ꓢꓲ ꓫꓬ ꓢꓴ ꓝꓣꓮꓠꓚꓲꓢ ꓫꓮꓦꓲꓰꓣ ꓑꓮꓲ ꓐꓰ ꓪꓴ-ꓢ ꓟꓬꓱ: ꓟꓯ ꓗꓷ ꓟ (50) ꓘꓳꓼ ꓐꓰ (25) ꓘꓳꓼ ꓐꓲ ꓙꓴ-ꓐꓲ-ꓡꓲ ꓑꓮꓲ ꓬꓰ_ ꓟ꓾
ꓟꓶ‐ꓚꓲ‐ꓠ ꓘꓴꓽ ꓗꓪ ꓐꓰ꓾ꓟꓶ‐ꓚꓲ‐ꓠ꓾ ꓐ‐ꓟꓳ‐ꓡ‐ꓫꓳ ꓔꓲꓺ ꓒ ꓓꓽ ꓙꓵꓽ ꓔꓶ. ꓗꓪ ꓐꓰ ꓪꓴ‐ꓢ ꓟꓬꓱꓽ ꓟꓯ ꓔꓬ ꓟ ꓢꓔ. ꓝꓣꓮꓠꓚꓲꓢ ꓫꓮꓦꓲꓰꓣ ꓔꓲꓺ ꓟ ꓐꓴ ꓢꓲ ꓫꓬ ꓢꓴ ꓝꓣꓮꓠꓚꓲꓢ ꓫꓮꓦꓲꓰꓣ ꓑꓮꓲ ꓐꓰ ꓔꓲꓺ ꓟ ꓐꓴ (7) ꓣꓳ ꓐꓴ ꓫ. ꓟꓳ ꓫꓱ. ꓖꓶ ꓙꓴ‐ꓐꓲ‐ꓡꓲ ꓑꓮꓲ ꓟꓲ‐ꓢ ꓪꓽ ꓘꓴ ꓙꓵ, ꓔꓯ 12 ꓦ ꓟ 3 ꓠꓬꓲ 2025 ꓘꓳꓼ ꓢꓲ ꓫꓬ ꓢꓴ ꓝꓣꓮꓠꓚꓲꓢ ꓫꓮꓦꓲꓰꓣ ꓑꓮꓲ ꓔꓯ ꓟꓶ‐ꓚꓲ‐ꓠ ꓔꓲꓺ ꓒ ꓓꓽ ꓢ‐ꓢꓲ‐ꓠ꓾ ꓠꓙꓮꓠꓖ‐ꓓꓴꓠꓖ꓾ ꓢꓲ ꓫꓬ ꓢꓴ ꓒꓳ‐ꓡꓳ ꓪꓽ ꓘꓴ ꓦꓲꓻ ꓗꓪ ꓬꓰ ꓓꓳ ꓡꓰ ꓟ ꓥꓳ꓿
ꓟꓲ‐ꓢ ꓪꓽ ꓘꓴ ꓙꓵ, ꓔꓯ ꓠꓬ ꓔꓲꓺ ꓒ ꓓꓽ ꓬꓳ‐ꓦ ꓟꓴꓠꓖ ꓠꓖꓮꓪꓠ ꓡꓮ ꓢꓮꓟ꓾ ꓔꓲꓺ ꓒ ꓓꓽ ꓝꓣꓮꓠꓚꓲꓢ ꓔꓧꓮꓠ ꓔꓴꓠ ꓐꓰ ꓔꓲꓺ ꓒ ꓐꓴ꓾ ꓟꓶ‐ꓚꓲ‐ꓠ ꓔꓲꓺ ꓒ ꓓꓽ ꓢ‐ꓢꓲ‐ꓠ ꓗꓪ ꓐꓰ ꓟꓬꓱꓽ ꓟꓯꓻ ꓢꓴ ꓔꓲꓺ ꓟ ꓐꓴ꓾ ꓐꓣꓳꓔꓧꓰꓣ ꓐꓴ ꓐꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓮ ꓟꓬ, ꓐꓰ ꓫꓱ. ꓖꓶ ꓓꓳ ꓡꓰ ꓟ ꓥꓳ꓿
ꓙꓴ‐ꓐꓲ‐ꓡꓲ ꓘꓳ, ꓣꓴ ꓟ ꓔꓲꓺ ꓟ ꓐꓴ ꓗꓪ ꓐꓰ (50) ꓘꓳꓼ ꓐꓲ ꓫꓵꓺ ꓙꓴ‐ꓐꓲ‐ꓡꓲ ꓘꓳ, ꓣꓴ ꓟ ꓔꓲꓺ ꓟ ꓐꓴ ꓠꓬ꓾ ꓔꓲꓺ ꓟ ꓑꓮꓴꓡꓲꓠꓰ ꓮꓴꓓꓣꓰꓬ꓾ ꓔꓲꓺ ꓟ ꓟꓮꓣꓲꓮ ꓳꓡꓲꓦꓲꓮ ꓡꓮꓜꓲꓠꓖ ꓗꓮꓪ ꓡꓴꓟ꓾ꓔꓲꓺ ꓟ ꓙꓴꓔꓔꓮ ꓚꓡꓮꓣꓰ ꓙꓮꓲꓪꓮ ꓙꓲ ꓣꓳꓲ ꓐꓴ ꓥ ꓢꓲ ꓠꓬꓲ (25) ꓘꓳꓼ ꓐꓲ ꓒꓴ ꓙꓴ‐ꓐꓲ‐ꓡꓲ ꓘꓳ, ꓣꓴ ꓟꓶ ꓢꓴ ꓠꓬ꓾ ꓔꓲꓺ ꓟ ꓟꓮꓣꓔꓧꓮ ꓧꓑꓮꓴꓙꓴꓠꓖ ꓓꓳꓲ ꓮꓪꓠꓖ꓾ ꓔꓲꓺ ꓟ ꓣꓳꓢꓰ ꓟꓮꓣꓬ ꓰꓢꓔꓧꓰꓣ ꓬꓮꓪ ꓢꓮꓴꓠꓖ꓾ ꓟꓮꓣꓬ ꓙꓳꓧꓠ ꓟꓮꓡꓰ ꓡꓴ ꓟꓮꓲ꓾ ꓔꓲꓺ ꓟ ꓣꓳꓢꓰ ꓮꓠꓖꓰꓡꓲꓠꓰ ꓟꓮꓣꓮꓠ ꓠꓮꓠꓖ ꓓꓳꓲ ꓐꓴ ꓥ ꓡꓳ꓾
ꓔꓲꓺ ꓒ ꓓꓽ ꓬꓳ‐ꓦ ꓟꓴꓠꓖ ꓠꓖꓮꓪꓠ ꓡꓮ ꓢꓮꓟ ꓗꓪ ꓐꓰ ꓪꓴ‐ꓢ ꓟꓬꓱꓽ ꓟꓯꓻ ꓟ ꓠꓬ ꓚꓲ ꓛꓬ ꓓ_ ꓟ ꓗꓪ ꓐꓰ ꓟꓽ ꓥ꓾ ꓪꓴ‐ꓢ ꓡꓰ ꓚꓲ ꓛꓬ ꓔꓯ ꓢꓲꓺ ꓚꓰ. ꓢꓲ ꓣꓱꓽ_ ꓟ ꓑꓶ ꓓꓴ ꓥ ꓡꓳ꓾ ꓪꓴ‐ꓢ ꓣꓱ ꓛꓰ ꓟꓽ ꓔꓬ ꓠꓬ ꓮ ꓫꓵ ꓥ ꓟꓲ ꓟꓽ ꓒꓬꓱꓽ ꓡ꓾ ꓖꓳ ꓟ ꓡꓰ ꓐꓰ ꓪꓴ‐ꓢ ꓣꓱ ꓛꓰ ꓗꓪ ꓐꓰ ꓠꓬ ꓟꓽ ꓒꓬꓱꓼ ꓡ ꓫꓵ ꓮ ꓫꓵ ꓟꓲ ꓟꓽ ꓙꓳ꓾ ꓐꓰ ꓔꓲꓺ ꓟ ꓐꓴ ꓔꓯ ꓢꓯꓼ ꓖꓶ ꓗꓷ ꓟ ꓥꓳ꓿
ꓢꓲ ꓫꓬ ꓢꓴ ꓝꓣꓮꓠꓚꓲꓢ ꓫꓮꓦꓲꓰꓣ ꓔꓲꓺ ꓟ ꓜꓴꓻ ꓐꓴ ꓟꓬ‐ꓟ ꓗꓪ ꓢ‐ꓢꓲ‐ꓠ ꓓꓵ ꓡ ꓟ ꓠꓬ (128) ꓘꓳꓼ ꓐꓲ ꓡꓰ ꓟ ꓥ ꓢꓲ ꓠꓬꓲ ꓮ ꓟꓶ ꓔꓲꓺ ꓟ ꓐꓴ (440) ꓣꓳ ꓛꓲ ꓔꓬ ꓡꓰ ꓟ ꓥ ꓢꓲ ꓟꓶ‐ꓚꓲ‐ꓠ ꓜꓴꓻ ꓘꓴꓽ ꓗꓪ ꓟꓬꓱꓽ ꓟꓯꓻ ꓔꓬ ꓟ ꓔꓲꓺ ꓟ (130) ꓣꓳ ꓟꓽ ꓞꓲ ꓔꓬ ꓟ ꓥ ꓡꓳ꓿ ꓢꓲ ꓫꓬ ꓢꓴ ꓝꓣꓮꓠꓚꓲꓢ ꓫꓮꓦꓲꓰꓣ ꓔꓲꓺ ꓟ ꓜꓴꓻ ꓐꓴ ꓠꓬ ꓟꓬ‐ꓟ꓾ ꓒꓲ‐ꓡꓲ‐ꓒꓲ꓾ ꓮꓟꓰꓣꓲꓚꓮ꓾ ꓲ‐ꓔ‐ꓡꓲ꓾ ꓔꓧꓮꓲ꓾ ꓗꓴꓷꓼ ꓗꓪ ꓢ‐ꓢꓲ‐ꓠ ꓟꓬꓱꓽ ꓟꓯꓻ ꓔꓬ ꓡꓳ꓾ ꓐꓰ ꓢꓷ. ꓪ ꓡꓳ꓿
