ꓙꓵꓻ ꓠꓲ, ꓔꓯ ꓟꓽ ꓙꓲ ꓢꓴ ꓡꓯꓼ ꓒꓯꓽ ꓗꓪ ꓐꓰ ꓗꓽ ꓕ ꓖꓶ ꓢꓴ ꓙꓲꓻ ꓫꓬ ꓢꓴ Ambrose ꓚꓱ, (St. Ambrose)
ꓙꓲꓻ ꓫꓬ ꓢꓴ ꓮꓟꓐꓣꓳꓢꓰ ꓔꓯ ꓮꓓ (340) ꓘꓳꓼ ꓕꓯ ꓖꓰꓣꓟꓮꓠꓬ ꓗꓴꓷꓼ ꓔꓣꓲꓰꓣ ꓡꓳ ꓒꓱ ꓗꓪ ꓦꓵꓻ ꓗꓷꓳ ꓿ ꓙꓲꓻ ꓫꓬ ꓢꓴ ꓮꓟꓐꓣꓳꓢꓰ ꓔꓯ ꓠꓬ ꓲꓔꓮꓡꓬ ꓗꓴꓷꓼ ꓟꓲꓡꓮꓠ ꓡꓳ ꓒꓱ ꓔꓯ ꓡꓳ. ꓙ ꓔ ꓙ ꓢꓴ ꓙꓲꓻ ꓫꓬ ꓢꓴ ꓥ ꓡꓳ꓿
ꓙꓲꓻ ꓫꓬ ꓢꓴ ꓮꓟꓐꓣꓳꓢꓰ ꓠꓬ ꓬꓲ ꓐ, ꓐ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓳ. ꓬꓰ ꓗ. ꓠꓯ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓢꓳꓻ ꓣꓴ ꓠ, ꓟ ꓐꓱ ꓶ ꓲꓔꓮꓡꓬ ꓗꓴꓷꓼ ꓟꓲꓡꓮꓠ ꓡꓳ ꓒꓱ ꓗꓪ ꓡ ꓗꓷꓳ꓿ ꓝꓮꓲ ꓬꓲ ꓠꓬ ꓟꓲ ꓠꓯ ꓢꓷ. ꓠꓲ, ꓢꓳꓻ ꓣꓴ ꓓꓳ ꓡꓰ ꓗ. ꓠꓯ ꓬꓲ ꓠꓬ ꓟꓲꓡꓮꓠ ꓡꓳ ꓒꓱ ꓔꓯ ꓙꓵꓽ ꓢꓴ ꓙꓵꓽ ꓪ ꓙꓳ ꓢꓴ ꓕꓲ ꓣꓳ ꓒꓬꓱꓼ ꓡ ꓪ꓿ ꓖꓳ ꓕꓲ ꓙꓵ, ꓗꓪ ꓬꓲ ꓠꓬ ꓪꓴ‐ꓢ ꓔꓯ ꓟꓽ ꓦꓻ ꓡꓱ ꓢꓴ ꓥ ꓡꓳ꓿
ꓖꓳ ꓕꓲ ꓙꓵ, ꓗꓪ ꓬꓲ ꓠꓬ ꓪꓴ‐ꓢ ꓦꓻ ꓡꓱ ꓡ ꓢꓴ ꓟꓽ ꓒꓬꓱꓼ ꓡ ꓢꓲ ꓥ ꓟꓲ ꓬꓲ ꓠꓬ ꓮ ꓘꓶ. ꓛꓲ ꓠꓲ, ꓟ ꓙꓲ ꓢꓴ ꓥ ꓟ ꓪꓴ. ꓠꓬꓲ ꓔꓲꓺ ꓒ ꓓꓽ ꓙꓵꓽ ꓪ ꓔꓯ ꓘꓳ, ꓣꓴ ꓠ, ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓡꓰ ꓬꓲ ꓔꓯ ꓓꓰꓽ ꓗꓷꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓲꓻ ꓫꓬ ꓢꓴ ꓮꓟꓐꓣꓳꓢꓰ ꓠꓬ ꓪꓴ‐ꓢ ꓦꓻ ꓡꓱ ꓢꓲ ꓠꓬꓲ ꓖꓳ ꓓꓱꓽ ꓔꓲ ꓟꓶ ꓡꓰ ꓗ. ꓠꓯ ꓔꓲꓺ ꓒ ꓕꓲ ꓪ ꓒꓬꓱꓼ ꓡ ꓡꓳ꓿ ꓖꓳ ꓗ. ꓠꓯ ꓟꓲꓡꓮꓠ ꓡꓳ ꓒꓱ ꓓꓽ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓠ, ꓟ ꓔꓲꓺ ꓒ ꓓꓽ ꓒꓬꓱꓼ ꓗꓷꓳ꓿
ꓙꓲꓻ ꓫꓬ ꓢꓴ ꓮꓟꓐꓣꓳꓢꓰ ꓔꓲꓺ ꓒ ꓓꓽ ꓒꓬꓱꓼ ꓡ ꓗ. ꓠꓯ ꓬꓲ ꓠꓯ, ꓗꓪ ꓙꓳ ꓟ ꓮ ꓙꓵꓽ ꓔꓯ ꓪꓴꓽ ꓗꓷ ꓢꓲ ꓠꓬ ꓘꓴ ꓜꓲꓼ ꓞꓳ ꓐꓱ ꓶ ꓐꓰ ꓫ. ꓢꓴ ꓟꓷꓽ ꓢꓴ ꓐꓴ ꓔꓯ ꓖꓶ ꓗꓷꓳ꓿ ꓙꓲꓻ ꓫꓬ ꓢꓴ ꓮꓟꓐꓣꓳꓢꓰ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓰ ꓠ, ꓟ ꓟꓬꓱꓽ ꓔꓯ ꓬꓰ ꓢꓲ ꓠꓬꓲ ꓬꓲ ꓠꓯ, ꓗꓪ ꓬꓲ ꓙꓵ, ꓙꓳ ꓟ ꓮ ꓙꓵꓽ ꓔꓯ ꓢꓲꓽ ꓫꓬ ꓕꓳ ꓶ ꓵꓻ ꓝꓮꓲ ꓪꓴ‐ꓢ ꓐꓰ ꓙ ꓡꓯꓽ ꓘꓳ ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓟ. ꓟꓲ ꓮ ꓡꓰ ꓚꓺ ꓠ, ꓟ ꓙ ꓖꓶ ꓢꓴ ꓥ ꓡꓳ꓿
ꓙꓲꓻ ꓫꓬ ꓢꓴ ꓮꓟꓐꓣꓳꓢꓰ ꓠꓬ ꓟ. ꓟꓲꓽ ꓚꓺ ꓟ ꓗꓪ ꓮ ꓘꓶ. ꓛꓲ ꓓꓽ ꓢꓴ ꓔꓲꓺ ꓒ ꓓꓽ ꓕꓲ ꓪ ꓥ ꓡꓳ꓿ ꓬꓲ ꓡꓰ ꓟ. ꓟꓲꓽ ꓚꓺ ꓗꓷ ꓟ ꓔꓯ ꓠ ꓡꓳ ꓑ ꓙ ꓪ ꓡꓰ ꓢꓴ ꓙꓲꓻ ꓫꓬ ꓢꓴ ꓮꓴꓖꓴꓢꓔꓲꓠꓰ ꓠꓬ ꓝꓴꓲ. ꓠꓯ, ꓗꓪ ꓐꓰ ꓓꓵꓽ ꓙ ꓒꓳ, ꓡꓲꓼ ꓡ ꓢꓲ ꓠꓬꓲ ꓙꓲꓻ ꓫꓬ ꓢꓴ ꓕꓲ ꓪ ꓒꓬꓱꓼ ꓡ ꓟ ꓥ ꓡꓳ꓿
ꓙꓲꓻ ꓫꓬ ꓢꓴ ꓮꓟꓐꓣꓳꓢꓰ ꓠꓬ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓙꓵ, ꓕꓯ ꓫ. ꓓꓴ ꓟꓷꓽ ꓓꓴ ꓔꓳ, ꓜꓳ ꓡ ꓟ ꓙꓵ, ꓕꓯ ꓘꓴ ꓜꓲꓼ ꓞꓳ ꓠꓯ, ꓗꓪ ꓐꓰ ꓬꓲ ꓠꓯ, ꓗꓪ ꓙꓳ ꓟ ꓔꓯ ꓪꓴꓽ ꓗꓷ ꓢꓲ ꓠꓬꓲ ꓫ. ꓢꓴ ꓟꓷꓽ ꓢꓴ ꓐꓴ ꓔꓯ ꓬꓰ ꓙ ꓔ ꓙ ꓗꓷ ꓢꓴ ꓥ ꓡꓳ꓿
ꓙꓲꓻ ꓫꓬ ꓢꓴ ꓮꓟꓐꓣꓳꓢꓰ ꓠꓬ ꓙꓵꓻ ꓠꓲ, ꓮ ꓟꓬ, ꓙꓳ ꓢꓴ ꓙꓲꓻ ꓫꓬ ꓢꓴ ꓥ ꓡꓳ꓿ ꓬꓲ ꓠꓬ ꓬꓲ ꓞꓲꓼ (58) ꓘꓳꓼ ꓕꓯ ꓢꓲꓺ ꓒ ꓠꓯ, ꓗꓪ ꓬꓲꓼ ꓟꓶ ꓡꓰꓳ꓿ ꓙꓲꓻ ꓫꓬ ꓢꓴ ꓮꓟꓐꓣꓳꓢꓰ ꓧꓪꓽ ꓖꓳ ꓓꓱꓽ ꓔꓯ ꓟꓲꓡꓮꓠ ꓡꓳ ꓒꓱ ꓓꓽ ꓪꓽ ꓘꓴ ꓦꓲꓻ ꓗꓪ ꓮ ꓟꓶ ꓟ ꓙꓵ, ꓗꓪ ꓛꓲ ꓙꓳ ꓟ ꓥ ꓡꓳ꓿ ꓫ. ꓟꓳ ꓪ꓿
