ꓚꓧꓣꓲꓢꓔꓟꓮꓢ ꓙꓵ, ꓗꓪ ꓢꓲ ꓡꓲ, ꓟ ꓐꓰ ꓪ ꓡꓯ ꓘꓳ_ ꓟ ꓔꓯ ꓫꓬ, ꓔꓶꓻ ꓓꓴ ꓬꓰ ꓡꓯ꓾

ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓚꓮꓢꓔꓰꓡ ꓖꓮꓠꓓꓳꓡꓝꓳ ꓗꓪ ꓢꓳꓺ ꓙꓳ ꓦꓲꓻ ꓚꓧꓣꓲꓢꓔꓟꓮꓢ ꓑꓮꓲ ꓗꓪ ꓤ ꓠꓱ ꓐꓴ ꓐꓰ ꓕꓲ ꓪ ꓐ ꓢꓲ ꓫʼꓟꓮꓢ ꓬꓲ ꓙꓵ, ꓡꓯꓼ ꓫꓴꓻ ꓓꓽ ꓟ ꓔꓯ ꓮ ꓙꓵ ꓢꓴ ꓠꓯꓼ ꓗꓪ ꓖꓶ ꓠ, ꓟ ꓜꓲꓼ ꓡ ꓢꓴ ꓐꓴ ꓔꓯ ꓘꓴ ꓔ ꓡꓳ꓾

ꓚꓮꓢꓔꓰꓡ ꓖꓮꓠꓓꓳꓡꓝꓳ ꓗꓪ ꓔꓬ ꓟ ꓔꓲꓺ ꓒ ꓪ ꓔꓲ ꓑꓮꓴꓡ (6) ꓢꓳ ꓙꓳ ꓦꓲꓻ ꓗꓪ ꓐꓰ ꓢꓳ ꓙꓳ ꓟ ꓐꓴ ꓡꓰ ꓬꓰ_ ꓟ 11 ꓧꓪ, ꓟ ꓫʼꓟꓮꓢ ꓑꓮꓲ ꓬꓰ ꓟ ꓥꓳ꓿ ꓕꓱ ꓟ ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓥ ꓟꓲ ꓚꓳ ꓙꓰ ꓡ ꓥꓳ꓿ ꓔꓲꓺ ꓒ ꓪ ꓔꓲ ꓡꓰ ꓕꓱ ꓡꓱ ꓬꓰ ꓟ ꓠꓬ ꓤ ꓠꓱ ꓤ ꓐꓴ ꓐꓱ ꓶ ꓮ ꓙꓵ ꓢꓴ ꓔꓯ ꓣꓱ ꓛꓰ ꓐꓲ_ ꓟ ꓫʼꓟꓮꓢ ꓗꓷ ꓡꓰ ꓝꓲ ꓐꓰ ꓐꓯ ꓠ, ꓟ ꓬꓲ ꓚꓱ, ꓥ ꓢꓲ ꓠꓬꓲ ꓔꓱ, ꓔꓱ, ꓐꓰ ꓐꓲ ꓜꓲꓼ ꓡꓰ ꓟ ꓠꓬ ꓚꓲ ꓛꓬ ꓪ ꓟꓶ ꓟ ꓔꓯ ꓔꓯꓺ ꓠ, ꓟ ꓟꓽ ꓥ꓾ ꓚꓲ ꓛꓬ ꓐꓰ ꓠꓱ. ꓐꓯꓼ ꓢꓴ ꓙꓻ ꓡꓯ ꓘꓳ ꓟ ꓗꓪ ꓢꓲ ꓡꓲ, ꓟ ꓐꓰ ꓔꓯꓺ ꓟ ꓥ ꓡꓳ꓾ ꓐꓰ ꓠꓬꓲ. ꓢꓲ ꓐꓯ ꓖꓶ ꓔ ꓡꓳ꓿

ꓫʼꓟꓮꓢ ꓠꓬ ꓗ, ꓛꓲ ꓟ ꓐꓰ ꓢꓲ ꓡꓲ, ꓟ ꓔꓯ ꓡꓵ, ꓔꓴ ꓖꓶ ꓡꓳ꓾

ꓑꓮꓲ ꓬꓲ ꓟꓶꓽ ꓗꓪ ꓔꓲꓺ ꓒ ꓪ ꓔꓲ ꓡꓰ ꓰ‐ꓔ‐ꓡꓲ꓾ ꓡ‐ꓔꓲꓠ꓾ ꓰꓠꓖꓡꓲꓢꓧ ꓐꓰ ꓢ‐ꓑꓮꓲꓠ ꓥꓳꓽ ꓗꓪ ꓐꓰ ꓫʼꓟꓮꓢ ꓟꓴ ꓖꓪ ꓖꓪ ꓟ ꓮ ꓘꓶ. ꓠ ꓠ, ꓗ, ꓛꓲ_ ꓡꓳ꓾ ꓤ ꓠꓱ ꓐꓴ ꓬꓲ. ꓥꓳꓽ ꓮ ꓟꓬ, ꓫꓵ ꓗꓪ ꓐꓰ ꓖꓪ ꓟ ꓠꓬ ꓫʼꓟꓮꓢ ꓠꓬ ꓮ ꓙꓵ ꓢꓴ ꓠꓲ, ꓟ ꓠꓯꓼ ꓗꓪ ꓗ, ꓛꓲ_ ꓟ ꓐꓰ ꓢꓲ ꓡꓲ, ꓟ ꓔꓯ ꓡꓵ, ꓔꓴ ꓖꓶ ꓟ ꓔꓯ ꓮ ꓙꓵ ꓢꓴ ꓢꓷ. ꓠ, ꓟ ꓐꓱ ꓶ ꓬꓰ ꓙ ꓡꓳ꓾ ꓐꓰ ꓐꓯ ꓔ ꓡꓳ꓾ ꓔꓲꓺ ꓒ ꓪ ꓔꓲ ꓡꓰ ꓕꓱ ꓡꓱ ꓒꓵꓽ ꓠꓲ, ꓐꓰ ꓘꓴ ꓖꓶ ꓡ ꓟ ꓔꓯ ꓫ ꓟꓳ꓾ ꓠꓲ, ꓡꓱ ꓗ, ꓛꓲ ꓡꓳ ꓐꓰ ꓐꓯ ꓔ ꓡꓳ꓿

ꓢꓲ ꓡꓲ, ꓠ, ꓟ ꓟꓬ ꓠꓬꓲ ꓢꓯꓼ ꓕꓵꓼ ꓠ, ꓟ꓾

ꓠꓵꓻ ꓠꓲ, ꓔꓯ ꓔꓯ, ꓡ ꓟ ꓢꓲ‐ꓫꓬ‐ꓟ‐ꓦ ꓐꓰ ꓐꓯ_ ꓟ ꓟꓴ ꓖꓪ ꓔꓯ ꓔꓱ, ꓕ ꓢꓲ ꓔꓲꓺ ꓒ ꓪ ꓔꓲ ꓡꓰ ꓤ ꓠꓱ ꓐꓴ ꓠꓬ ꓟꓴ ꓖꓪ ꓗꓪ ꓐꓰ ꓕꓲ ꓝ. ꓠꓵꓻ ꓠꓲ, ꓔꓯ ꓖꓶ ꓡ ꓟ ꓥꓳ꓿

ꓪꓴ‐ꓢ ꓠꓬ ꓠꓵꓻ ꓠꓲ, ꓡꓯꓼ ꓫꓴ ꓔꓯ ꓣꓳ ꓮ ꓙꓵ ꓔꓯ ꓖꓶ ꓠꓲ, ꓫꓵ_ ꓡꓳ꓾ ꓕꓱ ꓟ ꓠꓬ ꓫʼꓟꓮꓢ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓾ ꓪꓴ‐ꓢ ꓠꓬ ꓟꓲ ꓠꓯ ꓡ ꓞꓳ ꓐꓰ ꓟꓬ ꓠꓬꓲ ꓠꓬ ꓣꓳꓺ ꓟ꓾ ꓢꓯꓼ ꓐ ꓢꓴ ꓐꓴ ꓐꓰ ꓠꓶꓽ ꓞ, ꓟ ꓔꓯ ꓐꓯ ꓔ ꓡꓳ꓿

ꓣꓳ ꓐꓱ ꓶ ꓕꓱ ꓟ ꓠꓬ ꓪꓴꓽ ꓓꓰ ꓡꓰ ꓟ ꓘꓴ ꓔ ꓟ ꓬꓲ ꓚꓱ, ꓥ ꓡꓳ꓾ ꓟꓲ ꓠꓯ ꓗꓪ ꓢꓲ ꓡꓲ, ꓟ꓾ ꓪꓽ ꓡꓯ ꓘꓳ ꓟ꓾ ꓠꓵꓻ ꓠꓲ, ꓐꓰ ꓕꓲ ꓠꓲ, ꓕꓲ ꓪ ꓗꓷ ꓡꓰ ꓠ, ꓟ ꓟꓬ ꓠꓬꓲ ꓢꓯꓼ ꓕꓵꓼ ꓠ ꓔ ꓡꓳ꓾ ꓢꓯꓼ ꓖꓶ ꓡꓳ꓿

ꓣꓳꓺ ꓢꓴ ꓐꓴ ꓠꓬ ꓪꓴ‐ꓢ ꓔꓯ ꓟꓳ ꓟ꓾

ꓬꓲ ꓟꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰꓳ ꓡꓰ ꓤ ꓠꓱ ꓤ ꓐꓴ ꓐꓰ ꓬꓲ ꓪ ꓕꓲ ꓦꓲꓻ ꓢꓴ ꓐꓴ ꓐꓱ ꓶ ꓶ ꓥꓳ ꓙꓱ ꓪ ꓘꓴ ꓖꓶ ꓢꓲ ꓠꓬꓲ ꓪꓽ ꓘꓴ ꓠ, ꓟ ꓐꓰ ꓪꓴ‐ꓢ ꓔꓬ ꓟ ꓔꓯ ꓣꓳꓺ ꓢꓴ ꓐꓴ ꓠꓯꓼ ꓗꓪ ꓡꓰ ꓥ ꓟ ꓐꓰ ꓠꓲ, ꓟ ꓔꓯ ꓒꓴ ꓢꓲ ꓔꓬ ꓠ, ꓟ ꓢꓯꓼ ꓖꓶ ꓔ ꓡꓳ꓿