ꓔꓲꓺ ꓒ ꓙꓵꓽ ꓪ (50) ꓘꓳꓼ ꓐꓲ ꓫꓵꓺ ꓙꓴ‐ꓐꓲ‐ꓡꓲ ꓐꓰ (25 ) ꓘꓳꓼ ꓒꓴ ꓙꓴ‐ꓐꓲ‐ꓡꓲ ꓑꓮꓲ ꓬꓰ_ ꓟ꓾

ꓬ‐ꓖꓳ ꓔꓲꓺ ꓒ ꓓꓽ ꓢ‐ꓢꓲ‐ꓠ꓾ ꓔꓲꓺ ꓒ ꓓꓽ ꓟ Cardinal Charles Bo ꓔꓲꓺ ꓒ ꓙꓵꓽ ꓪ ꓘꓳ, ꓣꓴ ꓟꓶ ꓟ (50) ꓘꓳꓼ ꓐꓲ ꓫꓵꓺ ꓙꓴ‐ꓐꓲ‐ꓡꓲ ꓐꓰ ꓟꓶ‐ꓚꓲ‐ꓠ ꓔꓲꓺ ꓒ ꓓꓽ ꓢ‐ꓢꓲ‐ꓠ꓾ ꓟꓶ‐ꓚꓲ‐ꓠ ꓔꓲꓺ ꓒ ꓙꓵꓽ ꓔꓶ. ꓗꓪ ꓐꓰ ꓔꓲꓺ ꓒ John Galang La Raw ꓔꓲꓺ ꓒ ꓙꓵꓽ ꓪ (25) ꓘꓳꓼ ꓐꓲ ꓒꓴ ꓙꓴ‐ꓐꓲ‐ꓡꓲ ꓔꓯ ꓠꓬꓲꓸ ꓠꓬꓲ 15.1.2026 (ꓠꓽ ꓡꓲ. ꓠꓬꓲ) ꓕꓯ ꓬꓰ ꓓꓳ ꓡꓰ ꓟ ꓥꓳ=

ꓕꓱ ꓟꓲ‐ꓢ ꓪꓽ ꓘꓴ ꓙꓵ, ꓗꓪ ꓔꓲꓺ ꓒ ꓓꓽ ꓐꓴ꓾ ꓔꓲꓺ ꓒ 45 ꓣꓳ ꓛꓲ꓾ ꓔꓲꓺ ꓟ ꓐꓴ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓔ, ꓐ ꓡ ꓟ ꓥꓳ꓿

ꓔꓲꓺ ꓒ ꓓꓽ ꓠꓳꓰꓡ ꓢꓮꓪ ꓠꓮꓪ ꓮꓬꓰ ꓡꓰ ꓟ. ꓟꓲꓽ ꓚꓺ ꓢꓯꓼ ꓖꓶ_ ꓟ ꓗꓪ ꓚꓮꓣꓓꓲꓠꓮꓡ ꓚꓧꓮꓣꓡꓰꓢ ꓐꓳ ꓬꓲ ꓐꓯ ꓘꓶꓽ ꓥ ꓟ꓾ “ꓥꓪ ꓔꓯ ꓢꓯꓼ ꓪ ꓖꓶ_ ꓟ ꓬꓰ‐ꓢꓴ ꓙꓲ‐ꓢꓴ ꓗꓪ ꓐꓰ ꓥꓪ ꓠꓬ ꓮ ꓙꓵ ꓟ ꓔꓯ ꓬꓰ ꓐ ꓡ ꓡꓳ꓾” ꓐꓯ_ ꓟ ꓚꓱ, ꓗꓪ ꓐꓰ ꓢꓯꓼ ꓖꓶ ꓗꓷ ꓟ ꓥꓳ꓿ ꓕꓱ ꓟ ꓠꓬ꓾ ꓚꓲ ꓛꓬ ꓔꓱ, ꓚꓲ ꓛꓬ ꓙꓵꓻ_ ꓟ ꓓꓰ ꓢ “ꓪꓴ‐ꓢ ꓠꓯꓼ ꓗꓪ ꓙꓵꓻ” ꓟ ꓔꓯ ꓟ. ꓖꓶ_ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓓꓽ ꓡꓰ ꓬꓲꓼ ꓠꓬꓲ. ꓖꓶ_ ꓡꓳ꓿ ꓕꓱ ꓟ ꓔꓯ ꓢꓲ ꓫꓬ ꓢꓴ ꓒꓳ‐ꓡꓳ ꓡꓰ ꓧꓪ. ꓡꓰ ꓟ ꓔꓶ. ꓗꓪ ꓐꓰ ꓐꓳ ꓔ ꓟ ꓟꓽ ꓥ꓾ ꓐꓱ ꓓꓵ ꓗꓪ ꓔꓬ ꓟ ꓙꓵ, ꓗꓪ ꓐꓳ ꓔ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿

“25 ꓘꓳꓼ ꓐꓰ 50 ꓘꓳꓼ ꓐꓯ_ ꓟ ꓠꓬ ꓬꓲ. ꓙꓵ, ꓔꓯ ꓔꓯꓺ ꓔ ꓟ ꓟꓽ ꓥ꓾ ꓢꓲ ꓒꓽ ꓐꓰ ꓕꓲꓽ ꓪ ꓮ ꓟꓬ ꓛꓲ ꓙꓵꓻ ꓠꓲ, ꓐꓰ ꓕꓲꓽ ꓪ ꓙꓻ ꓫꓱꓽ_ ꓡ ꓐꓯ_ ꓟ ꓤꓶꓻ ꓔꓯ ꓔꓯꓺ ꓔ ꓟ ꓕꓲꓽ ꓟ ꓡꓰ ꓥ ꓡꓳ꓾” ꓐꓰ ꓔꓲꓺ ꓒ ꓓꓽ ꓠꓳꓰꓡ ꓡꓰ ꓢꓯꓼ ꓖꓶ ꓔ ꓡꓳ꓿ ꓖꓳ ꓟ ꓡꓰ ꓐꓰ ꓔꓲꓺ ꓒ ꓐꓴ ꓣꓱꓽ ꓙ ꓟꓬꓱꓽ ꓬꓰ ꓗꓷ ꓟ ꓠꓬ꓾ “ꓬꓲ. ꓪ ꓟꓬꓱꓽ ꓬꓰ ꓣꓱꓽ ꓙ ꓟ ꓠꓬ ꓙꓲ‐ꓢꓴ ꓢꓲ ꓤ ꓐꓴ ꓠꓲ, ꓟ ꓗꓪ ꓕꓳꓼ ꓠꓶꓼ ꓗꓶ ꓔ ꓟ ꓥ ꓡꓳ꓾ ꓪꓴ‐ꓢ ꓗꓴꓷꓼ ꓗꓪ ꓬꓲ. ꓪ ꓬꓲ. ꓒꓵꓽ ꓔꓯ ꓫ ꓔ ꓡꓳ꓾ ꓐꓰ ꓐꓯ ꓔ ꓡꓳ꓿

ꓔꓲꓺ ꓒ ꓙꓳꓧꓠ ꓡꓮ ꓣꓮꓪ ꓡꓰ ꓬꓲ ꓠꓻ ꓓꓴ ꓑꓬ ꓔꓬ ꓟ ꓙꓵ, ꓗꓪ ꓬꓰ ꓙ ꓔꓳ, ꓙ ꓗꓷ ꓟ ꓔꓲꓺ ꓒꓽ ꓓꓽ ꓟ ꓚꓮꓣꓓꓲꓠꓮꓡ ꓚꓧꓮꓣꓡꓰꓢ ꓐꓳ ꓔꓯ ꓫ ꓟꓳ ꓘꓶꓽ ꓫ. ꓕꓱ ꓗꓷ ꓟ ꓥꓳ꓿ ꓔꓲꓺ ꓒ ꓠꓬ ꓟꓬ‐ꓟ ꓗꓴꓷꓼ꓾ ꓗ‐ꓛꓲ ꓗꓴꓷꓼ ꓫꓴꓺ꓾ ꓠꓮꓟ‐ꓔꓲ ꓡꓳ ꓒꓱ ꓗꓪ 1974 ꓘꓳꓼ 3 ꓦ ꓟ 10 ꓠꓬꓲ ꓕꓯ ꓦꓵꓻ ꓗꓷ ꓟ ꓥ ꓢꓲ ꓠꓬꓲ 2001 ꓘꓳꓼ 1 ꓦ ꓟ 1 ꓠꓬꓲ ꓕꓯ ꓔꓲꓺ ꓒ ꓙꓵꓽ ꓪ ꓘꓳ, ꓣꓴ ꓗꓷ ꓟ ꓥꓳ꓿

ꓔꓲꓺ ꓒꓽ ꓓꓽ ꓟ ꓚꓮꓣꓓꓲꓠꓮꓡ ꓚꓧꓮꓣꓡꓰꓢ ꓐꓳ ꓡꓰ ꓬꓲ ꓤꓶꓻ ꓠꓯꓼ ꓗꓪ ꓠ ꓑ (7) ꓠꓬ ꓮ ꓘꓶ. ꓛꓲ ꓓꓵꓽ ꓙ ꓟꓶ ꓓꓴ ꓙꓳ_ ꓟ ꓕꓲ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿ ꓬꓲ ꓦꓵꓻ ꓗꓷ ꓗ. ꓠꓯ. (7) ꓦꓬꓼ ꓕꓯ ꓖꓳ ꓓꓱꓽ ꓔꓲ, ꓗꓷ ꓟ ꓥꓳ꓾ ꓬꓲ ꓞꓲꓼ (7) ꓘꓳꓼ ꓕꓯ ꓢꓲ ꓫꓬ ꓑ ꓑ ꓘꓳ, ꓣꓴ ꓗꓷ ꓟ ꓥꓳ꓾ (17) ꓘꓳꓼ ꓕꓯ ꓙꓵꓻ ꓠꓲ, ꓤꓶꓻ ꓠꓯꓼ ꓗꓪ ꓓꓵꓽ ꓡꓰ ꓟ꓾ (27) ꓘꓳꓼ ꓕꓯ ꓔꓲꓺ ꓒꓽ ꓙꓵꓽ ꓪ ꓘꓳ, ꓣꓴ ꓗꓷ ꓟ꓾ (37) ꓘꓳꓼ ꓕꓯ ꓔꓲꓺ ꓒꓽ ꓓꓽ ꓙꓵꓽ ꓪ ꓘꓳ, ꓣꓴ ꓗꓷ ꓟ꓾ (47) ꓘꓳꓼ ꓕꓯ ꓑꓮꓔꓧꓰꓲꓠ ꓢ‐ꓢꓲ‐ꓠ ꓗꓪ ꓔꓲꓺ ꓒ ꓓꓽ ꓙꓵꓽ ꓪ ꓐꓰ ꓟꓬꓱꓽ ꓬꓰ ꓗꓷ ꓟ꓾ (57) ꓘꓳꓼ ꓕꓯ ꓬꓮꓠꓖꓳꓠ ꓔꓲꓺ ꓒꓽ ꓓꓽ ꓢ‐ꓢꓲ‐ꓠ ꓗꓪ ꓔꓲꓺ ꓒꓽ ꓓꓽ ꓟ ꓙꓵꓽ ꓪ ꓐꓰ ꓟꓬꓱꓽ ꓬꓰ ꓗꓷ ꓟ꓾ (67) ꓘꓳꓼ ꓕꓯ ꓚꓮꓣꓓꓲꓠꓮꓡ ꓙꓵꓽ ꓪ ꓘꓳ, ꓣꓴ ꓗꓷ ꓟ꓾ (77) ꓘꓳꓼ ꓕꓯ ꓫꓵꓺ ꓙꓴ‐ꓐꓲ‐ꓡꓲ ꓔꓯ ꓬꓰ ꓔꓬ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿

ꓔꓲꓺ ꓒꓽ ꓓꓽ ꓟ ꓠꓬ꓾ ꓬꓲ ꓔꓬ ꓟ ꓙꓵ, ꓘꓴꓽ ꓗꓪ ꓟꓽ ꓪ ꓟꓽ ꓫꓱ, ꓟ ꓜꓴꓻ ꓘꓴꓽ ꓗꓪ ꓝ. ꓖꓶ_ ꓟ ꓓꓽ ꓖꓴ ꓕꓲꓽ ꓟ ꓡꓰ ꓐꓰ ꓢꓯꓼ ꓕꓵꓼ ꓔꓬ ꓟ ꓥ ꓢꓲ꓾ ꓟꓬ‐ꓟ ꓗꓴꓷꓼ ꓢꓲ ꓡꓲ, ꓟꓶ ꓠ, ꓟ꓾ ꓗꓴꓷꓼ ꓫꓵꓽ ꓪꓴ ꓔꓯ ꓬꓲ. ꓟꓶꓽ ꓢꓰꓼ ꓗꓷ ꓠ, ꓟ ꓠꓬ ꓬꓲ. ꓠꓲ., ꓡꓶꓽ ꓥ ꓡꓳ꓿ ꓢ‐ꓢꓲ‐ꓠ ꓬꓲ. ꓔꓶ. 7 ꓟ ꓗꓪ ꓔꓲꓺ ꓒꓽ ꓓꓽ ꓐꓰ ꓟꓬꓱꓽ ꓬꓰ ꓗꓷ ꓢꓲ ꓠꓬꓲ 1948 ꓘꓳꓼ 10 ꓦ ꓟ 29 ꓠꓬꓲ ꓕꓯ ꓟꓬ‐ꓟ ꓗꓴꓷꓼ ꓢꓮꓖꓮꓲꓠꓖ ꓟꓵꓽ ꓫꓴꓺ ꓟꓳꓠꓧꓡꓮ ꓞꓳ ꓘ, ꓗꓪ ꓦꓵꓻ ꓗꓷ ꓟ ꓥ ꓡꓳ꓿

ꓕꓱ ꓙꓴ‐ꓐꓲ‐ꓡꓲ ꓑꓮꓲ ꓚꓵ. ꓟꓶ ꓓꓴ ꓠꓬ ꓙꓵꓻ ꓠꓲ,꓾ ꓕꓷ ꓕꓷ ꓔꓬ ꓠ, ꓟ ꓐꓰ ꓪꓴ‐ꓢ ꓗꓪ ꓐꓰ ꓐꓯ ꓖꓴ ꓟꓽ ꓓ ꓟ ꓣꓱ ꓛꓰ ꓐꓱ ꓶ ꓢꓷ. ꓙ ꓟꓳ ꓙ ꓓꓴ ꓕꓲ ꓟ ꓥ ꓡꓳ꓾ ꓕꓱ ꓟ ꓠꓬ ꓢ‐ꓢꓲ‐ꓠ ꓟꓬꓱꓽ ꓬꓰ ꓢꓴ ꓐꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓮ ꓙꓵ ꓬꓰ‐ꓢꓴ ꓙꓲ‐ꓢꓴ ꓠꓯꓼ ꓗꓪ ꓙꓵꓻ ꓟ ꓝꓮꓲ ꓬꓲ. ꓫꓵꓼ ꓢꓯ. ꓔꓬ ꓐ ꓡ ꓠ, ꓟ ꓢꓯꓼ ꓪ ꓖꓶ ꓟ ꓥ ꓡꓳ꓿

“ꓕꓱ ꓟ ꓠꓬ ꓬꓲ. ꓞꓲ ꓘꓳꓼ ꓛꓲ ꓟꓬꓱꓽ ꓬꓰ ꓡꓳ, ꓬꓰ ꓟ ꓠꓯꓼ ꓗꓪ ꓫꓱ. ꓖꓶ ꓟ ꓡꓰ ꓐꓰ ꓜꓲꓼ ꓡ ꓢꓴ ꓐꓴ ꓮ ꓙꓵ ꓐꓱ ꓶ ꓥ ꓟꓲ ꓦ ꓕꓲ ꓒꓳ, ꓗꓪ ꓢꓷ. ꓡꓰ ꓓꓴ ꓡꓵ. ꓔꓴ ꓖꓶ_ ꓟ ꓕꓲ ꓟ ꓥ ꓡꓳ꓿ ꓔꓱ, ꓟ ꓢꓯꓼ ꓪ ꓠꓬ ꓚꓲ ꓛꓬ ꓗꓪ ꓐꓰ ꓡ ꓟ ꓟꓽ ꓥ꓾ ꓙꓵꓻ ꓠꓲ, ꓐꓰ ꓪꓴ‐ꓢ ꓣꓱ ꓛꓰ ꓗꓪ ꓐꓰ ꓡꓰ ꓪ ꓡ ꓟ ꓥ ꓟ ꓔꓯ ꓥ ꓟꓲ ꓢꓷ. ꓡꓰ ꓝꓲ_ ꓟ ꓥꓳ꓿”