ꓦꓮꓔꓲꓚꓮꓠ ꓲꓲ ꓚꓳꓴꓠꓚꓲꓡ ꓠꓬ ꓬꓰ‐ꓢꓴ ꓙꓲ‐ꓢꓴ ꓐꓰ ꓛꓳꓽ ꓒꓯ, ꓗꓷ ꓡꓰ ꓠ, ꓟ ꓣꓳ ꓔꓯ ꓘꓴ ꓔ ꓡꓳ꓾
ꓕꓲ ꓠꓽ ꓡꓲ ꓕꓲꓽ ꓠ ꓠꓽ ꓢꓽ ꓠꓬꓲ ꓙꓲ ꓢꓴ ꓢꓲ ꓤ ꓐꓴ ꓐꓰ ꓜꓲ ꓡꓯ ꓘꓳ ꓟ ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓦꓮꓔꓲꓚꓮꓠ ꓠꓬꓲꓽ ꓚꓳꓴꓠꓚꓲꓡ ꓚꓱ, ꓔꓯ ꓟꓳ. ꓙꓵꓻ ꓠꓲ, ꓟ. ꓖꓶ_ ꓟ ꓔꓯ ꓬꓰ ꓗꓷ ꓟ ꓥꓳ꓿ ꓕꓱ ꓕꓲꓽ ꓫꓵ ꓠꓽ ꓗꓪ ꓚꓳꓴꓠꓚꓲꓡ ꓗꓪ ꓡꓳ. ꓐꓲ_ ꓟ ꓐꓰ ꓣꓳ. ꓚꓵ_ ꓟ ꓕꓲꓽ ꓟ ꓥ ꓟ” ꓪꓴ‐ꓢ ꓙꓵꓽ ꓗ ꓚꓱ, ꓥ ꓟ ꓪꓴ‐ꓢ ꓐꓯ ꓘꓶꓽ “Dei Verbum” ꓚꓱ, ꓔꓯ ꓬꓲꓼ ꓠꓬꓲ. ꓐꓯ ꓖꓶ ꓗꓷ ꓟ ꓥꓳ꓿
“ꓚꓳ ꓑ. ꓠꓬ ꓬꓲ ꓢꓲ ꓒꓽ ꓬꓰ_ ꓟ ꓟꓬꓱꓽ ꓮ ꓙꓵ ꓔꓯ ꓟꓽ ꓢꓷ. ꓟ ꓑꓶ ꓓꓴ ꓥꓪ ꓠꓬ ꓠꓴ ꓪ ꓔꓯ ꓚꓳ ꓑ. ꓐꓰ ꓟꓽ ꓘꓴ꓾ ꓥꓪ ꓠꓬ ꓠꓴ ꓪ ꓔꓯ ꓛꓳꓽ ꓒꓯ, ꓐꓰ ꓘꓴ_ ꓥꓳ꓾”
1 ꓦ 14 ꓠꓬꓲ ꓠꓽ ꓢꓽ ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓲ ꓫꓬ ꓕꓳ ꓶ ꓬꓳ‐ꓦ ꓕꓳ ꓶ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓗꓪ ꓐꓰ ꓣꓴ ꓢꓲ ꓦꓮꓔꓲꓚꓮꓠ ꓠꓬꓲꓽ ꓚꓳꓴꓠꓚꓲꓡ ꓕꓳ ꓶ ꓔꓯ ꓝꓮꓲ ꓔꓱ, ꓕ ꓢꓲ ꓐꓯ ꓖꓶ ꓟ ꓥꓳ꓿
ꓪꓴ‐ꓢ ꓐꓯ ꓘꓶꓽ ꓥ ꓟ “Dei Verbum” ꓚꓱ, ꓔꓯ ꓟꓳ. ꓬꓲꓼ ꓠꓬꓲ. ꓐꓯ ꓟ ꓗꓪ ꓣꓳ ꓔꓯ ꓢꓲ ꓒꓽ ꓛꓳꓽ ꓒꓯ, ꓗꓷ ꓡꓰ ꓠ, ꓟ ꓢꓲ ꓒꓽ ꓬꓰ‐ꓢꓴ ꓡꓰ ꓘꓴ ꓔ ꓟ ꓝꓮꓲ ꓓꓵꓽ ꓙ ꓡꓰ ꓝꓲ ꓡꓳ꓾ “ꓕꓱ ꓟ ꓠꓬ ꓙꓲ ꓢꓴ ꓢꓲ ꓤ ꓐꓴ ꓙꓵꓻ ꓠꓲ, ꓚꓱ, ꓬꓲ. ꓚꓰꓺ ꓕꓲꓽ ꓚꓱ, ꓥ ꓟ “Dei Verbum” ꓠꓬ ꓣꓳ ꓔꓯ ꓝꓮꓲ ꓢꓷ. ꓡꓰ ꓝꓲ_ ꓟ ꓥ ꓡꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓞꓳ ꓤ ꓐꓰ ꓪꓴ‐ꓢ ꓠꓬꓲꓽ ꓗꓳ. ꓚ. ꓙꓻ ꓡꓯ ꓘꓳ_ ꓟ ꓔꓯ ꓬꓲ. ꓚꓰꓺ ꓗꓪ ꓐꓰ ꓒꓳ, ꓖꓶ_ ꓟ ꓥꓳ꓿ ꓖꓳ ꓙꓻ ꓡꓯ ꓘꓳ_ ꓟ ꓠꓬ ꓮ ꓟꓶ ꓠꓬ ꓛꓳꓽ ꓒꓯ, ꓗꓷ ꓡꓰ ꓟ ꓥꓳ꓿ ꓖꓳ ꓟ ꓑꓶ ꓓꓴ ꓘꓶꓼ ꓫꓵꓼ ꓙꓵꓽ ꓗ ꓕꓲꓽ ꓟ ꓕꓵꓼ ꓠꓬ ꓠꓵꓻ ꓠꓲ, ꓥ ꓡꓳ꓿
ꓣꓳ ꓠꓬ ꓪꓴ‐ꓢ ꓐꓰ ꓕꓲꓽ ꓔꓶ. ꓡꓰ ꓟꓽ ꓥ꓾ ꓚꓰꓼ ꓢꓴ ꓢꓲ ꓒꓽ ꓐꓰ ꓚꓰꓼ ꓟꓶ ꓢꓴ ꓠꓬꓲꓽ ꓗꓳ. ꓚ, ꓗꓪ ꓮ ꓕꓯ ꓟꓲ ꓟꓽ ꓪ ꓟꓽ ꓫꓱ, ꓟ ꓙꓳ_ ꓟ ꓔꓯ ꓢꓲ ꓒꓽ ꓐꓯ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ‐ꓢ ꓬꓲ ꓤ ꓔꓲ. ꓠꓬ ꓟꓲ ꓠꓯ ꓞꓳ ꓤ ꓐꓰ ꓬꓯꓼ ꓡ ꓟ ꓐꓰ ꓕꓲ ꓪ ꓪꓴ‐ꓢ ꓘꓶꓽ ꓫꓵꓼ ꓠꓬ ꓬꓲ ꓔꓶꓻ ꓙꓱꓼ ꓠꓯꓼ ꓗꓪ ꓒꓴ ꓡꓰ ꓟ ꓥꓳ꓿
“ꓢꓲ ꓒ ꓬꓰ‐ꓢꓴ ꓗꓪ ꓐꓰ ꓪꓴ‐ꓢ ꓠꓬ ꓣꓳ ꓔꓯ ꓬꓲ ꓤ ꓠꓱ ꓤ ꓐꓰ ꓘꓳ, ꓣꓴ ꓢꓲ꓾ ꓣꓳ ꓡꓳ. ꓐꓲ_ ꓟ ꓟꓲ ꓠꓯ ꓞꓳ ꓤ ꓤꓶꓻ ꓠꓯꓼ ꓗꓪ ꓥ ꓟꓲ ꓢꓲ ꓒꓽ ꓐꓰ ꓫꓱ, ꓠ, ꓟ ꓘꓴ ꓔ ꓡꓳ꓾” ꓕꓱ ꓟ ꓔꓯ ꓠꓲ, ꓟ ꓗꓪ ꓗꓶ ꓔ ꓢꓲ꓾” ꓪꓴ‐ꓢ ꓐꓯ ꓘꓶꓽ ꓠꓬ ꓣꓳ ꓠꓲ, ꓟ ꓘꓴꓽ ꓗꓪ ꓓꓵꓽ ꓡꓰ ꓐ ꓡ ꓠ, ꓟ” ꓠ ꓠ, ꓠ, ꓟ ꓣꓱ ꓬꓯꓼ_ ꓟ ꓐꓰ “ꓪꓴ‐ꓢ ꓢꓷ. ꓔꓬ ꓟ ꓔꓯ ꓐꓯ ꓟ. ꓖꓶ ꓠ, ꓟ ꓟꓽ ꓥ ꓥ꓾ ꓐꓰ ꓣꓳ ꓚꓲ ꓛꓬ ꓠꓬ ꓮꓽ ꓟ ꓥ ꓡ ꓐꓯ_ ꓟ ꓔꓯ ꓢꓷ. ꓠ, ꓟ” ꓪꓴ‐ꓢ ꓐꓰ ꓫ. ꓕꓱ ꓠ, ꓟ꓾(ꓪꓽ ꓘꓴ ꓠ, ꓟ) ꓣꓱ ꓬꓯꓼ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰꓳ ꓡꓰ ꓐꓯ ꓔ ꓡꓳ꓿
ꓪꓴ‐ꓢ ꓐꓰ ꓙꓻ ꓡꓯ ꓘꓳ ꓟ ꓔꓯ ꓫꓬ, ꓔꓴ ꓠ, ꓟ ꓪꓽ ꓘꓴ ꓟ ꓠꓬ ꓮ ꓘꓶ. ꓛꓲ ꓣꓱ ꓚꓵ_ ꓟ ꓚꓱ,꓾ ꓪꓽ ꓘꓴ ꓟ ꓐꓰ ꓬꓲ. ꓜꓴ ꓬꓲ ꓟꓯꓼ ꓪꓽ ꓘꓴ ꓠ, ꓟ ꓠꓬ꓾ ꓣꓳ ꓠꓬ ꓪꓴ‐ꓢ ꓠꓯꓼ ꓗꓪ ꓐꓰ ꓮ ꓫꓵ ꓑ ꓙ ꓠꓲ, ꓫꓵ_ ꓡ꓾ ꓐꓯ_ ꓟ ꓔꓯ ꓚꓲ ꓛꓬ ꓓꓵꓽ ꓙ ꓟꓽ ꓞꓷ, ꓞꓷ, ꓘꓴ ꓜꓲꓼ ꓞꓳ ꓗꓪ ꓐꓰ ꓕꓲꓽ ꓝ. ꓪꓴ‐ꓢ ꓬꓲ ꓚꓲ. ꓛꓬ ꓠꓬ ꓣꓳ ꓔꓯ ꓫ. ꓕꓱ_ ꓟ ꓥ ꓡꓳ꓾” ꓐꓰ ꓐꓯ ꓔ ꓡꓳ꓿
ꓕꓱ ꓪꓽ ꓘꓴ_ ꓟ ꓠꓬ “ꓠꓲ, ꓟ ꓘꓴꓽ ꓗꓪ ꓬꓰ ꓔꓬ ꓟ ꓚꓲ. ꓛꓬ ꓠꓲ, ꓡꓶꓽ ꓪꓽ ꓘꓴ_ ꓟ ꓗꓪ ꓐꓰ ꓕꓲꓽ ꓝ. ꓧꓪ. ꓡꓰ ꓟ ꓪ ꓟ ꓥꓳ꓾” ꓖꓳ ꓟ ꓑꓶ ꓓꓴ ꓙꓲ ꓢꓴ ꓢꓲ ꓤ ꓐꓴ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯ. ꓔꓬ ꓟ ꓤꓶꓻ ꓗꓪ “ꓪꓽ ꓘꓴ_ ꓟ꓾ ꓪꓴ‐ꓢ ꓐꓯ ꓘꓶꓽ ꓔꓯ ꓓꓵ ꓙ ꓔꓱ, ꓕ ꓟ ꓐꓰ ꓝꓮꓲ ꓔꓱ, ꓕ ꓠ, ꓟ ꓬꓲ. ꓙꓵ, ꓖꓶ ꓠ, ꓟ ꓣꓱ ꓬꓯꓼ_ ꓡꓳ꓾ ꓐꓰ ꓐꓯ ꓔ ꓡꓳ꓿
ꓬꓲ. ꓟꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓛꓳꓽ ꓒꓯ, ꓠꓬ ꓢꓷ. ꓥ ꓟꓲ ꓟꓽ ꓢꓷ. ꓔ ꓪ ꓡꓰ ꓬꓰ_ ꓟ ꓗꓪ ꓐꓰ ꓐꓬ ꓡꓰ ꓗꓴ._ ꓡꓳ꓾ ꓐꓰ ꓐꓯ ꓔ ꓡꓳ꓿ “ꓢꓲ ꓒꓽ ꓬꓰ‐ꓢꓴ ꓡꓰ ꓣꓳ ꓔꓯ ꓛꓳꓽ ꓒꓯ, ꓗꓷ ꓡꓰ ꓠ, ꓟ ꓘꓴ ꓔ ꓡꓳ꓿ ꓕꓱ ꓟ ꓔꓯ ꓕꓽ ꓟꓲ ꓡꓰ꓾ ꓕꓱ ꓟ ꓔꓯ ꓘꓳ, ꓣꓴ ꓢꓲ꓾ ꓙ ꓜꓲꓼ ꓟ ꓗꓪ ꓐꓰ ꓪꓴ‐ꓢ ꓐꓰ ꓛꓳꓽ ꓒꓯ, ꓗꓷ ꓡꓰ ꓟ ꓠꓬ ꓣꓳ ꓚꓬꓴ ꓙ ꓟ ꓡꓳ꓾ ꓐꓯ_ ꓟ ꓔꓯ ꓧꓪ ꓟꓳ ꓡ ꓥꓳ꓾” ꓐꓰ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓯꓼ ꓖꓶ ꓗꓷ ꓟ ꓥꓳ꓿
