ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓗ, ꓛꓲꓽˍ ꓟ ꓘꓳꓼ ꓫꓵꓼ ꓐꓰ ꓐꓯ ꓩꓴ ꓡˍ ꓥꓳ꓿ ꓠꓬꓲ. ꓠꓬꓲ ꓠꓬ ꓘꓳꓼ ꓫꓵꓼ ꓦꓬꓼ ꓠꓬꓲ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓘꓳꓼ ꓫꓵꓼ ꓦꓬꓼ ꓠꓬꓲ ꓗꓪ ꓠꓴ ꓪ ꓗ, ꓛꓲꓽˍ ꓟ ꓡꓰꓽ ꓟꓽ ꓞꓲꓺ ꓕꓱ ꓕꓲ ꓘꓳꓼ ꓡꓱꓸꓼ ꓗꓪ ꓥˍ ꓟꓲ ꓪꓴ‐ꓢ ꓣꓱꓽ ꓛꓰꓽ ꓗꓪ ꓐꓰ ꓠꓴ ꓪ ꓮ ꓙꓵꓽ ꓢꓴ ꓧꓪ. ꓧꓪꓸꓼ ꓐꓰ ꓞꓳ ꓙꓳ ꓔꓬ ꓟꓶ ꓝꓲ꓾ ꓐꓰ ꓐꓯ ꓩꓴ ꓡˍ ꓥꓳ꓿

ꓠꓬꓲ. ꓠꓬꓲ ꓠꓬ ꓟ, ꓟ ꓟ‐ꓡꓲ ꓠꓬ ꓪꓴ‐ꓢ ꓬꓲ ꓟ, ꓟ ꓥ ꓡꓳ ꓐꓯˍ ꓟ ꓑꓮꓲꓽ ꓔꓯ ꓣꓳ ꓬꓰ ꓔꓬ ꓟ ꓥ ꓡꓳ꓿ ꓟ. ꓟꓲꓽ ꓝꓲ. ꓠꓬ ꓡꓴ‐ꓘ 2ꓽ16‐21 ꓗꓪ ꓣꓳ ꓡꓳ. ꓠꓬꓲˍ ꓕꓯ ꓠꓬ ꓟ‐ꓡꓲ ꓐꓰ ꓬꓳ‐ꓢꓷ ꓡꓰ ꓐꓰ꓾ ꓞꓳ ꓫꓵꓼ ꓤ ꓬꓰ‐ꓢꓴ ꓔꓯ ꓠꓬ ꓮ. ꓠꓬꓲꓽ ꓡꓳ ꓕꓴ ꓗꓪ ꓫꓵ. ꓔ ꓟ ꓔꓯ ꓟꓳˍ ꓡꓳ꓿ ꓟ‐ꓡꓲ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓮ. ꓠꓬꓲꓽ ꓡꓳ ꓕꓴ ꓗꓪ ꓫꓵ. ꓔ ꓟ ꓠꓬ ꓟ‐ꓡꓲ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓦꓵꓻ ꓗꓷ ꓟ ꓑꓶ. ꓓꓴ ꓥꓳ꓿ ꓦꓵꓻ ꓖꓶˍ ꓟ ꓟ, ꓟ ꓥꓳ ꓐꓰ ꓣꓳ ꓕꓱ ꓡꓱ ꓐꓰ ꓢꓷ. ꓪˍ ꓟ ꓥ ꓡꓳ꓿

ꓕꓱ ꓟ ꓑꓶ. ꓓꓴ ꓕꓲ ꓖ ꓕꓲ ꓧꓪ, ꓠꓬ ꓕꓲ ꓖ ꓕꓲ ꓣꓳ ꓠꓬ ꓕꓱ ꓡꓱ ꓠ ꓠꓬꓲ ꓗꓴ.ˍ ꓡꓳ꓿ ꓟ‐ꓡꓲ ꓠꓬ ꓮ ꓫꓵꓽ ꓑꓶ. ꓓꓴ ꓪꓴ‐ꓢ ꓬꓲ ꓟ, ꓟ ꓥ ꓡ꓿ ꓟ‐ꓡꓲ ꓠꓬ ꓪꓴ‐ꓢ ꓥ ꓡ꓾ ꓐꓰ ꓕꓰ ꓡꓰ ꓠ ꓠꓬꓲ ꓓꓴ ꓙꓳˍ ꓡꓳ꓿ ꓟ‐ꓡꓲ ꓠꓽ ꓪꓴ‐ꓢ ꓟꓽ ꓥ꓿ ꓬꓲ ꓠꓬ ꓞꓳ ꓤ ꓥ ꓡꓳ꓿

ꓣꓳ ꓮ ꓡꓲ ꓐꓰ ꓢꓷ. ꓪˍ ꓡ ꓐꓯˍ ꓠꓬ꓾ ꓣꓳ ꓦ ꓡꓱ ꓔꓬ ꓟ ꓪꓴ‐ꓢ ꓠꓬ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓥꓳ꓿ ꓕꓱ ꓟ ꓑꓶ. ꓓꓴ ꓐ, ꓐ꓾ ꓮ ꓐꓲ꓾ ꓢꓲꓽ‐ꓫꓬ‐ꓟ‐ꓦ꓾ ꓐꓰ ꓣꓳ ꓕꓰ ꓡꓰ ꓘꓴˍ ꓡꓳ꓿ ꓟ‐ꓡꓲ ꓠꓬ ꓐ, ꓐ ꓪꓴ‐ꓢ ꓐꓱ ꓶ ꓠꓬ ꓐ, ꓐ ꓪꓴ‐ꓢ ꓬꓲ ꓮ. ꓟꓲꓽ ꓐꓰ ꓣꓳ ꓕꓰ ꓡꓰ ꓢꓷ. ꓪˍ ꓟ ꓥ ꓡꓳ꓿ ꓢꓲꓽ‐ꓫꓬ‐ꓟ‐ꓦ ꓐꓱ ꓶ ꓟ‐ꓡꓲ ꓠꓬ ꓢꓲꓽ‐ꓫꓬ‐ꓟ‐ꓦ ꓔꓬ ꓖꓴ ꓪꓽ ꓘꓴ ꓦꓲˍ ꓡꓰ ꓐꓰ ꓥꓳ꓿ ꓝꓮꓲ ꓢꓲ ꓒ ꓬꓰ‐ꓢꓴ ꓐꓱ ꓶ ꓠꓬ ꓣꓳ ꓮ ꓙꓵꓽ ꓢꓷ.ˍ ꓟ ꓕꓲ ꓡꓰ, ꓥꓳ꓿ ꓬꓲ ꓔꓯ ꓦꓵꓻ ꓖꓶˍ ꓟ ꓟ, ꓟ ꓥ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓞꓳ ꓤ ꓕꓲ ꓒꓳ, ꓪꓴ‐ꓢ ꓕꓲ ꓒꓳ, ꓗꓪ ꓠꓬ ꓒ ꓐꓲꓸꓼ ꓥ ꓟ ꓑꓶ. ꓓꓴ ꓟ, ꓟ ꓟ‐ꓡꓲ ꓠꓬ ꓪꓴ‐ꓢ ꓬꓲ ꓟ, ꓟ ꓥˍ ꓟꓲ ꓣꓳ ꓐꓯ ꓐ ꓡˍ ꓟ ꓥ ꓡꓳ꓿

ꓕꓱ ꓟ ꓑꓶ. ꓓꓴ ꓠꓬꓲ ꓣꓳ ꓘꓴ ꓜꓲꓼ ꓞꓳ ꓗꓪ ꓠꓬ ꓟ‐ꓡꓲ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓟ, ꓟ ꓐꓰ ꓕꓰ ꓡꓰ ꓐꓰ ꓙꓵꓻ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓟ‐ꓡꓲ ꓔꓯ ꓠꓬ ꓪꓴ‐ꓢ ꓬꓲ ꓟ, ꓟ ꓥ ꓡꓳ ꓐꓰ ꓣꓳ ꓕꓱ ꓡꓱ ꓓꓳ ꓟꓴ, ꓫꓱ. ꓖꓶˍ ꓥ ꓟꓲ ꓬꓲ ꓔꓯ ꓪꓴ‐ꓢ ꓥ ꓡꓳ ꓐꓰ ꓐꓯ ꓢꓲ ꓦ ꓡꓱ ꓔꓬ ꓟ ꓠꓽ ꓟꓽ ꓥ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓚꓲ. ꓛꓬ ꓡꓰ ꓬꓲ ꓔꓯ ꓟ, ꓟ ꓐꓰ ꓘꓴˍ ꓟ ꓑꓶ. ꓓꓴ ꓣꓳ ꓥˍ ꓟꓲ ꓪꓴ‐ꓢ ꓬꓲ ꓟ, ꓟ ꓔꓯ ꓣꓳ ꓟ, ꓟ ꓥꓳ ꓐꓰ ꓘꓴ ꓔꓬ ꓟ ꓔꓯˍ ꓟꓲ ꓫꓱ.ˍ ꓡꓳ꓿

ꓕꓱ ꓟˍ ꓡꓰꓽ ꓟꓽ ꓞꓲ ꓣꓳ ꓘꓴ ꓜꓲꓼ ꓞꓳ ꓗꓪ ꓠꓬ ꓘꓳꓼ ꓫꓵꓼ ꓦꓬꓼ ꓠꓬꓲ ꓗꓪ ꓮ ꓫꓵꓽ ꓑꓶ. ꓓꓴ ꓪꓴ‐ꓢ ꓬꓲ ꓟ, ꓟ ꓑꓮꓲꓽ ꓔꓯ ꓣꓳ ꓕꓱ ꓡꓱ ꓐꓰ ꓬꓰ ꓔꓬ ꓡ ꓐꓯ ꓟ ꓔꓯ ꓣꓳ ꓓꓵꓽ ꓙꓽ ꓠꓬꓲ ꓡꓯ꓿ ꓮ ꓫꓵꓽˍ ꓟꓲ ꓬꓰ ꓐ ꓡ ꓢꓴ ꓪꓴ‐ꓢ ꓢꓲ ꓒ ꓬꓰ‐ꓢꓴ ꓚꓬꓴ. ꓢꓲ ꓒ ꓬꓰ‐ꓢꓴ ꓡꓰ. ꓠꓬꓲ ꓟ, ꓟ ꓟ‐ꓡꓲ ꓖꓳ ꓓꓱꓽ ꓠꓯꓸꓼ ꓗꓪ ꓕꓱ ꓡꓱ ꓦꓵꓻ ꓡˍ ꓟ ꓠꓬ꓾ ꓟ, ꓟ ꓟ‐ꓡꓲ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓧꓪ. ꓧꓪꓸꓼ ꓐꓰ ꓬꓲ ꓠꓬ ꓗꓪꓽ ꓫꓵꓼ ꓐ ꓡˍ ꓟ ꓟ‐ꓡꓲ ꓥꓳ꓿ ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓬꓲ ꓚꓲ. ꓛꓬ ꓥˍ ꓟꓲ ꓟ, ꓟ ꓟ‐ꓡꓲ ꓔꓯ ꓦ ꓡꓱ ꓐꓳˍ ꓡꓳ꓿

ꓦ ꓡꓱ ꓐꓳˍ ꓡꓳ ꓐꓯˍ ꓟ ꓟ, ꓟ ꓟ‐ꓡꓲ ꓠꓽ ꓪꓴ‐ꓢ ꓥ ꓟ ꓑꓶ. ꓓꓴ ꓟꓽ ꓥ꓿ ꓖꓳ ꓡꓱ ꓐꓯ ꓥ ꓟꓲ ꓟ, ꓟ ꓟ‐ꓡꓲ ꓬꓲ ꓠꓵꓻ ꓠꓲ, ꓬꓲ ꓙꓵꓻ ꓠꓲ, ꓠꓬ ꓐ, ꓐ ꓪꓴ‐ꓢ ꓠꓲ, ꓒꓴˍ ꓟ ꓠꓵꓻ ꓠꓲ, ꓥ ꓟ꓾ ꓮ ꓟ ꓥ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓬꓲ ꓚꓲ. ꓛꓬ ꓥˍ ꓟꓲ ꓟ, ꓟ ꓟ‐ꓡꓲ ꓖꓳ ꓓꓱꓽ ꓗꓪ ꓬꓲ ꓠꓬ ꓑꓬ ꓠꓬ, ꓔꓬ ꓡꓳ꓿ ꓕꓱ ꓟ ꓑꓶ. ꓓꓴ ꓣꓳ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓕꓲ ꓟ ꓡꓱꓸꓼ ꓔꓯ ꓥˍ ꓟꓲ ꓟ, ꓟ ꓟ‐ꓡꓲ ꓗꓪꓽ ꓫꓵꓼ ꓡꓳ. ꓙ ꓟꓳ ꓙˍ ꓟ꓾ ꓢꓲ ꓒ ꓬꓰ‐ꓢꓴ ꓑꓬ ꓠꓬ, ꓔꓬ ꓟ ꓡꓰ ꓬꓲ ꓔꓯ ꓛꓲ ꓪꓳ ꓡꓯ ꓪꓳ ꓦ ꓡꓱ ꓐꓳ ꓢꓲ ꓑꓬ ꓠꓬ, ꓠ, ꓟ ꓐꓱ ꓶ ꓗꓶ ꓔ ꓟ ꓟ, ꓟ ꓟ‐ꓡꓲ ꓔꓯ ꓣꓳ ꓠꓬꓲ. ꓠꓬꓲ ꓑꓮꓲꓽ ꓬꓰ ꓖꓶ ꓔꓬ ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓕꓱ ꓕꓲ ꓘꓳꓼ ꓡꓱꓸꓼ ꓗꓪ ꓟ, ꓟ ꓟ‐ꓡꓲ‐ꓬ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓬꓲ ꓡꓳ. ꓠꓬ, ꓔꓬ ꓟ ꓡꓰ ꓐꓰ ꓣꓳ ꓮ ꓙꓵꓽ ꓔꓯ ꓥˍ ꓟꓲ ꓟ, ꓟ ꓟ‐ꓡꓲ ꓡꓰ ꓕꓱ ꓡꓱ ꓔ, ꓙ ꓗꓪꓽ ꓫꓵꓼ ꓖꓶ ꓠ, ꓟ ꓐꓱ ꓶ꓾ ꓦ ꓕꓲ ꓒꓳ, ꓗꓪ ꓣꓳ ꓔꓯ ꓠꓬꓲ ꓡꓳ. ꓔ, ꓙ ꓗꓪꓽ ꓫꓵꓼ ꓪꓽ ꓘꓴ ꓖꓶ ꓠ, ꓟ ꓐꓱ ꓶ ꓣꓳ ꓬꓲ ꓔꓯ ꓓꓳ ꓟꓴ, ꓫꓱ. ꓖꓶ ꓓꓴ ꓬꓰ ꓡꓯ꓿