ꓢꓲ ꓡꓲ ꓟ ꓠꓬ ꓠꓴ ꓪ ꓮ ꓙꓵ: ꓢꓴ ꓐꓰ ꓕꓲ ꓪ: ꓙꓳ ꓔꓬ ꓝꓲ꓾
ꓛꓳ ꓒꓵ:ˍ ꓟ ꓢꓲ: ꓒ ꓓ: ꓟꓲꓠ-ꓮꓪꓠꓖ-ꓡꓮꓲ ꓐꓰ ꓗꓴꓷꓼ ꓗꓪ ꓬꓳ. ꓚꓵ.ˍ ꓟ ꓟꓬꓱ: ꓬꓰ ꓔꓬ ꓟ ꓞꓳ ꓪꓴ: ꓞꓳ ꓔꓲ ꓐꓴꓳ꓾ ꓟꓬ-ꓟ ꓗꓴꓷꓼ ꓔꓲꓺ ꓒ ꓪ ꓔꓲ. ꓬꓲ ꓝꓲ ꓓꓴ Msgr. Andrea Ferrante꓾ ꓟꓬ-ꓟ ꓗꓴꓷꓼ ꓙꓵꓻ ꓢꓴ ꓘꓴ ꓜꓲꓼ ꓞꓳ ꓐꓴ ꓚꓳꓴꓠꓚꓲꓡ ꓗꓪ ꓟ ꓔꓲꓺ ꓒ ꓓ: ꓐꓴ꓾ ꓪ: ꓘꓴ ꓙ ꓖꓶ ꓔꓬ ꓢꓴ ꓐꓴ ꓐꓰ ꓮ ꓬꓲꓼ ꓠꓬꓲ ꓤ ꓐꓴꓳ꓾ “Peace be with you” “ꓢꓲ ꓡꓲ ꓟ ꓠꓬ ꓠꓴ ꓪ ꓐꓰ ꓕꓲ ꓪ: ꓙꓳ ꓔꓬ ꓝꓲ” ꓐꓯˍ ꓟ ꓒꓵ: ꓗ ꓬꓰ ꓘꓶ: ꓔꓯ ꓮ ꓠꓱ ꓮ ꓟꓬꓹ ꓘꓳꓼ ꓗꓪ ꓐꓰ ꓞꓳ ꓫꓵ: ꓞꓳ ꓙꓰ: ꓐꓴ꓾ ꓦ ꓡꓱ ꓚꓱꓹ ꓬꓲ ꓫꓵ: ꓬꓲ ꓙꓰ: ꓔꓯ ꓦ ꓡꓱꓦꓔꓬ ꓢꓴ ꓐꓴ ꓕꓲ ꓣꓳ ꓛꓳ: ꓕꓲ ꓣꓳ ꓒꓵ: ꓗ ꓬꓰ ꓫ. ꓕꓱ ꓡꓯ ꓘꓳˍ ꓕꓯ ꓣꓱ: ꓗꓷ ꓟ ꓥ ꓡꓳ=
ꓢꓲ ꓡꓲ ꓟ ꓐꓱ ꓶ ꓐꓯ ꓢꓲ ꓠꓬꓲ ꓢꓰꓼ ꓡꓯ ꓘꓳ ꓠꓹ ꓟ ꓙ: ꓖꓶ ꓔꓬ ꓡꓳ= ꓗꓴꓷꓼ ꓑ ꓫꓬ ꓐꓴ ꓠꓬ ꓬꓲꓼ ꓪ ꓔꓯ ꓙꓵ: ꓢꓴ ꓐꓴ ꓠꓬ ꓢꓰꓼ ꓡꓯ ꓘꓳ ꓓꓴ ꓐꓱ ꓶ ꓡꓳꓼ ꓠ ꓛꓲ ꓟ: ꓙ: ꓖꓶ ꓔ꓾ ꓢꓴ ꓡꓰ ꓛꓴ: ꓙꓳ ꓡˍ ꓕꓯ ꓛꓴ: ꓙꓳ ꓡꓲ. ꓖꓶˍ ꓟ ꓟ: ꓙꓳ꓾ ꓜꓲ: ꓜꓲ: ꓑꓰꓹ ꓑꓰꓹ ꓬꓰˍ ꓟ ꓔꓯ ꓜꓲ: ꓜꓲ: ꓑꓰꓹ ꓑꓰꓹ ꓟ: ꓬꓰ ꓡꓲ. ꓖꓶ ꓕꓯ ꓗꓴꓷꓼ ꓔꓯ ꓙꓵ:ˍ ꓟ ꓗꓪ ꓥꓳ: ꓡꓰꓳ꓾ ꓟ: ꓪ: ꓠꓬꓲ ꓟ ꓙꓵ: ꓪ ꓙꓳ ꓢꓴ꓾ ꓕꓱ ꓡꓱ ꓐꓯ ꓔꓬ ꓡꓳ= ꓖꓳ ꓟ ꓪꓴ. ꓠꓬꓲ ꓗꓴꓷꓼ ꓐꓴ ꓠꓬ ꓐꓳ: ꓡ-ꓛꓴ. ꓐꓴ ꓔꓯ ꓫꓬꓹ ꓦꓲ. ꓔꓬ ꓠ ꓗꓷ ꓡꓰꓳ=
ꓐꓳ: ꓡ-ꓛꓴ. ꓐꓴ ꓔꓯ ꓫꓬꓹ ꓦꓲ. ꓙ: ꓖꓶˍ ꓟ ꓗꓪ ꓕꓲ ꓗꓴꓷꓼ ꓕꓯ: ꓢꓲ ꓕꓲ ꓗꓴꓷꓼ ꓪ ꓜꓲ ꓪ: ꓠꓬꓲ ꓡꓰ ꓠ ꓬꓰ ꓩꓴ ꓡˍ ꓟ ꓑꓶ. ꓓꓴ 2024 ꓘꓳꓼ ꓗꓪ ꓓꓳ-ꓡ ꓒꓴ 2718 ꓐꓲ-ꓡꓲ-ꓬꓯ ꓗꓪ ꓛꓲ ꓣꓱ: ꓗꓷꓳ꓾ ꓐꓰ ꓐꓯˍ ꓔ ꓡꓳ=
ꓟ: ꓬꓰ ꓟ: ꓓꓻ ꓬꓰ ꓠ ꓔ ꓟ ꓟꓬꓱ: ꓕꓲ ꓟˍ ꓡꓰ ꓐꓰ ꓬꓰ ꓔꓬ ꓖꓴˍ ꓡꓳ=
ꓫꓵ: ꓪꓴ ꓕꓱ ꓟ ꓬꓲ ꓚꓰꓺ ꓠꓬ ꓕꓲ ꓗꓴꓷꓼ ꓐꓰ ꓕꓲ ꓗꓴꓷꓼ ꓙꓻ ꓡꓯ ꓘꓳˍ ꓟ ꓗꓪ ꓙꓵ: ꓗ ꓐꓴ꓾ ꓪ: ꓡꓯ ꓘꓳˍ ꓟ꓾ ꓕꓲ ꓗꓴꓷꓼ ꓐꓰ ꓕꓲ ꓗꓴꓷꓼ ꓠꓲꓹ ꓒꓵ: ꓠꓲꓹ ꓡꓱꓻˍ ꓟ ꓗꓪ ꓟ: ꓔꓶꓺ ꓔꓶꓺ ꓐꓰ꓾ ꓙꓳꓺ ꓠꓲꓹ꓾ ꓪ: ꓠꓬꓲˍ ꓟ ꓔꓯ ꓟꓳ. ꓖꓶ ꓢꓲ ꓙꓵ: ꓠꓲꓹ ꓫꓵˍ ꓟ꓾ ꓕꓱ ꓡꓱ ꓫꓵ: ꓕꓯ: ꓢꓲ ꓗꓪ ꓔꓶꓺ ꓔꓬ ꓖꓴˍ ꓟ ꓑꓶ. ꓓꓴ ꓥ ꓡꓳ= ꓕꓱ ꓟ ꓗꓪ ꓐꓰ ꓶꓼ ꓫ ꓟꓶˍ ꓟ ꓬꓲ ꓢꓶ: ꓠꓬ ꓞꓳ ꓤ ꓐꓴ ꓠꓬ ꓬꓲ ꓑꓶ. ꓟ: ꓞꓷꓹ ꓙꓳꓺ ꓠꓲꓹ ꓗꓪ ꓐꓰ ꓞꓳ ꓙꓳ ꓢꓯ. ꓔꓬ ꓪˍ ꓡꓳ=
ꓮ ꓡꓲ ꓕꓲ ꓙꓵꓹ ꓕꓯ ꓥˍ ꓟꓲ ꓢꓰꓼ ꓡꓯ ꓘꓳ ꓓꓴ ꓓ: ꓟ ꓓꓳ ꓡ ꓗꓴ.ˍ ꓡꓳ ꓐꓯˍ ꓟ ꓠꓲꓹ ꓫ. ꓓꓴ ꓡꓰ ꓞꓳ ꓙꓳ ꓔꓬ ꓪˍ ꓡꓳ= ꓣꓳ ꓠꓯꓸꓼ ꓗꓪ ꓢꓰꓼ ꓡꓯ ꓘꓳ ꓓꓴ ꓔꓯ ꓙꓳꓺˍ ꓟ ꓠꓲꓹ ꓟ ꓙꓳ ꓔꓬ ꓕ ꓑꓳꓸꓼ ꓑꓳꓺ ꓡ-ꓛꓴ. ꓐꓴ ꓔꓯ ꓮ ꓟꓬꓹ ꓙ: ꓖꓶˍ ꓟ ꓔꓯ ꓠ: ꓗꓷ ꓟ: ꓐ ꓡ ꓟ ꓥ ꓡꓳ= ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓕꓶꓻ ꓞꓹ ꓟ ꓢꓲ ꓡꓲ ꓟ ꓔꓯ ꓫꓬꓹ ꓜꓶꓻ ꓟꓹ ꓟ ꓐꓱ ꓶ ꓐꓳ: ꓡ-ꓛꓴ. ꓮ ꓟꓬꓹ ꓙꓳˍ ꓟ ꓟ: ꓥ꓾ ꓗꓴꓷꓼ ꓠꓬꓲ: ꓗꓴ. ꓚꓸꓼ ꓗꓪ ꓛꓳ ꓒꓵ: ꓡꓯ ꓘꓳˍ ꓟ꓾ ꓬꓰ ꓙꓻ ꓡꓯ ꓘꓳˍ ꓟ꓾ ꓕꓱ ꓡꓱ ꓫꓵ: ꓗꓪ ꓐꓰ ꓡꓰ: ꓢꓲ ꓡꓲ ꓟ ꓔꓯ ꓫꓬꓹ ꓜꓶꓻ ꓐ ꓡˍ ꓥꓳ꓾ ꓐꓯ ꓟ ꓔꓯ ꓚꓲ. ꓔ ꓠ ꓗꓹ ꓡꓳ=
ꓖꓳ ꓟ ꓑꓶ ꓓꓴ ꓔꓲꓺ ꓒ ꓪ ꓔꓲ ꓡꓰ ꓐꓲ ꓜꓲꓼˍ ꓟ ꓐꓳ: ꓡ-ꓛꓴ. ꓔꓯ ꓫ ꓗꓷ ꓠꓹ ꓟ ꓔꓯ ꓬꓲꓼ ꓠꓬꓲ. ꓐꓯ ꓖꓶ ꓔ ꓡꓳ= ꓐꓳ: ꓡ-ꓛꓴ. ꓫ ꓔ ꓐꓰ ꓐꓯ ꓕꓯ ꓟꓯꓼ ꓶ ꓤ ꓔꓯ ꓫ ꓠꓹ ꓟ ꓓꓰ ꓢ ꓣꓳ ꓠꓲꓹ ꓟ ꓐꓰ ꓓꓵ: ꓙ ꓔ ꓟ ꓠꓯꓼ ꓗꓪ ꓔꓬ ꓟ ꓶ ꓤ ꓔꓯ ꓡꓳ ꓗꓷ ꓠꓹ ꓟ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓟ ꓥ ꓡꓳ=
ꓢꓲ ꓡꓲꓹ ꓟ ꓠꓬ ꓛꓲ ꓠ ꓙꓰ ꓔꓬ ꓟ ꓬꓲ ꓔꓶꓻ ꓙꓱꓼ ꓕꓲ ꓟ ꓓꓰ ꓢ ꓥ ꓡꓳ=ꓢꓲ ꓡꓲꓹ ꓟ ꓠꓬ ꓙ ꓫꓱ: ꓔꓬ ꓟ ꓚꓱꓹ ꓕꓲ ꓟ ꓥ ꓟ ꓡꓰ ꓐꓰ ꓮ ꓟꓶ ꓒꓬꓱꓼ ꓡꓰ ꓔꓬ ꓟ ꓟꓲ ꓥ ꓡꓳ=
ꓢꓲ ꓡꓲꓹ ꓟ ꓠꓬ ꓚꓵ ꓚꓵ ꓔꓬ ꓟ ꓥ ꓢꓲ ꓣꓳ ꓠꓲꓹ ꓟ ꓘꓴ ꓠꓯꓼ ꓗꓪ ꓬꓲ ꓔꓶ. ꓣꓴ ꓔꓬ ꓟ ꓥ ꓡꓳ=ꓣꓳ ꓠꓬ ꓢꓲ ꓡꓲꓹ ꓟ ꓐꓰ ꓕꓶꓻ ꓕꓶꓻ ꓡꓰ ꓞꓳꓹ ꓔ ꓢꓲ ꓣꓳ ꓠꓲꓹ ꓟ ꓘꓴ: ꓗꓪ ꓬꓲ. ꓔꓶ. ꓖꓶ ꓠꓬ ꓢꓲ ꓡꓲꓹ ꓗꓹ ꓛꓲ ꓟ ꓬꓲ ꓙꓱ ꓔꓯ ꓣꓳ ꓠꓶ: ꓛꓳ ꓕꓲ ꓛꓳ ꓐꓴ ꓔꓯ ꓖꓶ ꓐ ꓡꓰ ꓟ ꓥ ꓡꓳ= ꓖꓳ ꓟ ꓑꓶ ꓓꓴ ꓢꓲ ꓫꓬ ꓢꓴ ꓮꓴꓖꓴꓢꓔꓲꓠꓰ ꓡꓰ “If you wish to draw others to peace, find have it yourselves; be steadfast in peace yourself. To inflame others, you must have the flame burning within you” ꓠꓱ. ꓐꓯꓼ ꓢꓴ ꓔꓯ ꓢꓲ ꓡꓲꓹ ꓗꓹ ꓛꓲˍ ꓟ ꓖꓶ ꓠꓲꓹ ꓫꓵ ꓠꓬ ꓓ: ꓪꓴ. ꓠꓬ ꓣꓳ ꓠꓯꓼ ꓗꓪ ꓢꓲ ꓡꓲꓹ ꓟ ꓙꓳ ꓠ ꓔ ꓡꓳ= ꓢꓴ ꓔꓯ ꓮ. ꓔꓳ. ꓓꓳꓼ ꓖꓶ ꓠꓹ ꓟ ꓣꓳ ꓠꓯꓼ ꓗꓪ ꓮ. ꓔꓳ ꓔꓬ ꓠ ꓔ ꓡꓳ=” ꓐꓰ ꓐꓯ ꓖꓶ ꓔ ꓟ ꓥꓳ=
ꓢꓲ ꓡꓲꓹ ꓗꓹ ꓛꓲˍ ꓟ ꓔꓯ ꓬꓰ ꓖꓶ ꓢꓴ ꓠꓬ ꓶ ꓙꓳ ꓫꓱꓹ ꓙꓳ ꓢꓴ ꓥ ꓡꓳ꓾ ꓟꓬ-ꓟ ꓗꓴꓷꓼ ꓢꓲ ꓡꓲꓹ ꓗꓹ ꓛꓲ ꓠꓹ ꓟ ꓐꓱ ꓶ ꓬꓲ ꓚꓱꓹ ꓮ ꓟꓬꓹ ꓫꓵ ꓐꓰ ꓔꓬ ꓟ ꓔꓯ ꓪꓴ-ꓢ ꓡꓰ ꓶ ꓥꓳ ꓙꓱ ꓖꓶ ꓢꓲ 2026 ꓘꓳꓼ ꓠꓬ ꓟꓬ-ꓟ ꓗꓴꓷꓼ ꓐꓱ ꓶ ꓡꓰ ꓟ: ꓞꓲ ꓕꓲ ꓟꓲ ꓠꓯ ꓡꓱꓼ ꓐꓱ ꓶ ꓢꓲ ꓡꓲꓹ ꓠꓹ ꓟ ꓪ: ꓘꓴ ꓓꓴ ꓬꓰ ꓡꓯ= ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓟꓯꓼ ꓢꓰꓼ ꓡꓯ ꓘꓳ ꓟ꓾ ꓜꓲ ꓜꓲ ꓟꓴ ꓟꓴ ꓬꓰˍ ꓟ ꓑꓶ ꓓꓴ ꓡ ꓞꓳ ꓮ ꓟꓬꓹ ꓠꓬ ꓬꓲ ꓪ ꓥꓳ ꓡꓳ. ꓓꓴ ꓐꓬ ꓡꓰ ꓔꓬ ꓥ ꓟꓲ ꓢꓲ ꓡꓲꓹ ꓟ ꓠꓬ ꓟꓲ ꓠꓯ ꓡ ꓞꓳ ꓐꓴ ꓐꓱ ꓶ ꓟ: ꓟꓶ ꓡꓰ ꓓˍ ꓟ ꓣꓱ ꓬꓯꓼ ꓟ ꓐꓰ ꓔꓬ ꓟ ꓥ ꓡꓳ=
ꓔꓱꓹ ꓟ ꓐꓰ ꓜꓲ ꓜꓲ ꓟꓴ ꓟꓴ ꓬꓰꓘ ꓟ ꓠꓬ ꓞꓳ ꓤ ꓐꓴ ꓢꓯꓼ ꓐˍ ꓟ ꓗꓪ ꓐꓰ ꓒꓬꓱꓼ ꓡ ꓥ ꓟꓲ ꓖ: ꓖꓶˍ ꓟ ꓐꓰ ꓫꓱ. ꓤ ꓠꓲꓹ ꓠꓬ ꓡ ꓞꓳ ꓐꓴ ꓔꓯ ꓝꓮꓲ ꓫꓬꓹ ꓔꓱꓹ ꓖꓶˍ ꓟ ꓢꓯꓼ ꓪ ꓥ ꓡꓳ꓾ꓖꓪ ꓙꓱ ꓡꓯ ꓘꓳˍ ꓟ꓾ ꓠ ꓠꓹ ꓟ ꓐꓰ ꓜꓲ ꓘꓴ ꓠꓲꓹ ꓠꓬ ꓟ: ꓪˍ ꓟ ꓟ: ꓫꓱꓹ ꓟ ꓔꓯ ꓝꓮꓲ ꓫꓬꓹ ꓔꓶꓻ ꓖꓶˍ ꓟ ꓓ: ꓖꓴ ꓥ ꓡꓳ=
ꓢꓯꓼ ꓐ ꓢꓴ꓾ ꓫ. ꓢꓴ ꓟꓷꓼ ꓢꓴ ꓐꓴ ꓐꓰ ꓗꓴꓷꓼ ꓫꓵ ꓪꓴ ꓑꓶ ꓓꓴ ꓫ. ꓔꓬ ꓢꓴ ꓢꓯ ꓔꓯ ꓠ ꓠꓹ ꓓꓴ ꓬꓰ ꓡꓯ= ꓢꓲ ꓡꓲꓹ ꓔꓯ ꓫ. ꓪ ꓐꓯ ꓘꓶ: ꓗꓪ ꓐꓰ ꓡꓰ ꓟ: ꓥ꓾ ꓟꓬꓱ: ꓗꓪ ꓐꓰ ꓟ. ꓖꓶ ꓠꓹ ꓟ ꓥ ꓡꓳ=
ꓕꓲ ꓞꓲꓼ ꓕꓲ ꓑ ꓙꓲ ꓓꓰ ꓡꓰˍ ꓟ ꓪꓴ-ꓢꓳ꓾ ꓢꓲ ꓒ: ꓢꓲ ꓡꓲꓹ ꓗꓹ ꓛꓲˍ ꓟ ꓠꓬ ꓟꓲ ꓠꓯ ꓗꓪ ꓘꓶ ꓡꓶ ꓗ ꓔ ꓓꓴ ꓮ ꓙꓵ ꓟ ꓓꓰ ꓢ ꓪꓴ: ꓟꓴ ꓡꓰ ꓟ ꓢꓲ ꓡꓲꓹ ꓗꓹ ꓛꓲˍ ꓟ ꓥ ꓡꓳ= ꓕꓲ ꓟꓲ ꓠꓯ ꓡꓱꓼ ꓗꓪ ꓠꓵꓻ ꓠꓲꓹ ꓐꓰ ꓥꓳ ꓡꓳ. ꓓꓴ ꓔꓯ ꓧꓳ: ꓔꓯꓹ ꓖꓶ ꓐ ꓡ ꓠꓹ ꓟ ꓥꓪ ꓠꓴ ꓔꓯ ꓢꓲ ꓡꓲꓹ ꓟ ꓝꓲ ꓓꓴ ꓒꓬꓱꓼ ꓡꓰ ꓝꓲ ꓡꓯ꓾ ꓕꓱ ꓪ: ꓘꓴ ꓘꓶ: ꓔꓯ ꓢꓲ ꓒ: ꓠꓵꓻ ꓠꓲꓹ ꓐꓰ ꓫꓱ. ꓤ ꓠꓲꓹ ꓠꓯꓼ ꓗꓪ ꓙꓵꓻ ꓢꓲ ꓔꓱꓹ ꓟ ꓠꓲꓹ ꓟ ꓐꓰ ꓶ: ꓓꓰˍ ꓔꓬ ꓡꓳ꓾ ꓮꓟꓰꓠ.
