ꓟꓬ‐ꓟ ꓥꓳꓽ ꓗꓪ ꓚꓳ. ꓬꓰˍ ꓟ Radio Veritas Asia (RVA) ꓜꓴ ꓠꓬ ꓠꓽ ꓦꓬꓼ ꓠꓬꓲ ꓕꓯ ꓣꓦꓮ ꓢꓯꓼ ꓠ ꓠ, ꓔꓬ ꓢꓴ ꓐꓴ ꓔꓯ ꓝꓮꓲ ꓕꓲ ꓧꓪ, ꓜꓲꓼ ꓡꓳꓽ ꓖꓶˍ ꓟ ꓑꓮꓲꓽ ꓔꓯ ꓬꓰ ꓗꓷꓳ꓿ ꓠꓻ ꓫꓵꓽ ꓠꓻ ꓙꓰꓽ꓾ ꓗꓴꓷꓼ ꓫꓵꓽ ꓪꓴ ꓐꓰ ꓟꓵꓽ ꓙꓴꓽ ꓓꓽ ꓟ ꓚꓵ, ꓗꓷ ꓗ ꓠꓯ. ꓝꓮꓲ ꓕꓲ ꓧꓪ, ꓬꓰ ꓗꓷ ꓟ ꓥ ꓢꓲ ꓠꓬꓲ꓾ ꓣꓦꓮ ꓟꓬꓱꓽ ꓔꓯ ꓝ. ꓢꓲ ꓣꓱꓽ ꓬꓰ ꓐ ꓡ ꓠ, ꓟ ꓐꓱ ꓶ ꓚꓲ. ꓟꓶ ꓓꓴ ꓕꓲ ꓟ ꓥ ꓡꓳ꓿

1 ꓦ 18 ꓠꓬꓲ ꓕꓯ ꓬꓰ‐ꓢꓴ ꓫꓵꓺ ꓠꓲ, ꓟ (Sacred Heart Cathedral) ꓪꓽ ꓘꓴ ꓦꓲ ꓗꓪ ꓬꓰˍ ꓟ ꓣꓦꓮ ꓓꓮꓬ ꓐꓰ ꓫ. ꓟꓳ ꓪꓽ ꓘꓴˍ ꓟ ꓔꓯ ꓟ‐ꓓ‐ꓡꓰ, ꓢꓽ‐ꓢꓶ‐ꓠ ꓙꓵꓽ ꓔꓲꓺ ꓒ ꓓꓽ Markco Tin Win ꓡꓰ ꓧꓳꓽ ꓪꓴ. ꓟꓴ ꓗꓷꓳ꓿ ꓕꓱ ꓟ ꓠꓬ ꓮ ꓟꓬ, ꓘꓳꓼ ꓟꓶ ꓫꓵ ꓡꓰ ꓗ ꓠꓯ. ꓝꓮꓲ ꓕꓲ ꓧꓪ, ꓜꓲ ꓡꓯ ꓘꓳˍ ꓟ ꓣꓦꓮ ꓐꓰ ꓠ ꓠ, ꓢꓴ ꓐꓴ ꓐꓱ ꓶ ꓚꓲ. ꓟꓶ ꓓꓴ ꓗꓷ ꓡꓰꓳ꓿

“2019 ꓘꓳꓼ ꓕꓯ ꓡꓰ ꓚꓳꓦꓲꓓ‐19 ꓠꓻ ꓫꓵꓽ ꓦꓬꓼ ꓠꓬꓲ ꓐꓰ ꓠꓱ. ꓐꓯ ꓘꓶꓻ ꓡꓶ ꓓꓴ ꓬꓲ ꓫꓵꓽ ꓬꓲ ꓙꓰꓽ ꓑꓶ. ꓓꓴ ꓠ ꓠ, ꓢꓴ ꓐꓴ ꓐꓰ ꓜꓲ ꓡꓯ ꓘꓳ ꓟꓽ ꓐ ꓡ ꓗꓷ ꓡꓰꓳ”꓾ ꓐꓰ ꓟꓬ‐ꓟ ꓥꓳꓽ ꓗꓪ ꓐꓰ ꓐꓯ ꓑꓶ ꓔꓬ ꓟ ꓣꓦꓮ ꓗꓪ ꓧꓳꓽ ꓣꓱꓽ ꓢꓴ ꓔꓲꓺ ꓒ Peter Kyi Maung ꓡꓰ ꓐꓯ ꓗꓷꓳ꓿ ꓣꓦꓮ ꓜꓴ ꓕꓱ ꓟ ꓔꓯ ꓬꓰ ꓙ ꓔꓳ, ꓙ ꓢꓴ ꓐꓴ ꓐꓰ ꓜꓴ ꓕꓱ ꓟ ꓗꓪ ꓟꓬꓱꓽ ꓬꓰ ꓔꓬ ꓢꓴ ꓮ ꓙꓵꓽ ꓔꓯ ꓫ. ꓟꓳˍ ꓟ ꓫ. ꓕꓱ ꓗꓷꓳ꓿

ꓔꓲꓺ ꓒ ꓓꓽ Markco ꓬꓲ ꓫ. ꓕꓱˍ ꓟ ꓗꓪ ꓮ ꓟꓶ ꓫ. ꓙꓵ ꓟꓷꓼ ꓙꓵ ꓓꓴ ꓔꓳ, ꓜꓳꓽ ꓔꓬ ꓟ ꓦꓬꓼ ꓠꓬꓲ ꓗꓪ ꓙꓵꓻ ꓠꓲ, ꓔꓯ ꓟꓬꓽ ꓠꓬꓲ ꓪꓴꓽ ꓡ ꓝꓲ ꓠ, ꓟ ꓕꓵꓼ ꓪ ꓖꓶ ꓗꓷꓳ꓿ “ꓪꓴ‐ꓢ ꓕꓲ ꓣꓳˍ ꓡꓰꓽ ꓣꓳ ꓠꓲ, ꓫ. ꓓꓴ ꓔꓯ ꓧꓪ. ꓡꓰ ꓠ ꓬꓰ ꓙ ꓖꓶ ꓐ ꓡˍ ꓡꓳ꓾ ꓐꓯˍ ꓟ ꓔꓯ ꓢꓷ. ꓢꓲ ꓣꓳ ꓙꓵꓻ ꓠꓲ, ꓔꓯ ꓪꓴꓽ ꓡ ꓝꓲ ꓠ ꓗ, ꓡꓳ꓾” ꓐꓰ ꓐꓯ ꓗꓷꓳ꓿

ꓣꓦꓮ ꓟꓬ‐ꓟ ꓢꓯꓼ ꓔꓯ ꓠ ꓠ, ꓢꓴ Auntie Mary ꓡꓰ꓾ ꓣꓮꓓꓲꓳ ꓦꓬꓼ ꓠꓬꓲ ꓕꓯ ꓕꓳꓽ ꓶ ꓗꓪ ꓚꓳ. ꓐꓳ ꓩꓴˍ ꓟ꓾ ꓙꓻ ꓡꓯ ꓘꓳ ꓘꓳˍ ꓟ ꓚꓱ, ꓔꓯ ꓐꓯ ꓟ. ꓖꓶ ꓗꓷꓳ꓿ “ꓣꓦꓮ ꓔꓯ ꓠ ꓠ, ꓟ ꓠꓬ ꓥꓪ ꓔꓯ ꓢꓯꓼ ꓪ ꓮ ꓟꓬ, ꓖꓶˍ ꓡꓳ” ꓐꓰ ꓐꓯ ꓗꓷ ꓢꓲ ꓬꓲ ꓮ. ꓟꓲꓽ ꓠꓬ ꓠꓱ. ꓐꓯ ꓗꓴꓷꓼ ꓗꓪ ꓔꓬ ꓢꓲ ꓪꓽ ꓘꓴ ꓦꓲ ꓗꓪ ꓙꓰ ꓟꓽ ꓐ ꓡ ꓕꓯ ꓣꓦꓮ ꓳꓠꓡꓲꓠꓰ ꓗꓪ ꓚꓳ. ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓡꓳ꓾ ꓐꓰ ꓬꓲ ꓡꓰ ꓐꓯˍ ꓡꓳ꓿

ꓣꓦꓮ ꓢꓯꓼ ꓔꓯ ꓠ ꓠ, ꓢꓴ ꓝꓮꓲ ꓕꓲ ꓣꓳ ꓥ ꓟ Collette Tun Lwin Oo ꓠꓬ 2005 ꓘꓳꓼ ꓕꓯ ꓡꓰ ꓣꓦꓮ ꓢꓯꓼ ꓔꓯ ꓠ ꓠ, ꓩꓴ ꓡ ꓢꓴ ꓥ ꓢꓲ ꓞꓳ ꓡꓱ ꓐꓴ ꓐꓱ ꓶ ꓢꓷ. ꓙ ꓟꓳ ꓙ ꓚꓱ, ꓐꓴ ꓔꓯ ꓬꓲ ꓡꓰ ꓓꓳ ꓟꓴ, ꓗꓷꓳ꓿ ꓖꓳ ꓟ ꓡꓰꓽ ꓟꓽ ꓞꓲ “ꓠ, ꓠ ꓢꓴ ꓐꓴ ꓖꓶ ꓩꓴˍ ꓟ ꓕꓳꓽ ꓶ” ꓡꓰ ꓐꓰ ꓠ ꓠ, ꓢꓴ ꓐꓰ ꓟꓬꓱꓽ ꓬꓰ ꓢꓴ ꓙ ꓡꓯ ꓘꓳˍ ꓟ ꓔꓯ ꓝꓮꓲ ꓕꓲ ꓧꓪ, ꓬꓰ ꓠ, ꓟ ꓬꓲ ꓡꓰ ꓬꓲꓼ ꓠꓬꓲ. ꓖꓶ ꓗꓷꓳ꓿

ꓣꓦꓮ ꓟꓬ‐ꓟ ꓢꓰꓣꓦꓲꓚꓰ ꓔꓮ 1978 ꓘꓳꓼ ꓕꓱ ꓔꓶ ꓗꓷ ꓢꓲ 2018 ꓘꓳꓼ ꓕꓯ ꓓꓲꓖꓲꓔꓮꓡ ꓑꓡꓮꓔꓝꓳꓣꓟ ꓗꓪ ꓒꓳ, ꓡꓶ. ꓗꓷ ꓟ ꓥ ꓡꓳ꓿ 2025 ꓘꓳꓼ 3 ꓦ 28 ꓠꓬꓲ ꓕꓯ ꓬꓲ ꓢꓯꓼ ꓮ ꓘꓶ. ꓪꓴꓽˍ ꓟ ꓟꓵꓽ ꓙꓴꓽ ꓚꓵ, ꓗꓷ ꓗ ꓠꓯ. ꓫ. ꓓꓴ ꓙꓳ ꓡˍ ꓥ ꓟꓲ ꓔꓲꓺ ꓒ Peter꓾ ꓔꓲꓺ ꓟ Regina Moe Moe Khaing ꓐꓰ ꓢꓲ ꓤ 3 ꓣꓳ ꓐˍ ꓟ ꓜꓴꓻ ꓤ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟ ꓪꓴ‐ꓢ ꓐꓯ ꓘꓶꓽ꓾ ꓬꓲ ꓓꓳꓽ꓾ ꓐꓰ ꓫ. ꓕꓱˍ ꓟ ꓚꓱ, ꓐꓴ ꓔꓯ ꓳꓠꓡꓲꓠꓰ ꓗꓪ ꓚꓰ, ꓖꓶ ꓔꓬ ꓟ ꓥ ꓡꓳ꓿  

ꓣꓦꓮ ꓔꓯ 1969 ꓘꓳꓼ ꓕꓯ ꓮꓢꓲꓮ ꓗꓪ ꓟ ꓔꓲꓺ ꓒ ꓓꓽ ꓐꓴ ꓜꓴ ꓡꓰ ꓫꓬ, ꓔꓶ ꓗꓷ ꓟ ꓥ ꓢꓲ “ꓮꓢꓲꓮ ꓙꓲ‐ꓢꓴ ꓢꓲ ꓤ ꓐꓴ ꓢꓯꓼ” ꓒꓬꓱꓼ ꓠ, ꓟ ꓔꓶ ꓙꓱꓼ ꓬꓰ ꓔ ꓟ ꓥ ꓡꓳ꓿ ꓟꓬ‐ꓟ ꓢꓰꓣꓦꓲꓚꓰ ꓠꓬ ꓟꓬ‐ꓟ ꓥꓳꓽ ꓫ. ꓕꓱˍ ꓟ ꓗ‐ꓔꓳ‐ꓡꓲꓗ ꓢꓲ ꓤ ꓐꓴ ꓐꓱ ꓶ ꓦ ꓡꓱ ꓐꓳ ꓖꓴ ꓕꓲ ꓟˍ ꓡꓰ ꓐꓰ ꓝ. ꓢꓲ ꓣꓱꓽ ꓬꓰ ꓔꓬ ꓟ ꓥ ꓢꓲ ꓠꓬꓲ꓾ ꓕꓱ ꓡꓱ ꓬꓰ ꓔꓬ ꓟ ꓗꓪ ꓐꓰ ꓮ ꓟꓬ, ꓣꓱꓽ ꓬꓯꓼ ꓖꓴ ꓙꓳˍ ꓡꓳ ꓐꓯˍ ꓟ ꓔꓯ ꓢꓷ. ꓙ ꓟꓳ ꓙ ꓖꓶ ꓔꓬ ꓡꓳ꓿

News: RVA Myanmar