ꓙꓲꓻ ꓫꓬ ꓢꓴ Francis Xavier ꓠꓬ ꓟꓵꓽ ꓗꓳ, ꓓꓵ ꓓꓵ ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓬꓰ ꓢꓴ ꓙꓲꓻ ꓫꓬ ꓢꓴ ꓕꓲ ꓣꓳ ꓥ ꓡꓳ꓿ ꓬꓲ ꓔꓯ ꓮꓓ (1506) ꓘꓳꓼ ꓕꓯ ꓢꓑꓮꓲꓠ ꓗꓴꓷꓼ ꓑꓮꓟꓑꓡꓳꓠꓮ ꓡꓳ ꓒꓱ ꓗꓪ ꓦꓵꓻ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓐꓲ‐ꓔꓲ ꓗꓴꓷꓼ ꓑꓮꓣꓲꓢ ꓡꓳ ꓒꓱ ꓗꓪ ꓟꓲ ꓠꓯ ꓢꓷ. ꓠꓲ, ꓢꓳꓻ ꓣꓴ ꓔꓬ ꓟ ꓙꓵ, ꓕꓯ ꓥ ꓟꓲ ꓙꓲꓻ ꓫꓬ ꓢꓴ Ignatius ꓠꓯ, ꓗꓪ ꓛꓳꓽ ꓢꓴ ꓕꓲ ꓣꓳ ꓥ ꓡꓳ꓿
ꓙꓲꓻ ꓫꓬ ꓢꓴ Francis Xavier ꓠꓬ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓢꓳꓻ ꓓꓳ ꓡꓰ ꓗ. ꓠꓯ ꓪꓴ‐ꓢ ꓟꓬꓱꓽ ꓔꓲꓺ ꓒ ꓕꓲ ꓪ ꓒꓬꓱꓼ ꓡ ꓠ, ꓟ ꓐꓱ ꓶ ꓔꓲꓺ ꓒ ꓢꓳꓻ ꓦꓲꓻ ꓗꓪ ꓙꓰ ꓗꓷꓳ꓿ ꓙꓲꓻ ꓫꓬ ꓢꓴ Francis Xavier ꓔꓲꓺ ꓒ ꓕꓲ ꓪ ꓒꓬꓱꓼ ꓡ ꓗ. ꓠꓯ (1541) ꓘꓳꓼ ꓕꓯ ꓲꓠꓓꓲꓮ ꓗꓴꓷꓼ ꓗꓪ ꓪꓴ‐ꓢ ꓟꓬꓱꓽ ꓬꓰ ꓠ,ꓟ ꓐꓱ ꓶ ꓙꓰ ꓗꓷꓳ꓿ ꓖꓳ ꓗ. ꓠꓯ ꓬꓲ ꓠꓬ ꓲꓠꓓꓲꓮ ꓗꓴꓷꓼ ꓖꓳꓮ ꓟꓬꓱꓺ ꓔ ꓟ ꓞꓳ ꓘ, ꓒꓽ ꓗꓪ ꓔꓬ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓬꓰ ꓗꓷꓳ꓿ ꓝꓮꓲ ꓖꓳ ꓕꓲ ꓙꓵ, ꓗꓪ ꓲꓠꓓꓲꓮ ꓗꓴꓷꓼ ꓗꓪ ꓑꓳꓣꓔꓴꓖꓴꓰꓢꓢ ꓞꓳ ꓫꓵꓽ ꓔꓯ ꓓꓽ ꓪꓴ. ꓪꓴ‐ꓢ ꓐꓯ ꓘꓶꓽ ꓚꓺ ꓟ. ꓖꓶ ꓗꓷꓳ꓿ ꓗ. ꓠꓯ ꓲꓠꓓꓲꓮ ꓞꓳ ꓫꓵꓽ ꓐꓴ ꓔꓯ ꓟ. ꓟꓲꓽ ꓚꓺ ꓟ. ꓖꓶ ꓗꓷꓳ꓿ ꓟꓽ ꓔꓱ ꓟ ꓚꓱ, ꓗꓪ ꓐꓰ ꓙꓵꓽ ꓔꓬ ꓟ ꓑꓳꓣꓔꓴꓖꓴꓰꓰꓢꓢ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓑ ꓫꓬ ꓐꓴ ꓔꓯ ꓟꓽ ꓙꓲ ꓟ ꓟꓽ ꓔꓱ ꓚꓱ, ꓗꓪ ꓟꓽ ꓙꓵꓽ ꓠ, ꓟ ꓑꓶ. ꓑꓶ. ꓟ. ꓟꓲꓽ ꓚꓺ ꓗꓷꓳ꓿
ꓕꓱ ꓡꓱ ꓐꓰ ꓲꓠꓓꓲꓮ ꓞꓳ ꓫꓵꓽ ꓐꓴ ꓔꓯ ꓛꓳꓽ ꓑ ꓬꓰ ꓝꓲ ꓢꓲ ꓠꓬꓲ ꓙꓵꓽ ꓟ ꓔꓯ ꓠꓽ ꓗꓷ ꓠ, ꓟ ꓟ. ꓟꓲꓽ ꓮ ꓟꓬ, ꓚꓺ ꓗꓷꓳ꓿ ꓕꓱ ꓡꓰ ꓐꓰ ꓙꓲꓻ ꓫꓬ ꓢꓴ Francis Xavier ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓫ. ꓓꓴ ꓟꓷꓽ ꓓꓴ ꓔꓳ, ꓜꓳ ꓔꓬ ꓟ ꓲꓠꓓꓲꓮ ꓞꓳ ꓫꓵꓽ ꓐꓴ ꓠꓯ, ꓗꓪ ꓟ. ꓟꓲ ꓚꓺ ꓗꓷ ꓢꓲ ꓠꓬꓲ ꓪꓴ‐ꓢ ꓔꓯ ꓦꓻ ꓡꓱ ꓡ ꓢꓴ ꓐꓴ ꓐꓰ ꓧꓳꓽ ꓓꓱ ꓔꓲ ꓟꓶ ꓡꓰ ꓢꓴ ꓙꓲ‐ꓢꓴ ꓢꓲꓺꓤ ꓮ ꓟꓬ, ꓙꓳ ꓡ ꓗꓷꓳ꓿ ꓙꓲꓻ ꓫꓬ ꓢꓴ Francis Xavier ꓠꓬ ꓮꓓ (1549) ꓘꓳꓼ ꓕꓯ ꓙꓮꓑꓮꓠ ꓗꓴꓷꓼ ꓗꓪ ꓪꓴ‐ꓢ ꓟꓬꓱꓽ ꓬꓰ ꓗꓷꓳ꓿ ꓕꓱ ꓡꓰ ꓐꓰ ꓙꓲꓻ ꓫꓬ ꓢꓴ ꓫꓮꓦꓲꓰꓣ ꓠꓬ ꓙꓮꓑꓮꓠ ꓗꓴꓷꓼ ꓙꓵꓽ ꓢꓴ ꓪ ꓔꓲ ꓐꓴ ꓑꓴꓔꓳꓖꓴꓰꓢꓢ ꓞꓳ ꓫꓵꓽ ꓐꓴ ꓬꓲ ꓛꓵ ꓡꓯꓻ ꓫꓴ ꓔꓯ ꓖꓶ ꓡꓰ ꓢꓲ ꓠꓬ ꓙ‐ꓑꓮꓠ ꓪ ꓔꓲ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓜꓲꓼ ꓗꓷꓳ꓿ ꓖꓳ ꓗ. ꓠꓯ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓙꓵꓽ ꓪ ꓪ ꓡꓰ ꓟ ꓥ ꓡꓳ꓿
ꓝꓮꓲ ꓝ. ꓢꓲ ꓥ ꓟꓲ ꓧꓶꓽ ꓗꓴꓷꓼ ꓗꓪ ꓪꓴ‐ꓢ ꓟꓬꓱꓽ ꓬꓰ ꓙꓰ ꓠ, ꓟ ꓙꓰ ꓟ ꓙꓵ, (1552) ꓬꓲ ꓞꓲ (46) ꓘꓳꓼ ꓕꓯ ꓢꓲꓺ ꓒ ꓠꓯ, ꓗꓪ ꓬꓲꓼ ꓟꓶ ꓡꓰꓳ꓿ ꓙꓲꓻ ꓫꓬ ꓢꓴ Francis Xavier ꓠꓬ ꓧꓶꓽ ꓗꓴꓷꓼ ꓧꓳꓠꓖ ꓗꓳꓠꓖ ꓟꓵꓽ ꓗꓪ ꓛꓲ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓙꓰ ꓗꓷ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ Francis Xavier ꓠꓬ ꓬꓲ ꓢꓯꓼ ꓟ ꓟꓽ ꓟꓶ ꓡꓰ ꓢꓲ ꓠꓬꓲ ꓬꓰ‐ꓢꓴ ꓐꓰ ꓢꓯꓼ ꓘꓴ ꓢꓲ ꓠꓬꓲ ꓢꓯꓼ ꓟꓬ ꓖꓴ ꓡꓰꓳ꓿
