ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓟ ꓕꓲ ꓐꓱ ꓟ ꓔꓯ ꓠꓽ ꓟꓲ ꓡꓰ, ꓗꓷ ꓠ ꓔˍ ꓡꓳ꓾ ꓜꓳꓽ꓿ ꓣꓳ ꓮ ꓕꓯ ꓟꓲ ꓑ ꓙꓽ ꓠꓬꓲˍ ꓥꓳ꓿ ꓟꓲ ꓡꓰ, ꓗꓷˍ ꓟ ꓐꓯˍ ꓟ ꓠꓬ ꓣꓳ ꓚꓲ. ꓔ ꓟꓽ ꓛꓵ ꓟ ꓐꓴ ꓔꓯ ꓝꓮꓲ ꓕꓲ ꓧꓪ, ꓟꓽ ꓓꓵꓽ ꓙꓽ ꓠꓬꓲ ꓟ ꓥ ꓡꓳ꓿ ꓣꓳ ꓚꓲ. ꓔ ꓟꓽ ꓛꓵ ꓟ ꓚꓱ, ꓐꓴ ꓔꓯ ꓝꓮꓲ ꓕꓲ ꓧꓪ, ꓓꓵꓽ ꓙꓽ ꓠꓬꓲˍ ꓕ ꓑꓳꓸꓼ ꓣꓳ ꓠꓲ, ꓟ ꓗꓪ ꓠꓻ ꓡˍ ꓟ꓾ ꓣꓳ ꓔꓯ ꓫ. ꓔꓳ ꓡꓰ ꓝꓲˍ ꓟ꓾ ꓠꓲ, ꓟ ꓫ. ꓡꓰ ꓝꓲˍ ꓟ꓾ ꓠꓲ, ꓟ ꓣꓳ ꓡˍ ꓟ꓾ ꓠꓲ, ꓟ ꓦꓶ ꓡ ꓝꓲˍ ꓟ ꓕꓱ ꓡꓱ ꓫꓵꓽ ꓔꓯ ꓝꓮꓲ ꓕꓲ ꓧꓪ, ꓒꓬꓱꓼ ꓡ ꓝꓲˍ ꓟ ꓚꓱ, ꓐꓴ ꓔꓯ ꓝꓮꓲ ꓕꓲ ꓧꓪ, ꓓꓵꓽ ꓙꓽ ꓠꓬꓲ ꓟꓽ ꓓꓻꓳ꓿
ꓗꓳ. ꓗꓷ ꓟ ꓔꓯ ꓓꓵꓽ ꓙꓽ ꓠꓬꓲˍ ꓕ ꓑꓳꓸꓼ ꓕꓯꓽ ꓢꓲ ꓗꓪ ꓐꓯ ꓗꓷ ꓟ ꓡꓰ ꓒꓬꓱꓼ ꓡˍ ꓕꓯ ꓠꓽ ꓣꓳ ꓖꓳ ꓓꓱꓽˍ ꓡꓰꓽ ꓬꓲ ꓫꓵꓼ ꓕꓱ ꓟ ꓡꓰ ꓝꓮꓲ ꓕꓲ ꓧꓪ, ꓘꓶꓻ ꓡꓶ ꓡˍ ꓥꓳ꓿ ꓖꓳ ꓟ ꓑꓶ. ꓓꓴ ꓣꓳ ꓔꓯ ꓠꓻ ꓡꓰ ꓝꓲˍ ꓟˍ ꓟꓲ ꓬꓲ ꓪꓴ. ꓗꓪ ꓐꓰ ꓝꓮꓲ ꓕꓲ ꓧꓪ, ꓠꓻ ꓡꓰ ꓝꓲˍ ꓡꓳ꓿ ꓠꓲ, ꓟ ꓦꓶˍ ꓟˍ ꓟꓲ ꓠꓲ, ꓟ ꓦꓶ ꓗꓳ. ꓗꓷ ꓟ ꓔꓯ ꓝꓮꓲ ꓕꓲ ꓧꓪ, ꓓꓵꓽ ꓙꓽ ꓠꓬꓲˍ ꓕꓯ ꓣꓳ ꓠꓬ ꓝꓮꓲ ꓬꓲ ꓫꓵꓼ ꓠꓲ, ꓟ ꓦꓶ ꓡˍ ꓡꓳ꓿ ꓕꓲ ꓚꓱ, ꓐꓯ ꓪˍ ꓠꓬ ꓣꓳ ꓠꓲ, ꓟ ꓓꓵꓽ ꓙꓽ ꓚꓱ, ꓔꓯ ꓪ ꓜꓲ ꓫ. ꓡꓰ ꓝꓲˍ ꓡꓳ꓿
“ꓝꓮꓲ ꓕꓲ ꓧꓪ, ꓐꓯ ꓟꓽ ꓙꓲꓻ ꓟ꓾ ꓛꓱꓽ ꓟꓽ ꓧꓺ ꓟ ꓚꓱ, ꓐꓴ ꓔꓯ ꓟꓽ ꓐꓯ ꓟ ꓠꓬ ꓙꓲꓻ ꓓꓰ ꓡꓰˍ ꓟ ꓥꓳ” ꓜꓳꓽ꓿ ꓖꓳ ꓕꓯ ꓡꓰꓽ ꓣꓳ ꓠꓬ ꓝꓮꓲ ꓟꓽ ꓓꓵꓽ ꓙꓽ ꓛꓲ ꓡ ꓟ ꓥꓳ꓿ ꓟꓽ ꓓꓵꓽ ꓙꓽ ꓛꓲ ꓡ ꓟ ꓟꓶ ꓫꓵ ꓡꓰˍ ꓕꓯ꓾ ꓟꓽ ꓓꓵꓽ ꓙꓽ ꓟꓶ ꓟ ꓟꓶ ꓫꓵ ꓡˍ ꓕꓯ ꓣꓳ ꓠꓲ, ꓟ ꓠꓬ ꓟꓲ ꓡꓰ, ꓗꓷˍ ꓡꓳ꓿ ꓣꓳ ꓝꓮꓲ ꓕꓲ ꓧꓪ, ꓓꓵꓽ ꓙ ꓟꓶ ꓡ ꓝꓲ ꓠꓲ, ꓟꓽ ꓫꓵ ꓟ ꓚꓱ, ꓐꓴ ꓔꓯ ꓓꓵꓽ ꓙꓽ ꓟꓶ ꓡˍ ꓕ ꓑꓳꓸꓼ “ꓬꓲ ꓚꓱ, ꓕꓱ ꓟ ꓔꓯ ꓝꓮꓲ ꓟꓽ ꓓꓵꓽ ꓙꓽꓳ꓿ ꓝꓮꓲ ꓕꓲ ꓧꓪ, ꓕꓽ ꓓꓵꓽ ꓙꓽ ꓨ” ꓐꓯ ꓢꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓙꓳꓺ ꓗꓽ ꓖꓶ ꓠ ꓗ, ꓡꓳ꓿
ꓮ ꓡꓲ ꓗ, ꓠꓬꓲ ꓟꓲ ꓡꓰ, ꓝꓲ ꓗꓷ ꓠ ꓔˍ ꓡ ꓐꓯ ꓠꓬ꓾ ꓕꓯꓽ ꓢꓲ ꓗꓪ ꓐꓯ ꓗꓷ ꓟ ꓡꓰ ꓠꓻ ꓙꓵ ꓓꓴ ꓐꓰ ꓟꓽ ꓙꓲꓻ ꓟ ꓠꓬ ꓬꓲ ꓪꓴ. ꓕꓲꓽ ꓗꓪ ꓐꓰ ꓝꓮꓲ ꓕꓲ ꓧꓪ, ꓣꓳ ꓔꓯ ꓠꓻ ꓡꓰ ꓝꓲˍ ꓟ ꓑꓶ. ꓓꓴ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓣꓳ ꓤꓶꓻ ꓔꓯ ꓮ ꓔꓳ. ꓛꓴˍ ꓟ ꓡꓰ ꓛ ꓔꓬ, ꓝꓲˍ ꓟ ꓚꓱ, ꓬꓲ ꓪꓴ. ꓔꓴ ꓓꓴ ꓠꓬ ꓓꓵꓽ ꓙꓽ ꓟꓶ ꓡˍ ꓟ ꓥ ꓡꓳ꓿ ꓟꓲ ꓡꓰ, ꓗꓷˍ ꓟ ꓠꓽ ꓗ, ꓛꓲꓽ ꓓꓴ ꓔꓯ ꓣꓳ ꓤꓶꓻ ꓗꓪ ꓓꓵꓽ ꓡ ꓠ, ꓟ ꓗ ꓘꓶꓽ ꓒꓴ ꓖꓶˍ ꓟ ꓔꓯ ꓫꓱ.ˍ ꓡꓳ꓿ ꓣꓳ ꓔꓯ ꓠꓻ ꓡꓰ ꓝꓲ ꓓꓴ ꓐꓴ ꓬꓲ ꓪ ꓬꓰ ꓗꓷ ꓟ ꓔꓯ ꓟꓲ ꓡꓰ, ꓗꓷˍ ꓟ ꓠꓬ ꓬꓲ ꓪ ꓔꓯ ꓖꓽ ꓖꓶˍ ꓟ ꓐꓯˍ ꓟ ꓢꓶ. ꓟꓽ ꓞꓲ ꓣꓳ ꓚꓲ. ꓛꓬ ꓐꓱ ꓶ ꓬꓲ ꓪ ꓔꓯ ꓟꓲ ꓡꓰ, ꓗꓷˍ ꓟ ꓥ ꓡꓳ꓿ ꓠꓱ. ꓐꓯ ꓢꓴ ꓑꓶ. ꓓꓴ ꓣꓳ ꓔꓯ ꓛ ꓡꓰ ꓝꓲˍ ꓟ ꓔꓯ ꓣꓳ ꓟꓽ ꓣꓴꓺꓳ꓿
ꓖꓽ ꓖꓶˍ ꓟ ꓐꓯˍ ꓟ ꓠꓬ ꓚꓲ. ꓛꓬ ꓐꓱ ꓶ ꓖꓽ ꓖꓶ ꓗꓷ ꓟ ꓥ ꓡꓳ꓿ ꓖꓳ ꓕꓯ ꓢꓲ. ꓡꓰꓽ ꓣꓳ ꓥˍ ꓟꓲ ꓩꓴ ꓗꓷ ꓟꓶ ꓡꓰ ꓢꓲ ꓠꓬꓲ ꓣꓳ ꓤꓶꓻ ꓔꓯ ꓟꓲ ꓙꓬ ꓙꓰ ꓐ ꓡˍ ꓥꓳ ꓟꓽ ꓥ ꓡ꓿ ꓖꓳ ꓟ ꓑꓶ. ꓓꓴ ꓣꓳ ꓤꓶꓻ ꓠꓯꓸꓼ ꓗꓪ ꓕꓲ ꓐꓱ ꓔꓯ ꓟꓲ ꓡꓰ, ꓗꓷ ꓠ ꓔˍ ꓡꓳ꓿ ꓘꓳ ꓣꓴ ꓢꓲ ꓣꓳ ꓔꓯ ꓙꓳ ꓔꓬ ꓟ ꓡꓰ ꓣꓳ ꓤꓶꓻ ꓔꓯ ꓝ. ꓢꓲ ꓞꓳ ꓙꓳ ꓠ ꓗ, ꓡꓳ꓿
ꓖꓳ ꓟ ꓪꓴ. ꓠꓬꓲ ꓣꓳ ꓔꓯ ꓠꓻ ꓡꓰ ꓝꓲ ꓢꓴ ꓐꓴ ꓔꓯ ꓕꓲ ꓔꓲ.ˍ ꓟꓲ ꓟꓽ ꓓꓵꓽ ꓙꓽ ꓟ ꓠꓬ ꓚꓲ. ꓛꓬ ꓔꓯ ꓚꓲ. ꓛꓬ ꓠꓲ, ꓠꓵˍ ꓟ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓐꓰ ꓪꓴ. ꓔꓴ ꓢꓲ ꓣꓳ ꓔꓯ ꓠꓻ ꓡꓰ ꓝꓲˍ ꓟ ꓕꓲ ꓐꓱ ꓔꓯ ꓟꓲ ꓡꓰ, ꓗꓷ ꓢꓲ꓾ ꓚꓲ. ꓛꓬ ꓚꓳꓽ ꓚꓲ. ꓛꓬ ꓖꓽ ꓖꓶ ꓓꓴ ꓬꓰ ꓡꓯ꓿
