ꓞꓲ; ꓟꓳꓽ ꓡꓰ ꓟ ꓞꓳ ꓟꓳꓽ ꓕꓲ ꓣꓳ ꓠꓬ ꓬꓲꓸꓹ ꓡꓴ ꓐꓱ ꓗꓪ ꓙ ꓖꓴ ꓫꓱꓽ ꓔꓬ ꓕꓯ ꓤ ꓠꓱ ꓤ ꓕꓲ ꓣꓳ ꓠꓬ ꓬꓲꓸꓹ ꓙꓬ ꓙꓵꓽ ꓡ ꓟ ꓪꓴꓸ ꓠꓬꓲ ꓬꓲ ꓐꓽ ꓗꓪ ꓤꓰˍ ꓟ ꓥꓪꓸ ꓕꓲ ꓟ ꓔꓯ ꓣꓴ ꓢꓲ ꓬꓲꓸꓹ ꓙꓬ ꓡꓳꓸꓸ ꓗꓪ ꓡꓳ ꓧꓳꓽ ꓩꓴˍ ꓡꓳ=
ꓞꓳ ꓟꓳꓽ ꓠꓬ ꓤ ꓠꓱ ꓤ ꓔꓯ ꓠ ꓠꓬꓲˍ ꓡꓳ꓾ ꓮ ꓫꓵꓽ ꓑꓶ. ꓓꓴ ꓥꓪꓸ ꓔꓯ ꓬꓲꓸꓹ ꓙꓬ ꓗꓪ ꓡꓳ ꓖꓶˍ ꓡ? ꓐꓰ ꓠ ꓠꓬꓲˍ ꓕꓯ꓾ ꓥꓪꓸ ꓕꓱ ꓕꓲ ꓘꓹ ꓟ ꓟꓽ ꓫꓵꓸꓹ ꓡꓰ ꓠ ꓬꓲꓸꓹ ꓙꓬ ꓗꓪ ꓡꓳ ꓖꓶˍ ꓗꓷ ꓟ ꓥ ꓡꓳ꓾ ꓐꓰ ꓒꓳꓹ ꓖꓶ ꓡꓳ=
ꓞꓳ ꓟꓳ ꓡꓰ꓾ ꓥꓪꓸ ꓕꓱ ꓮ ꓟꓬꓹ ꓟ ꓔꓯ ꓠꓴ ꓮ ꓡꓲ ꓢꓲ ꓚꓬꓴ. ꓙ ꓐ ꓡˍ ꓡ꓾ ꓐꓰ ꓐꓯ ꓕꓯ ꓤ ꓠꓱ ꓤ ꓠꓬ ꓥꓪꓸ ꓕꓲ ꓟ ꓔꓯ ꓣꓴ ꓢꓲ ꓬꓲꓸꓹ ꓙꓬ ꓗꓪ ꓡꓳ ꓖꓶ ꓗꓷ ꓢꓲ ꓕꓱ ꓡꓱ ꓐꓯ ꓡꓳ= ꓥꓪ ꓠꓬ ꓥꓪꓸ ꓮ ꓟꓬꓹ ꓔꓯ ꓚꓬꓴ ꓙ ꓟꓽ ꓐ ꓡ ꓐꓯˍ ꓥ ꓟꓲ ꓥꓪ ꓡꓰ ꓚꓬꓴ. ꓙ ꓪ ꓡꓰ ꓟ ꓥꓪꓸ ꓠꓬ ꓬꓲ ꓤꓶꓸꓹ ꓫꓵꓺ ꓢꓲ꓾ ꓬꓲꓸꓹ ꓙꓬ ꓗꓪ ꓗꓹ ꓛꓲꓽ ꓛꓲꓽ ꓡꓰꓽ ꓔꓬ ꓪ ꓡꓰˍ ꓡꓳ꓾ ꓐꓰ ꓒꓳꓹ ꓖꓶ ꓡꓳ=
ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓮ ꓫꓵꓽ ꓕꓯ ꓢꓳ ꓓꓴ ꓟꓶˍ ꓡ ꓐꓯ ꓠꓬ꓾ ꓟꓲ ꓠꓯ ꓕꓯꓽ ꓢꓲ ꓗꓪ ꓫꓸ ꓢꓴ ꓟꓷꓼ ꓢꓴ ꓮ ꓟꓬꓹ ꓔꓬ ꓟ ꓥ ꓡꓳ= ꓬꓲꓸꓹ ꓪ ꓮ ꓙꓵꓽ ꓔꓯ ꓫꓸ ꓓꓴ ꓗꓪ ꓐꓰ ꓚꓬꓴ. ꓙ ꓐ ꓡ ꓠ ꓗꓪ ꓛꓲ ꓣꓳ ꓟꓽ ꓐ ꓡ=
ꓖꓳ ꓡꓰ ꓐꓯ ꓥ ꓟꓲ ꓣꓳ ꓒ ꓕꓲ ꓗꓪ ꓔꓬ ꓟ ꓫꓸ ꓢꓴ ꓟꓷꓼ ꓢꓴ ꓔꓯ ꓐ ꓡ ꓟꓬ ꓛꓲ ꓬꓰ ꓙ ꓪ ꓡꓰ ꓢꓲ ꓬꓲ ꓪ ꓤꓶꓸꓹ ꓗꓪ ꓮ ꓔꓲꓸ ꓤ ꓔꓬ ꓢꓻ ꓡꓰ ꓐꓭˍ ꓠꓬ ꓟꓲ ꓠꓯ ꓕꓱ ꓟ ꓔꓯ ꓠꓴ ꓐ ꓡ ꓟꓬ ꓛꓲ ꓬꓰ ꓙ ꓪ ꓡꓰ ꓟ ꓥ ꓡꓳ= ꓟꓬꓽ ꓠꓬꓲ ꓐꓭ ꓠꓬꓲ ꓣꓳ ꓔꓯꓺ ꓢꓳ ꓓꓴ ꓠꓬ ꓤ ꓠꓱ ꓤ ꓕꓱ ꓕꓲ ꓣꓳ ꓠꓬ ꓬꓲ ꓚꓲ. ꓛꓬ ꓠꓲꓹ ꓟ ꓡꓰ ꓬꓰ ꓙ ꓖꓶ ꓗꓷ ꓟ ꓥ ꓡꓳ= ꓢꓴ ꓡꓰ꓾ ꓠꓴ ꓠꓬ ꓮ ꓘꓶꓸ ꓓꓻ ꓐꓭ ꓐꓰ ꓐꓯ ꓡ ꓟ ꓫꓸ ꓪ ꓘꓶꓽ ꓔꓯ ꓠꓲꓹ ꓥꓳ ꓢꓲ ꓬꓰ_ ꓟ ꓟꓽ ꓥ ꓟ ꓔꓯ ꓣꓳ ꓢꓷꓸ ꓪˍ ꓡꓳ=
