ꓐꓶ‐ꓬꓲ ꓗꓴꓷꓼ ꓫꓴ ꓖꓴ ꓪꓴ. ꓡ‐ꓫꓬꓳ ꓢꓽ‐ꓢꓶ‐ꓠ꓾ ꓑ‐ꓟ‐ꓚꓳ, ꓔꓲꓺ ꓒ ꓙꓵꓽ ꓔꓶ. ꓗꓪ ꓙꓳˍ ꓟ ꓘꓳ,‐ꓧꓳꓽ ꓘ, ꓗꓪ (12.12.2025) ꓕꓯ ꓡꓴ‐ꓓꓰ ꓟ, ꓟ ꓟ‐ꓣꓲ‐ꓬ ꓭ. ꓘꓴ ꓒꓴ ꓑꓮꓲꓽ ꓬꓰ ꓗꓷꓳ꓿ ꓑꓮꓲꓽ ꓟꓲ‐ꓢ ꓔꓯ ꓠꓬ ꓑ‐ꓟ‐ꓚꓳ, ꓔꓲꓺ ꓒ ꓙꓵꓽ ꓔꓶ. ꓔꓯ ꓙꓵꓽ ꓔꓬ ꓟ ꓔꓲꓺ ꓒ ꓬꓳ‐ꓫꓴ ꓡꓰ ꓧꓳꓽ ꓪꓴ. ꓟꓴ ꓢꓲ ꓠꓬꓲ ꓬꓰ ꓗꓷꓳ꓿

ꓟ, ꓟ ꓟ‐ꓡꓲ ꓭ. ꓘꓴ ꓒꓴ ꓑꓮꓲꓽ ꓟꓽ ꓬꓰ ꓧꓶ. ꓕꓯ ꓢꓲꓽ ꓫꓬ ꓟ‐ꓣꓲ‐ꓬ ꓔꓯ ꓞꓳ ꓘ, ꓗꓪ ꓑꓱ. ꓚꓳˍ ꓟ꓾ ꓣꓳ‐ꓢ‐ꓣꓲ ꓪꓽ ꓘꓴˍ ꓟ꓾ ꓡꓲ‐ꓢꓴ ꓡꓲꓽ ꓒꓰꓽ ꓖꓪ ꓛꓰ, ꓛꓰ,ˍ ꓟ ꓗꓪ ꓐꓰ ꓛꓵ, ꓣꓴ ꓗꓷ ꓢꓲ꓾ ꓢꓲꓽ ꓫꓬ ꓟ‐ꓣꓲ‐ꓬ ꓭ. ꓘꓴ ꓟꓲꓽ ꓕꓯꓽ ꓢꓲ ꓗꓪ ꓙꓰˍ ꓡꓳ꓿

ꓖꓳ ꓗ ꓠꓯ. ꓞꓳ ꓡꓱ ꓐꓴ ꓡꓰ ꓢꓲꓽ ꓫꓬ ꓟ‐ꓣꓲ‐ꓬ ꓐꓰ ꓕꓲ ꓪꓽ꓾ ꓑꓮꓲꓽ ꓗꓪ ꓛꓲ ꓡ ꓢꓴ ꓐꓴ ꓮ ꓙꓵꓽ ꓔꓯ ꓠꓲ, ꓒꓴ ꓛꓲ ꓡꓵ ꓡꓯ ꓡꓵ ꓖꓶ ꓗꓷꓳ꓿

ꓙꓵꓽ ꓟꓵꓽ ꓔꓲꓺ ꓒ ꓬꓳ‐ꓫꓴˍ ꓐꓰ꓾ ꓢꓶ,‐ꓑꓳ ꓔꓲꓺ ꓒ ꓬꓳ‐ꓢꓷ ꓟꓮꓲ,‐ꓡꓲꓽ ꓐꓴ ꓡꓰ ꓢꓲꓽ ꓫꓬ ꓟ‐ꓣꓲ‐ꓬ ꓭ. ꓘꓴ ꓔꓯ ꓐꓲꓻ ꓫꓴꓽ ꓚ ꓒꓴ ꓖꓶ ꓗꓷꓳ꓾ ꓐꓰ ꓢꓷ. ꓪˍ ꓡꓳ꓿ ꓖꓳ ꓗ ꓠꓯ. ꓑꓮꓲꓽ ꓟꓲ‐ꓢ ꓪꓽ ꓘꓴ ꓗꓷ ꓟ ꓥ ꓡꓳ꓿

ꓑꓮꓲꓽ ꓟꓲ‐ꓢ ꓪꓽ ꓘꓴ ꓓꓳ ꓡꓰ ꓗ ꓠꓯ. Salesian ꓔꓲꓺ ꓟ ꓜꓴꓻ ꓐꓴ ꓡꓰ Games ꓗꓽ ꓠꓯ, ꓫꓵꓽ ꓗꓽ ꓠꓯ, ꓖꓶˍ ꓟ꓾ ꓟꓳꓼ ꓡꓳ ꓜꓻ ꓖꓶꓽ ꓜꓽˍ ꓟ ꓐꓰ꓾ ꓟꓶꓽ ꓘꓶꓽ ꓕꓯ ꓛꓲ ꓡꓵ ꓡꓯ ꓡꓵˍ ꓟ ꓔꓯ ꓬꓰ ꓗꓷꓳ꓿

ꓘꓳ,‐ꓧꓳꓽ ꓘ, ꓗꓪ ꓟ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓠꓬ ꓛꓽ ꓬꓰ, (ꓡꓽ ꓚꓬ.) ꓔꓶ ꓠꓬꓲ꓾ ꓜꓻ ꓟꓲ ꓬꓰ ꓠꓬꓲ ꓐꓰ ꓶꓻ ꓡꓯꓼ ꓟꓴ ꓔꓬ ꓖꓴˍ ꓟ ꓥ ꓡꓳ꓿ ꓒꓴ ꓫꓵ ꓫ. ꓟ ꓐꓰ꓾ ꓘꓴ ꓜꓲꓼ ꓞꓳ ꓢꓲ ꓤ ꓮ ꓘꓶ. ꓠꓲ.ˍ ꓟ ꓑꓶ. ꓓꓴ ꓪꓽ ꓘꓴ ꓦꓲ ꓫꓬ, ꓠ, ꓟ ꓫ. ꓙꓵ ꓔꓬ ꓡꓳ꓾ ꓐꓰ ꓢꓷ. ꓪˍ ꓡꓳ꓿

ꓡ‐ꓫꓬꓳ ꓢꓽ‐ꓢꓶ‐ꓠ ꓗꓪ ꓡꓲ‐ꓢꓴ ꓞꓳ ꓫꓵꓽ ꓗꓪ ꓐꓰ ꓗ‐ꓔꓳ‐ꓡꓲꓗ ꓔꓲꓺ ꓒ (4) ꓣꓳ ꓙꓳˍ ꓟ ꓘꓴꓽ ꓠꓯꓸꓼ ꓗꓪ ꓔꓲꓺ ꓒ ꓬꓳ‐ꓫꓴ ꓠꓬ ꓑ‐ꓟ‐ꓚꓳ, ꓔꓲꓺ ꓒ ꓙꓵꓽ ꓔꓶ. ꓗꓪ ꓪꓴ‐ꓢ ꓟꓬꓱꓽ ꓟꓯꓻ ꓔꓬ ꓟ ꓥ ꓡꓳ꓿ ꓑ‐ꓟ‐ꓚꓳ, ꓔꓲꓺ ꓒ ꓙꓵꓽ ꓔꓶ. ꓗꓪ ꓗ‐ꓔꓳ‐ꓡꓲꓗ ꓢꓲ ꓤ ꓐꓴ ꓔꓬ ꓟ ꓞꓳ ꓘ, ꓠꓬ (14) ꓘ, ꓛꓲˍ ꓡꓰꓽ ꓙꓳ ꓢꓲ꓾ ꓟꓬꓽ ꓠꓬꓲ ꓠꓬ ꓡꓲ‐ꓢꓴ ꓫꓵꓽ ꓐꓴ ꓥ ꓡꓳ꓿