ꓪꓴ‐ꓢ ꓠꓬ ꓕꓱ ꓟꓲ ꓠꓯ ꓔꓯ ꓶꓽ ꓞ, ꓟ ꓗꓪ ꓐꓰ ꓡꓳ. ꓠꓬꓲ ꓔꓬ ꓟ ꓟꓽ ꓥ꓾
ꓔꓲꓺ ꓒ ꓪ ꓔꓲ ꓡꓰ ꓠꓽ ꓦꓬꓼ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓗꓪ ꓙꓲ ꓢꓴ ꓢꓲ ꓤ ꓚꓲ ꓛꓬ ꓪ ꓟꓶ_ ꓟ ꓖꓳ ꓓꓱ ꓔꓲ, ꓟ ꓣꓱ ꓛꓰ ꓔꓯ ꓝꓮꓲ ꓓꓵꓽ ꓙ ꓔꓱ, ꓕ ꓠ, ꓟ ꓐꓰ “ꓗ, ꓛꓲ_ ꓟ꓾ ꓔꓷꓻ ꓞ, ꓟ ꓐꓰ ꓣꓱ ꓛꓰ ꓔꓯ ꓢꓷ. ꓙ ꓟꓳ ꓙ ꓠ, ꓟ꓾ ꓢꓯꓼ ꓖꓶ ꓔ ꓡꓳ꓿
ꓢꓲ ꓒ ꓬꓰ‐ꓢꓴ ꓖꓳ ꓓꓱ ꓔꓲ, ꓟ ꓑꓮꓲ ꓔꓯ ꓬꓰ ꓠ, ꓟ ꓢꓔ. ꓑꓰꓔꓰꓣ ꓪꓽ ꓘꓴ ꓦꓲꓻ ꓓꓽ ꓗꓪ ꓜꓲꓼ ꓡ ꓢꓴ ꓐꓴ ꓔꓯ ꓔꓲꓺ ꓒ ꓪ ꓔꓲ ꓡꓰ ꓕꓱ ꓕꓲꓽ ꓙꓵ, ꓠꓬ “ꓣꓳ ꓔꓯ ꓢꓲ ꓒꓽ ꓠꓯꓼ ꓗꓪ ꓕꓲꓽ ꓪ ꓙꓻ ꓫꓱꓽ ꓠ, ꓟ꓾ ꓪꓴ‐ꓢ ꓐꓯ ꓘꓶꓽ ꓔꓯ ꓛꓳ ꓫꓱꓽ ꓠ, ꓟ ꓐꓰ ꓛꓳꓽ ꓒꓯ, ꓐꓴ ꓠꓯꓼ ꓗꓪ ꓔꓬ ꓟ ꓢꓲ ꓒꓽ ꓫꓱ. ꓤ ꓠꓵꓻ ꓠꓲ, ꓔꓯ ꓔꓯꓺ ꓢꓳꓺ ꓛꓳ ꓫꓱꓽ ꓠ, ꓟ ꓘꓴ ꓔ ꓡꓳ꓾” ꓐꓰ ꓐꓯ ꓔ ꓡꓳ꓿
ꓬꓴ‐ꓓ ꓬꓲꓻ ꓡꓴ ꓐꓱ ꓘꓴꓽ ꓗꓪ ꓢꓲ ꓒ ꓬꓰ‐ꓢꓴ ꓖꓳ ꓓꓱ ꓔꓲ, ꓟ ꓠꓬ ꓣꓳ ꓮ ꓙꓵ ꓔꓯ ꓥ ꓟꓲ ꓖꓳ ꓓꓱ ꓔꓲ, ꓟ ꓔꓯ ꓘꓳ, ꓣꓴ ꓟꓶ ꓠ, ꓟ ꓘꓴ ꓔ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿ ꓕꓱ ꓣꓱ ꓛꓰ ꓠꓬ “ ꓣꓳ ꓔꓯ ꓙꓲ ꓢꓴ ꓢꓲ ꓤ ꓒꓬꓱꓼ ꓡꓰ ꓠ, ꓟ꓾ ꓝꓴꓲ ꓗꓪ ꓐꓰ ꓡꓲ, ꓙꓰ ꓠ, ꓟ ꓐꓰ ꓢꓲ‐ꓫꓬ‐ꓟ‐ꓦ ꓢꓯꓼ ꓪ ꓗꓪ ꓐꓰ ꓣꓳ ꓔꓯ ꓪꓴ‐ꓢ ꓤ ꓠꓱ ꓤ ꓐꓰ ꓘꓳ, ꓣꓴ ꓟꓶ ꓡꓰ ꓝꓲ ꓟ ꓥ ꓡꓳ꓾” ꓐꓰ ꓐꓯ ꓔ ꓡꓳ꓿
ꓟ‐ꓕꓲ ꓕꓳ ꓶ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓕꓱ ꓟ ꓠꓬ “ ꓪꓴ‐ꓢ ꓬꓲ ꓚꓱ, ꓕꓲꓽ ꓟ ꓡꓱꓼ ꓠꓬ ꓚꓺ ꓟꓲꓽ ꓗꓪ ꓟ. ꓖꓶ ꓔ ꓡꓳ꓾ ꓬꓲ. ꓤ ꓔꓲ ꓢꓲ ꓒ ꓬꓰ‐ꓢꓴ ꓠꓬ ꓬꓴ‐ꓓ ꓬꓲꓻ ꓡꓴ ꓐꓱ ꓗꓪ ꓖꓳ ꓓꓱ ꓔꓲ, ꓟ ꓡꓰ ꓐꓰ ꓢꓲ‐ꓫꓬ‐ꓟ‐ꓦ ꓠꓬ ꓢꓲ ꓒꓽ ꓠꓯꓼ ꓗꓪ ꓬꓯꓼ ꓡ ꓟ ꓥꓳ꓾ ꓖꓳ ꓟ ꓡꓰ ꓐꓰ ꓢꓲ ꓒꓽ ꓐꓰ ꓕꓲꓽ ꓝ. ꓣꓳ ꓔꓯ ꓚꓬꓴ ꓙ ꓟ ꓢꓯꓼ ꓪ ꓐꓰ ꓖꓶ ꓡ ꓟ ꓥꓳ꓾” ꓐꓰ ꓐꓯ ꓔ ꓡꓳ꓿
“ꓪꓴ‐ꓢ ꓠꓬ ꓣꓳ ꓤꓶꓻ꓾ ꓣꓳ ꓠꓻ ꓓꓴ ꓐꓰ ꓣꓳ ꓥꓳ ꓡꓳ. ꓓꓴ ꓔꓯ ꓟꓽ ꓠꓬꓲ. ꓠ. ꓕꓱ ꓟꓲ ꓠꓯ ꓔꓯ ꓶꓻ ꓞ, ꓟ ꓗꓪ ꓐꓰ ꓠꓬꓲ. ꓠ. ꓔꓬ ꓟ ꓟꓽ ꓥ꓾ ꓢꓲ ꓒꓽ ꓠꓬ ꓟꓲ ꓠꓯ ꓡ ꓞꓳ ꓮ ꓙꓵ ꓐꓱ ꓶ ꓓꓵꓽ ꓙ ꓟꓶ ꓓꓴ ꓠꓵꓻ ꓠꓲ, ꓟꓬꓱꓽ ꓚꓱ, ꓠꓯꓼ ꓗꓪ ꓣꓳ ꓔꓯ ꓘꓴ ꓔ ꓠ, ꓟ ꓟꓲ ꓠꓯ ꓗꓪ ꓞꓳ ꓤ ꓕꓲ ꓣꓳ ꓐꓰ ꓘꓳ, ꓣꓴ ꓢꓲ ꓪꓴ‐ꓢ ꓐꓯ ꓘꓶꓽ ꓐꓰ ꓕꓲ ꓪ ꓣꓳ ꓗꓳ, ꓡꓳ ꓗꓪ ꓬꓯꓼ ꓡ ꓟ ꓥ ꓡꓳ꓾” ꓐꓰ ꓐꓯ ꓔ ꓡꓳ꓿
ꓖꓳ ꓓꓱ ꓔꓲ, ꓒꓽ ꓬꓳ‐ꓦ ꓓꓵꓽ ꓙ ꓟꓶ ꓡꓰ ꓟ ꓠꓬ꓾ ꓪꓴ‐ꓢ ꓬꓲ ꓚꓲ ꓛꓬ ꓠꓬ ꓝꓴꓲ ꓙꓳ ꓢꓴ ꓟꓲ ꓠꓯ ꓡ ꓞꓳ ꓮ ꓙꓵ ꓡꓰ ꓐꓰ ꓖꓳ ꓓꓱ ꓔꓲ, ꓟ ꓔꓯ ꓘꓳ, ꓣꓴ ꓟ ꓥ ꓡꓳ꓾ ꓖꓳ ꓟ ꓠꓬ “ꓪꓴ‐ꓢ ꓬꓲ ꓐꓯ ꓖꓴ ꓟꓽ ꓓ ꓟ ꓫꓱ. ꓤ ꓠꓵꓻ ꓠꓲ, ꓔꓯ ꓟ. ꓖꓶ ꓠ, ꓟ ꓥ ꓡꓳ꓾” ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿
ꓖꓳ ꓓꓱꓽ ꓔꓲ, ꓣꓱ ꓛꓰ ꓠꓬ ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓠꓯꓼ ꓔꓯ “ꓞꓳ ꓫꓵ ꓮ ꓙꓵ꓾ ꓡꓲ ꓒꓰꓼ ꓮ ꓙꓵ ꓗꓪ ꓐꓰ ꓤ꓾ ꓤ ꓟꓶ ꓐꓰ ꓫꓬ, ꓔꓶ ꓔ ꓢꓲ꓾ ꓢꓲ‐ꓫꓬ‐ꓟ‐ꓦ ꓗꓪ ꓐꓰ ꓤꓶꓻ ꓫꓵꓼ ꓒꓬꓱꓼ ꓡꓰ ꓡ ꓟ ꓪꓴ‐ꓢ ꓞꓳ ꓫꓵ” ꓐꓯ_ ꓟ ꓘꓴ ꓜꓲꓼ ꓞꓳ ꓘꓴꓽ ꓠꓯꓼ ꓗꓪ ꓧꓳꓽ ꓔꓯ, ꓖꓶ_ ꓟ ꓥ ꓡꓳ꓿ ꓔꓲꓺ ꓒ ꓪ ꓔꓲ ꓡꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓔꓯ “ꓚꓲ ꓛꓬ ꓪ ꓟꓶ_ ꓟ ꓪꓴꓽ ꓓꓰ ꓡꓰ_ ꓟ ꓣꓱ ꓛꓰ” ꓔꓯ ꓓꓵꓽ ꓙ ꓠ, ꓟ ꓐꓰ “ꓗ, ꓛꓲ_ ꓟ꓾ ꓔꓶꓻ ꓞ, ꓟ ꓔꓱ, ꓟ ꓣꓱ ꓛꓰ ꓔꓯ ꓢꓷ. ꓙ ꓟꓳ ꓙ ꓠ, ꓟ꓾ ꓢꓯꓼ ꓖꓶ ꓔ ꓡꓳ꓿
ꓖꓳ ꓟ ꓡꓰ ꓐꓰ ꓠꓯꓽ ꓙꓵ, ꓕꓯ ꓢꓲꓢꓔꓲꓠꓰ ꓚꓧꓮꓑꓰꓡ ꓗꓪ ꓤ ꓠꓱ ꓤ 20 ꓣꓳ ꓔꓯ ꓖꓳ ꓓꓱ ꓔꓲ, ꓖꓶ ꓢꓲ꓾ ꓣꓳ ꓐꓰ ꓙꓵꓻ ꓠꓲ, ꓫꓱꓽ_ ꓟ ꓬꓲꓼ ꓤ ꓠꓬꓲ ꓤ ꓫꓵꓼ ꓐꓴ” ꓗꓷ ꓡꓰꓳ ꓐꓰ ꓐꓯ ꓔ ꓡꓳ꓿ “ ꓕꓱ ꓢꓮꓚꓣꓮꓟꓰꓠꓔ ꓣꓱ ꓛꓰ ꓠꓬ ꓣꓳ ꓐꓰ ꓕꓲ ꓪ ꓕꓲ ꓞꓲꓼ ꓕꓲ ꓑ ꓔꓬ ꓟ ꓢꓲ ꓫꓬ_ ꓟ ꓬꓲ. ꓙꓱ ꓕꓲꓽ ꓟ ꓥ ꓡꓳ꓾ ꓠꓯꓺ ꓞꓲ, ꓟ ꓙꓵ, ꓗꓪ ꓖꓳ ꓓꓱ ꓔꓲ, ꓟ ꓣꓱ ꓛꓰ ꓠꓬ ꓠꓬꓲ ꓟꓳ ꓓꓴ ꓥ ꓢꓲ꓾ ꓣꓳ ꓤꓶꓻ ꓤ, ꓠꓬꓲ ꓫꓵ ꓠꓬꓲ ꓓꓴ ꓗꓳ. ꓡꓳ ꓗꓪ ꓫꓬ ꓡꓰ ꓝꓲ ꓢꓲ꓾ ꓫꓵꓻ ꓟ ꓙꓵ, ꓗꓪ ꓥ ꓟꓲ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓠ, ꓟ ꓗ. ꓘꓶꓽ ꓥ ꓡꓳ꓾” ꓐꓰ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓐꓯ ꓔ ꓡꓳ꓿
