ꓟ, ꓟ ꓬꓲ ꓝꓲ ꓓꓴ ꓜꓴ (Legion of Mary (Legio Marie)) ꓙꓴꓐꓲꓡꓰꓰ ꓑꓮꓲꓽ ꓬꓰˍ ꓟ

ꓟ, ꓟ ꓬꓲ ꓝꓲ ꓓꓴ ꓜꓴ (Legion of Mary) ꓙꓴꓐꓲꓡꓰꓰ ꓑꓮꓲꓽ ꓔꓯ 2025 ꓘꓳꓼ 12 ꓦ 22 ꓠꓬꓲ ꓕꓯ꓾ ꓟꓲ‐ꓚꓲ‐ꓠ ꓡꓳ ꓒꓱ ꓮꓴꓠꓖ‐ꓠꓮꓠ ꓗꓪ ꓙꓳˍ ꓟ ꓙꓲꓻ ꓫꓬ ꓢꓴ ꓚꓳꓡꓴꓟꓐꓮꓠ ꓪꓽ ꓘꓴ ꓦꓲꓻ ꓗꓪ ꓬꓰ ꓗꓷꓳ꓿ ꓑꓮꓲꓽ ꓕꓱ ꓟ ꓔꓯ ꓠꓯꓼ ꓠꓯꓼ 9ꓽ00 ꓙꓵ, ꓕꓯ ꓪꓴ. ꓔꓴ ꓗꓷ ꓟ ꓥ ꓡꓳ꓿

ꓑꓮꓲ ꓟꓲ‐ꓢ ꓪꓽ ꓘꓴ ꓓꓴ ꓔꓯ ꓔꓲꓺ ꓒ ꓓꓽ John Mung Ngawn La Sam ꓡꓰ ꓧꓳꓽ ꓪꓴ. ꓟꓴ ꓢꓲ ꓠꓬꓲ꓾ ꓔꓲꓺ ꓒ ꓐꓴ꓾ ꓟ, ꓟ ꓬꓲ ꓝꓲ ꓓꓴ ꓜꓴ ꓐꓴ ꓡꓰ ꓙꓴꓐꓲꓡꓰꓰ ꓟꓲ‐ꓢ ꓪꓽ ꓘꓴ ꓓꓴ ꓔꓯ ꓬꓰ ꓗꓷꓳ꓿

ꓔꓲꓺ ꓒ ꓓꓽ ꓡꓰ ꓟ, ꓟ ꓟ‐ꓡꓲ ꓔꓯ ꓔꓯꓺ ꓢꓳ ꓢꓲ ꓬꓲ ꓝꓲ ꓓꓴ ꓟꓬꓱꓽ ꓬꓰ ꓔꓬ ꓟ ꓟ, ꓟ ꓬꓲ ꓝꓲ ꓓꓴ (Legion of Mary) ꓜꓴ ꓔꓯ ꓟ, ꓟ ꓟ‐ꓡꓲ ꓡꓰ ꓐꓰ ꓙ ꓣꓳ ꓠꓲ, ꓙꓳ ꓠ, ꓟ꓾ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓚˍ ꓟ ꓗꓪ ꓐꓯ ꓖꓶ ꓗꓷꓳ꓿ ꓟ, ꓟ ꓟ‐ꓡꓲ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓟ, ꓟ ꓤꓶꓻ ꓔꓯ ꓘꓳ ꓣꓴ ꓗꓷ ꓢꓲ ꓙ ꓣꓳ ꓠꓲ, ꓡꓰ “ꓥꓪ ꓠꓬ ꓪꓴ‐ꓢ ꓬꓲ ꓚꓳ ꓟ ꓥ ꓡꓳ꓿ ꓠꓴ ꓠꓲ, ꓡꓶꓽ ꓙꓳˍ ꓟ ꓡꓰ ꓥꓪ ꓠꓯꓸꓼ ꓗꓪ ꓒꓬꓱꓼ ꓡ ꓝꓲ꓾” ꓐꓰ ꓐꓯ ꓢꓲ ꓪꓴ‐ꓢ ꓬꓲ ꓐꓯ ꓘꓶꓽ ꓔꓯ ꓘꓳ ꓣꓴ ꓗꓷꓳ꓿ “ꓖꓳ ꓟ ꓑꓶ. ꓓꓴ ꓣꓳ ꓥˍ ꓟꓲ ꓟꓽ ꓟꓶ ꓫꓵˍ ꓕꓯ ꓦꓵꓻ ꓡˍ ꓟ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓠꓲ, ꓟ ꓗꓪ ꓘꓳ ꓣꓴ ꓝꓲ ꓠꓲ, ꓫꓵˍ ꓡꓳ꓿ ꓙ ꓣꓳ ꓠꓲ, ꓔꓯ ꓬꓲ ꓪꓴ. ꓠꓲ, ꓟ ꓠꓯꓸꓼ ꓗꓪ ꓧꓳꓽ ꓖꓶ ꓠ ꓗˍ ꓟ ꓥ ꓡꓳ꓾” ꓐꓰ ꓶꓼ ꓓꓳꓽ ꓫꓱ, ꓓꓳꓽ ꓚ ꓟ. ꓖꓶ ꓗꓷꓳ꓿

ꓠꓬꓲ. ꓠꓬꓲ ꓣꓳ Legion of Mary (Legio Marie) ꓜꓴ ꓠꓬ ꓟ, ꓟ ꓔꓯ ꓔꓯꓺ ꓢꓳˍ ꓡꓳ꓿ ꓖꓳ ꓟ ꓑꓶ. ꓓꓴ ꓟ, ꓟ ꓡꓰ ꓐꓰ ꓛꓳ ꓫꓱꓽˍ ꓟ ꓣꓳ ꓐꓴ ꓥˍ ꓟꓲ ꓟ, ꓟ ꓡꓰ ꓐꓰ ꓙ ꓣꓳ ꓠꓲ, ꓙꓳˍ ꓠꓬ꓾ ꓟ, ꓟ ꓡꓰ ꓐꓰ ꓠꓲ, ꓒꓵꓽ ꓠꓲ, ꓡꓱˍ ꓠꓬ꓾ ꓠꓵꓻ ꓠꓲ, ꓙꓳˍ ꓠꓬ ꓠꓴ ꓠꓲ, ꓟ ꓠꓯꓸꓼ ꓗꓪˍ ꓟꓲ ꓢꓲ ꓒ ꓬꓰ‐ꓢꓴ ꓦꓵꓻ ꓡˍ ꓥꓳ꓿ ꓞꓳ ꓤ ꓮ ꓙꓵꓽ ꓔꓯ ꓙꓲꓻ ꓖꓴ ꓖꓶˍ ꓟ꓾ ꓞꓳ ꓤ ꓮ ꓙꓵꓽ ꓔꓯ ꓗ, ꓛꓲꓽ ꓡꓰ ꓝꓲˍ ꓟ ꓬꓰ ꓙ ꓗꓴ.ˍ ꓟ ꓟ, ꓟ ꓐꓴ ꓒꓬꓱꓼ ꓡˍ ꓥꓳ꓾ ꓐ, ꓐ ꓐꓴ ꓒꓬꓱꓼ ꓡˍ ꓥꓳ꓾ ꓐꓰ ꓔꓲꓺ ꓒ ꓓꓽ ꓡꓰ ꓝ. ꓢꓲ ꓐꓯ ꓖꓶ ꓗꓷꓳ꓿

ꓟ, ꓟ ꓬꓲ ꓝꓲ ꓓꓴ (Legion of Mary) ꓜꓴ ꓠꓬ ꓪꓽ ꓘꓴˍ ꓟ꓾ ꓞꓳ ꓠꓻ ꓐꓴ ꓔꓬ ꓗꓪ ꓚꓳꓻ ꓙꓰ ꓢꓲ ꓢꓯꓼ ꓖꓶ ꓪꓽ ꓘꓴ ꓖꓶˍ ꓟ꓾ ꓘꓴ ꓜꓲꓼ ꓞꓳ ꓗꓪ ꓬꓰ ꓙ ꓖꓶˍ ꓟ꓾ ꓕꓱ ꓡꓱ ꓫꓵꓽ ꓟꓬꓱꓽ ꓗꓪ ꓐꓰ ꓪꓴ‐ꓢ ꓟꓬꓱꓽ ꓬꓰ ꓔꓬ ꓖꓴˍ ꓟ ꓥ ꓡꓳ꓿ ꓜꓴ ꓕꓱ ꓟ ꓗꓪ ꓠꓬ ꓘꓴ ꓜꓲꓼ ꓞꓳ ꓢꓲ ꓤ ꓮ ꓟꓬ, ꓐˍ ꓟ ꓜꓴ ꓓꓽ ꓟ ꓕꓲ ꓟ ꓥ ꓡꓳ꓾ ꓐꓰ ꓢꓷ. ꓪˍ ꓡꓳ꓿

#rvalisu

#localchurchnews

#Myitkyinadiocese

#LegionofMary #LegioMarie