ꓪꓴ‐ꓢ ꓟꓲ ꓕꓯ ꓗꓪ ꓣꓳ ꓠꓬ ꓮ ꓘꓶ. ꓒꓵꓽ_ ꓡꓳ꓾

ꓠꓽ ꓦꓬꓼ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓙꓲ‐ꓢꓴ ꓢꓲ ꓤ ꓐꓴ ꓗꓪ ꓐꓰ ꓮ ꓕꓯ ꓟꓲ ꓡꓵ, ꓔꓴ ꓢꓲ ꓔꓬ ꓠ, ꓟ꓾ ꓟꓬ ꓠꓬꓲ ꓣꓳ. ꓚꓵ_ ꓟ ꓚꓱ, ꓔꓯ ꓡꓰ ꓢꓯꓼ ꓕꓵꓼ ꓠ, ꓟ ꓐꓰ ꓪꓴ‐ꓢ ꓟꓲ ꓕꓯ ꓗꓪ ꓣꓳ ꓠꓬ ꓮ ꓟꓬ ꓛꓲ ꓒꓵꓽ ꓡꓳ, ꓬꓰ ꓟ ꓔꓯ ꓮ ꓕꓯ ꓟꓲ ꓟꓽ ꓟꓲ ꓠ, ꓟ ꓢꓯꓼ ꓪ ꓖꓶ_ ꓡꓳ꓿ ꓣꓳ ꓔꓯ ꓫꓱ. ꓤ ꓠꓲ, ꓠꓵ_ ꓟ ꓪꓴ‐ꓢ ꓐꓰ ꓜꓲ ꓡꓯ ꓘꓳ ꓠ, ꓟ ꓠꓬ ꓕꓲꓽ ꓠꓬꓲ ꓡꓲ ꓕꓲꓽ ꓠꓬꓲ ꓪꓽ ꓘꓴ ꓠ, ꓟ ꓐꓰ ꓓꓵꓽ ꓙ ꓔꓱ, ꓕ ꓠ, ꓟ ꓬꓲ. ꓙꓵ, ꓖꓶ ꓠ, ꓟ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿

ꓢꓲ ꓫꓬ ꓕꓳ ꓶ ꓬꓳ‐ꓦ ꓕꓳ ꓶ ꓗꓪ ꓐꓰ ꓬꓳ‐ꓦ ꓡꓰ ꓢꓲ ꓒꓽ ꓬꓰ‐ꓢꓴ ꓔꓯ “ꓪꓴ‐ꓢ ꓬꓲ ꓮ ꓣꓳ ꓤ꓾ ꓟꓲ ꓠꓯ ꓗꓪ ꓟ ꓝꓴꓲ ꓣꓴ ꓦ ꓢꓴ ꓠꓬ ꓬꓲ ꓥ ꓡꓳ꓾” ꓐꓯ_ ꓟ ꓝꓲ. ꓔꓯ ꓔꓱ, ꓕ ꓖꓶ ꓗꓷ ꓟ ꓥꓳ꓿

ꓬꓳ‐ꓦ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓝꓴꓲ ꓣꓴ ꓦ ꓖꓶ ꓢꓴ ꓐꓰ ꓐꓯ ꓢꓲ꓾ ꓢꓲ ꓒ ꓠꓬ ꓪꓴ‐ꓢ ꓥ ꓟ ꓐꓰ ꓬꓲ‐ꓢꓷ‐ꓡꓲ ꓡ ꓞꓳ ꓐꓴ ꓛꓳ ꓫꓱꓽ ꓠ, ꓟ ꓙꓵꓽ ꓪ ꓔꓯ ꓬꓲ ꓟꓳ. ꓖꓶ ꓗꓷ ꓟ ꓥꓳ꓾ ꓗ. ꓠꓯ. ꓬꓲ ꓟꓬꓱꓽ ꓓꓳ ꓡꓰ ꓠꓬ꓾” ꓥꓪ ꓗ ꓠꓯ. ꓢꓲ ꓗꓪ ꓡ ꓞꓳ ꓕꓲ ꓣꓳ ꓡ_ ꓥꓳ꓾ ꓬꓲ ꓠꓽ ꓥꓪ ꓕꓯ ꓢꓲ ꓪꓴꓽ_ ꓟ ꓥ ꓡꓳ꓾ ꓮ ꓡꓲꓳ ꓐꓯ ꓠꓬ ꓥꓪ ꓟꓽ ꓙꓳ ꓕꓯ ꓡꓰ ꓬꓲ ꓙꓳ ꓔꓬ ꓡꓳ꓾ ꓬꓳ‐ꓦ 1ꓽ30 ꓐꓰ ꓢꓷ. ꓙ ꓟꓳ ꓙ ꓗꓷ ꓟ ꓥꓳ꓿

ꓬꓳ‐ꓦ ꓠꓬ ꓡ ꓞꓳ ꓐꓴ ꓗꓪ ꓐꓰ ꓠꓵꓻ ꓠꓲ, ꓪ ꓟꓶ ꓡꓰ ꓢꓴ ꓥ ꓢꓲ ꓙꓱ‐ꓣꓴ‐ꓢ‐ꓡꓱ ꓗꓪ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓥ ꓟꓲ ꓬꓲ ꓔꓯ ꓙꓳꓺ ꓟ ꓗꓪ ꓛꓲ ꓟꓬꓱꓺ ꓓꓳꓽ ꓙꓳ ꓡꓳ꓾ ꓬꓲ ꓖꓳ ꓡꓱ ꓟꓬꓱꓺ ꓓꓳꓽ ꓙꓳ ꓟ ꓔꓯ ꓣꓱ ꓢꓲ ꓠꓬꓲ ꓧꓪ. ꓡꓰ ꓟ ꓐꓰ ꓡ ꓞꓳ ꓐꓴ ꓠꓲ, ꓠꓵꓻ ꓟ ꓔꓯ ꓤ ꓠꓬꓲ ꓫꓵ ꓠꓬꓲ ꓡ ꓟ ꓗꓪ ꓬꓲ ꓟꓽ ꓞꓳ. ꓡꓰ꓾ ꓬꓳ‐ꓦ ꓠꓬ ꓢꓲ ꓒ ꓬꓰ‐ꓢꓴ ꓟꓲ ꓕꓯ ꓗꓪ ꓚꓲ ꓛꓬ ꓔꓱ, ꓚꓲ ꓛꓬ ꓣꓳꓺ ꓢꓴ ꓕꓲ ꓣꓳ ꓐꓰ ꓘꓳ, ꓣꓴ ꓢꓲ꓾ ꓢꓲ ꓒ ꓬꓰ‐ꓢꓴ ꓪꓴꓽ ꓓꓰ ꓡꓰ ꓟ ꓔꓯ ꓬꓲ. ꓔꓶ. ꓖꓶ_ ꓟ ꓥ ꓡꓳ꓿ “ꓬꓳ‐ꓦ ꓠꓬ ꓚꓲ ꓛꓬ ꓔꓱ, ꓚꓲ ꓛꓬ ꓢꓲ ꓒꓽ ꓐꓱ ꓶ ꓙ ꓖꓶ ꓠ, ꓟ ꓝꓲ ꓟꓶ ꓢꓴ ꓥ ꓡꓳ꓾ ꓢꓲ ꓒꓽ ꓬꓯꓼ ꓡ ꓕꓯ ꓗ, ꓛꓲ ꓟ ꓐꓰ ꓙꓽ ꓣꓳꓺ ꓟ ꓐꓰ ꓪꓴ‐ꓢ ꓬꓲ ꓔꓬ ꓟ ꓔꓯ ꓢꓷ. ꓠ, ꓟ ꓬꓲ. ꓔꓯ ꓬꓲ. ꓔꓶ. ꓖꓶ_ ꓡꓳ꓾”

“ꓮ ꓟꓶ ꓤꓶꓻ ꓣꓳ ꓐꓱ ꓶ ꓬꓲ ꓢꓷ. ꓙ ꓟꓳ ꓙ ꓗꓷ ꓟ ꓠꓬ ꓮ ꓟꓬ ꓛꓲ ꓣꓳ. ꓚꓵ_ ꓡ꓾”

ꓞꓳ ꓤ ꓠꓬ ꓚꓲ ꓛꓬ ꓔꓯ ꓗ, ꓛꓲ ꓡꓰ ꓝꓲ_ ꓡꓳ ꓐꓰ ꓢꓷ. ꓡꓰ ꓝꓲ_ ꓟ꓾ ꓟꓬꓱꓺ ꓓꓳꓽ ꓙꓳ ꓟ ꓠꓯꓼ ꓗꓪ ꓡꓰ ꓛꓳ ꓙꓰ ꓔꓬ ꓥ ꓟꓲ ꓬꓲ. ꓟꓶꓽ ꓗꓪ ꓫ ꓓꓴ ꓐꓰ ꓟꓽ ꓫꓱ, ꓟ ꓡꓰ ꓔꓳ, ꓜꓳ ꓡꓰ ꓟ꓾ ꓕꓱ ꓟ ꓠꓬ ꓕꓷꓻ ꓞ, ꓟ ꓟꓽ ꓙꓳ꓾ ꓠꓲ, ꓟ ꓐꓬ ꓡꓰ ꓥ ꓟ꓾ ꓞꓳ, ꓣꓴ ꓔ ꓟ ꓞꓳ ꓙꓳ ꓚꓱ, ꓙꓻ ꓶꓯ ꓘꓳ ꓚꓱ, ꓡꓰ ꓥ ꓡꓳ꓾ “ꓔꓱ, ꓟ ꓠꓯꓼ ꓗꓪ ꓠꓬ ꓣꓳ ꓠꓬ ꓕꓱ ꓟ ꓡꓰ ꓐꓰ ꓮꓽ ꓟꓴ ꓕꓲꓽ ꓕ ꓗ, ꓛꓲ ꓓꓴ ꓔꓯ ꓟꓽ ꓣꓱ ꓔꓯꓼ꓾ ꓣꓳ ꓗ, ꓛꓲ ꓓꓴ ꓐꓰ ꓪꓴꓽ ꓓꓰ ꓡꓰ ꓟ ꓠꓬ ꓕꓲ ꓑ, ꓞ ꓟꓬꓱꓺ ꓓꓽ ꓙꓳ_ ꓟ꓾ ꓧꓪ. ꓡꓰ ꓟ ꓐꓯ_ ꓟ ꓤ ꓠꓬꓲ ꓓꓴ ꓠꓯꓼ ꓗꓪ ꓬꓲ. ꓚꓰꓺ ꓟꓽ ꓣꓴ꓾ ꓟꓴ ꓗꓪ ꓗꓪ ꓔꓬ ꓟ ꓪꓴ‐ꓢ ꓠꓵꓻ ꓠꓲ, ꓐꓰ ꓠꓲ, ꓡꓶꓽ ꓙꓳ_ ꓟ ꓔꓯ ꓪ ꓟꓶ ꓠ, ꓟ ꓐꓱ ꓶ ꓚꓲ ꓛꓬ ꓔꓱ, ꓚꓲ ꓛꓬ ꓢꓷ. ꓡꓰ ꓟ ꓗꓪ ꓐꓰ ꓡꓰ ꓬꓲ. ꓚꓰꓺ ꓥ ꓡꓳ꓿”

ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓠꓵꓻ ꓠꓲ, ꓠꓬ꓾ ꓠꓬꓲ. ꓠꓬꓲ ꓗꓪ ꓛꓲ ꓣꓳ ꓠꓯꓼ ꓗꓪ ꓬꓯꓼ ꓡ ꓟ ꓪꓴ‐ꓢ ꓠꓵꓻ ꓠꓲ, ꓥ ꓡꓳ꓾ ꓖꓳ ꓡꓱ ꓬꓯꓼ ꓡ ꓟ ꓠꓬ꓾ ꓣꓳ ꓔꓯ ꓓꓵꓽ ꓙ ꓟꓶ ꓡꓰ ꓝꓲ ꓟ ꓟꓽ ꓥ꓾ ꓣꓳ ꓫ ꓙꓵ ꓟꓷꓼ ꓙꓵ ꓓꓴ ꓔꓯ ꓬꓲ ꓡꓰ ꓕꓲꓽ ꓪ ꓘꓳ, ꓣꓴ ꓠ, ꓟ ꓐꓰ ꓣꓳ ꓶꓻ ꓔꓯ ꓟꓯꓻ ꓙ ꓠ, ꓟ ꓥ ꓡꓳ꓿ ꓕꓱ ꓡꓱ ꓬꓰ ꓟ ꓗꓪ ꓐꓰ ꓢꓲ ꓒꓽ ꓡꓰ ꓣꓳ ꓠꓬ ꓮꓽ ꓟ ꓥ ꓟ ꓔꓱ, ꓜꓳ ꓟ ꓐꓰ ꓢꓲ ꓒꓽ ꓟꓲ ꓕꓯ ꓗꓪ ꓣꓳ ꓠꓬ ꓮ ꓟ,ꓬ ꓛꓲ ꓒꓵꓽ ꓓꓰ ꓡꓰ_ ꓟ ꓐꓯ_ ꓟ ꓔꓱ, ꓜꓳ ꓟ ꓔꓯ ꓟ. ꓖꓶ ꓔꓬ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿

ꓔꓲꓺ ꓒ ꓪ ꓔꓲ ꓡꓰꓳ ꓡꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓗꓪ ꓐꓰ ꓣꓳ ꓐꓰ ꓪꓴ‐ꓢ ꓠꓬꓲꓽ ꓗꓳ. ꓚ ꓗꓪ ꓔꓬ ꓟ ꓔꓯ ꓠꓲ, ꓟ ꓟꓽ ꓟꓬ ꓠ, ꓟ ꓐꓰ ꓮꓽ ꓟꓴ ꓕꓲꓽ ꓕ ꓠꓯꓼ ꓗꓪ ꓛꓳ ꓢꓲ ꓚꓲ ꓛꓬ ꓬꓲ. ꓙꓵ, ꓐꓰ ꓢꓯꓼ ꓪ ꓔꓯ ꓮꓽ ꓔꓳ ꓔꓳ ꓟꓽ ꓐꓬ ꓠ, ꓟ” ꓢꓯꓼ ꓖꓶ ꓗꓷ ꓟ ꓥꓳ꓿

“ꓬꓳ‐ꓦ ꓗꓪ ꓐꓰ ꓮ ꓕꓯ ꓟꓲ ꓧꓪ. ꓛꓲ ꓡꓰ ꓠ, ꓟ꓾ ꓫ. ꓕꓱ ꓟ ꓗꓪ ꓔꓱ, ꓠ, ꓟ꓾ ꓙꓽ ꓣꓳ ꓢꓲ ꓔꓬ ꓠ, ꓟ ꓐꓰ ꓠꓲ, ꓟ ꓠꓯꓼ ꓗꓪ ꓬꓲ. ꓠꓯ, ꓟ ꓔꓯ ꓫꓬ, ꓦꓵꓻ ꓠ, ꓟ꓾” ꓢꓳꓺ ꓣꓴ ꓓꓴ ꓬꓰ ꓡꓯ꓿

ꓣꓳ ꓠꓬ ꓟꓽ ꓔꓬ ꓟꓽ ꓓ ꓣꓱ ꓬꓯꓼ ꓔꓬ ꓟ ꓗꓪ ꓐꓰ ꓡꓰ ꓙꓽ ꓣꓳꓺ ꓢꓲ ꓔꓬ ꓓꓴ ꓬꓰ ꓡꓯ꓾ ꓐ ꓡ ꓠꓬ ꓕꓲꓽ ꓠꓬꓲ ꓡꓰ ꓕꓲ ꓠꓬꓲ ꓢꓲ ꓡꓲ, ꓐꓰ ꓪꓽ ꓘꓴ ꓟ꓾ ꓔꓱ, ꓕ ꓟ ꓐꓰ ꓠ ꓠ, ꓠ, ꓟ ꓬꓲ. ꓙꓵ, ꓖꓶ ꓓꓴ ꓬꓰ ꓡꓯ꓾ ꓪꓴ‐ꓢ ꓐꓰ ꓜꓲ ꓡꓯ ꓘꓳ ꓠ, ꓟ ꓐꓰ ꓢꓲ ꓒꓽ ꓐꓰ ꓕꓲ ꓪ ꓔꓬ ꓟꓶ ꓠ, ꓟ ꓐꓱ ꓶ ꓟꓵꓽ ꓗꓪ ꓔꓬ ꓠ, ꓟ ꓡꓰ ꓥ ꓡꓳ꓿

ꓔꓱ, ꓟ꓾ ꓢꓷ. ꓠꓲ, ꓙꓳ ꓟ꓾ ꓙꓽ ꓣꓳꓺ ꓟ ꓗꓪ ꓔꓯꓺ ꓢꓳ ꓓꓴ ꓥ ꓟ ꓟ, ꓟ ꓟ‐ꓡꓲ ꓔꓯ ꓣꓳ ꓓꓵꓽ ꓙ ꓟ ꓠꓯꓼ ꓗꓪ ꓬꓰ ꓙ ꓠ, ꓟ ꓪꓽ ꓘꓴ ꓢꓲ ꓬꓲꓼ ꓟꓶ ꓢꓰꓼ ꓗꓷ ꓟ ꓥꓳ꓿