ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓟ ꓚꓱ, (Church history)
ꓧꓪ. ꓧꓪ.ꓼ ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓚꓺ ꓟꓲꓽ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓟ ꓚꓱ, ꓔꓯ ꓣꓳ ꓡꓳ. ꓠꓬꓲ ꓓꓴ ꓬꓰ ꓡꓯ꓿ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓥ ꓟ ꓢꓲꓽ ꓫꓬ ꓕꓳ ꓶ ꓐꓳ ꓒꓽ ꓝꓲ ꓓꓴ ꓬꓳ‐ꓦ ꓠꓬ ꓙꓱ‐ꓣꓴ‐ꓢ ꓡꓱ ꓡꓳ ꓒꓱ ꓗꓪ ꓔꓬ ꓗꓷ ꓟ ꓥ ꓡꓳ꓿ ꓝꓲ ꓓꓴ ꓬꓳ‐ꓦ ꓠꓬ ꓢꓲꓺ ꓒ ꓬꓰ‐ꓢꓴ ꓟ, ꓟ ꓥ ꓟ ꓟ‐ꓡꓲ ꓔꓯ ꓡꓳ. ꓙ ꓠꓬꓲ ꓙ ꓢꓲ ꓠꓬꓲ ꓙꓱ‐ꓣꓴ‐ꓢ‐ꓡꓱ ꓡꓳ ꓒꓱ ꓗꓪ ꓟ, ꓟ ꓟ‐ꓡꓲ ꓫꓵꓻ ꓗꓪ ꓛꓲ ꓢꓯ. ꓔꓬ ꓗꓷ ꓟ ꓥ ꓡꓳ꓿
ꓖꓳ ꓗ. ꓠꓯ ꓝꓲ ꓓꓴ ꓬꓳ‐ꓦ ꓠꓬ ꓬꓲ‐ꓩꓴ‐ꓢꓳ ꓡꓳ ꓒꓱ ꓗꓪ ꓔꓲꓺ ꓒ ꓓꓽ ꓙꓵꓽ ꓪ ꓘꓳ, ꓣꓴ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓟꓯ ꓗꓷ ꓟ ꓥ ꓡꓳ꓿ ꓝꓲ ꓓꓴ ꓬꓳ‐ꓦ ꓔꓯ ꓮ ꓘꓶ. ꓛꓲ ꓞꓻ ꓟ ꓮ. ꓔꓳ ꓐꓬꓱ ꓗꓪ ꓗꓶ ꓗꓷ ꓥ ꓟ ꓢꓲꓺ ꓒ ꓡꓰ ꓬꓰ ꓙ ꓟ ꓪꓴ. ꓠꓬꓲ ꓟꓽ ꓫꓵꓻ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓣꓳ‐ꓟ ꓗꓴꓷꓼ ꓗꓪ ꓪ ꓔꓲ ꓓꓳꓟꓲꓔꓲꓮ ꓠꓬ ꓪ ꓔꓲ ꓙꓵꓽ ꓟ ꓙꓵ, ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓫꓵꓽ ꓪꓴꓽ ꓮ ꓘꓶ. ꓛꓲ ꓖꓶ ꓢꓲ ꓠꓬꓲ ꓢꓰꓼ ꓟ ꓙꓵ, ꓟꓲ ꓥ ꓡꓳ꓿ ꓬꓲ ꓔꓯ ꓑꓮꓟꓳꓢ ꓟꓬꓱꓺ ꓟ ꓟꓵꓽ ꓗꓪ ꓔꓬ ꓝꓲ ꓟ ꓥ ꓡꓳ꓿ ꓖꓳ ꓗꓪ ꓬꓲ ꓠꓬ ꓢꓲꓽ ꓫꓬ ꓕꓳ ꓶ ꓮ ꓟꓬ, ꓐꓳ ꓗꓷ ꓟ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓐꓳ ꓒꓽ ꓝꓲ ꓓꓴ ꓬꓳ‐ꓦ ꓠꓬ ꓬꓲ‐ꓩꓴ‐ꓢꓳ ꓡꓳ ꓒꓱ ꓗꓪ ꓮꓓ (100) ꓘꓳꓼ ꓕꓯ ꓢꓲꓺ ꓒ ꓠꓯ, ꓗꓪ ꓬꓯꓼ ꓟꓶ ꓡꓰ ꓟ ꓥ ꓡꓳ꓿
ꓝꓲ ꓓꓴ ꓬꓳ‐ꓦ ꓢꓲꓺ ꓒ ꓠꓯ, ꓗꓪ ꓬꓯꓼ ꓟꓶ ꓗ. ꓠꓯ ꓝꓲ ꓓꓴ ꓬ‐ꓗꓴ ꓠꓬ ꓙꓱ‐ꓣꓴ‐ꓢ‐ꓡꓱ ꓗꓪ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓒꓬꓱꓼ ꓡ ꓗꓷꓳ꓿ ꓝꓲ ꓓꓴ ꓬ‐ꓗꓴ ꓠꓬ ꓪꓴ‐ꓢ ꓐꓰ ꓮ ꓕꓯ ꓥ ꓟꓲ ꓙ ꓡꓯꓽ ꓘꓳ, ꓢꓲ ꓠꓬꓲ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓮ ꓕꓯ ꓥ ꓟꓲ ꓚꓺ ꓢꓴ ꓕꓲ ꓣꓳ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓝꓲ ꓓꓴ ꓬ‐ꓗꓴ ꓡꓰ ꓘꓴ ꓜꓲꓼ ꓞꓳ ꓠꓯ, ꓗꓪ ꓮ ꓡꓰ ꓐꓰ ꓔꓬ ꓠ, ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓟ. ꓖꓶ ꓢꓲꓽ ꓫꓬ ꓕꓳ ꓶ ꓔꓯ ꓥ ꓟꓲ ꓐꓳ ꓖꓶ ꓟ ꓥ ꓡꓳ꓿
ꓝꓲ ꓓꓴ ꓒꓳ‐ꓡꓳ ꓠꓬ ꓗꓴꓷꓼ ꓙꓵꓽ ꓢꓴ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓣꓳ‐ꓟ ꓡꓳ ꓒꓱ ꓗꓪ ꓞꓳ ꓧꓳ ꓙꓰ ꓗ. ꓠꓯ ꓮ ꓟꓶ ꓫꓵˍ ꓟ ꓙꓵ, ꓕꓯ ꓝꓲ ꓓꓴ ꓒꓳ‐ꓡꓳ ꓔꓯ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓢꓰꓼ ꓗꓷ ꓟ ꓥ ꓡꓳ꓿
ꓢꓲꓽ ꓫꓬ ꓕꓳ ꓶ ꓐꓳ ꓒꓽ ꓝꓲ ꓓꓴ ꓟ‐ꓕꓲ ꓠꓬ ꓬꓴ‐ꓔ ꓞꓳ ꓫꓵꓽ ꓔꓯ ꓓꓽ ꓪꓴ. ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓟ ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓬꓲ ꓪꓴ. ꓚꓺ ꓟ. ꓖꓶ ꓢꓴ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓬꓲ ꓠꓬ ꓬꓴ‐ꓔ ꓥꓳꓽ ꓫꓵꓽ ꓗꓪ ꓐꓰ ꓢꓲꓽ ꓫꓬ ꓕꓳ ꓶ ꓔꓯ ꓐꓳ ꓖꓶ ꓗꓷ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓝꓲ ꓓꓴ ꓐꓴ ꓠꓬ ꓟꓵꓽ ꓗꓳ ꓓꓵ ꓓꓵ ꓗꓪ ꓙꓰ ꓢꓲ ꓠꓬꓲ ꓞꓳ ꓫꓵꓽ ꓞꓳ ꓙꓱ ꓮ ꓙꓵꓽ ꓔꓯ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓟ. ꓖꓶ ꓗꓷ ꓟ ꓪꓴ. ꓠꓬꓲ ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓟꓬ, ꓔꓯ ꓡꓳ. ꓟꓳ ꓓꓽ ꓟꓲ ꓥ ꓡꓳ꓿
