꓴ ꓬꓲꓽ ꓪ ꓠꓲꓸꓹ ꓟ ꓗꓪ ꓠꓬ ꓞꓳ ꓟꓳꓽ ꓫꓸ ꓪ ꓔꓯ ꓡꓰ ꓠꓽ ꓠꓹ ꓠ ꓡꓳ ꓥ꓾ ꓐꓰ ꓙ ꓟꓶ ꓢꓲ꓾ ꓬꓲꓽ ꓪ ꓒꓬꓱꓼ ꓠꓲꓸꓹ ꓫꓵꓽˍꓟ ꓙꓳ ꓥˍꓟꓲ ꓞꓳ ꓟꓳ ꓟꓽ ꓪ ꓡꓸ ꓐꓰ ꓬꓲꓽ ꓪ ꓪꓴꓸ ꓠꓶꓽ ꓗꓪ ꓙ ꓟꓶ ꓡꓰˍꓟ ꓙꓳ ꓡꓳ= ꓞꓳ ꓟꓳ ꓡꓰ ꓜꓳˍꓥ꓾ ꓞꓳ ꓟꓳ ꓐꓴ ꓡꓰ ꓢꓷꓸ ꓔꓽ ꓥ꓾ ꓞꓳ ꓟꓳ ꓐꓴ ꓡꓰ ꓓˍ ꓥ꓾ ꓐꓰ ꓣꓳ ꓕꓲ ꓔꓶꓼ ꓙ ꓟꓶ ꓟꓽ ꓔ= ꓞꓳ ꓟꓳ ꓐꓴ ꓙ ꓟꓶˍꓟ ꓡꓰ ꓐꓰ ꓕꓱ ꓗꓷ ꓕꓯ ꓤ ꓠꓱ ꓤ ꓐꓴ ꓕꓲ ꓤꓶꓸꓹ ꓡꓱ ꓗꓪ ꓫꓬ ꓕꓱ ꓟꓽ ꓙꓲ ꓐꓰ ꓓꓵ ꓙ ꓬꓰ ꓡ ꓥꓳ= ꓖꓳ ꓡꓰ ꓐꓯ ꓠꓬ ꓮꓽ ꓡꓰ ꓠꓽ ꓠ ꓢ ꓠꓽ ꓕꓱ ꓠꓽ ꓗꓸ ꓡ ꓐꓯ ꓠꓬ ꓬꓲꓽ ꓪ ꓬꓰ ꓥꓳ ꓡꓰ ꓟ ꓔꓯ ꓕꓱ ꓟ ꓔꓯ ꓕꓲ ꓡꓰ ꓥ ꓡꓳ꓾ ꓙꓵꓽˍꓟ ꓚꓱꓹ ꓗꓪ ꓬꓲꓽ ꓪ ꓠꓽ ꓠ ꓢ ꓠ ꓕꓱ ꓪ ꓠꓹ ꓟ ꓮ ꓓꓰꓽ ꓣꓳꓸꓸ ꓚꓵ ꓡꓳ=
2ꓸꓓꓽ ꓥꓴꓸꓹ ꓓꓲ ꓗꓷ ꓓꓴ ꓥ ꓢꓷ꓾ ꓟꓽ ꓠꓽ ꓬꓰ ꓐꓯ ꓥꓪ ꓡꓰ ꓓꓲ ꓓꓴ ꓥꓳ꓾ ꓐꓰ ꓕꓲ ꓐꓴ ꓮꓽ ꓐ ꓮꓽ ꓟ ꓣꓱꓽ ꓢꓴ ꓐꓴ ꓠꓬ ꓕꓱ ꓡꓱ ꓬꓰ ꓔꓬ ꓟ ꓔꓯ ꓡꓳꓸ ꓟꓳ ꓡꓳ= ꓕꓱ ꓗꓪ ꓢꓯꓼ ꓖꓶ ꓠꓲꓸꓹ ꓫꓵꓼˍꓟ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓥꓴꓸꓹ ꓔꓬ ꓡ? ꓬꓲ ꓥꓴꓸꓹ ꓔꓬ ꓟ ꓬꓲꓽ ꓚꓱꓹ ꓔꓯ ꓢꓷꓸ ꓕꓯ ꓢꓲ꓾ꓫꓵꓼ ꓪꓴ ꓕꓲ ꓟ ꓔꓯ ꓫꓬ ꓒ ꓡ ꓟ ꓥ ꓡꓳ= ꓕꓱ ꓟ ꓠꓬ ꓥꓴꓸꓹ ꓠ ꓟꓽ ꓗꓸꓕꓱ ꓡꓱ ꓟꓽ ꓗꓷ ꓠꓼ ꓟ ꓕꓱ ꓡꓱ ꓤ ꓟꓳ ꓛꓲ ꓡꓳ ꓐꓰ ꓐꓯ ꓖꓶ ꓠꓬ ꓤ ꓠꓱ ꓤ ꓐꓴ ꓬꓲꓽ ꓪ ꓠꓲꓸꓹ ꓗꓹ ꓛꓲ ꓓꓴ ꓙꓳ ꓡ ꓟ ꓥ ꓡꓳ=
3ꓸꓮ ꓘꓶꓸ ꓠꓽ ꓟꓲꓹ ꓖꓶ ꓗꓷ꓾ ꓠꓴ ꓠꓬ ꓪꓴ ꓢꓴ ꓥ ꓟ ꓑꓶꓸ ꓓꓴ ꓣꓳ ꓢꓴ ꓔꓯ ꓖꓶ꓾ ꓮꓽ ꓐ ꓮꓽ ꓟ ꓣꓱꓽ ꓢꓴ ꓐꓴ ꓕꓲ ꓐꓴ ꓠꓬ ꓬꓲ ꓔꓯ ꓡꓰ ꓟꓽ ꓥ ꓢꓲ꓾ ꓮ ꓫꓵꓽ ꓪꓴ ꓠꓬ ꓣꓱꓽ ꓔꓬ ꓡ? ꓐꓰ ꓐꓯ ꓢꓲ꓾ ꓓꓲ ꓠꓲꓽ ꓓꓰ ꓠꓲꓽ ꓬꓰ ꓔꓬ ꓟ ꓞꓳ ꓟꓳ ꓐꓴ ꓔꓯ ꓥˍꓟꓲ ꓡꓳꓸ ꓟꓳ ꓡꓳ꓾ꓕꓱ ꓡꓱ ꓬꓰ ꓔꓬ ꓟ ꓠꓬ ꓮ ꓘꓶꓸ ꓥꓳꓽ ꓡꓰ ꓟ ꓥ ꓡꓳ= ꓖꓳ ꓡꓰ ꓐꓯˍꓠꓬ ꓮ ꓡꓰ ꓐꓯ ꓟꓸ ꓖꓶ ꓠꓯꓼ ꓡ? ꓐꓯ ꓠꓬ ꓥꓪꓽ ꓤ ꓥꓪꓽ ꓤ ꓟꓶ ꓕꓱ ꓟ ꓠꓬ ꓠꓴ ꓶ ꓤ ꓟꓽ ꓥ ꓟ ꓑꓶꓸ ꓓꓴ ꓠꓴ ꓡꓳ ꓗꓪ ꓠꓲꓸꓹ ꓫꓵꓼˍꓠꓬ ꓓꓰ ꓢꓲ꓾ ꓕꓲ ꓑ ꓤ ꓡꓳ ꓗꓪ ꓐꓰ ꓬꓲꓽ ꓪ ꓠꓲꓸꓹ ꓗꓪ ꓓꓴ ꓡꓰ ꓠꓽ ꓐꓯ ꓖꓶ ꓠꓬ ꓟꓬ ꓠꓬꓲ ꓙꓲˍ ꓥꓳ ꓠꓲꓸꓹ ꓠꓵ ꓟ ꓮꓽ ꓮ ꓟ ꓬꓲ ꓤ ꓠꓬꓲ ꓤ ꓐꓴꓳ=
4ꓸꓠꓴ ꓔꓯ ꓮꓽ ꓡꓰ ꓟ ꓡꓰ ꓟꓸ ꓖꓶ ꓡ? ꓤ ꓠꓱ ꓤ ꓐꓴ ꓕꓲ ꓫꓵꓽ ꓫꓵꓽ ꓬꓰ ꓥꓳꓽ ꓡꓰ ꓕꓯ ꓮꓽ ꓐꓽ ꓮ ꓟ ꓣꓱꓽ ꓢꓴ ꓐꓴ ꓕꓱ ꓡꓱ ꓐꓯ ꓔꓬ ꓟ ꓙꓳ ꓡꓳ= ꓕꓱ ꓟ ꓠꓬ ꓥꓪꓽ ꓡꓰ ꓬꓰ ꓗꓷˍꓟ ꓥꓳ ꓐꓰ ꓐꓯˍ ꓕꓯ ꓥꓪ ꓔꓯ ꓐꓯ ꓡ ꓥꓳ ꓐꓰ ꓙ ꓟꓶ ꓢꓲꓽ ꓢꓴ ꓡꓰ ꓬꓰˍ ꓡꓳ ꓐꓰ ꓗꓶꓸ ꓗꓴꓸ ꓡ ꓟ ꓠꓬ ꓕꓱ ꓡꓱ ꓫꓵꓽ ꓗꓪ ꓐꓰ ꓥ ꓡꓳ=
