ꓠꓲ, ꓒꓵꓽ ꓠꓲ, ꓡꓱꓻˍ ꓟ ꓡꓲꓽ ꓒꓰꓼ ꓐꓰ ꓙꓵꓻ ꓠꓲ, ꓚꓱ, ꓐꓴ ꓔꓯ ꓑꓳ. ꓢꓲ ꓟ. ꓖꓶˍ ꓟ ꓙꓵ, ꓗꓪ ꓟꓬ‐ꓟ ꓗꓴꓷꓼ ꓔꓲꓺ ꓒ ꓓꓽ Cardinal Charles Bo ꓡꓰ꓾ Asia ꓗꓪ ꓟ ꓘꓴ ꓜꓲꓼ ꓞꓳ ꓠꓬ ꓠ ꓠ, ꓗꓴ. ꓢꓴ꓾ ꓣꓱꓽ ꓙ ꓗꓴ. ꓢꓴ꓾ ꓐꓼ ꓧꓷꓼ ꓐꓼ ꓡꓱꓼ ꓐꓰ ꓠꓲ, ꓒꓴ ꓗ, ꓛꓲꓽ ꓠꓲ, ꓙꓳ ꓗꓴ. ꓠ ꓔˍ ꓡꓳ꓾ ꓐꓰ ꓐꓯˍ ꓡꓳ꓿ ꓕꓱ ꓫ. ꓕꓱ ꓘꓶꓽ ꓔꓯ 2025 ꓘꓳꓼ 11 ꓦ 28 ꓠꓬꓲ ꓕꓯ Malaysia ꓗꓴꓷꓼ Penang ꓡꓳ ꓒꓱ ꓗꓪ ꓙꓳˍ ꓟ Light Hotel ꓗꓪ ꓬꓰˍ ꓟ Great Pilgrimage of Hope ꓐꓱ ꓶ ꓟꓲ‐ꓢ ꓬꓰ ꓪꓽ ꓘꓴˍ ꓟ ꓗꓪ ꓐꓯ ꓗꓷ ꓟ ꓥ ꓡꓳ꓿ ꓔꓲꓺ ꓒ ꓓꓽ Cardinal Charles Bo ꓠꓬ (2019‐2024) ꓕꓯ Asia ꓗꓴꓷꓼ ꓔꓲꓺ ꓒ ꓓꓽ ꓐꓴ ꓜꓴꓻ ꓚꓰ FABC ꓗꓪ ꓧꓳꓽ ꓪꓴ. ꓟꓴ ꓗꓷ ꓢꓴ ꓥ ꓡꓳ꓿
ꓬꓲ ꓫ. ꓕꓱ ꓘꓶꓽ ꓬꓲ ꓪꓴ. ꓗꓪ ‘Minglaba! Mabuhay! Vanakkam! ꓐꓰ ꓞꓳ ꓫꓵꓽ ꓞꓳ ꓙꓰꓽ ꓐꓴ ꓔꓯ ꓧꓪ. ꓧꓪꓸꓼ ꓐꓯ ꓗꓷ ꓢꓲ꓾ “Asia ꓔꓯ ꓡꓳ. ꓠꓬꓲ꓾ ꓣꓳ ꓟꓽ ꓪꓴ. ꓔꓴ ꓗꓷ ꓧꓶ. ꓕꓯ ꓡꓰ Asia ꓠꓬ Pentecost ꓢꓯꓼ ꓡꓰ ꓐꓰ ꓟꓶ ꓔꓬ ꓡꓳ” ꓐꓰ Asia ꓗꓪ ꓐꓲꓻˍ ꓟ ꓮ ꓙꓵꓽ ꓔꓯ ꓫꓱ. ꓖꓶ ꓗꓷꓳ꓿ ꓖꓳ ꓕꓲ ꓙꓵ, ꓗꓪ ꓗꓴꓷꓼ 32 ꓟ ꓗꓪ ꓐꓰ ꓡ ꓞꓳ 900 ꓣꓳ ꓟꓽ ꓞꓲ꓾ ꓟꓬ‐ꓟ ꓗꓴꓷꓼ ꓗꓪ ꓐꓰ 30 ꓣꓳ ꓙꓳˍ ꓟ ꓥ ꓡꓳ꓿
ꓔꓲꓺ ꓒ ꓓꓽ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓬꓲ ꓕꓲꓽ ꓟꓴꓽ ꓠꓬ “Asia ꓬꓰ‐ꓢꓴ ꓬꓲ ꓛꓳꓽ ꓒꓯ, ꓠꓯꓸꓼ ꓗꓪ ꓟ Asia ꓡ ꓞꓳ ꓐꓴ ꓕꓲ ꓠꓲ, ꓕꓲ ꓪ ꓓꓴ ꓓꓳ ꓙꓰˍ ꓟ” ꓐꓯˍ ꓟ ꓥ ꓡꓳ꓿ ꓝꓮꓲ ꓔꓲꓺ ꓒ ꓓꓽ ꓡꓰ Asia ꓗꓪ ꓔꓳ, ꓜꓳꓽ ꓔꓬ ꓟ “ꓟꓲꓽ ꓦꓲ ꓕꓳꓽ ꓥꓳꓽ” ꓐꓴ ꓔꓯ ꓖꓴ ꓟ. ꓖꓶ ꓗꓷꓳ꓿ ꓟꓯꓼ ꓓꓶꓽ ꓡꓯ ꓘꓳˍ ꓟ꓾ ꓠꓱ. ꓐꓱ ꓕꓲ ꓖꓻ ꓗꓪ ꓚꓵ. ꓙꓰ ꓪˍ ꓟ꓾ digital ꓗꓪ ꓚꓳ. ꓠ. ꓟꓲˍ ꓟ ꓬꓲ ꓢꓯꓼ꓾ ꓕꓱ ꓡꓱ ꓫꓵꓽ ꓐꓴ ꓔꓯ ꓓ‐ꓠꓲ‐ꓡꓰ ꓕꓳꓽ ꓶ ꓗꓪ ꓐꓰ ꓙꓳꓺ ꓠꓯ,ˍ ꓟ ꓙꓱꓽ ꓤ ꓡꓰ ꓐꓰ ꓐꓯ ꓔ ꓡꓳ꓿
“ꓫꓱ. ꓤ ꓓꓴ ꓧ.ˍ ꓟ ꓟꓷꓼ ꓠꓷ, ꓝ. ꓒ ꓓ‐ꓠꓲ‐ꓡꓰ ꓠꓬ ꓣꓳ ꓗꓪ ꓟ ꓕꓲ ꓐꓱˍ ꓡꓰ ꓐꓰ Social Media ꓔꓯ ꓒꓴ ꓠꓬꓲˍ ꓕꓯ꓾ ꓥ ꓠꓬ ꓓꓳꓽ ꓫꓵꓽ ꓐꓴ ꓔꓯ ꓒꓴ ꓠꓬꓲ ꓗꓷˍ ꓕꓯ ꓙꓳꓺ ꓛꓱꓽˍ ꓟ ꓡꓰ ꓐꓰ ꓬꓲ ꓥˍ ꓟꓲ ꓖꓳ ꓡꓱ ꓗ, ꓥꓳ” ꓐꓰ ꓔꓲꓺ ꓒ ꓓꓽ ꓡꓰ ꓝ. ꓢꓲ ꓐꓯˍ ꓡꓳ꓿ ꓐꓯ ꓘꓶꓽ ꓕꓱ ꓟ ꓠꓬ ꓮ ꓟꓶ ꓒꓬꓱꓼ ꓔꓬ ꓟ ꓔꓯ ꓔꓯꓺ ꓔ ꓟ ꓕꓲ ꓚꓱ, ꓥ ꓡꓳ꓿ ꓖꓳ ꓡꓱ ꓥˍ ꓟꓲ ꓬꓲ ꓡꓰ꓾ ꓙꓵꓻ ꓢꓴ ꓐꓴ ꓔꓯ “ꓡ‐ꓞꓳ‐ꓮ‐ꓐꓲ” ꓬꓰ‐ꓢꓴ ꓠꓬ ꓟꓲ ꓠꓯ ꓕꓱ ꓟ ꓟꓽ ꓢꓲ ꓡꓲ ꓟ ꓠꓯꓸꓼ ꓗꓪ ꓢꓲ ꓡꓲ ꓟ ꓔꓯ ꓔꓯ, ꓖꓶ ꓡ ꓡꓳ꓾ ꓐꓰ ꓔꓲꓺ ꓒ ꓓꓽ ꓡꓰ ꓝ. ꓢꓲ ꓐꓯˍ ꓡꓳ꓿
ꓔꓲꓺ ꓒ ꓓꓽ Cardinal Bo ꓡꓰ Asia ꓘꓴ ꓜꓲꓼ ꓞꓳ ꓬꓲ ꓙ ꓖꓴ ꓟ. ꓖꓶˍ ꓟ ꓟ ꓗꓴꓺ ꓤ ꓠꓬꓲ ꓟꓳꓻ ꓓꓴ 5 ꓟ ꓔꓯ ꓐꓯ ꓑꓶ ꓗꓷ ꓢꓲ꓾ “ꓘꓪꓽˍ ꓟ ꓠꓯ ꓞꓲꓼ ꓓꓳ ꓗꓷˍ ꓟ ꓡꓰ” ꓞꓲ. ꓒꓬꓱꓽ ꓓꓳˍ ꓟ ꓡꓰ ꓒꓬꓱꓼ ꓔꓬ ꓟ ꓙꓵꓻ ꓠꓲ, ꓚꓱ, ꓗꓪ ꓐꓰ ꓡꓲ, ꓓꓳ ꓡ ꓠ, ꓟ ꓙꓵꓻ ꓢꓴ ꓐꓴ ꓔꓯ ꓕꓵꓼ ꓪ ꓖꓶ ꓔ ꓡꓳ꓿
ꓬꓲ ꓪꓴ. ꓟ ꓠꓬꓲ ꓟꓳꓻ ꓓꓴ ꓠꓬ “ꓠ ꓠ, ꓟ ꓠꓬꓲ ꓟꓳꓻ ꓓꓴ” ꓥ ꓡꓳ꓿ Asia ꓑ ꓫꓬꓼ ꓐꓴ ꓠꓬ ꓫ. ꓕꓱˍ ꓟ ꓗꓪ ꓠꓲ, ꓒꓴˍ ꓡꓳ꓿ ꓕꓲ ꓖ ꓕꓲ ꓧꓪ, ꓠ ꓠ, ꓔꓬ ꓢꓴ ꓟꓽ ꓙꓳ ꓥˍ ꓟꓲ ꓣꓳ ꓠꓬ ꓝ. ꓢꓲ ꓫ. ꓕꓱ ꓔꓬ ꓡꓳ꓾ ꓐꓰ ꓔꓲꓺ ꓒ ꓓꓽ ꓡꓰ ꓪꓽ ꓫꓱ, ꓥꓳꓽ ꓫ. ꓕꓱˍ ꓡꓳ꓿ ꓬꓲ ꓡꓰ “ꓠ ꓠ, ꓗꓴ.ˍ ꓟ ꓘꓴ ꓜꓲꓼ ꓞꓳ ꓠꓬ ꓠꓻ ꓫꓬ, ꓖꓶ ꓐ ꓡˍ ꓟ ꓘꓴ ꓜꓲꓼ ꓞꓳ ꓥ ꓡꓳ” ꓐꓰ ꓐꓯˍ ꓡꓳ꓿
ꓠꓬꓲꓽ ꓟ ꓕꓲ ꓟ ꓠꓬꓲ ꓟꓳꓻ ꓓꓴ ꓠꓬ “ꓧꓳꓽ ꓣꓱꓽˍ ꓟ ꓠꓬ ꓣꓱꓽ ꓙˍ ꓟ ꓥ ꓠꓯ, ꓡꓳ”꓿ ꓧꓳꓽ ꓣꓱꓽ ꓢꓴ ꓚꓵ ꓚꓵ ꓠꓬ ꓛꓲ ꓒꓯ, ꓞꓲꓽ ꓖꓶ ꓢꓴ ꓥ ꓠꓯ, ꓡꓳ꓾ ꓡꓯꓼ ꓠꓬꓲ ꓖꓴ ꓢꓴ ꓥ ꓟꓽ ꓓꓻ” ꓐꓰ ꓐꓯ ꓢꓲ “ꓠꓴ ꓡꓯꓼ ꓠꓬꓲ ꓗꓷ, ꓠꓬ ꓠꓴ ꓔꓯ ꓪ ꓔꓲ. ꓕꓲ ꓣꓳ ꓡꓰ ꓐꓰ ꓓꓵꓽ ꓙꓽ ꓟꓶ ꓝꓲˍ ꓕꓯ ꓠꓽ ꓠꓴ ꓠꓬ ꓮ ꓣꓳ ꓡꓳ. ꓢꓴ ꓟꓽ ꓥ ꓓꓻꓳ꓿ ꓠꓴ ꓡꓯꓼ ꓠꓬꓲ ꓗꓷ, ꓔꓯ ꓡꓵ. ꓗꓷ ꓝꓲ. ꓛꓲ ꓡꓺꓳ꓾” ꓐꓰ ꓬꓲ ꓡꓰ ꓐꓯˍ ꓡꓳ꓿
ꓠꓬꓲ ꓟꓳꓻ ꓓꓴ ꓢꓽ ꓟ ꓕꓲ ꓟ ꓠꓬ꓾ ꓟꓽ ꓫꓱ. ꓡꓯ ꓘꓳ ꓟ ꓠꓬ ꓪꓴ‐ꓢ ꓬꓲ ꓐꓲꓻˍ ꓟ ꓡꓯꓼ ꓓꓴ ꓥ ꓡꓳ꓾ ꓐꓰ ꓬꓲ ꓡꓰ ꓐꓯ ꓗꓷ ꓢꓲ ꓠꓬꓲ꓾ ꓞꓳ ꓫꓵꓽ ꓟꓽ ꓘꓶꓽ ꓠ, ꓟ꓾ ꓫ. ꓢꓴ ꓐꓳ ꓢꓴ ꓟꓽ ꓘꓶꓽ ꓠ, ꓟ꓾ ꓡꓲꓽ ꓒꓰꓼ ꓟꓽ ꓘꓶꓽ ꓠ, ꓟ꓾ ꓔꓲꓺ ꓒ ꓓꓽ ꓡꓰ ꓘꓴ ꓜꓲꓼ ꓞꓳ ꓔꓯ ꓬꓲꓼ ꓠꓬꓲ. ꓖꓶ ꓗꓷꓳ꓿ “ꓕꓱ ꓟ ꓠꓬ ꓘꓶꓻ ꓡꓶꓽ ꓓꓴ ꓕꓲ ꓟ ꓟꓽ ꓥ꓾ ꓕꓱ ꓟ ꓠꓬ ꓬꓰ‐ꓢꓴ ꓬꓲ. ꓐꓲꓻ ꓜꓳꓽ ꓠꓴꓽ (Art) ꓥ ꓡꓳ꓾” ꓐꓰ ꓬꓲ ꓡꓰ ꓐꓯ ꓗꓷꓳ꓿
ꓡꓲꓺ ꓙꓰꓽ ꓕꓲ ꓙꓰꓽ ꓟ ꓠꓬꓲ ꓟꓳꓻ ꓓꓴ ꓠꓬ “ꓞꓳ ꓫ. ꓐꓴ ꓔꓯ ꓔꓱ, ꓫꓵ ꓗꓪ ꓗꓷ ꓠ, ꓟ” ꓥ ꓡꓳ꓿ “ꓢꓲ ꓒ ꓬꓰ‐ꓢꓴ ꓮ ꓟꓶ ꓕꓯ ꓡꓰ ꓬꓯꓼ ꓡˍ ꓕꓯ ꓬꓲ ꓮ ꓡꓲ ꓗꓪ ꓔꓬ ꓠꓯ, ꓡ꓿ ꓕꓱ ꓟ ꓠꓽ ꓦꓲꓻ ꓓꓽ ꓟ ꓗꓪ ꓟꓽ ꓥ꓿ ꓪ ꓔꓲ. ꓦꓲ ꓗꓪ ꓟꓽ ꓥ꓿ ꓫ. ꓢꓴ ꓐꓴ꓾ ꓠꓱ. ꓐꓯ ꓕꓲ ꓖꓻ ꓗꓪ ꓚꓵ. ꓙꓰ ꓪ ꓡꓰ ꓢꓴ ꓐꓴ꓾ ꓦꓲꓻ ꓟꓽ ꓙꓳ ꓢꓴ ꓐꓴ ꓠꓯꓸꓼ ꓗꓪ ꓔꓬ ꓡˍ ꓥꓳ” ꓐꓰ ꓐꓯ ꓗꓷ ꓟ ꓥ ꓡꓳ꓿
ꓡꓳ, ꓬꓰˍ ꓕꓲꓽ ꓟ ꓠꓬ “ꓞꓳ ꓡꓱ ꓐꓴ ꓐꓱ ꓶ ꓢꓯ. ꓔꓬ ꓢꓲ ꓗ, ꓛꓲꓽˍ ꓟ ꓘꓴ ꓜꓲꓼ ꓞꓳ ꓔꓯ ꓧꓪ ꓟꓶ ꓡꓰ ꓠ, ꓟ” ꓥ ꓡꓳ ꓐꓰ ꓐꓯˍ ꓡꓳ꓿ ꓞꓳ ꓡꓱ ꓐꓴ ꓠꓲ, ꓫꓵˍ ꓟ ꓠꓬ ꓮ ꓕꓯ ꓟꓲ ꓟ. ꓟꓲꓽ ꓚꓺ ꓔꓬ ꓟ ꓘꓴ ꓜꓲꓼ ꓞꓳ ꓟꓽ ꓥ ꓥ꓾ ꓠ ꓠ, ꓖꓶ ꓗꓴ.ˍ ꓟ ꓘꓴ ꓜꓲꓼ ꓞꓳ꓾ ꓪꓽ ꓘꓴˍ ꓟ ꓡꓰꓽ ꓟꓽ ꓞꓲꓺ ꓗ, ꓛꓲꓽˍ ꓟ ꓔꓯ ꓥˍ ꓟꓲ ꓟꓶ ꓠꓲ, ꓫꓵˍ ꓡꓳ꓾” ꓐꓰ ꓐꓯ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓡꓰ ꓬꓲ. ꓬꓲ ꓢꓲ ꓖꓶꓽ ꓟꓽ ꓐ ꓡ ꓕꓯ ꓠꓽ ꓞꓳ ꓡꓱ ꓞꓳ ꓡꓯ. ꓐꓴ ꓠꓬ ꓬꓲ ꓑꓶ. ꓟꓽ ꓙꓳ ꓟ scrolling ꓗꓪ ꓡꓰꓽ ꓐꓲ ꓜꓲꓼˍ ꓟ ꓬꓲ. ꓬꓲ ꓢꓲ ꓔꓯ ꓧꓪˍ ꓥꓳ꓾ ꓐꓰ ꓬꓲ ꓡꓰ ꓖꓴ ꓟ. ꓖꓶ ꓗꓷꓳ꓿
Cardinal Bo ꓡꓰ “Asia ꓗꓴꓷꓼ ꓕꓲ ꓟ ꓡꓱꓸꓼ ꓗꓪ ꓙꓲ‐ꓢꓴ ꓬꓲ ꓠꓵꓻ ꓠꓲ, ꓐꓯ ꓘꓶꓽ ꓔꓯ ꓞꓳ ꓤ ꓮ ꓙꓵꓽ ꓠ ꓠ, ꓐ ꓡ ꓠ, ꓟ ꓥꓳ ꓡꓳ.ˍ ꓡꓳ” ꓐꓰ ꓐꓯ ꓢꓲ “ꓢꓲ ꓒ ꓬꓰ‐ꓢꓴꓳ꓾ ꓠꓴ ꓢꓲ ꓤ ꓐꓴ ꓐꓰ Asia ꓗꓴꓷꓼ ꓗꓪ ꓝꓮꓲ ꓕꓲ ꓧꓪ, ꓙ ꓫꓱꓽ ꓡꓯ꓿ ꓠꓴ ꓐꓯ ꓘꓶꓽ ꓠꓬ Asia ꓗꓴꓷꓼ ꓗꓪ ꓙꓳˍ ꓟ ꓡ ꓞꓳ ꓮ ꓙꓵꓽ ꓠꓲ, ꓟ ꓐꓰ ꓦꓲꓻ ꓘꓴꓽ ꓮ ꓙꓵꓽ ꓠꓯꓸꓼ ꓗꓪ ꓬꓯꓼ ꓡꓯ꓾ ꓮꓟꓰꓠ” ꓐꓰ ꓐꓯ ꓢꓲ ꓠꓬꓲ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓬꓲ ꓟꓶꓽ ꓢꓰꓼ ꓗꓷꓳ꓿
