ꓞꓳ ꓤ ꓮꓽ ꓟ ꓥˍ ꓟꓲ ꓙꓲꓻˍ ꓟ ꓧˍ ꓟ ꓔꓯ ꓡꓰꓽ ꓟꓶ ꓠꓲ, ꓫꓵ ꓢꓴ ꓐꓴˍ ꓡꓰꓽ ꓥꓳ꓿ ꓖꓳ ꓡꓱ ꓥˍ ꓟꓲ ꓙꓲˍ ꓡꓳ ꓫꓵꓽ ꓔꓯ ꓧꓪ ꓠ ꓔˍ ꓟ ꓔꓯ ꓠꓬ ꓟꓽ ꓢꓷ. ꓔꓬ꓾ ꓟꓽ ꓚꓬ, ꓪ ꓔꓬ꓿ ꓢꓷ. ꓠꓲ, ꓢꓳ ꓦꓲ ꓗꓪ ꓥˍ ꓟꓲ ꓓ ꓡꓳ, ꓬꓰ ꓢꓴ ꓒꓬꓱꓼ ꓠꓲ, ꓫꓵˍ ꓡꓳ꓾ ꓟꓬꓱꓽ ꓬꓰ ꓖꓴ ꓗꓪ ꓥˍ ꓟꓲ ꓓꓻˍ ꓟ ꓟꓬꓱꓽ ꓬꓰ ꓢꓴ ꓒꓬꓱꓼ ꓠꓲ, ꓫꓵˍ ꓡꓳ꓿ ꓚꓲ. ꓛꓬ ꓶꓻ ꓡꓯꓼ ꓟꓬꓱꓽ ꓗꓪ ꓥˍ ꓟꓲ ꓪꓴꓽ ꓡ ꓟꓴ ꓡ ꓠꓲ, ꓫꓵˍ ꓡꓳ꓾ ꓚꓲ. ꓛꓬ ꓔꓶꓺ ꓙꓱꓼ ꓗꓪ ꓛꓲ ꓬꓰ ꓠꓲ, ꓫꓵˍ ꓡꓳ꓾ ꓕꓱ ꓡꓱ ꓫꓵꓽ ꓙꓲˍ ꓟ ꓧˍ ꓟ꓾ ꓧꓪ. ꓡꓰˍ ꓟ ꓔꓯ ꓟꓶ ꓠꓲ, ꓟꓽ ꓫꓵ ꓢꓴ ꓠꓽ ꓟꓽ ꓙꓳ꓿
ꓖꓳ ꓡꓱ ꓥˍ ꓟꓲ ꓙꓲˍ ꓟ ꓔꓯ ꓮ ꓡꓲ ꓣꓴ ꓠ ꓗˍ ꓡ꓾ ꓐꓯ ꓟ ꓔꓯ ꓠꓽ ꓠꓲ, ꓟ ꓟꓽ ꓙꓳ ꓔꓬ꓿ ꓟꓶ ꓠꓽ ꓟꓶ ꓠꓲ, ꓫꓵˍ ꓥ ꓟꓲ ꓮ ꓡꓲ ꓐꓰ ꓟꓶ ꓡꓰ ꓠ ꓬꓰ ꓠ ꓔˍ ꓡ ꓐꓯ ꓟ ꓔꓯ ꓠꓬ ꓟꓽ ꓓꓵꓽ ꓙꓽ ꓔꓬ꓿ ꓞꓳ ꓤ ꓥ ꓕ ꓑꓳꓸꓼ ꓗꓪ ꓙꓲˍ ꓟ ꓙꓳˍ ꓟ ꓡꓰ ꓟꓽ ꓙꓲꓻ ꓟ ꓬꓲ ꓫꓱ, ꓥˍ ꓟꓲ ꓙꓳ ꓔꓬ ꓟ ꓥꓳ꓿ ꓖꓳ ꓟ ꓡꓰ ꓐꓰ ꓮ ꓡꓲ ꓫꓵꓽ ꓗꓪ ꓥˍ ꓟꓲ ꓙꓲˍ ꓟ ꓐꓰ ꓟꓽ ꓙꓲꓻ ꓟ ꓐꓯ ꓢꓲ ꓕꓱ ꓡꓱ 2 ꓫꓵꓽ ꓙꓳˍ ꓟ ꓥ ꓡꓳ꓿
ꓣꓳ ꓠꓬ ꓙꓲˍ ꓟ ꓔꓯ ꓡꓰꓽ ꓟꓶ ꓠꓲ, ꓫꓵˍ ꓠꓬ ꓙꓲˍ ꓟ ꓚꓱ, ꓔꓯ ꓡꓰꓽ ꓓꓵꓽ ꓙꓽ ꓪˍ ꓟ ꓥꓳ꓿ ꓡ ꓞꓳ ꓕꓲ ꓣꓳ ꓐꓰ ꓙꓻ ꓡꓯ ꓘꓳˍ ꓟ ꓗꓪˍ ꓟꓲ ꓖꓳ ꓡꓱ ꓥꓳ꓿ ꓡ ꓞꓳ ꓖꓳ ꓕꓲ ꓣꓳ ꓔꓯ ꓙꓳˍ ꓟ ꓙꓲꓻˍ ꓟ ꓬꓲ ꓫꓱ, ꓐꓰ ꓟꓽ ꓙꓲꓻ ꓟ ꓬꓲ ꓫꓱ, ꓠꓯꓸꓼ ꓗꓪ ꓐꓰ ꓟꓽ ꓙꓲꓻ ꓟ ꓬꓲ ꓫꓱ, ꓔꓯ ꓣꓳ ꓡꓰ ꓫꓬ, ꓔꓱ, ꓖꓶ ꓟꓽ ꓐ ꓡ ꓥˍ ꓟꓲ꓾ ꓙꓲꓻˍ ꓟ ꓬꓲ ꓫꓱ, ꓙꓲˍ ꓟ ꓣꓱꓽ ꓬꓰ ꓚꓱ, ꓔꓯ ꓠꓽ ꓣꓳ ꓔꓯꓺ ꓢꓳ ꓐ ꓡˍ ꓡꓳ꓿
ꓞꓳ ꓤ ꓕꓲ ꓣꓳ ꓡꓰ ꓮ ꓟꓶ ꓟ ꓚꓲ. ꓛꓬ ꓕꓯꓽ ꓢꓲ ꓕꓲ ꓝ. ꓪꓴꓽ ꓡ ꓟꓴ ꓡ ꓠꓲ, ꓫꓵˍ ꓠꓬ ꓚꓲ. ꓛꓬ ꓚꓳꓽ ꓚꓲ. ꓛꓬ ꓡꓰꓽ ꓫꓬ, ꓔꓱ, ꓕꓯ ꓡꓰꓽ ꓒꓬꓱꓼ ꓡ ꓓˍ ꓟ ꓥ ꓡꓳ꓿
“ꓥꓪ ꓠꓽ ꓮ ꓘꓶ. ꓪꓴꓽ ꓡ ꓟꓴ ꓡ ꓠꓲ, ꓫꓵꓳ” ꓐꓰ ꓐꓯ ꓔꓬ ꓥˍ ꓟꓲ ꓮ ꓡꓲ ꓕꓲ ꓣꓳˍ ꓟꓲ ꓣꓳ ꓔꓯ ꓖꓳ ꓙꓱ ꓟꓽ ꓔꓳ, ꓖꓶꓽ ꓡ꓿ ꓔꓯꓺ ꓥꓳꓽ ꓢꓴ ꓡꓰ ꓣꓳ ꓔꓯ ꓖꓳ ꓙꓱ ꓔꓳ, ꓖꓶꓽ ꓡˍ ꓥ ꓟꓲ ꓣꓳ ꓚꓲ. ꓛꓬ ꓡꓰ ꓛꓲ ꓒꓯ, ꓦꓽ ꓢꓲ ꓓꓯꓻ ꓠꓲ, ꓟꓽ ꓫꓵ ꓕꓯ ꓠꓽ ꓮ ꓟˍ ꓟꓲ ꓮ ꓫꓵꓽ ꓬꓰ ꓟꓽ ꓐ ꓡ꓿ “ꓬꓲ ꓚꓲ. ꓛꓬ ꓡꓰ ꓓꓯꓻ ꓠꓲ, ꓟꓽ ꓫꓵ ꓢꓴ ꓕꓲ ꓣꓳ ꓔꓯ ꓖꓳꓽ ꓙꓱ ꓕꓯꓽ ꓢꓲ ꓗꓪ ꓓꓯꓻ ꓠ, ꓟ ꓟ. ꓖꓶ ꓟꓽ ꓠ” ꓐꓰ Andrew Carnegie ꓡꓰ ꓐꓯ ꓔ ꓡꓳ꓿ ꓕꓱ ꓟ ꓡꓰ ꓐꓰ ꓙꓲˍ ꓟ ꓔꓯ ꓟꓶ ꓠꓲ, ꓟꓽ ꓫꓵ ꓢꓴ ꓥˍ ꓟꓲ ꓠꓱ. ꓐꓯ ꓢꓴ ꓔꓬ ꓗꓪ ꓚꓳ. ꓙꓲˍ ꓟ ꓕꓲ ꓫꓵꓽ ꓫꓵꓽ꓾ ꓙꓲˍ ꓟ ꓬꓲ ꓫꓱ,꓾ ꓙꓲˍ ꓟ ꓢꓯꓼ ꓕꓵꓼ ꓚꓱ, ꓕꓱ ꓡꓱ ꓫꓵꓽ ꓔꓯ ꓟꓳꓻ ꓟꓽ ꓗꓴ.꓾ ꓢꓳ ꓣꓴ ꓟꓽ ꓗꓴ.꓿ ꓖꓳ ꓡꓱ ꓠꓬꓲ ꓙꓲˍ ꓟ ꓮ ꓡꓲ ꓫꓵꓽ ꓥˍ ꓟꓲ ꓟꓶ ꓠꓲ, ꓟꓽ ꓫꓵ ꓢꓴ ꓔꓬ ꓗꓪ ꓙꓲˍ ꓟˍ ꓟꓲ ꓟꓽ ꓙꓳ ꓟ ꓥꓳ꓿
ꓙꓲˍ ꓟ ꓬꓲ ꓫꓱ, ꓟꓽ ꓙꓳ ꓢꓴ ꓕꓲ ꓣꓳ ꓠꓬ ꓙꓲˍ ꓟ ꓞꓳ ꓤ ꓕꓲ ꓣꓳ ꓒꓬꓱꓼ ꓡ ꓟꓽ ꓓꓻ ꓟ ꓡꓰ ꓐꓰ꓾ ꓪꓴꓽ ꓡ ꓟꓴ ꓡ ꓢꓴ ꓕꓲ ꓣꓳˍ ꓟꓲ ꓒꓬꓱꓼ ꓡ ꓟꓽ ꓓꓻ꓿
ꓖꓳ ꓡꓱ ꓠꓬꓲ ꓪ ꓜꓲ ꓙꓲˍ ꓟ ꓞꓳ ꓤ ꓕꓲ ꓣꓳ ꓒꓬꓱꓼ ꓡ ꓠꓲ, ꓫꓵˍ ꓠꓬ ꓠꓱ. ꓐꓯ ꓢꓴ ꓔꓬ ꓗꓪ ꓚꓳ. ꓙꓲˍ ꓟ ꓬꓲ ꓫꓱ,꓾ ꓙꓲˍ ꓟ ꓣꓱꓽ ꓬꓰ ꓚꓱ,꓾ ꓙꓲˍ ꓟ ꓛꓳ ꓫꓱꓽ ꓚꓱ, ꓐꓴ ꓔꓯ ꓡꓳ. ꓟꓳꓻ ꓠ ꓛꓲ ꓡꓳ. ꓠꓬꓲ꓿
ꓙꓲˍ ꓟ ꓬꓲ ꓫꓱ,꓾ ꓙꓲˍ ꓟ ꓣꓱꓽ ꓬꓰ ꓚꓱ, ꓐꓴ ꓔꓯ ꓔꓯꓺ ꓢꓳ ꓢꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓫꓬ, ꓔꓱ, ꓗꓷ꓿ ꓢꓴ ꓔꓯ ꓙꓳˍ ꓟ ꓟꓽ ꓙꓲꓻ ꓟ ꓬꓲ ꓫꓱ,꓾ ꓟꓽ ꓙꓲꓻ ꓟ ꓛꓳ ꓫꓱꓽ ꓣꓱꓽ ꓬꓰ ꓚꓱ, ꓗꓪ ꓐꓰ ꓢꓳ ꓣꓴ ꓓꓴ ꓬꓰ꓿ “ꓳ꓾ ꓬꓲ ꓔꓯ ꓙꓳˍ ꓟ ꓬꓲ ꓫꓱ, ꓕꓱ ꓟ ꓠꓽ ꓟꓽ ꓙꓲꓻ ꓐꓷ꓾ ꓠꓱ. ꓐꓯ ꓢꓴ ꓔꓯ ꓠꓽ ꓡꓰ ꓝꓲˍ ꓐꓷ꓾ ꓥꓪ ꓠꓽ ꓕꓱ ꓟ ꓔꓯ ꓤ ꓟꓳ ꓓꓴ ꓥꓳ꓾” ꓐꓰ ꓓꓵꓽ ꓙꓽ ꓢꓲ ꓢꓳ ꓣꓴ ꓓꓴ ꓬꓰ꓿
ꓙꓲˍ ꓟ ꓣꓱꓽ ꓬꓰ ꓚꓱ, ꓬꓲ ꓫꓱ, ꓔꓯ ꓠꓽ ꓛꓳꓻ ꓫꓱꓽ ꓐ ꓡ ꓠ, ꓟ ꓢꓯꓼ ꓕꓵꓼ꓿ ꓮ ꓤ ꓤ ꓐꓰ ꓠꓱ. ꓐꓯ ꓢꓴ ꓡꓰ ꓛꓳ ꓫꓱꓽ ꓔꓬ ꓟ ꓙꓲˍ ꓟ ꓣꓱꓽ ꓬꓰ ꓚꓱ, ꓠꓬ ꓣꓳ ꓔꓯ ꓙꓳ ꓡꓰ ꓢꓲ꓾ ꓙꓲˍ ꓟ ꓖꓳ ꓟ ꓠꓬ ꓣꓳ ꓠꓯꓸꓼ ꓗꓪ ꓕꓶ ꓞ, ꓡꓰˍ ꓥꓳ꓿ ꓬꓲ ꓦꓬꓼ ꓠꓬꓲ ꓕꓲ ꓟ ꓛꓲ ꓡˍ ꓕꓯ ꓣꓳ ꓠꓯꓸꓼ ꓗꓪ ꓙꓲˍ ꓟ ꓬꓲ ꓫꓱ, ꓙꓲˍ ꓟ ꓣꓱꓽ ꓬꓰ ꓚꓱ, ꓡꓰꓽ ꓤꓰꓻ ꓞ, ꓡꓰˍ ꓥꓳ꓿ ꓖꓳ ꓟ ꓑꓶ. ꓓꓴ ꓪ ꓜꓲ ꓙꓲˍ ꓟ ꓞꓳ ꓤ ꓕꓲ ꓣꓳ ꓒꓬꓱꓼ ꓡ ꓠ, ꓟ ꓠꓬ ꓠꓱ. ꓐꓯ ꓢꓴ ꓗꓪ ꓙꓳˍ ꓟ ꓟꓽ ꓙꓲꓻ ꓟ ꓬꓲ ꓫꓱ, ꓗꓪ ꓐꓰ ꓢꓳ ꓣꓴ ꓤ ꓟꓳ ꓢꓲ ꓠꓬꓲ꓾ ꓙꓲˍ ꓟ ꓬꓲ ꓫꓱ, ꓐꓴ ꓔꓯ ꓠꓬ ꓔꓯꓺ ꓢꓳ꓾ ꓡꓯꓼ ꓕꓲꓺ ꓣꓱꓽ ꓬꓰ ꓙꓰ꓿ ꓖꓳ ꓡꓱ ꓬꓰˍ ꓠꓬ ꓣꓳ ꓠꓬ ꓙꓲˍ ꓟ ꓞꓳ ꓤ ꓕꓲ ꓣꓳ ꓒꓬꓱꓼ ꓡˍ ꓥꓳ꓿
