ꓙꓲ‐ꓢꓴ ꓢꓲꓺ ꓤ ꓐꓴ ꓚꓳꓴꓠꓚꓲꓡ ꓡꓰ ꓧꓳꓽ ꓪꓴ. ꓟꓴ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕ ꓔꓬ ꓟ ꓚꓱ, ꓚꓱ, (Climate change)
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓚꓱ, ꓗꓪ ꓠꓬ ꓟꓵꓽ ꓗꓳ, ꓓꓵ ꓓꓵ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓙꓵꓽ ꓐ ꓟ ꓚꓳꓴꓠꓚꓲꓡ ꓡꓰ ꓧꓳꓽ ꓪꓴ. ꓟꓴ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓟ ꓔꓯ ꓗꓽ ꓕ ꓟ ꓟꓬꓱꓽ ꓬꓰ ꓟ ꓚꓱ, ꓔꓯ ꓣꓳ ꓡꓳ. ꓠꓬꓲ ꓓꓴ ꓬꓰ ꓡꓯ꓿ 1994 ꓘꓳꓼ 4 ꓦ ꓕꓯ ꓐꓳ ꓔ ꓟ ꓕꓳ ꓶ ꓗꓪ ꓠꓬ ꓪꓚꓚ ꓙꓲ‐ꓢꓴ ꓢꓲꓺ ꓤ ꓐꓴ ꓜꓴꓻ ꓡꓰ ꓐꓳ ꓔ ꓟ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓔꓯ ꓟꓳ. ꓣꓳ ꓡꓳ. ꓟꓳ ꓓꓽ ꓟ ꓥ ꓡꓳ꓿
ꓕꓱ ꓡꓰ ꓘꓴ ꓜꓲꓼ ꓞꓳ ꓮ ꓟꓬꓽ ꓐ ꓟ ꓙꓲ‐ꓢꓴ ꓢꓲꓺ ꓤ ꓚꓳꓴꓠꓚꓲꓡ ꓗꓪ ꓐꓰ 1975 ꓘꓳꓼ ꓕꓯ ꓠꓰꓣꓳꓐꓲ ꓡꓳ ꓒꓱ ꓗꓪ ꓬꓰ ꓟ ꓟꓵꓽ ꓘꓳꓼ ꓚꓱ, ꓔꓯ ꓟꓳ. ꓓꓽ ꓪꓴ. ꓪꓚꓚ ꓜꓴꓻ ꓡꓰ ꓫ. ꓕꓱ ꓡ ꓟ ꓔꓯ ꓡꓳ. ꓟꓳ ꓓꓽ ꓟ ꓥ ꓡꓳ꓿ 1988 ꓘꓳꓼ ꓕꓯ ꓠꓬ ꓪꓚꓚ ꓚꓳꓴꓠꓚꓲꓡ ꓗꓪ ꓐꓰ ꓧꓳꓽ ꓪꓴ. ꓟꓴ ꓢꓲ ꓠꓬꓲ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ ꓡ ꓟ ꓚꓱ, ꓔꓯ ꓖꓪ ꓙꓱꓽ ꓠ, ꓟ ꓐꓰ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ꓾ ꓗꓴꓷꓼ ꓔꓯ ꓙꓵꓽ ꓢꓴ ꓐꓴ ꓐꓰ ꓢꓲꓽ ꓒꓽ ꓓꓽ ꓐꓴ ꓔꓯ ꓘꓴˍ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕ ꓠ, ꓟ ꓟꓬꓱꓽ ꓬꓰ ꓠ, ꓟ ꓖꓪꓽ ꓙꓱ ꓜꓲꓼ ꓓꓴ ꓬꓰ ꓗꓷꓳ꓿
ꓪꓚꓚ ꓡꓰ ꓟꓲ ꓠꓯ ꓞ ꓡ ꓟ ꓚꓱ, ꓔꓯ ꓖꓪꓽ ꓙꓱ ꓟ ꓙꓵ, ꓗꓪ ꓪꓴ‐ꓢ ꓡꓰ ꓚꓰꓼ ꓔ ꓟ ꓙꓲ ꓟ ꓚꓱ, ꓔꓯ ꓠꓬꓲ. ꓠꓬꓲ ꓠꓬ ꓐꓬ ꓡꓰ ꓝꓲˍ ꓟ ꓓꓵꓽ ꓙ ꓫ. ꓓꓴ ꓒꓬꓱꓼ ꓡ ꓝꓲˍ ꓟ ꓚꓱ, ꓮ ꓟꓬꓽ ꓫꓵꓽ ꓔꓯ ꓖꓪꓽ ꓙꓱ ꓗꓷ ꓟ ꓥ ꓡꓳ꓿
ꓟꓲ ꓠꓯ ꓢꓲ ꓡꓲ ꓟꓶ ꓠ, ꓟ ꓚꓱ, ꓔꓯ ꓖꓪꓽ ꓙꓱ ꓗꓷꓳ꓿ 1992 ꓘꓳꓼ ꓗꓪ ꓟꓲ ꓠꓯ ꓗꓴꓷꓼ ꓮ ꓙꓵꓽ ꓐ ꓟ ꓖꓪꓽ ꓙꓱ ꓟ ꓗꓪ ꓥ ꓟꓲ ꓪꓚꓚ ꓚꓳꓴꓠꓚꓲꓡ ꓥ ꓟꓲ ꓙꓰ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓖꓪꓽ ꓙꓱ ꓗꓷꓳ꓿
ꓙꓲ‐ꓢꓴ ꓢꓲꓺ ꓤ ꓚꓳꓴꓠꓚꓲꓡ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓔꓯ ꓖꓪꓽ ꓙꓱ ꓗꓷ ꓟ ꓮ ꓙꓵꓽ ꓔꓯ ꓪꓽ ꓡꓳ ꓐꓰ ꓐꓯ ꓗꓷ ꓟ ꓥ ꓡꓳ꓿ ꓟꓲ ꓠꓯ ꓞ ꓡ ꓟ ꓪꓴ. ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓫꓵꓽ ꓪꓴꓽ ꓐꓰ ꓟꓲ ꓠꓯ ꓗꓪ ꓪꓴ‐ꓢ ꓡꓰ ꓚꓰꓼ ꓔ ꓟ ꓢꓯ. ꓫꓵꓽ ꓢꓯ. ꓙꓵꓽ ꓮ ꓙꓵꓽ ꓔꓯ ꓥ ꓟꓲ ꓟꓲ ꓠꓯ ꓞꓽ ꓡ ꓟ ꓪꓴ. ꓠꓬꓲ ꓫꓵꓽ ꓪꓴꓽ ꓓꓽ ꓒꓬꓱꓼ ꓡ ꓝꓲˍ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓪꓚꓚ ꓜꓴꓻ ꓠꓬ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓔꓯ ꓗꓽ ꓕ ꓠ, ꓟ ꓖꓪ ꓙꓱꓽ ꓜꓲꓼ ꓓꓴ ꓗꓪ ꓐ ꓗꓷ ꓧꓳꓽ ꓪꓴ. ꓟꓴ ꓔꓬ ꓢꓴ ꓜꓴꓻ ꓕꓲ ꓜꓴꓻ ꓟꓲ ꓥ ꓡꓳ꓿ ꓫ. ꓟꓳ ꓪ꓿
