ꓢꓲ ꓒ ꓪꓴ‐ꓢ ꓬꓲ ꓟꓳ. ꓖꓶˍ ꓟ ꓐꓰ ꓐꓯˍ ꓟ ꓑꓮꓲꓽ ꓥ ꓟ ꓢꓷ. ꓠꓲ, ꓙꓳˍ ꓒ ꓢ ꓣꓳ (Epiphany) ꓑꓮꓲꓽ ꓕꓯ ꓔꓲꓺ ꓒ ꓪ ꓔꓲ. ꓡꓰꓳ (14) ꓠꓬ ꓙꓲꓻ ꓫꓬ ꓢꓴ ꓑꓰꓔꓰꓣ ꓐꓮꓢꓲꓡꓲꓚꓮ ꓪꓽ ꓘꓴ ꓦꓲ ꓗꓪ ꓘꓴ ꓜꓲꓼ ꓞꓳ ꓢꓲ ꓤ 5,800 ꓣꓳ ꓛꓲ ꓐꓰ ꓕꓲ ꓪꓽˍ ꓟꓲ‐ꓢ ꓔꓲꓺ ꓪꓽ ꓘꓴˍ ꓟ ꓔꓯ ꓧꓳꓽ ꓣꓱꓽ ꓗꓷ ꓢꓲ꓾ ꓡꓳ, ꓬꓰˍ ꓟ ꓕꓲ ꓟ ꓥ ꓟ “ꓢꓲꓽ ꓫꓬˍ ꓟ ꓗ ꓘꓶꓽ” (Holy Door) ꓔꓯ ꓚꓲ. ꓗꓷ ꓢꓲ “ꓥꓳ ꓡꓳ.ˍ ꓟ ꓙꓴꓐꓲꓡꓰꓰ ꓘꓳꓼ” (Jubilee Year of Hope) ꓔꓯ ꓬꓲ ꓟꓶꓽ ꓢꓰꓼ ꓗꓷꓳ꓿
ꓠꓽ ꓠꓬꓲꓽ ꓠꓬꓲ ꓢꓷ. ꓠꓲ, ꓙꓳ ꓒ ꓢ ꓣꓳ (Epiphany) ꓑꓮꓲꓽꓗꓪ ꓔꓲꓺ ꓒ ꓪ ꓔꓲ. ꓡꓰꓳ ꓠꓬ ꓙꓲꓻ ꓫꓬ ꓢꓴ ꓑꓰꓔꓰꓣ ꓐꓮꓢꓲꓡꓲꓚꓮ ꓪꓽ ꓘꓴ ꓦꓲꓻ ꓗꓪ ꓘꓴ ꓜꓲꓼ ꓞꓳ ꓢꓲ ꓤ 5,800 ꓣꓳ ꓛꓲ ꓐꓰ ꓕꓲꓽ ꓪˍ ꓟꓲ‐ꓢ ꓔꓲꓺ ꓪꓽ ꓘꓴ ꓗꓷ ꓟ ꓥ ꓡꓳ꓿
ꓟꓲ‐ꓢ ꓬꓲ ꓪꓴ. ꓕꓯ ꓔꓲꓺ ꓒ ꓪ ꓔꓲ. ꓡꓰ ꓙꓴꓐꓲꓡꓰꓰ ꓘꓳꓼ ꓐꓱ ꓶ ꓒꓴ ꓔˍ ꓟ ꓢꓲꓽ ꓫꓬˍ ꓟ ꓗ ꓘꓶꓽ ꓮ ꓟꓬ, ꓟ ꓠꓯꓸꓼ ꓗꓪ ꓡꓳ, ꓬꓰˍ ꓟ ꓕꓲ ꓟ ꓥ ꓟ ꓙꓲꓻ ꓫꓬ ꓢꓴ ꓑꓰꓔꓰꓣ ꓪꓽ ꓘꓴ ꓦꓲ ꓗ ꓘꓶꓽ ꓔꓯ ꓚꓲ. ꓗꓷꓳ꓿ ꓕꓱ ꓟ ꓠꓬ “ꓥꓳ ꓡꓳ.ˍ ꓟ ꓬꓲ ꓓꓴ ꓓꓳ ꓢꓴ ꓐꓴ (Pilgrims of Hope)” ꓐꓰ ꓔꓲꓺ ꓒ ꓪ ꓔꓲ. ꓡꓰ ꓘꓴˍ ꓟ ꓵꓻ ꓖꓴ ꓟꓽ ꓓ ꓟ ꓤ ꓑ. ꓤ꓾ ꓤ ꓟꓶ ꓤ ꓮ ꓙꓵꓽ ꓠꓬ “ꓗ ꓘꓶꓽ ꓮ ꓕꓯ ꓟꓲ ꓒꓴ ꓔˍ ꓟ ꓡꓳ ꓒꓱ꓾ ꓙꓱ‐ꓣꓴ‐ꓢ‐ꓡꓱ ꓡꓳ ꓒꓱ ꓫꓵꓼ” ꓗꓪ ꓟꓳ. ꓔˍ ꓢꓲ ꓪꓽ ꓘꓴ ꓦꓲ ꓗ ꓘꓶꓽ ꓗꓪ ꓗꓳ. ꓙꓰˍ ꓟ ꓬꓲ. ꓦꓬꓼ ꓠꓬꓲ ꓔꓯ ꓬꓲ ꓟꓶꓽ ꓢꓰꓼ ꓗꓷ ꓟ ꓥ ꓡꓳ꓿
ꓟ‐ꓕꓲ ꓢꓲꓽ ꓫꓬ ꓕꓳꓽ ꓶ ꓥ ꓟ ꓖꓳ ꓕꓲ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓔꓱ, ꓕˍ ꓟ ꓗꓪ ꓔꓲꓺ ꓒ ꓪ ꓔꓲ. ꓡꓰ ꓢꓷ. ꓠꓲ, ꓙꓳ ꓒ ꓐꓴ ꓠꓲ, ꓒꓴˍ ꓟ ꓐꓰ ꓩꓴ‐ꓡꓲ ꓪ ꓔꓲ. ꓙꓳꓺ ꓛꓱꓽˍ ꓟ ꓔꓯ ꓔꓯꓺ ꓢꓲ ꓟ. ꓟꓲꓽ ꓚꓺ ꓗꓷꓳ꓿ “ꓢꓲꓽ ꓫꓬ ꓕꓳꓽ ꓶ ꓠꓬ ꓢꓲ ꓒ ꓪꓴ‐ꓢ ꓬꓲ ꓚꓲ. ꓛꓬ ꓒꓬꓱꓽ ꓟꓳꓻ ꓡˍ ꓟ ꓚꓱ, ꓔꓯ ꓐꓯˍ ꓕ ꓑꓳꓸꓼ ꓠꓲ, ꓒꓴˍ ꓟ ꓐꓰ ꓙꓳꓺ ꓛꓱꓽˍ ꓟ꓾ ꓒꓳ, ꓔꓳ,ˍ ꓟ ꓐꓰ ꓠ ꓡꓳ.ˍ ꓟ꓾ ꓙꓳꓺˍ ꓟ ꓐꓰ ꓟꓷꓼ ꓢꓲꓼˍ ꓟ ꓕꓱ ꓡꓱ ꓟꓽ ꓫꓱ. ꓡꓯ ꓘꓳ ꓓꓴ ꓔꓯ ꓟꓽ ꓚꓵ ꓔ” ꓐꓰ ꓐꓯ ꓗꓷꓳ꓿ ꓖꓳ ꓟ ꓡꓰꓽ ꓟꓽ ꓞꓲꓺ Epiphany ꓑꓮꓲꓽ ꓠꓬ ꓪꓴ‐ꓢ ꓬꓲ ꓙꓳꓻ ꓔꓬ ꓟ ꓠꓬ ꓮ ꓙꓵꓽ ꓔꓯ ꓚꓵ ꓔ ꓟ ꓟꓽ ꓙꓳ ꓙꓳ꓾ ꓫꓬꓽ ꓫꓬꓽ ꓡꓰꓽ ꓢꓲꓽ ꓢꓲꓽ ꓡꓰꓽ ꓟꓳ. ꓖꓶ ꓔꓬ ꓡꓳ ꓐꓰ ꓬꓲ ꓡꓰ ꓝ. ꓢꓲ ꓐꓯˍ ꓡꓳ꓿
ꓪꓴ‐ꓢ ꓒꓬꓱꓽ ꓟꓳ ꓡˍ ꓟ ꓠꓬ ꓥꓳ ꓡꓳ. ꓓꓴ ꓬꓲ ꓪꓴ. ꓔꓴˍ ꓟ ꓥ ꓟ꓾ ꓢꓲ ꓒ ꓬꓲ ꓙꓳꓻ ꓔꓬ ꓟ ꓠꓬ “ꓟꓲꓽ ꓟꓲ ꓠꓯꓸꓼ ꓘꓪ ꓫꓵꓼˍ ꓟ ꓟꓽ ꓙꓳ” ꓐꓰ ꓞꓳ ꓤ ꓐꓴ ꓔꓯ ꓱꓽ ꓠꓱꓼ ꓝꓲˍ ꓟ ꓠꓲ, ꓟ ꓙꓬ ꓡꓰ ꓓꓴ ꓔꓯ ꓡꓳ, ꓬꓰ ꓝꓲˍ ꓟ ꓥ ꓡꓳ꓾ ꓔꓲꓺ ꓒ ꓪ ꓔꓲ. ꓡꓰ ꓝ. ꓢꓲ ꓐꓯˍ ꓡꓳ꓿ “ꓔꓴ꓾ ꓡꓬ. ꓔꓬ꓿ ꓮ ꓡꓲꓳ ꓐꓯˍ ꓠꓬ ꓠꓴ ꓠꓬꓲ ꓟꓳꓻ ꓓꓴ ꓠꓬ ꓛꓲ ꓡꓺꓳ꓿ ꓢꓲ ꓒ ꓪꓴ‐ꓢ ꓬꓲ ꓐꓬꓱꓼ ꓡꓱꓼ ꓡꓱꓼ ꓟ ꓠꓬ ꓠꓴ ꓕꓯꓽ ꓢꓲ ꓗꓪ ꓡꓬ. ꓡꓺꓳ” ꓐꓰ ꓐꓯˍ ꓟ ꓟꓷꓽ ꓠꓷ, ꓝ. ꓘꓶꓽ ꓐꓰ ꓕꓲ ꓡꓰ, ꓮ ꓟꓶ ꓐꓰ ꓡ ꓠ, ꓟ ꓦꓬꓼ ꓠꓬꓲ ꓔꓯ ꓐꓯ ꓞꓷ, ꓖꓶˍ ꓟ ꓬꓲꓼ ꓫꓵꓼ ꓟ ꓕꓲ ꓫꓵꓽ ꓬꓲ ꓪꓴ. ꓔꓴ ꓗꓷ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓟꓷꓽ ꓠꓷ, ꓝ. ꓘꓶꓽ ꓮ ꓙꓵꓽ ꓔꓯ ꓢꓷ. ꓔˍ ꓡꓳ꓾ ꓐꓰ ꓬꓲ ꓪ ꓚꓲ. ꓛꓬ ꓓꓵꓽ ꓙ ꓟꓶ ꓔꓬ ꓟ ꓙꓱ‐ꓣꓴ‐ꓢ‐ꓡꓱ ꓡꓳ ꓒꓱ ꓢꓴ ꓐꓴ ꓠꓬ ꓢꓷ. ꓠꓲ, ꓙꓳ ꓒ ꓐꓴ ꓡꓰ ꓧꓪ ꓡˍ ꓟ ꓑꓶ. ꓓꓴ ꓠꓲ, ꓟ ꓘꓶꓻ ꓡꓶ ꓡꓰꓳ꓿ ꓬꓲ ꓪ ꓠꓬ “ꓠꓺ ꓠꓬꓲˍ ꓟ ꓐꓰ ꓥꓳ ꓡꓳ.ˍ ꓟ ꓒꓲꓼ ꓡꓰ ꓟ ꓡꓰ ꓥꓳ” ꓐꓰ ꓔꓲꓺ ꓒ ꓪ ꓔꓲ. ꓡꓰ ꓐꓯˍ ꓡꓳ꓿ “ꓥꓳ ꓡꓳ. ꓓꓴ ꓑꓶ. ꓓꓴ ꓛꓲ ꓡ ꓢꓴ ꓐꓴ” ꓕꓯꓽ ꓢꓲ ꓗꓪ ꓡꓳ ꓒꓱ ꓖꓳ ꓟ ꓙꓳꓺ ꓛꓱꓽ ꓔꓬ ꓟ ꓠꓬ ꓠꓲ, ꓒꓴ ꓓꓴ ꓟꓽ ꓗꓷ ꓡꓰ ꓡꓰ ꓐꓰ ꓙꓳꓺ ꓗꓽ ꓓꓴ ꓕꓲ ꓟˍ ꓡꓰ ꓐꓰ ꓚꓬ, ꓪˍ ꓟ ꓥ ꓡꓳ꓿ “ꓕꓱ ꓟ ꓠꓬ ꓘꓴ ꓜꓲꓼ ꓞꓳ ꓥ ꓟ ꓣꓳ ꓔꓯ ꓥˍ ꓟꓲ ꓙꓳꓺ ꓗꓽ ꓔꓬ ꓟ ꓥ ꓡꓳ” ꓐꓰ ꓬꓲ ꓡꓰ ꓐꓯˍ ꓡꓳ꓿
ꓖꓳ ꓗ ꓠꓯ. ꓙꓴꓐꓲꓡꓰꓰ ꓘꓳꓼ ꓔꓯ ꓝꓮꓲ ꓕꓲ ꓧꓪ, ꓓꓵꓽ ꓙꓽ ꓠꓬꓲ ꓗꓷ ꓢꓲ ꓔꓲꓺ ꓪ ꓔꓲ. ꓡꓰꓳ ꓡꓰ ꓮ ꓟꓶ ꓟ ꓞꓳ ꓤ ꓐꓴ ꓬꓲ ꓪ ꓦ ꓔꓯ ꓟꓳ. ꓧꓪˍ ꓟ ꓚꓱ, ꓐꓴ ꓔꓯ ꓓꓵꓽ ꓙ ꓠꓬꓲ ꓠ, ꓟ ꓕꓵꓼ ꓪ ꓖꓶ ꓗꓷꓳ꓿ “ꓬꓲ ꓪ ꓐꓴ ꓠꓬ ꓮꓽ ꓟ ꓥ ꓡ꓾ ꓮ ꓡꓲ ꓟ ꓠꓬ ꓬꓲ ꓪ ꓔꓯ ꓡꓵ, ꓫꓴ ꓖꓶ ꓗꓷ ꓡ꓿ ꓬꓲ ꓪ ꓮ ꓫꓵꓽ ꓔꓯ ꓧꓪ ꓟꓶ ꓡꓰ ꓡ꓿ ꓬꓲ ꓪ ꓠꓲ, ꓟ꓾ ꓬꓲ ꓪ ꓠꓺ ꓠꓬꓲ ꓘꓶꓽ ꓐꓰ ꓬꓲ ꓪ ꓓꓵꓽ ꓙꓽ ꓚꓱ, ꓐꓴ ꓠꓬ ꓮ ꓫꓵꓽ ꓥ ꓡ” ꓐꓰ ꓠꓺ ꓠꓬꓲ ꓘꓶꓽ ꓖꓶ ꓗꓷꓳ꓿ ꓢꓷ. ꓠꓲ, ꓙꓳ ꓒ ꓐꓴˍ ꓡꓰ ꓐꓰ ꓠꓬꓲ. ꓠꓬꓲ ꓟ ꓦꓬꓼ ꓠꓬꓲ ꓗꓪˍ ꓟꓲ ꓫ. ꓢꓲ ꓠꓬꓲ ꓙꓳꓺ ꓠ ꓔˍ ꓟ ꓟꓲ ꓠꓯ ꓗꓪ ꓢꓯꓼ ꓕꓵꓼ ꓢꓲ ꓧꓪ ꓠ, ꓟ ꓣꓱꓽ ꓞ, ꓡꓳ ꓐꓰ ꓓꓵꓽ ꓙꓽ ꓟꓶ ꓔꓬ ꓢꓴ “ꓠꓬꓲ. ꓠꓬꓲ ꓢꓷ. ꓠꓲ, ꓙꓳ ꓒ ꓐꓴ” ꓠꓬ ꓙꓳ ꓔꓬ ꓡꓳ꓾ ꓐꓰ ꓬꓲ ꓡꓰ ꓐꓯ ꓗꓷꓳ꓿
ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓡꓳ, ꓬꓰˍ ꓕꓯ ꓔꓲꓺ ꓒ ꓪ ꓔꓲ. ꓡꓰꓳ ꓡꓰ Epiphany ꓑꓮꓲꓽ ꓬꓲ ꓝꓳ, ꓟꓶ ꓠꓬ ꓪꓴꓻ ꓟꓶ ꓟꓽ ꓓꓻ꓾ ꓙꓵꓽˍ ꓟꓲ ꓙꓵꓽ ꓟꓽ ꓐ ꓡ ꓟ ꓡꓯꓼ ꓫꓴ ꓥ ꓡꓳ ꓐꓰ ꓐꓯ ꓗꓷꓳ꓿ “ꓢꓷ. ꓠꓲ, ꓙꓳ ꓒ ꓐꓴ ꓪꓴ. ꓓꓵ ꓕꓱꓼ ꓗꓷ ꓟ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓒꓵꓽ ꓐꓯ ꓞꓷ, ꓟꓽ ꓓꓻ ꓟ ꓙꓲꓻˍ ꓟ ꓢꓲ ꓒ ꓥ ꓡꓳ” ꓢꓲ ꓒ ꓬꓲ ꓒꓬꓱꓽ ꓟꓳ ꓡˍ ꓟ ꓠꓬ ꓮ ꓘꓶ. ꓐꓲˍ ꓟ ꓪꓴꓽ ꓓꓰˍ ꓟ ꓗꓪ ꓟꓽ ꓥ ꓥ꓾ ꓙ ꓣꓳˍ ꓟ ꓗꓪ ꓥ ꓐꓯˍ ꓥ ꓟꓲ ꓐꓱ‐ꓡꓱ‐ꓦꓱ ꓡꓳ ꓒꓱ ꓔꓯ “ꓠꓴ ꓠꓬ ꓮ ꓔꓲ. ꓤˍ ꓟꓲ ꓟꓽ ꓣꓳꓺ” ꓐꓰ ꓐꓯ ꓗꓷꓳ꓿
“ꓥꓳ ꓡꓳ.ˍ ꓟ ꓬꓲ ꓓꓴ ꓓꓳ ꓢꓴ ꓐꓴ (Pilgrims of Hope) ꓒꓬꓱꓼ ꓡˍ ꓟ ꓠꓬ ꓓꓵꓽ ꓙꓽ ꓟꓶ ꓓꓴ ꓥ ꓡꓳ꓿ ꓣꓳ ꓠꓬ ꓕꓲ ꓠꓲ, ꓕꓲ ꓪꓽ ꓓꓴ ꓓꓳ ꓔꓬ ꓟˍ ꓟꓲ ꓓꓵꓽ ꓙꓽ ꓟꓶ ꓓꓴ ꓥ ꓡꓳ” ꓐꓰ ꓔꓲ ꓒ ꓪ ꓔꓲ. ꓡꓰ ꓐꓯˍ ꓡꓳ꓿ ꓘꓴ ꓜꓲꓼ ꓞꓳ ꓠꓬ ꓢꓷ. ꓡꓰ ꓓꓴ ꓦꓲ ꓕꓲ ꓟˍ ꓡꓰ ꓐꓰ ꓟꓽ ꓦꓰꓼ ꓞ, ꓞ, ꓐꓰ꓾ ꓞꓳ ꓤ ꓐꓴ ꓪꓴꓽ ꓧꓶ ꓠꓽ ꓐ ꓡˍ ꓟ “ꓦꓲ” ꓕꓲ ꓟˍ ꓡꓰ ꓐꓰ ꓦꓰꓼ ꓞ, ꓕꓯ ꓠꓽ꓾ ꓟ, ꓟ ꓟ‐ꓡꓲ ꓬꓲ ꓙ ꓖꓴ ꓟ. ꓖꓶ ꓡˍ ꓟ ꓗꓪ ꓐꓰ꓾ ꓠꓵꓻ ꓠꓲ, ꓗꓪ ꓐꓰ ꓟꓲ ꓠꓯ ꓞꓳ ꓤ ꓒꓬꓱꓼ ꓡˍ ꓟ ꓢꓲ ꓒ ꓪꓴ‐ꓢ ꓗꓪ ꓐꓰ ꓒꓬꓱꓽ ꓑꓶ. ꓔˍ ꓟ ꓪꓽ ꓠꓬꓲˍ ꓟ ꓞꓳ ꓤ ꓕꓲ ꓪꓳꓼ꓾ ꓠꓯꓼ ꓠꓯꓼ ꓗꓴ ꓟ ꓤꓲꓻ ꓬꓲ ꓞꓲꓼ ꓤ ꓡꓯ, ꓤ ꓐꓴ” ꓒꓬꓱꓼ ꓡˍ ꓥꓳ꓾ ꓐꓰ ꓬꓲ ꓟꓶꓽ ꓗꓪ ꓐꓯ ꓗꓷꓳ꓿
News – Vatican News
