ꓢꓯ. ꓔꓬ ꓟ ꓪꓴ‐ꓢ ꓐꓯ ꓘꓶꓽ
ꓪꓴ‐ꓢ ꓐꓯ ꓘꓶꓽ ꓥ ꓟ ꓒꓵꓽ ꓓꓰ ꓡꓰ ꓟ ꓒꓴ ꓗꓶꓻ ꓓꓴ ꓠꓬ ꓘꓴ ꓜꓲꓼ ꓞꓳ ꓠꓯꓼ ꓗꓪ ꓡꓯꓼ ꓙꓱ ꓔ ꓟ ꓥ ꓡꓳ꓿ ꓕꓱ ꓟ ꓠꓬ ꓡꓳ ꓓꓰ ꓡꓰ ꓐꓰ ꓩꓴ ꓢꓲ ꓔꓬ ꓟ ꓟꓽ ꓥ꓾ ꓚꓺ ꓟꓲꓽ ꓕꓲ ꓚꓳ ꓡꓳ ꓗꓪ ꓙ ꓖꓴ ꓟ. ꓖꓶ ꓔꓬ ꓟ ꓢꓯ. ꓔꓬ ꓟ ꓔꓱ, ꓟ ꓥ ꓡꓳ꓿
ꓢꓲ ꓫꓬ_ ꓟ ꓪꓴ‐ꓢ ꓐꓯ ꓘꓶꓽ ꓐꓰ ꓚꓺ ꓟꓲꓽ ꓡꓲꓽ ꓒꓰꓼ ꓚꓱ, ꓐꓴ ꓠꓬ ꓪꓽ ꓡꓯ ꓘꓳ ꓫꓱ, ꓟ ꓪꓴ‐ꓢ ꓠꓯꓼ ꓗꓪ ꓐꓰ ꓡ_ ꓟ ꓬꓰ ꓓꓳ ꓡ ꓟ ꓥ ꓡꓳ꓿ ꓕꓱ ꓟ ꓠꓬ ꓧ, ꓗꓷ ꓙꓰ ꓟꓽ ꓓ꓾ ꓦ ꓚꓬꓴ ꓙ ꓟꓶ ꓠ, ꓟ ꓐꓯ_ ꓟ ꓫꓱ, ꓟ ꓔꓶꓻ ꓙꓱꓼ ꓠꓯꓼ ꓗꓪ ꓪꓴ. ꓔꓴ ꓔ ꓟ ꓥ ꓡꓳ꓿
ꓕꓲ ꓤꓶꓻ ꓡꓲ ꓕꓲ ꓤꓶꓻ ꓡꓲꓽ ꓒꓰꓼ ꓐꓯ_ ꓟ ꓠꓬ ꓘꓴ ꓜꓲꓼ ꓞꓳ ꓙꓵꓻ ꓠꓲ,꓾ ꓤꓶꓻ ꓐꓰ ꓪꓽ ꓘꓴ ꓚꓱ, ꓔꓯ ꓕꓲ ꓤꓶꓻ ꓡꓲ ꓕꓲ ꓤꓶꓻ ꓠꓯꓼ ꓗꓪ ꓖꓶ ꓡ ꓟ ꓙꓻ ꓡ ꓟ ꓥ ꓡꓳ꓿ ꓪꓴ‐ꓢ ꓐꓯ ꓘꓶꓽ ꓔꓯ ꓘꓴ ꓜꓲꓼ ꓞꓳ ꓠꓲ, ꓟ ꓘꓴꓽ ꓠꓯꓼ ꓗꓪ ꓐꓳ ꓗꓶ ꓔ ꓟ ꓥ ꓡꓳ꓿
ꓢꓲ‐ꓫꓬ‐ꓟ‐ꓦ ꓬꓲ. ꓙ ꓖꓴ ꓟꓳ. ꓖꓶ ꓔ ꓟ ꓗꓪ ꓐꓰ ꓙꓲ ꓢꓴ ꓢꓲ ꓤ ꓐꓴ ꓓꓵꓽ ꓙ ꓔꓱ, ꓕ ꓟ꓾ ꓦ ꓕꓲ ꓒꓳ, ꓔꓳ, ꓜꓳ ꓡ ꓟ ꓬꓲ ꓚꓱ, ꓝꓲ ꓓꓴ ꓐꓴ ꓗꓪ ꓐꓰ ꓙꓵꓽ ꓪ ꓘꓳ, ꓣꓴ ꓟꓶ ꓢꓴ ꓐꓴ ꓟ. ꓖꓶ ꓘꓶꓽ ꓗꓪ ꓐꓰ ꓕꓲ ꓝ. ꓪꓴ‐ꓢ ꓐꓯ ꓘꓶꓽ ꓔꓯ ꓟꓬ ꓠꓬꓲ ꓬꓲ. ꓠꓯ, ꓟ ꓢꓷ. ꓡꓰ ꓝꓲ_ ꓡꓳ꓿
ꓢꓲ ꓫꓬ ꓕꓳ ꓶ ꓐꓰ ꓡꓲꓽ ꓒꓰꓼ ꓠꓬ ꓕꓲꓽ ꓟ ꓟꓽ ꓙꓳ ꓠꓬ ꓕꓲꓽ ꓟ ꓠꓬ ꓦꓰꓼ ꓞ, ꓓꓴ ꓟꓽ ꓒꓬꓱꓼ ꓡ ꓐꓰ ꓔꓲꓺ ꓒ ꓪ ꓔꓲ ꓡꓰ ꓬꓲꓼ ꓠꓬꓲ. ꓐꓯ ꓔ ꓡꓳ꓿ ꓢꓲ ꓫꓬ ꓕꓳ ꓶ ꓠꓬ ꓐꓳ ꓑꓶ ꓔ ꓟ ꓚꓺ ꓟꓲꓽ ꓥ ꓢꓲ꓾ ꓡꓲꓽ ꓒꓰꓼ ꓚꓱ, ꓠꓬ ꓖꓳ ꓟ ꓔꓯ ꓟꓬ ꓠꓬꓲ ꓬꓲ. ꓠꓯ, ꓟ ꓢꓷ. ꓡꓰ ꓓꓴ ꓔꓯ ꓒꓴ ꓠ, ꓟ ꓢꓯꓼ ꓖꓶ_ ꓟ ꓥ ꓡꓳ꓿ ꓕꓱ ꓠꓬꓲꓽ ꓟ ꓕꓲ ꓪ ꓪ ꓗꓷ ꓟ ꓠꓬ ꓙꓵꓻ ꓠꓲ, ꓚꓱ, ꓢꓲ ꓫꓬ_ ꓟ ꓡꓯ ꓙꓱ ꓔ ꓟ ꓒꓴ ꓗꓶꓻ ꓕꓲꓽ ꓟ ꓡꓰ ꓥ ꓡꓳ꓿
ꓢꓲ ꓫꓬ ꓢꓴ ꓧꓰꓠꓰꓣꓬ ꓠꓰꓪꓟꓰꓠ ꓬꓲ ꓐꓯ ꓘꓶꓽ ꓗꓪ ꓐꓰ ꓙꓲ ꓢꓴ ꓢꓲ ꓤ ꓐꓴ ꓙꓵꓻ ꓠꓲ, ꓟ. ꓘꓶꓽ ꓠꓬ ꓗ, ꓗ, ꓛꓲ ꓛꓲ ꓐꓰ ꓧꓪ. ꓛꓲ_ ꓟ ꓔꓱ, ꓟ ꓥ ꓟ ꓔꓯ ꓟ. ꓖꓶ ꓔ ꓡꓳ꓿ ꓬꓲ. ꓫꓵ. ꓕꓲ ꓟ ꓠꓬ ꓮ ꓘꓶ. ꓪꓴ_ ꓟ ꓬꓲ. ꓜꓲ ꓐꓰ ꓪꓴ ꓡ ꓟ ꓡꓰ ꓐꓰ ꓔꓱ, ꓟ ꓬꓲ. ꓠꓯ, ꓟ ꓠꓬ ꓒꓳ, ꓡꓶ. ꓓꓴ ꓟꓽ ꓙꓳ ꓥ ꓟꓲ ꓚꓺ ꓟꓲꓽ ꓫꓵꓼ ꓗꓪ ꓠꓬ ꓟꓬ ꓠꓬꓲ ꓛꓱꓻ ꓐꓬ ꓡꓰ ꓢꓲ ꓪꓴꓽ ꓟꓴ ꓡ ꓟ ꓥꓳ꓿
ꓙꓲ ꓢꓴ ꓢꓲ ꓤ ꓐꓴ ꓙꓵꓽ ꓪ “ ꓡꓯ ꓙꓱ ꓔ ꓟ ꓒꓴ ꓗꓶꓻ” ꓐꓯ_ ꓟ ꓠꓬ ꓙꓵꓽ ꓪ ꓔꓯ ꓘꓳ, ꓣꓴ ꓟ ꓢꓷ. ꓟ ꓔꓯ ꓐꓯ ꓟ ꓥ ꓡꓳ꓿ ꓘꓴ ꓜꓲꓼ ꓞꓳ ꓢꓲ ꓤ ꓮ ꓙꓵ ꓠꓬ ꓕꓱ ꓙꓵꓻ ꓠꓲ, ꓒꓴ ꓗꓶꓻ ꓓꓴ ꓔꓯ ꓟꓽ ꓐꓬ ꓡꓰ ꓠ ꓫ ꓔ ꓠ, ꓟ ꓐꓰ ꓡ ꓠ, ꓟ ꓞꓳ ꓫꓵꓽ ꓐꓴ ꓠꓯꓼ ꓗꓪ ꓟꓳ. ꓖꓶ ꓠ, ꓟ ꓙꓵꓽ ꓪ ꓙꓳ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿
ꓙ ꓖꓴ ꓟꓳ. ꓖꓶ_ ꓟ ꓗꓴꓺ ꓟ ꓡꓰ ꓐꓰ ꓢꓲ‐ꓫꓬ‐ꓟ‐ꓦ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓮ ꓕꓯ ꓟꓲ ꓢꓯ. ꓔꓬ ꓧꓪ. ꓛꓲ ꓠ, ꓟ ꓬꓰ ꓖꓶ_ ꓡꓳ꓿ ꓢꓲ‐ꓫꓬ‐ꓟ‐ꓦ ꓠꓬ ꓔꓱ, ꓟ ꓔꓯ ꓒꓳ, ꓗꓷ ꓢꓴ ꓟꓽ ꓥ꓾ ꓘꓴ ꓜꓲꓼ ꓞꓳ ꓗꓪ ꓐꓰ ꓕꓱ ꓔꓱ, ꓟ “ꓐꓲ ꓡꓶ_ ꓟ” ꓔꓯ ꓬꓲ. ꓙꓵ, ꓐꓰ ꓕꓲ ꓪ ꓟꓬ ꓠꓬꓲ ꓬꓲ. ꓠꓯ, ꓟ ꓔꓯ ꓢꓷ. ꓠ, ꓟ ꓬꓰ ꓙ_ ꓟ ꓥ ꓡꓳ꓿
