ꓙꓲ‐ꓢꓴ ꓪ ꓔꓲ. ꓪꓽ ꓘꓴ ꓦꓲ (Christ the King) ꓐꓰ ꓟꓬꓱ ꓔ ꓟ ꓪꓽ ꓘꓴ ꓦꓲ ꓫꓵꓼ ꓒꓴ ꓑꓮꓲꓽ ꓔꓯ 12 ꓦ ꓟ 10 ꓠꓬꓲ 2025 ꓘꓳꓼ꓾ ꓠꓽ ꓢꓽ ꓠꓬꓲ ꓕꓯ ꓟꓲ‐ꓚꓲ‐ꓠ ꓢꓽ‐ꓢꓶ‐ꓠ꓾ ꓲ‐ꓙꓮꓠ‐ꓓꓳꓠ ꓔꓲꓺ ꓒ ꓙꓵꓽ ꓔꓶ. ꓗꓪ ꓙꓳˍ ꓟ ꓣ‐ꓓ‐ꓗꓮꓳ, ꓞꓳ ꓘ, ꓗꓪ ꓬꓰ ꓗꓷ ꓟ ꓥ ꓡꓳ꓿ ꓪꓽ ꓘꓴ ꓦꓲ ꓫꓵꓼ ꓒꓴ ꓑꓮꓲꓽ ꓔꓯ ꓠꓬ ꓔꓲꓺ ꓒ ꓓꓽ Francis Daw Tang ꓡꓰ ꓧꓳꓽ ꓪꓴ. ꓟꓴ ꓢꓲ ꓒꓴ ꓑꓮꓲꓽ ꓬꓰ ꓗꓷꓳ꓿
ꓪꓽ ꓘꓴ ꓦꓲ ꓬꓲ ꓫꓵꓼ ꓒꓴ ꓑꓮꓲꓽ ꓐꓰ ꓕꓲ ꓪˍ ꓟꓴ ꓗꓪ ꓪ ꓔꓲ. ꓟ ꓟ, ꓟ ꓭ. ꓘꓴ ꓐꓰ ꓢꓲꓽ ꓫꓬ ꓑ ꓑ ꓦꓲ ꓔꓯˍ ꓟꓲ ꓶꓼ ꓥꓳꓽ ꓙꓱꓽ ꓗꓷ ꓢꓲ ꓒꓴ ꓐ ꓡ ꓗꓷꓳ꓿
ꓔꓲꓺ ꓒ ꓓꓽ ꓐꓰ ꓕꓲ ꓪꓽ ꓟꓲ‐ꓚꓲ‐ꓠ ꓢꓽ‐ꓢꓶ‐ꓠ ꓗꓪ ꓟ ꓔꓲꓺ ꓒ ꓐꓴ ꓡꓰ ꓟꓲ‐ꓢ ꓪꓽ ꓘꓴˍ ꓟ ꓔꓯ ꓧꓳꓽ ꓣꓱꓽ ꓗꓷ ꓟ ꓥ ꓡꓳ꓿ ꓟꓲ‐ꓢ ꓪꓽ ꓘꓴˍ ꓟ ꓠꓯꓸꓼ ꓗꓪ ꓔꓲꓺ ꓒ Paul Tu Awng ꓡꓰ ꓶꓼ ꓓꓳꓽ ꓫꓱ, ꓓꓳꓽ ꓚ ꓢꓲ ꓦ ꓢꓯꓼ ꓪ ꓖꓶ ꓗꓷꓳ꓿
“ꓪꓽ ꓘꓴ ꓦꓲ ꓠꓬ ꓢꓲꓽ ꓫꓬ ꓖꓴ ꓥ ꓡꓳ꓿ ꓕꓱ ꓗꓪ ꓠꓬ ꓪꓽ ꓘꓴ ꓖꓴ꓾ ꓝꓴꓲ. ꓣꓷꓠ. ꓖꓴ꓾ ꓡꓯꓽ ꓒꓯ, ꓝ. ꓖꓴ꓾ ꓫꓵꓻ ꓢꓴ ꓐꓴ ꓐꓱ ꓶ ꓪꓽ ꓘꓴ ꓙ ꓖꓶ ꓖꓴ꓾ ꓚꓲ. ꓛꓬ ꓪꓽ ꓘꓴ ꓘꓶꓽ ꓔꓯ ꓧꓳ. ꓧꓳꓽ ꓖꓴ ꓥ ꓡꓳ꓿” ꓐꓰ ꓐꓯˍ ꓡꓳ꓿
ꓔꓲꓺ ꓒ Tu Awng ꓡꓰ ꓝ. ꓢꓲ ꓠꓬꓲ꓾ “ꓕꓱ ꓗꓪ ꓠꓬ ꓪꓴꓽ ꓓꓰ ꓖꓴ ꓥ ꓡꓳ꓿ ꓝꓮꓲ ꓣꓳ ꓠꓬ ꓪꓴ‐ꓢ ꓬꓲ ꓢꓲꓽ ꓫꓬ ꓦꓲ ꓥ ꓡꓳ꓿ ꓪꓽ ꓘꓴ ꓦꓲ ꓕꓱ ꓟ ꓔꓯ ꓧꓶꓽ ꓚꓲ꓾ ꓭ. ꓛꓲ꓾ ꓡꓳ ꓓꓰ꓾ ꓐꓲ‐ꓡꓯ.‐ꓟꓬꓮꓬ ꓗꓪ ꓐꓰ ꓫꓬ, ꓔ ꓟ ꓡꓰ ꓐꓰ ꓣꓳ ꓥ ꓟꓲ ꓕꓲ ꓣꓳ ꓕꓯꓽ ꓢꓲ ꓕꓲ ꓣꓳ ꓜꓶ ꓢꓲ ꓘꓴ ꓜꓲꓼ ꓞꓳ ꓔꓯ ꓫꓬ, ꓔꓶ ꓔ ꓟ ꓥ ꓡꓳ꓿ ꓬꓰ‐ꓢꓴ ꓙꓲ‐ꓢꓴ ꓕꓯꓽ ꓢꓲ ꓫꓬ, ꓔ ꓟ ꓥ ꓡꓳ꓾” ꓐꓰ ꓔꓲꓺ ꓒ Tu Awng ꓡꓰ ꓪꓽ ꓘꓴ ꓦꓲ ꓫꓵꓼ ꓒꓴ ꓑꓮꓲꓽ ꓗꓪ ꓛꓲ ꓡ ꓢꓴ ꓐꓴ ꓔꓯ ꓶꓼ ꓓꓳꓽ ꓫꓱ, ꓓꓳꓽ ꓗꓪ ꓐꓰ ꓢꓯꓼ ꓪ ꓖꓶ ꓗꓷꓳ꓿
ꓪꓽ ꓘꓴ ꓓꓳ ꓡꓰ ꓗ ꓠꓯ. ꓕꓯ ꓠꓬ ꓪꓽ ꓘꓴ ꓦꓲ ꓫꓬ,ˍ ꓟ ꓗꓪ ꓬꓰ ꓙ ꓡ ꓢꓴ ꓐꓴ ꓔꓯ ꓟꓬꓱ ꓓꓳꓽ ꓖꓶ ꓫ. ꓟꓳˍ ꓟ꓾ ꓘꓴ ꓜꓲꓼ ꓞꓳ ꓗꓪ ꓪꓴ‐ꓢ ꓟꓬꓱꓽ ꓟꓯꓻ ꓔꓬ ꓟ ꓔꓲꓺ ꓒ ꓓꓽ ꓐꓴ꓾ ꓔꓲꓺ ꓒ ꓐꓴ꓾ ꓔꓲꓺ ꓟ ꓐꓴ꓾ ꓐꓣꓳ ꓐꓴ꓾ ꓟ. ꓒ ꓟ. ꓟ ꓐꓴ ꓔꓯ ꓒꓵꓽ ꓗ ꓬꓰ ꓗꓷꓳ꓿ ꓖꓳ ꓗ ꓠꓯ. ꓟꓳꓼ ꓡꓳ ꓜꓻ ꓜꓽ ꓗꓷ ꓢꓲ ꓑꓮꓲꓽ ꓕꓱ ꓟ ꓔꓯ ꓬꓲ ꓟꓶꓽ ꓢꓰꓼ ꓗꓷꓳ꓿
