ꓣꓳ ꓔꓬ ꓟ ꓟꓲ ꓠꓯ ꓐꓰ ꓣꓳ ꓕꓲ ꓦꓲꓻ ꓢꓴ ꓐꓴ ꓠꓯꓼ ꓗꓪ ꓢꓲ ꓡꓲ, ꓠ, ꓟ ꓪꓽ ꓘꓴ ꓓꓴ ꓬꓰ ꓡꓯ꓾
2026 ꓘꓳꓼ ꓬꓲ. ꓪꓴ. ꓥ ꓟꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓙꓴ‐ꓐꓲ‐ꓡꓲ ꓘꓳꓼ ꓠꓬ ꓟꓲ ꓠꓯ ꓤꓶꓻ ꓫꓵꓼ ꓕꓲ ꓟ ꓐꓱ ꓶ ꓥꓳ ꓡꓳ. ꓓꓴ ꓔꓯ ꓮ ꓡꓰ ꓐꓰ ꓫꓬ, ꓔꓶꓻ ꓠ, ꓟ ꓣꓳ ꓔꓯ ꓟ. ꓖꓶ ꓬꓲꓼ ꓠꓬꓲ. ꓖꓶ ꓗꓷ ꓟ ꓥꓳ꓿
ꓔꓲꓺ ꓒ ꓪ ꓔꓲ ꓡꓰ “ꓬꓲ. ꓪꓴ. ꓗꓪ ꓫꓵ ꓪꓴ ꓐꓰ ꓫ. ꓙꓵ ꓟꓷꓼ ꓙꓵ ꓟ ꓑꓶ ꓓꓴ ꓢꓲꓽ ꓧꓳ. ꓔꓬ ꓟ ꓗꓴꓷꓼ ꓠꓯꓼ ꓗꓪ ꓥ ꓟꓲ ꓖꓳ ꓟ ꓡꓰ ꓐꓰ ꓜꓲ ꓜꓲ ꓟꓴ ꓟꓴ ꓬꓰ ꓢꓲ ꓫ ꓙꓵ ꓔꓬ ꓟ ꓠꓻ ꓓꓴ ꓔꓬ ꓟ ꓣꓳ ꓕꓲ ꓦꓲꓻ ꓢꓴ ꓐꓴ ꓠꓯꓼ ꓗꓪ ꓥ ꓟꓲ “ꓢꓲ ꓡꓲ, ꓠ, ꓟ ꓐꓱ ꓶ ꓕꓲ ꓪ ꓪꓽ ꓘꓴ ꓠ, ꓟ ꓢꓯꓼ ꓖꓶ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓘꓳꓼ ꓫꓵꓼ ꓦꓬꓼ ꓠꓬꓲ ꓛꓲ ꓡ ꓟ ꓡꓰ ꓐꓰ “ꓕꓲ ꓞꓲꓼ ꓕꓲ ꓑ ꓟ ꓪꓴ‐ꓢ ꓠꓬ ꓞꓳ ꓫꓵ ꓞꓳ ꓙꓰ ꓗꓳ, ꓡꓳ ꓗꓪ ꓢꓲ ꓡꓲ, ꓟ ꓐꓰ ꓠꓲ, ꓠꓵꓻ ꓡꓯ ꓘꓳ ꓟ ꓔꓯ ꓪꓴ. ꓔꓴ ꓗꓷ ꓟ ꓗꓪ ꓐꓰ ꓣꓳ ꓤꓶꓻ ꓔꓯ ꓝꓮꓲ ꓬꓲ ꓫꓵꓼ ꓒꓬꓱꓼ ꓡꓰ ꓠ, ꓟ ꓘꓴ ꓔ ꓡꓳ꓾” ꓐꓰ ꓐꓯ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓙꓴ‐ꓐꓲ‐ꓡꓲ ꓘꓳꓼ ꓠꓬ ꓣꓳ ꓔꓯ “ꓛꓬ ꓥꓳꓽ ꓡꓰ ꓟ ꓔꓯ ꓖꓽ ꓖꓶ_ ꓟ ꓐꓰ ꓥ ꓟꓲ ꓫ ꓙꓵ ꓓꓴ ꓔꓯ ꓠꓲ, ꓗꓳ. ꓟꓬ ꓗꓳ. ꓟ ꓐꓰ ꓥ ꓟꓲ ꓓꓵ ꓙ ꓞꓷ, ꓓꓴ ꓔꓯ ꓙꓲ_ ꓟ ꓡꓰ ꓥ ꓟꓲ ꓒꓳ, ꓡꓶ. ꓖꓶ ꓠ, ꓟ ꓐꓱ ꓶ ꓣꓳ ꓠꓲ, ꓟ ꓔꓯ ꓪꓴ‐ꓢ ꓠꓯꓼ ꓗꓪ ꓒꓳ, ꓡꓶ. ꓟ ꓗꓪ ꓐꓰ ꓟꓲ ꓠꓯ ꓤꓶꓻ ꓫꓵꓼ ꓕꓲ ꓟ ꓐꓱ ꓶ ꓥꓳ ꓡꓳ. ꓓꓴ ꓔꓯ ꓮ ꓡꓰ ꓐꓰ ꓫꓬ, ꓔꓶꓻ ꓠ, ꓟ ꓔꓯ ꓟ. ꓖꓶ ꓗꓷ ꓟ ꓥꓳ꓾”
ꓢꓲ ꓫꓬ, ꓟ ꓪꓴ‐ꓢ ꓬꓲ. ꓟ, ꓟ ꓟ‐ꓡꓲ ꓑꓮꓲ ꓬꓰ ꓔꓬ ꓟ ꓠꓬꓲ. ꓠꓬꓲ ꓘꓴ ꓜꓲꓼ ꓞꓳ ꓠꓬ ꓣꓳ ꓔꓯ “ꓟ, ꓟ ꓟ‐ꓡꓲ ꓠꓬ ꓬꓰ‐ꓢꓴ ꓙꓲ‐ꓢꓴ ꓬꓲ ꓠꓲ, ꓟ ꓔꓷ, ꓡꓵ ꓔ ꓟ ꓔꓯ ꓓꓽ ꓪꓴ. ꓘꓳ, ꓣꓴ ꓟꓶ ꓢꓴ “ꓥ ꓟꓲ ꓟ, ꓟ ꓟ‐ꓡꓲ ꓔꓯ ꓥꓳ ꓡꓳ. ꓠ, ꓟ ꓘꓴ ꓔ ꓡꓳ꓿
ꓟ, ꓟ ꓟ‐ꓡꓲ ꓠꓲ, ꓟ ꓐꓰ ꓣꓳ ꓠꓲ, ꓟ ꓔꓯ ꓮ ꓕꓯ ꓟꓲ ꓢꓷ. ꓔꓬ ꓟ ꓪꓴ‐ꓢ ꓠꓬ ꓞꓳ ꓤ ꓕꓲ ꓣꓳ ꓐꓰ ꓬꓯꓼ ꓡ ꓢꓲ ꓢꓲ ꓒꓽ ꓬꓲ ꓠꓲ, ꓟ ꓔꓯ ꓢꓷ. ꓡꓰ ꓝꓲ_ ꓟ ꓥꓳ ꓐꓰ ꓐꓯ ꓔ ꓡꓳ꓾ ꓖꓳ ꓟ ꓑꓶ ꓓꓴ ꓢꓲ ꓒ ꓬꓰ‐ꓢꓴ ꓬꓲ ꓠꓲ, ꓟ ꓠꓬ ꓞꓳ ꓙꓲ ꓞꓳ ꓙꓵ ꓮ ꓙꓵ ꓟꓲ ꓠꓯ ꓞꓳ ꓤ ꓮ ꓙꓵ ꓐꓱ ꓶ ꓔꓷ, ꓡꓵ ꓔꓬ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿
ꓖꓳ ꓟ ꓠꓬ ꓔꓱ, ꓜꓳ ꓢꓴ ꓐꓴ ꓐꓱ ꓶ ꓬꓲ ꓪ ꓛꓳ ꓫꓱꓽ ꓟ ꓗꓪ ꓦꓰꓼ ꓞ, ꓐ ꓡ ꓠ, ꓟ ꓔꓷ, ꓔ ꓟ ꓡꓰ ꓐꓰ ꓟꓽ ꓔꓱ, ꓜꓳ ꓢꓴ ꓐꓱ ꓶ ꓥ ꓟꓲ ꓬꓲ ꓪ ꓤꓶꓻ ꓔꓯ ꓒꓳ, ꓡꓶ. ꓖꓶ ꓢꓲ ꓢꓲ ꓡꓲ, ꓟ ꓔꓯ ꓧꓪ ꓟꓳ ꓠ, ꓟ ꓠꓲ, ꓟ ꓡꓵ ꓔꓬ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓮꓠꓖꓰꓡꓴꓢ ꓓꓳꓽ ꓫꓵ ꓬꓲ. ꓟꓶꓽ ꓢꓰꓼ ꓟ ꓗꓪ ꓙꓲ ꓢꓴ ꓢꓲ ꓤ ꓐꓴ ꓔꓯ ꓪꓴ‐ꓢ ꓟ, ꓟ ꓐꓰ ꓘꓴ ꓜꓲꓼ ꓞꓳ ꓟ, ꓟ ꓥ ꓟ ꓟ, ꓟ ꓟ‐ꓡꓲ ꓡꓰ ꓪꓽ ꓘꓴ ꓙ ꓖꓶ ꓔꓬ ꓟ ꓔꓯ ꓙꓵꓻ ꓢꓲ ꓶꓽ ꓓꓰ ꓠ, ꓟ ꓘꓴ ꓔ ꓡꓳ꓿
