ꓬꓲ ꓒꓵꓽ ꓙꓳ ꓓꓰ ꓡꓰˍ ꓟ ꓐꓯˍ ꓟ
ꓤꓶꓻ ꓗꓪ ꓣꓳ ꓕꓲ ꓛꓱꓽ ꓗꓪ ꓐꓰ ꓔꓱ, ꓔꓱ, ꓡꓰꓽ ꓢꓯꓼ ꓕꓵꓼ ꓔꓬ ꓕ ꓑꓳꓸꓼ ꓙꓽ ꓖꓳꓼˍ ꓟ ꓟꓽ ꓙꓳꓺꓳ꓿
ꓕꓲ ꓧꓪ, ꓙꓳˍ ꓕꓯ ꓡꓳ ꓒꓱ ꓤ ꓕꓲ ꓟ ꓗꓪ ꓮꓽ ꓑ ꓟꓳꓽ ꓕꓲ ꓣꓳ ꓙꓳˍ ꓙꓳꓽ꓿ ꓞꓳ ꓔꓱ, ꓥ ꓢꓲ ꓬꓲ ꓫꓱ, ꓙꓲꓻˍ ꓟ ꓑꓶ. ꓓꓴ ꓬꓲ ꓔꓯ ꓠꓲ, ꓠꓵˍ ꓢꓴ ꓮ ꓟꓬ, ꓙꓳˍ ꓡꓳ꓿
ꓕꓲ ꓠꓬꓲ ꓙꓳˍ ꓕꓯ ꓮꓽ ꓑ ꓟꓳꓽ ꓠꓬ ꓖꓳ ꓓꓱꓽ ꓔꓬ, ꓟꓽ ꓢꓻ ꓗꓷ ꓡꓰ ꓢꓲ ꓬꓲ ꓢꓯꓼ ꓟꓬ ꓡꓳ, ꓬꓰ ꓙꓵ, ꓛꓲ ꓡꓺꓳ꓾ ꓐꓰ ꓢꓷ. ꓡꓰꓳ꓿ ꓖꓳ ꓡꓱ ꓠꓬꓲ ꓬꓲ ꓤ 3 ꓫꓵ. ꓔꓯ ꓘꓴ ꓢꓲ ꓠꓬꓲ ꓡꓯꓼ ꓪ (ꓚꓬ ꓔꓲꓽ) ꓐꓱ ꓖꓶ ꓗꓷꓳ꓿
ꓤ ꓪꓴꓽ ꓠꓬ ꓦꓲꓻ ꓔꓯ ꓟꓶ ꓡꓰꓳ꓿ ꓤ ꓝꓮꓲ ꓕꓲ ꓣꓳ ꓠꓬ ꓮ. ꓠꓬꓲꓽ ꓕꓲ ꓟ ꓟꓶ ꓡꓰꓳ꓿ ꓤ ꓣꓳ ꓠꓽ ꓮ. ꓞꓳ ꓕꓲ ꓑꓼ ꓡꓰꓽ ꓟꓶˍ ꓡꓳ꓿ ꓕꓱ ꓟ ꓠꓬ ꓮꓽ ꓑ ꓟꓳꓽ ꓔꓯ ꓙꓳˍ ꓟ ꓡꓯꓼ ꓪ (ꓚꓬ ꓔꓲꓽ) ꓮ ꓙꓵꓽ ꓥ ꓡꓳ꓿
ꓕꓱ ꓡꓱ ꓠꓬꓲ ꓮꓽ ꓑ ꓟꓳꓽ ꓫꓵꓻ ꓢꓲ ꓮ ꓟꓬ, ꓘꓳꓼ ꓗꓳ. ꓬꓰꓳ꓿ ꓤ ꓪꓴꓽ ꓟꓶ ꓔ ꓟ ꓦꓲ ꓠꓬ ꓐꓰꓽ ꓡꓰ ꓢꓲ ꓐꓬ ꓡꓰꓳ꓾ ꓤ ꓝꓮꓲ ꓕꓲ ꓣꓳ ꓟꓶ ꓔ ꓟ ꓮ. ꓠꓬꓲꓽ ꓥˍ ꓟꓲ ꓬꓲ ꓤꓲꓼ ꓟꓳꓽ ꓡꓰ ꓠꓬꓲ ꓮ. ꓠꓬꓲꓽ ꓮ ꓚꓵ, ꓟꓽ ꓓꓳ ꓡꓺꓳ꓿ ꓤ ꓣꓳ ꓟꓶ ꓔ ꓟ ꓮ. ꓞꓳ ꓕꓲ ꓑꓼ ꓡꓰꓽ ꓟꓽ ꓐꓬ ꓡꓰ ꓡꓰ ꓤꓰꓻ ꓞ, ꓟ ꓥ ꓡꓳ꓿
ꓤ ꓣꓳꓺ ꓠꓬ ꓮ. ꓞꓳ, ꓖꓳ ꓟ ꓔꓯ ꓣꓱꓽ ꓢꓲ ꓢꓲ, ꓬꓰ ꓒꓽ (ꓑꓴ ꓙꓲꓻ ꓢꓴ) (ꓚꓮꓣꓑꓰꓠꓔꓰꓣ) ꓟꓬꓱꓽ ꓬꓰˍ ꓡꓳ꓿
ꓬꓲ ꓟꓬꓱꓽ ꓗꓪ ꓪ ꓜꓲ ꓓꓻ ꓡꓰ ꓠ ꓢꓯꓼ ꓕꓵꓼˍ ꓡꓳ꓿ ꓟꓬꓱꓽ ꓗꓪ ꓐꓰ ꓟꓶ ꓡˍ ꓟ ꓒꓴ ꓔꓯ ꓫ ꓢꓲ (ꓠ. ꓢꓲ) ꓦꓲꓻ ꓐꓰ ꓮ. ꓠꓬꓲꓽ ꓕꓲ ꓟ ꓪꓴꓻ ꓐ ꓡ ꓗꓷꓳ꓿ ꓪꓴꓽˍ ꓟ ꓤ ꓠꓬꓲꓽ ꓫꓵ. ꓠꓬ ꓬꓲ ꓪ ꓠꓬꓲ ꓤ ꓙꓳꓻ ꓢꓻ ꓔꓬ ꓟ ꓟ ꓔꓯ ꓡꓰꓽ ꓟꓳꓻˍ ꓡꓳ꓿ ꓢꓯꓼ ꓕꓵꓼ ꓔꓬ ꓟ ꓔꓯ ꓠꓽ ꓟꓽ ꓟꓳꓻ꓿ ꓬꓲ ꓪ ꓠꓲ, ꓟ ꓗꓪ ꓮꓽ ꓑ ꓟꓳꓽ ꓠꓽ ꓤ ꓣꓳꓺ ꓔꓯ ꓡꓰꓽ ꓠꓲ, ꓠꓵˍ ꓢꓲ ꓒꓵꓽ ꓓꓰ ꓡꓰˍ ꓟ ꓡꓯꓼ ꓪ (ꓚꓬ ꓔꓲꓽ) ꓖꓶ ꓗꓷꓳ꓾ ꓐꓰ ꓟꓬ ꓔꓳ,ˍ ꓡꓳ꓿
ꓖꓳ ꓡꓱ ꓠꓬꓲ ꓬꓲ ꓪ ꓠꓬꓲ ꓤ ꓔꓬ ꓗꓪ ꓐꓰ ꓮ. ꓞꓳ, ꓔꓯ ꓘꓴꓽ ꓠ, ꓟ ꓙꓽ ꓖꓶˍ ꓡꓳ꓿ ꓮ ꓡꓲ ꓫꓵꓽ ꓚꓵ ꓔ ꓟ ꓙꓳˍ ꓥ ꓟꓽ ꓢꓷ. ꓐꓰ ꓓꓵꓽ ꓙꓽ ꓟꓶ ꓔꓬ ꓖꓴˍ ꓡꓳ꓿
ꓖꓳ ꓡꓱ ꓥˍ ꓟꓲ ꓬꓲ ꓪ ꓡꓯꓽ ꓒꓯ, ꓘꓴꓽ ꓗꓪ ꓮ. ꓞꓳ, ꓛꓲ ꓡ ꓢꓲ ꓮ ꓟꓬ, ꓚꓱ, ꓢꓯꓼ ꓕꓵꓼ ꓠꓬꓲˍ ꓟꓲ ꓮ ꓫꓵꓽ ꓟꓽ ꓟꓳꓻ꓿ ꓕꓱ ꓟ ꓠꓽ ꓮ. ꓞꓳ, ꓕꓲ ꓟˍ ꓡꓰꓽ ꓥ ꓡꓳ꓿ ꓮ ꓫꓵꓽ ꓪꓽ ꓠꓬꓲ ꓓꓴ ꓟꓽ ꓙꓳ꓿
ꓤ ꓣꓳ ꓠꓽ ꓬꓲ ꓮ ꓬꓲꓼ ꓐꓴ ꓬꓲ ꓮ. ꓞꓳ, ꓔꓯ ꓘꓴꓽ ꓔꓯ, ꓙꓰ ꓟ ꓟꓽ ꓢꓷ.꓿ ꓮ. ꓞꓳ, ꓝꓮꓲ ꓕꓲ ꓟ ꓪꓴꓻ ꓢꓲ ꓗ, ꓛꓲꓽ ꓛꓲꓽ ꓡꓰꓽ ꓬꓲ ꓟꓬꓱꓽ ꓬꓲ ꓝ ꓢꓲ ꓬꓰˍ ꓡꓳ꓾ ꓙꓳꓽ꓿
ꓖꓳ ꓗ ꓠꓯ. ꓕꓯ ꓡꓰꓽ ꓤ ꓪꓴꓽ ꓠꓬꓲꓽ ꓫꓵ. ꓠꓬ ꓓꓵꓽ ꓙꓽ ꓟꓶ ꓡꓰꓳ꓿ ꓬꓲ ꓪ ꓠꓬꓲ ꓤ ꓟꓶ ꓔ ꓟ ꓒꓵꓽ ꓓꓰ ꓡꓰˍ ꓟ ꓡꓯꓼ ꓪ (ꓚꓬ ꓔꓲꓽ) ꓠꓽ ꓮ. ꓞꓳ, ꓟꓽ ꓥ꓿ ꓔꓱ, ꓟ ꓠꓲ, ꓟ ꓐꓰ ꓙꓲꓻˍ ꓟ ꓬꓲ ꓫꓱ, ꓥ ꓡꓳ꓾ ꓐꓯˍ ꓟ ꓔꓯ ꓡꓳ. ꓟꓳꓻ ꓡꓰ ꓟ ꓥ ꓡꓳ꓿
ꓟ. ꓟꓲꓽ ꓠꓽ ꓕꓱ ꓗꓪ ꓛꓲˍ ꓡꓰꓽ ꓥ ꓡꓳ꓿
ꓣꓳ ꓠꓬ ꓧꓪ. ꓡꓰ ꓢꓴ ꓐꓴ ꓔꓯ ꓠꓲ, ꓠ ꓗꓴ.ˍ ꓡꓳ꓿ ꓖꓳ ꓡꓱ ꓥˍ ꓟꓲ ꓕꓱ ꓡꓱ ꓧꓪ. ꓡꓰ ꓠ, ꓟ ꓐꓱ ꓶ ꓮ ꓟꓬ, ꓢꓯꓼ ꓕꓵꓼ ꓪꓴꓽ ꓧꓶ ꓔ ꓟ ꓔꓯ ꓠꓽ ꓟꓽ ꓟꓳꓻ ꓟꓳꓻ ꓙ ꓙꓰˍ ꓡꓳ꓿
ꓤꓶꓻ ꓗꓪ ꓣꓳ ꓕꓲ ꓛꓱꓽ ꓗꓪ ꓐꓰ ꓔꓱ, ꓔꓱ, ꓡꓰꓽ ꓢꓯꓼ ꓕꓵꓼ ꓔꓬ ꓕ ꓑꓳꓸꓼ ꓙꓽ ꓖꓳꓼˍ ꓟ ꓟꓽ ꓙꓳꓺꓳ꓿
ꓧꓪ. ꓡꓰˍ ꓟ ꓟꓶ ꓠ, ꓟ ꓐꓱ ꓶ ꓣꓱꓽ ꓞ, ꓓꓰ ꓡꓰ ꓟ ꓠꓽ ꓢꓳˍ ꓟ ꓐꓰ ꓢꓯꓼ ꓕꓵꓼˍ ꓟ ꓥ ꓡꓳ꓾ ꓐꓯˍ ꓟ ꓔꓯ ꓕꓱ ꓟ. ꓟꓲꓽ ꓗꓪ ꓐꓰ ꓢꓳ ꓣꓴ ꓠ, ꓟ ꓥ ꓡꓳ꓿
