ꓧꓪ. ꓧꓪꓸꓼ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓡꓳ. ꓠꓬꓲˍ ꓕꓯ ꓪꓴ‐ꓢ ꓠꓬ ꓫ. ꓢꓴ ꓟꓷꓼ ꓢꓴ ꓔꓯ ꓬꓰ ꓙˍ ꓟ꓾ ꓢꓯꓼ ꓐꓽ ꓢꓴ ꓔꓯ ꓔꓳ, ꓙ ꓖꓶˍ ꓟ꓾ ꓠꓬꓲ. ꓞ, ꓢꓴ ꓕꓲ ꓛꓱꓽ ꓗꓪ ꓦꓰꓼ ꓞ, ꓖꓶˍ ꓟ ꓕꓱ ꓡꓱ ꓫꓵꓽ ꓡꓳ. ꓟꓳˍ ꓡꓳ꓿ ꓪꓴ‐ꓢ ꓚꓱ, ꓠꓬ ꓞꓳ ꓤ ꓚꓱ, ꓐꓰ ꓟꓽ ꓪꓽ ꓡꓯ ꓘꓳ꓿ ꓣꓳ ꓞꓳ ꓤ ꓐꓴ ꓔꓯ ꓠꓬ ꓒꓴ ꓙꓳ ꓢꓴ ꓫꓵꓺ ꓙꓳ ꓢꓴ꓾ ꓙꓵꓽ ꓪ ꓙꓳ ꓢꓴ꓾ ꓢꓯꓼ ꓙꓳ ꓪꓽ ꓠꓬꓲ ꓢꓴ ꓔꓯ ꓡꓰꓽ ꓣꓳ ꓠꓬ ꓔ, ꓠꓲ, ꓫꓵˍ ꓡꓳ꓿
ꓮ ꓡꓲꓳ ꓐꓯˍ ꓠꓬ ꓬꓲ ꓪ ꓣꓳ ꓔꓯ ꓬꓰ ꓙ ꓡ ꓠ, ꓟ ꓐꓱ ꓶ ꓥ ꓠꓬ ꓬꓲ ꓪ ꓔꓯ ꓦ ꓡꓱ ꓠ, ꓟ ꓐꓱ ꓶ꓾ ꓕꓱ ꓡꓱ ꓫꓵꓽ ꓢꓷ. ꓠꓲ, ꓙꓳ ꓙꓵꓽ ꓪ ꓙꓳ ꓒꓴ ꓙꓳ ꓫꓵ ꓙꓳ ꓢꓴ ꓔꓯˍ ꓡꓰꓽ ꓞꓳ ꓤ ꓠꓬ ꓔ, ꓠꓲ, ꓫꓵˍ ꓡꓳ꓿ ꓬꓰ ꓙ ꓠꓲ, ꓫꓵˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓪꓴ‐ꓢ ꓚꓱ, ꓠꓬ ꓪꓴ‐ꓢ ꓚꓱ, ꓠꓬ ꓫ. ꓢꓴ ꓟꓷꓼ ꓢꓴ ꓢꓯꓼ ꓐꓽ ꓢꓴ꓾ ꓪꓴꓽ ꓧꓶ ꓢꓴ꓾ ꓮ ꓫꓵꓽˍ ꓟꓲ ꓬꓰ ꓟꓽ ꓐ ꓡ ꓢꓴ꓾ ꓠꓬꓲ. ꓞ, ꓟ ꓟꓶ ꓢꓴ ꓕꓲ ꓛꓱꓽ ꓗꓪ ꓬꓲ ꓠꓬ ꓦꓰꓼ ꓞ, ꓡˍ ꓡꓳ꓿
ꓢ. ꓠꓯ (4) ꓠꓽ ꓕꓲ ꓠꓽ ꓢꓲ ꓒ ꓦꓬꓼ ꓠꓬꓲ ꓗꓪ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ꓾ (ꓟ‐ꓕꓲ 5ꓽ1‐12) ꓥ ꓡꓳ꓿ ꓪꓴ‐ꓢ ꓠꓬ ꓣꓳ ꓔꓯ ꓮ ꓡꓲ ꓫꓵꓽ ꓬꓰˍ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ ꓐꓯˍ ꓟ ꓐꓯ ꓟꓳ. ꓖꓶ ꓡˍ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓡꓳ. ꓠꓬꓲˍ ꓕꓯ꓾ “ꓦ ꓗꓪ ꓞꓳ ꓫ. ꓥ ꓟ ꓚꓬ, ꓪ ꓢꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓠꓲ, ꓥꓴ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓠꓲ, ꓟ ꓠꓴꓽ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓙꓲ ꓫꓬˍ ꓟ ꓔꓯ ꓟꓷꓼ ꓢꓲꓼ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓢꓴ ꓔꓯ ꓫꓱ. ꓤˍ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓠꓲ, ꓟ ꓢꓲꓽ ꓫꓬˍ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓢꓴ ꓔꓯ ꓧꓳ, ꓡꓯ ꓘꓳ ꓝꓲ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿
Jꓲꓻ ꓫꓬˍ ꓟ ꓪꓴ. ꓠꓬꓲ ꓗ. ꓧꓪˍ ꓟ ꓟꓶ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓥꓪ ꓪꓴ. ꓠꓬꓲ ꓢꓴ ꓡꓰ ꓠꓴ ꓔꓯ ꓫ. ꓚꓲ.꓾ ꓠꓴ ꓔꓯ ꓗ. ꓧꓪ꓾ ꓝꓮꓲ ꓠꓴ ꓔꓯ ꓥꓶˍ ꓟ ꓬꓲ ꓫꓵꓽ ꓬꓲ ꓙꓰꓽ ꓐꓯ ꓡ ꓠꓬ ꓠꓴ ꓪ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ꓾” ꓐꓰ ꓐꓯ ꓔ ꓡꓳ꓿
ꓢꓲ ꓒ ꓬꓰ‐ꓢꓴ ꓬꓲ ꓶꓼ ꓘꓶꓽ ꓫꓱ, ꓘꓶꓽ ꓠꓬ ꓟꓲ ꓠꓯ ꓚꓱ, ꓗꓪ ꓚꓳ. ꓓꓵꓽ ꓙˍ ꓠꓬ ꓮ ꓡꓲ ꓓꓵꓽ ꓙ ꓠꓬꓲˍ ꓟꓲ ꓶꓼ ꓙꓳ ꓫꓱ, ꓙꓳˍ ꓟ ꓟꓽ ꓥ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓾ ꓕꓱ ꓟ ꓠꓽ ꓟꓽ ꓢꓻ ꓟ ꓡꓰꓽ ꓟꓽ ꓞꓲꓺ ꓚꓵ ꓚꓵ ꓣꓳ ꓤꓶꓻ ꓐꓱ ꓶ ꓢꓯꓼ ꓕꓵꓼ ꓠ ꓔˍ ꓟ ꓚꓵ ꓚꓵ ꓫ. ꓟ ꓚꓱ, ꓕꓲ ꓚꓱ, ꓥ ꓡꓳ꓿ ꓞꓳ ꓫ. ꓐꓴ ꓶꓼ ꓙꓳ ꓫꓱ, ꓙꓳˍ ꓐꓯˍ ꓟ ꓠꓬ ꓮ ꓫꓵꓽ ꓬꓲ. ꓬꓲ ꓢꓲ ꓥ ꓡ꓿
ꓥ ꓡꓳ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓔꓯ ꓣꓳ ꓜꓳꓽ ꓜꓳꓽ ꓡꓳ. ꓠꓬꓲˍ ꓕꓯ ꓪꓴ‐ꓢ ꓐꓯ ꓠꓲ, ꓫꓵˍ ꓟ ꓔꓯ ꓠꓬ ꓣꓳ ꓫꓬꓽ ꓫꓬꓽ ꓡꓰꓽ ꓟꓳꓻ ꓓ, ꓡꓳ꓿ ꓪꓴ‐ꓢ ꓠꓬ ꓫ. ꓙꓵ ꓟꓷꓼ ꓙꓵ ꓢꓴ ꓒ ꓕꓲꓺ ꓗꓪ ꓔꓬ ꓡꓳ꓾ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓫ. ꓙꓵ ꓟꓷꓼ ꓙꓵˍ ꓕꓯ ꓓꓵꓽ ꓙꓽ ꓟꓬꓽ ꓓꓵꓽ ꓙꓽ ꓪꓴꓽ ꓓꓴ꓾ ꓮ ꓡꓲ ꓗꓪ ꓡꓰ. ꓦ ꓡꓱ ꓖꓴ ꓟꓽ ꓙꓳ ꓢꓴ ꓒ ꓕꓲꓺ ꓗꓪ ꓮ ꓕꓯ ꓥ ꓟꓲ ꓪꓴ‐ꓢ ꓠꓬ ꓒ ꓕꓲꓺ ꓔꓬ ꓡꓳ꓿ ꓬꓲ ꓔꓯ ꓘꓴˍ ꓕꓯ ꓬꓲ ꓠꓬ ꓓꓽ ꓔꓳ, ꓡꓳ꓾ ꓐꓯˍ ꓟ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿
ꓖꓳ ꓡꓱ ꓠꓬꓲ ꓫ. ꓢꓴ ꓟꓷꓼ ꓢꓴ ꓒ ꓕꓲꓺ ꓗꓪ ꓪꓴ‐ꓢ ꓔꓬ ꓟ ꓬꓲ ꓔꓶ ꓙꓱꓼ ꓠꓬ꓾ ꓞꓳ ꓫ. ꓐꓴ ꓬꓲ ꓪ ꓦ ꓡꓱ ꓖꓴ ꓠꓬ ꓪꓴ‐ꓢ ꓕꓲ ꓣꓳˍ ꓡꓰꓽ ꓙꓳˍ ꓡꓳ꓿ ꓬꓲ ꓪ ꓠꓬ ꓒꓴ ꓫꓵ ꓟꓽ ꓙꓳ꓾ ꓢꓷ. ꓠꓲ, ꓟꓽ ꓙꓳ꓾ ꓢꓯꓼ ꓪ ꓟꓽ ꓙꓳ ꓟ ꓑꓶ. ꓓꓴ ꓮ ꓡꓲ ꓗꓪˍ ꓟꓲ ꓦ ꓡꓱ ꓟꓽ ꓠ꓿ ꓬꓲ ꓪ ꓦ ꓡꓱ ꓖꓴ ꓠꓬ ꓪꓴ‐ꓢ ꓕꓲ ꓣꓳˍ ꓡꓰꓽ ꓙꓳˍ ꓡꓳ꓿ ꓖꓳ ꓡꓱ ꓠꓬꓲ ꓪꓴ‐ꓢ ꓬꓲ ꓪ ꓒ ꓕꓲꓺ ꓗꓪ ꓔꓬ ꓡꓳ꓿ ꓮ ꓫꓵꓽ ꓥˍ ꓟꓲ ꓬꓲ ꓪ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓔꓽ ꓪꓴꓽ ꓖꓴ꓾ ꓬꓲ ꓪ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓢꓯꓼ ꓦ ꓖꓴ ꓠꓽ ꓪꓴ‐ꓢ ꓕꓲ ꓣꓳˍ ꓡꓰꓽ ꓙꓳˍ ꓟ ꓑꓶ. ꓓꓴ ꓪꓴ‐ꓢ ꓠꓬ ꓬꓲ ꓪ ꓒ ꓕꓲꓺ ꓗꓪ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓞꓳ ꓫ. ꓒ ꓕꓲꓺ ꓗꓪ ꓡꓰꓽ ꓪꓴ‐ꓢ ꓔꓬ ꓡ꓾ ꓐꓰ ꓠꓺ ꓠꓬꓲ ꓓꓴ ꓙꓳˍ ꓡꓳ꓿ ꓖꓳ ꓡꓱ ꓟꓽ ꓥ꓿
