ꓪꓴ-ꓢ ꓠꓬ ꓠꓵ ꓠꓲꓹ ꓥ ꓐꓯ ꓔꓬ ꓥˍꓟꓲ ꓮ ꓫꓵꓽ ꓪꓴꓸ ꓠꓬꓲ ꓠꓲꓹ ꓫꓸ ꓟꓬ ꓫꓸ ꓓꓴ ꓙꓳ ꓔꓬ ꓡ꓾ ꓐꓯˍꓟ ꓚꓱꓹ
ꓪꓴ-ꓢ ꓠꓬ ꓮ ꓠꓱ ꓞꓳ ꓤ ꓔꓯ ꓚꓰꓼ ꓕꓯ ꓠꓬ ꓞꓳ ꓤ ꓐꓴ ꓫꓸ ꓡꓰ ꓠꓹ ꓟ ꓓꓵ ꓙ ꓢꓲ꓾ ꓮ ꓫꓵꓼ ꓔꓯ ꓟꓲ ꓟꓽ ꓚꓰꓼ ꓔ꓾ ꓮꓽ ꓙꓵꓹ ꓠꓬ ꓙꓲˍꓡꓳ ꓐꓰ ꓐꓯ ꓢꓲ꓾ ꓚꓰꓼ ꓔꓽ ꓟ ꓥ ꓡꓳ= ꓮ ꓠꓱ ꓕꓯ ꓠꓬ ꓮꓽ ꓓꓰ ꓗꓹ ꓛꓲ ꓟ ꓥ ꓡꓳ= ꓮ-ꓓꓯ ꓐꓰ ꓰ-ꓪ꓾ꓠꓬ ꓪꓴ-ꓢ ꓐꓯ ꓖꓶ ꓔꓯ ꓠꓽ ꓡꓳꓸ ꓢꓲ꓾ ꓠꓬ ꓮ ꓓꓰ ꓗꓹ ꓛꓲ ꓠꓽ ꓔꓬ ꓗꓷ ꓟ ꓥ ꓡꓳ= ꓖꓳ ꓡꓰ ꓐꓯ ꓥˍꓟꓲ ꓮ-ꓓꓯ ꓐꓰ ꓰ-ꓪ꓾ ꓠꓬ ꓪꓴ-ꓢ ꓐꓯ ꓖꓶ ꓟꓽ ꓠꓽ ꓠ ꓗꓷ ꓗꓸ ꓠꓯ꓾ ꓝꓮꓲ ꓐꓯˍꓟ ꓟꓲ ꓠꓯ ꓕꓱ ꓟ ꓘꓴ ꓗꓪ ꓓꓵ ꓡ ꓡꓳ=
ꓞꓳ ꓤ ꓠꓬ ꓪꓴ-ꓢ ꓔꓯ ꓒꓳꓹ ꓔꓳ ꓡ ꓔꓬ ꓡꓳ= ꓟꓲ ꓠꓯ ꓕꓱ ꓟ ꓠꓯˍ ꓘꓴ ꓗꓪ ꓠꓬ ꓫꓸ ꓓꓵ ꓟꓬ ꓓꓴ ꓕꓱ ꓡꓱ ꓕꓳꓼ ꓜꓳꓼ ꓡ ꓔꓬ ꓟ ꓥ ꓡꓳ= ꓕꓱ ꓟ ꓠꓬ ꓪꓴ-ꓢ ꓠꓲꓸꓹ ꓡꓶ ꓟꓽ ꓥ꓾ꓬꓲ ꓠꓬ ꓣꓳ ꓔꓯ ꓫꓱꓹ ꓤ ꓡꓳ꓾ ꓣꓳ ꓔꓯ ꓠꓲꓸꓹ ꓠꓵ ꓡꓳ꓾ ꓫꓱꓹ ꓤ ꓡꓳ꓾ ꓖꓳ ꓡꓰ ꓥˍꓟꓲ ꓣꓳ ꓝꓮꓲ ꓬꓰ ꓗꓷ ꓟ ꓑꓶꓸ ꓓꓴ ꓣꓳ ꓟꓽ ꓙꓵ ꓟ ꓟꓽ ꓜꓳ ꓟ ꓙꓳ ꓟ ꓟꓲ ꓠꓯ ꓕꓱ ꓟ ꓗꓪ ꓢꓯꓼ ꓔꓬ ꓪ ꓟ ꓡꓰ ꓐꓰ ꓕꓲ ꓡꓲꓽ ꓗꓷ ꓔꓬ ꓡꓳ=
ꓕꓯ ꓥꓳꓽ ꓕꓲ ꓟ ꓐꓯˍꓠꓬ ꓬꓲꓸꓹꓡꓳ ꓐꓱ ꓕꓲ ꓟ ꓗꓪ ꓥꓪꓽ ꓠꓬ ꓮ ꓘꓶꓸ ꓗꓸ ꓛꓲ ꓠꓽ ꓔꓬ ꓡꓳ꓾ ꓖꓳ ꓡꓰ ꓐꓯ ꓥˍꓟꓲ ꓟꓶ ꓫꓵꓽ ꓡ ꓕꓯ ꓠꓬ ꓬꓲꓸꓹ ꓙꓬ ꓠꓬ ꓠꓶꓼ ꓡ ꓢꓲ꓾ꓥꓪꓽ ꓮ ꓙꓵ ꓥˍꓟꓲ ꓬꓲꓸꓹ ꓙꓬ ꓠꓶꓼ ꓟ ꓘꓴ ꓗꓪ ꓔꓬ ꓪ ꓡꓳ= ꓕꓱ ꓟ ꓡꓰ ꓐꓰ ꓟꓲ ꓠꓯ ꓕꓱ ꓟ ꓗꓪ ꓝꓮꓲ ꓐꓯˍꓟ ꓓꓵ ꓡ ꓟ ꓑꓶꓸ ꓓꓴ ꓟꓽ ꓙꓵ ꓢꓴ ꓐꓴ ꓐꓰ ꓕꓲ ꓠꓲꓹ ꓕꓲ ꓪ ꓔꓬ ꓠꓽ ꓗꓷ ꓡꓰ ꓟ ꓥ ꓡꓳ= ꓬꓲ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓗꓪ ꓢꓯꓼ ꓔꓬ ꓟ ꓕꓲ ꓑ ꓤ ꓗꓪ ꓠꓲꓸꓹ ꓫꓸ ꓟꓬ ꓫꓸ ꓓꓴ ꓠꓬ ꓮ ꓕꓯ ꓥˍꓟꓲ ꓕꓳꓼ ꓜꓳꓼ ꓡ ꓓꓴ ꓥꓳ꓾ ꓖꓳ ꓡꓰ ꓐꓯ ꓥˍꓟꓲ ꓠꓲꓸꓹ ꓟ ꓕ ꓫꓸ ꓕꓱ ꓟ ꓠꓬ ꓪꓴ-ꓢ ꓣꓳ ꓔꓯ ꓡꓳꓸ ꓗꓷ ꓟ ꓟꓽ ꓥ꓾ ꓬꓲ ꓠꓬ ꓣꓳ ꓐꓰ ꓮꓽ ꓕꓯ ꓥˍꓟꓲ ꓞꓳ ꓙꓳ ꓔꓬ ꓡꓳ= ꓣꓳ ꓠꓬ ꓟꓽ ꓙꓵ ꓟꓽ ꓜꓳ ꓢꓴ ꓐꓴ ꓠꓯꓼˍꓗꓪ ꓔꓬ ꓥˍꓟꓲ ꓬꓲ ꓠꓵ ꓠꓲꓸꓹ ꓡꓰ ꓣꓳ ꓔꓯ ꓡꓳꓸ ꓙ ꓖꓶ ꓔꓬ ꓡꓳ꓾ ꓐꓯˍꓟ ꓔꓯ ꓙꓵꓽ ꓢꓲ꓾ ꓢꓯꓼ ꓕꓵꓼ ꓓꓴ ꓬꓰ ꓡꓯ=
