ꓐꓶ ꓓꓳ ꓖꓴ ꓟꓶ. ꓮꓢꓲꓮ ꓕꓲ ꓚꓳ ꓡꓳ ꓗꓪ ꓬꓲꓻ ꓙꓬ ꓙꓵꓽ_ ꓟ꓾ ꓟꓵꓽ ꓡꓶ_ ꓟ ꓑꓶ ꓓꓴ ꓞꓳ ꓤ 1500 ꓣꓳ ꓟꓽ ꓞꓲ ꓫꓵꓻ ꓡꓰ ꓟ ꓥ ꓡꓳ꓿ ꓮ ꓟꓶ ꓲꓠꓓꓳꓠꓲꓢꓲꓮ ꓗꓴꓷꓼ ꓗꓪ ꓫꓵꓻ ꓢꓴ 883 ꓣꓳ ꓔꓬ ꓡꓰ ꓟ ꓐꓰ ꓢꓣꓲ ꓡꓮꓠꓗꓮ ꓗꓪ 486 ꓣꓳ꓾ ꓔꓧꓮꓲ ꓗꓪ 185 ꓣꓳ ꓐꓰ ꓟꓮꓡꓮꓬꓢꓲꓮ ꓗꓪ 3 ꓣꓳ ꓔꓬ ꓡꓰꓳ ꓐꓰ ꓐꓯ ꓑꓶ ꓔ ꓡꓳ꓿
ꓡꓳ, ꓬꓰ ꓟ ꓢꓲ ꓒ ꓬꓰ‐ꓢꓴ ꓔꓯ ꓥꓳ ꓡꓳ. ꓔ ꓟ ꓬꓲ ꓙꓵ, ꓠꓬꓲꓽ ꓠꓽ ꓕꓲ ꓠꓽ ꓠꓽ ꓦꓬꓼ ꓠꓬꓲ ꓕꓯ ꓟꓵꓽ ꓘꓳꓼ ꓑꓶ ꓓꓴ ꓫ. ꓔꓬ ꓢꓴ ꓑ ꓫꓬ ꓐꓴ ꓫꓵꓻ ꓡꓰ ꓢꓴ ꓐꓴ ꓕꓲ ꓦꓲꓻ ꓢꓴ ꓐꓱ ꓶ ꓪꓽ ꓘꓴ ꓙ ꓖꓶ ꓗꓷ ꓟ ꓥꓳ꓿ ꓖꓳ ꓟ ꓡꓰ ꓟꓵꓽ ꓗꓳ ꓓꓵ ꓓꓵ ꓗꓪ ꓐꓰ ꓬꓰ ꓙ ꓔꓳ, ꓙ ꓢꓴ ꓜꓴ ꓐꓴ ꓔꓯ ꓥ ꓟꓲ ꓬꓰ ꓙ ꓔꓳ, ꓙ ꓠ, ꓟ ꓢꓯꓼ ꓖꓶ ꓗꓷ ꓟ ꓥꓳ꓿
ꓮ ꓟꓶ ꓟꓵꓽ ꓘꓳꓼ ꓐꓰ ꓔꓳ, ꓜꓳ ꓔꓬ ꓔꓶ. ꓗꓪ ꓥ ꓟꓲ ꓬꓰ ꓙ ꓢꓴ ꓜꓴ ꓐꓴ ꓛꓲ ꓔꓬ ꓟ ꓥ ꓢꓲ ꓠꓬꓲ ꓬꓰ ꓙ ꓔꓬ ꓟ ꓥ ꓡꓳ꓾ ꓓꓳꓽ ꓫꓵ ꓗꓪ ꓐꓰ ꓢꓣꓲ ꓡꓮꓠꓗꓮ ꓐꓰ ꓲꓠꓓꓳꓠꓲꓢꓲꓮ ꓗꓴꓷꓼ ꓗꓪ ꓟꓲ ꓠꓯ ꓗꓪ ꓔꓵ. ꓔꓬ ꓞꓳ ꓫꓵꓻ ꓐꓴ ꓮ ꓟꓬ, ꓔꓬ ꓢꓰ ꓟ ꓥꓳ꓾ ꓗꓴꓷꓼ ꓮ ꓙꓵ ꓐꓯ ꓠꓬ ꓞꓳ ꓤ 900 ꓣꓳ ꓛꓲ ꓟꓶꓽ ꓡꓰ ꓔꓬ ꓢꓰ ꓟ ꓥꓳ꓿
ꓲꓠꓓꓳꓠꓲꓢꓲꓮ ꓗꓴꓷꓼ꓾ ꓢꓴꓟꓮꓔꓣꓮ ꓗꓪ ꓢ‐ꓢꓲ‐ꓠ ꓟꓬꓱꓽ ꓬꓰ ꓔꓬ ꓟ꓾ ꓚꓮꓑꓴꓚꓧꓲꓠ ꓔꓲꓺ ꓒ ꓜꓴꓻ ꓐꓴ ꓡꓰ ꓫ. ꓔꓬ ꓢꓴ꓾ ꓘꓰ, ꓡ ꓢꓴ ꓐꓴ ꓔꓯ ꓔꓬ ꓔꓶ. ꓖꓶ ꓔ ꓟ ꓥ ꓡꓳ꓾ ꓔꓲꓺ ꓒ ꓜꓴꓻ ꓗꓪ ꓐꓰ ꓔꓲꓺ ꓒ ꓬꓳꓢꓰꓑꓧ ꓠꓳꓣꓐꓰꓣꓔ ꓢꓲꓠꓮꓖꓮ ꓡꓰ “ꓮ ꓘꓶ. ꓛꓲ ꓫ. ꓔ ꓟ ꓙꓵ, ꓠꓬ ꓙ ꓡꓰꓳ꓾ ꓬꓰ ꓙ ꓔꓳ, ꓙ ꓡ ꓢꓴ ꓠꓬ ꓮ ꓟꓶ ꓗꓪ ꓐꓰ ꓡꓰ ꓪꓴ. ꓔꓴ_ ꓟ꓾ ꓮ ꓫꓵ ꓑꓶ ꓓꓴ ꓐꓯ ꓠꓬ ꓕꓱ ꓡꓱ ꓔꓳ, ꓜꓳ ꓔꓬ ꓟ ꓗꓪ ꓐꓰ ꓑ ꓫꓬ ꓐꓴ ꓘꓰ, ꓔꓬ ꓟ ꓛꓵ. ꓔꓬ ꓟ ꓑꓶ ꓓꓴ ꓥ ꓡꓳ꓾ ꓮ ꓟꓶ ꓠꓬ ꓬꓲꓻ ꓙꓬ ꓐꓰ ꓮ. ꓔꓳ. ꓫ. ꓔꓬ ꓢꓰ ꓟ ꓥꓳ꓾ ꓟꓬ ꓠꓬꓲ ꓠꓬ ꓬꓲꓻ ꓙꓬ ꓫ. ꓔꓬ ꓟ ꓐꓰ ꓬꓲ ꓪ ꓠꓯꓼ ꓗꓪ ꓬꓲꓻ ꓙꓬ ꓡꓳꓼ ꓡꓰ ꓠ ꓟꓽ ꓙꓳ_ ꓟ꓾ ꓬꓲꓻ ꓙꓬ ꓡꓳꓻ ꓗꓪ ꓐꓰ ꓡꓰ ꓣꓱ ꓔꓬ ꓟ꓾ ꓬꓲꓼ ꓠꓬꓲ ꓤ ꓐꓴ ꓮ ꓘꓶ. ꓛꓲ ꓬꓰ ꓙ ꓔꓳ, ꓙ ꓢꓴ ꓣꓱ ꓬꓯꓼ ꓔꓬ ꓡꓳ꓾ ꓓꓳ ꓡꓰ ꓠꓬ ꓬꓲ ꓪ ꓔꓬ ꓦꓲꓻ ꓔꓯ ꓥ ꓟꓲ ꓝꓮꓲ ꓫꓬ, ꓖꓶ ꓠ, ꓟ ꓥ ꓡꓳ꓾ ꓖꓳ ꓟ ꓡꓰ ꓐꓰ ꓢꓲꓐꓳꓡꓖꓳ ꓢ‐ꓢꓲ‐ꓠ ꓘꓴꓽ ꓗꓪ ꓫꓵꓻ ꓢꓴ ꓟꓶꓽ ꓢꓴ ꓮ ꓟꓬ, ꓔꓬ ꓡꓳ꓾ ꓐꓰ ꓦꓮꓔꓲꓚꓮꓠ ꓓꓳꓽ ꓫꓵ ꓬꓲ ꓚꓰꓺ ꓗꓪ ꓐꓯ ꓔ ꓟ ꓥ ꓡꓳ꓿
