ꓢꓬꓓꓠꓰꓬ ꓡꓳ ꓒꓱ ꓗꓪ ꓟꓽ ꓟꓶ ꓫꓵ ꓕꓯ ꓗꓷ ꓡꓰ ꓟ ꓛꓴ ꓙꓳ ꓢꓴ ꓡꓰ ꓐꓶ ꓔꓳ, ꓗꓷ ꓗ. ꓠꓯ. ꓔꓲꓺ ꓒ ꓪ ꓔꓲ ꓠꓯꓼ ꓗꓪ ꓲꓢꓣꓮꓰꓡ ꓗꓴꓷꓼ ꓙꓵ ꓢꓲ ꓒꓽ ꓲꓢꓮꓮꓚ ꓧꓰꓣꓜꓳꓖ ꓗꓪ ꓐꓰ ꓑꓧꓳꓠꓰ ꓐꓰ ꓫ. ꓕꓱ ꓗꓷ ꓟ ꓥꓳ꓿

12 ꓦ ꓟ 17 ꓠꓬꓲ ꓠꓽ ꓢꓽ ꓠꓬꓲ ꓕꓯ ꓙꓲ ꓢꓴ ꓢꓲ ꓤ ꓐꓴ ꓫꓧꓣꓲꓢꓔꓟꓮꓢ ꓑꓮꓲ ꓔꓯ ꓬꓰ ꓠ, ꓟ ꓙ ꓖꓶ ꓔꓬ ꓢꓲ ꓙꓰꓪꓢ ꓘꓴ ꓜꓲꓼ ꓞꓳ ꓐꓴ ꓠꓬ ꓧꓮꓠꓴꓗꓗꓮꓧ ꓑꓮꓲ ꓔꓯ ꓬꓰ ꓔꓬ ꓟ ꓙꓵ, ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ ꓲꓢꓣꓮꓰꓡ ꓗꓴꓷꓼ ꓙꓵ ꓢꓲ ꓒꓽ ꓲꓢꓮꓮꓚ ꓧꓰꓣꓜꓳꓖ ꓗꓪ ꓐꓰ ꓑꓧꓳꓠꓰ ꓘꓳ, ꓣꓴ ꓟꓶ ꓟ ꓥꓳ꓿

ꓔꓲꓺ ꓒ ꓪ ꓔꓲ ꓡꓰ ꓟꓵꓽ ꓗꓳ ꓓꓵ ꓓꓵ ꓗꓪ ꓔꓬ ꓟ ꓙꓰꓪ ꓞꓳ ꓫꓵꓽ ꓗꓳ, ꓡꓳ ꓐꓰ ꓞꓳ ꓙꓳ ꓚꓱ, ꓜꓴ ꓮ ꓙꓵ ꓠꓯꓼ ꓗꓪ ꓙꓳꓺ ꓠꓲ, ꓔꓯ ꓫꓬ, ꓖꓶ_ ꓟ (ꓮꓠꓔꓲꓢꓰꓟꓲꓔꓲꓢꓟ) ꓙꓴ. ꓞꓳ ꓫꓵ ꓒꓳ, ꓔꓴ ꓟ ꓮ ꓩꓵ ꓔꓯ ꓗ‐ꓔꓳ‐ꓡꓲ ꓘꓴ ꓜꓲꓼ ꓞꓳ ꓗꓪ ꓐꓰ ꓥ ꓟꓲ ꓕꓼ ꓡꓳ꓾ ꓖꓳ ꓟ ꓡꓰ ꓟꓽ ꓞꓲ ꓔꓲꓺ ꓒ ꓪ ꓔꓲ ꓡꓰ “ꓗꓴꓷꓼ ꓘꓴꓽ ꓗꓪ ꓢꓯꓼ ꓕꓵꓼ ꓔꓬ ꓟ ꓢꓲ ꓡꓲ, ꓟ ꓬꓲ ꓚꓱ, ꓮ ꓟꓬ, ꓗꓪ ꓠꓲ, ꓟ ꓟꓽ ꓐꓬ ꓢꓯꓼ ꓕꓵꓼ ꓠ, ꓟ” ꓢꓯꓼ ꓖꓶ ꓢꓲ ꓠꓬꓲ ꓟꓲ ꓠꓯ ꓡ ꓞꓳ ꓞꓳ ꓙꓳ ꓚꓱ, ꓗꓪ ꓥ ꓟꓲ ꓟꓬ ꓠꓬꓲ ꓢꓯꓼ ꓕꓵꓼ ꓢꓲ ꓬꓰ ꓠ, ꓟ ꓐꓱ ꓶ ꓣꓳ. ꓚꓵ_ ꓡꓳ꓾ ꓐꓰ ꓐꓯ ꓔ ꓡꓳ꓿

12 ꓦ ꓟ 14 ꓠꓬꓲ ꓠꓽ ꓦꓬꓼ ꓠꓬꓲ ꓕꓯ ꓙꓰꓪꓢ ꓐꓴ ꓧꓮꓠꓴꓗꓗꓮꓧ ꓑꓮꓲ ꓓꓽ ꓘꓴꓽ ꓐꓳꓠꓓꓲ ꓗꓪ ꓑꓮꓲ ꓬꓰ ꓔꓬ ꓕꓯ ꓤ ꓑ ꓤ ꓠꓬꓲꓽ ꓣꓳ ꓡꓰ ꓐꓶ ꓡ ꓟ ꓑꓶ ꓓꓴ ꓞꓳ ꓤ 16 ꓣꓳ ꓫꓵꓻ ꓢꓲ 25 ꓣꓳ ꓠꓻ ꓓꓴ ꓡꓰ ꓟ ꓥꓳ꓿

ꓝꓮꓲ ꓕꓲ ꓠꓬꓲ ꓔꓲꓺ ꓒ ꓪ ꓔꓲ ꓡꓰ ꓦꓮꓔꓲꓚꓮꓠ ꓗꓪ ꓚꓧꓣꓲꓢꓔꓟꓮꓢ ꓐꓱ ꓶ ꓐꓲ ꓫꓴꓽ ꓠ, ꓟ ꓔꓯ ꓖꓶ ꓡ ꓢꓴ ꓐꓴ ꓐꓰ ꓜꓲ ꓔꓬ ꓕꓯ ꓖꓳ ꓛꓴ ꓙꓳ ꓡ ꓟ ꓗꓪ ꓫꓵꓻ ꓡꓰ ꓢꓴ ꓐꓴ ꓐꓱ ꓶ ꓪꓽ ꓘꓴ ꓖꓶ ꓗꓷ ꓟ ꓥꓳ꓿

ꓕꓱ ꓡꓱ ꓙꓰꓪ ꓞꓳ ꓫꓵ ꓒꓳ, ꓔꓴ ꓟ꓾ ꓜꓲ ꓜꓲ ꓟꓴ ꓟꓴ ꓐꓶ ꓡ ꓟ ꓔꓯ ꓠꓽ ꓗꓷ ꓠ, ꓟ꓾ ꓣꓳ ꓠꓲ, ꓟ ꓘꓴ ꓗꓪ ꓐꓰ ꓛꓴ ꓙꓳ ꓠꓲ, ꓟꓽ ꓙꓳ ꓠ, ꓟ꓾ ꓸꓐꓯ ꓔ ꓡꓳ꓿

12 ꓦ 14 ꓠꓬꓲ ꓙꓰꓪ ꓐꓴ ꓔꓯ ꓐꓶ ꓔꓳ, ꓡ ꓟ ꓑꓶ ꓓꓴ ꓫꓵꓻ ꓢꓴ 16 ꓣꓳ ꓗꓪ ꓛꓲ ꓔꓬ ꓡ ꓟ ꓑꓶ ꓓꓴ ꓮꓴꓢꓔꓣꓮꓡꓲꓮ ꓗꓴꓷꓼ ꓔꓲꓺ ꓒ ꓓꓽ ꓠꓯꓼ ꓗꓪ ꓠꓲ, ꓟ ꓟꓽ ꓢ ꓚꓱ, ꓕꓳ ꓶ ꓦ ꓩꓴ ꓗꓷ ꓢꓲ ꓠꓬꓲ꓾ ꓠꓲ, ꓟ ꓫ. ꓔꓬ ꓢꓴ ꓠꓲ, ꓟ ꓟꓽ ꓢ ꓔꓬ ꓢꓴ ꓐꓴ ꓐꓱ ꓶ ꓪꓽ ꓘꓴ ꓙ ꓖꓶ ꓔꓬ ꓡꓳ꓾ ꓐꓰ ꓐꓯ ꓔ ꓟ ꓥ ꓡꓳ꓿