ꓙꓵꓻ ꓠꓲ, ꓐꓯ_ ꓟ ꓬꓲ. ꓚꓱ,

ꓙꓵꓻ ꓠꓲ, ꓔꓯ ꓢꓷ. ꓠ, ꓟ ꓟ. ꓟꓲ ꓕꓲꓽ ꓟ ꓟ. ꓖꓶ ꓡ ꓥꓳ꓾ꓟ. ꓟꓲꓽ ꓗꓪ ꓠꓬ ꓟꓬ ꓢꓶꓽ ꓠꓬꓲ ꓟꓽ ꓟꓳ ꓢꓴ ꓥꓪꓽ ꓣꓳ ꓔꓬ ꓡꓳ꓾ꓖꓳ ꓥꓪꓽ ꓣꓳ ꓔꓯ ꓟꓬ ꓢꓶꓽ ꓠꓬꓲ ꓟꓳ ꓢꓴ ꓡꓰ ꓟꓶꓽ ꓖꓶꓽ ꓥ ꓠꓬ ꓦ ꓟ ꓐꓯ_ ꓟ ꓠꓬ ꓮ ꓡꓰ ꓫꓵ ꓥ ꓡ꓾ ꓐꓰ ꓐꓯ_ ꓟ ꓔꓯ ꓐꓯ ꓟ. ꓖꓶ_ ꓡꓳ꓿ ꓟꓶꓽ ꓖꓶꓽ ꓦ ꓟ ꓐꓯ_ ꓟ ꓠꓬ ꓖꓳ ꓓꓱ ꓪꓴ_ ꓟ ꓥ ꓡꓳ꓾ꓕꓱ ꓡꓱ ꓙꓳ_ ꓡꓳ ꓐꓰ ꓐꓯ ꓟ. ꓖꓶ_ ꓡꓳ꓿ ꓖꓳ ꓕꓯ ꓟꓬ ꓢꓶꓽ ꓠꓬꓲ ꓟꓽ ꓟꓳ ꓢꓴ ꓠꓬ ꓟꓽ ꓢꓷ. ꓟꓽ ꓙꓵꓻ ꓖꓳ ꓟ ꓑꓶ ꓓꓴ ꓚꓲ ꓛꓬ ꓫꓱ, ꓪ ꓕꓲ ꓪ ꓡꓰ ꓠꓬꓲ ꓖꓳ ꓕꓯ ꓠꓬ ꓥꓪ ꓠꓴ ꓙꓵꓻ_ ꓥꓳ꓾ ꓐꓰ ꓐꓯ_ ꓡꓳ꓿ ꓖꓳ ꓟ ꓑꓶ ꓓꓴ ꓬꓲ ꓪ ꓥꓪꓽ ꓣꓳ ꓠꓬ ꓟꓶꓽ ꓖꓶꓽ ꓦ ꓟ ꓔꓯ ꓕꓲ ꓠꓬꓲ ꓫꓱ, ꓠꓬꓲ_ ꓡꓳ꓿ ꓕꓲꓽ ꓣꓳ ꓠꓬ ꓬꓲ. ꓟꓶ. ꓔꓯ ꓫꓱ, ꓠꓬꓲ_ ꓡꓳ꓾ꓕꓲ ꓣꓳ ꓠꓬ ꓛꓲ ꓒꓯ, ꓔꓯ ꓕꓲ ꓠꓬꓲ_ ꓡꓳ꓿ ꓕꓲ ꓣꓳ ꓠꓬ ꓜꓳꓼ ꓐꓬ ꓗꓪ ꓕꓲ ꓠꓬꓲ_ ꓡꓳ꓾ ꓕꓲ ꓣꓳ ꓠꓬ ꓠ. ꓑꓳ ꓗꓪ ꓕꓲ ꓠꓬꓲ_ ꓡꓳ꓿ ꓕꓲ ꓣꓳ ꓠꓬ ꓠꓻ ꓘꓴ ꓗꓪ ꓕꓲ ꓠꓬꓲ_ ꓡꓳ꓾ ꓬꓲ ꓪ ꓥꓪꓽ ꓣꓳ ꓔꓯ ꓦ ꓟ ꓠꓬ ꓮ ꓡꓰ ꓫꓵ ꓥ ꓡ? ꓐꓰ ꓠ ꓠꓬꓲ_ ꓡꓳ꓿ ꓥꓪ ꓐꓱ ꓶ ꓠꓬ ꓟꓶꓽ ꓖꓶꓽ ꓦ ꓟ ꓐꓯ_ ꓟ ꓠꓬ ꓞꓲ ꓤ ꓞ ꓡꓰ ꓐꓰ ꓥ ꓡꓳ꓾ꓝꓮꓲ ꓕꓲ ꓣꓳ ꓠꓬ ꓟꓶꓽ ꓖꓶꓽ ꓦ ꓟ ꓐꓯ_ ꓟ ꓠꓬ ꓜꓲ ꓘꓴ ꓓ ꓡꓰ ꓐꓰ ꓗ, ꓡꓳ ꓐꓰ ꓐꓯ_ ꓡꓳ꓾ ꓝꓮꓲ ꓕꓲ ꓣꓳ ꓠꓬ ꓭ. ꓐꓬ ꓡꓰ ꓐꓰ ꓮ ꓫꓵ. ꓫꓵ ꓪ ꓓꓰ ꓡꓰ ꓐꓰ ꓗ, ꓡꓳ꓾ ꓐꓯ_ ꓡꓳ꓿ ꓝꓮꓲ ꓕꓲ ꓣꓳ ꓠꓬ ꓪ ꓟ ꓡꓰ ꓐꓰ ꓪ ꓡꓰ ꓡꓰ ꓗ, ꓡꓳ꓾ꓐꓰ ꓐꓯ_ ꓡꓳ꓿ꓬꓲ. ꓟꓶꓽ ꓕꓲ ꓣꓳ ꓟ ꓠꓬ ꓑ ꓕꓵ ꓮ ꓫꓵ. ꓫꓵ ꓗ, ꓟ ꓡꓰ ꓐꓰ ꓑ ꓕꓵ ꓠꓵ_ ꓟ ꓡꓰ ꓐꓰ ꓗ, ꓡꓳ ꓐꓰ ꓐꓯ ꓔ ꓡꓳ꓿

ꓠꓲ, ꓠꓵ_ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟꓬ ꓢꓶꓽ ꓠꓬꓲ ꓟꓽ ꓟꓳ ꓢꓴ ꓕꓱ ꓥꓪꓽ ꓣꓳ ꓡꓱꓼ ꓠꓬ ꓬꓲ ꓠꓬ ꓕꓲ ꓠꓬꓲ ꓫꓱ, ꓠꓬꓲ_ ꓟ ꓠꓬ ꓦ ꓟ ꓟꓶꓽ ꓖꓶꓽ ꓙꓳ_ ꓡꓳ꓿ ꓖꓳ ꓡꓱ ꓥ ꓟꓲ ꓮ ꓙꓵ ꓟꓽ ꓙꓳ꓾ꓕꓱ ꓟ ꓑꓶ ꓓꓴ ꓠꓬꓲ. ꓠꓬꓲ ꓣꓳ ꓞꓳ ꓤ ꓥ ꓟꓲ ꓕꓱ ꓡꓱ ꓥꓳ꓾ ꓥꓪ ꓔꓯ ꓪꓴ‐ꓢ ꓙꓳ_ ꓡꓳ꓾ ꓥꓪ ꓠꓴ ꓪꓴ‐ꓢ ꓠꓬ ꓕꓲ ꓡꓲ ꓗ, ꓡꓳ꓾ ꓥꓪ ꓠꓴ ꓪꓴ‐ꓢ ꓠꓬ ꓖꓳ ꓡꓱ ꓥꓳ꓾ ꓕꓱ ꓡꓱ ꓥꓳ ꓐꓰ ꓣꓳ ꓐꓯ ꓔꓬ ꓥ ꓟꓲ ꓚꓲ ꓛꓬ ꓞꓳ ꓤ ꓢꓯꓼ ꓪ ꓗꓪ ꓐꓰ ꓪꓴ‐ꓢ ꓔꓯ ꓢꓷ. ꓟꓽ ꓐ ꓡ꓾ ꓙꓵꓻ ꓟꓽ ꓐ ꓡ꓾ ꓮ ꓫꓵ ꓑꓶ ꓓꓴ ꓥ ꓡ꓾ꓚꓲ ꓛꓬ ꓞꓳ ꓤ ꓢꓷ. ꓠꓲ, ꓗꓪ ꓐꓰ ꓟꓽ ꓐ ꓡ ꓟ ꓑꓶ ꓓꓴ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓙꓵꓻ ꓠꓲ, ꓠꓬ ꓮ ꓕꓯ ꓟꓶ ꓓ_ ꓡ ꓐꓯ ꓠꓬ ꓪꓴ‐ꓢ ꓚꓲ ꓛꓬ ꓡꓰ ꓐꓰ ꓖꓶ ꓡ ꓕꓯ ꓪꓴ‐ꓢ ꓚꓲ ꓛꓬ ꓡꓰ ꓐꓰ ꓒꓶ ꓟ. ꓖꓶ ꓡ ꓕꓯ ꓙꓵꓻ ꓠꓲ, ꓔꓯ ꓟꓶ ꓡ ꓟ ꓥ ꓡꓳ꓿ ꓕꓱ ꓟ ꓑꓶ ꓓꓴ ꓠꓬꓲ. ꓠꓬꓲ ꓣꓳ ꓙꓵꓻ ꓠꓲ, ꓠꓬ ꓮ ꓗꓪ ꓟꓶ ꓓ_ ꓡ ꓐꓯ ꓠꓬ ꓪꓴ‐ꓢ ꓡꓰ ꓟ. ꓖꓶ_ ꓟ ꓟ. ꓟꓲꓽ ꓪꓴ‐ꓢ ꓡꓰ ꓐꓰ ꓐꓯ ꓖꓶ ꓡ ꓟ ꓘꓴ ꓜꓲꓼ ꓞꓳ ꓗꓪ ꓐꓰ ꓣꓳ ꓙꓵꓻ ꓠꓲ, ꓣꓱ ꓛꓰ ꓔꓯ ꓟꓶ ꓓ_ ꓥꓳ꓾ꓙꓵꓻ ꓠꓲ, ꓠꓬ ꓪꓴ‐ꓢ ꓖꓶ ꓡ ꓟ ꓣꓱ ꓛꓰ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓣꓳ ꓮ ꓙꓵ ꓥ ꓟꓲ ꓪꓴ‐ꓢ ꓡꓰ ꓒꓶ ꓟ. ꓖꓶ ꓡ ꓟ ꓪꓴ‐ꓢ ꓔꓱ, ꓚꓵ_ ꓟ ꓪꓴ‐ꓢ ꓬꓲ ꓒꓲ ꓕꓯ ꓣꓳ ꓠꓱ. ꓐꓯꓼ ꓟꓽ ꓢꓷ. ꓡꓰ ꓢꓴ ꓔꓯ ꓣꓳ ꓐꓯ ꓟ. ꓖꓶ ꓠ, ꓟ ꓣꓳ ꓪꓴ‐ꓢ ꓦ ꓡꓱ ꓢꓴ ꓣꓳ ꓶꓻ ꓙꓳ_ ꓡꓳ꓿ ꓣꓳ ꓮ ꓙꓵ ꓙꓵꓻ ꓠꓲ, ꓔꓯ ꓐꓯ ꓒꓬꓱ ꓡꓯ꓾ ꓣꓳ ꓔꓯ ꓖꓶ ꓡ ꓟ ꓪꓴ‐ꓢ ꓡꓰ ꓒꓶ ꓟ. ꓖꓶ ꓡ ꓟ ꓐꓱ ꓶ ꓥ ꓟꓲ ꓣꓳ ꓪꓴ‐ꓢ ꓔꓯ ꓫ ꓟꓳ ꓓꓴ ꓥ ꓡꓳ꓿