ꓗꓟSS-MYITKYINA ꓬꓰ ꓙ ꓜꓴꓻ ꓒꓴ ꓗꓷ ꓟ (25) ꓘꓳꓼ ꓐꓲ ꓙꓴꓐꓲꓡꓰꓰ ꓑꓮꓲꓽ ꓬꓰˍ ꓟ ꓓꓳꓽ
ꓠꓬꓲꓸ ꓠꓬꓲ 11 ꓦ ꓟ 29 ꓠꓬꓲ 2025 ꓘꓳꓼ ꓠꓽ ꓛꓳꓼ ꓠꓬꓲ ꓕꓯ ꓟꓲ-ꓚꓲ-ꓠ ꓢ-ꓢꓲ-ꓠ ꓗꓪ ꓗꓟꓢꓢ-ꓟꓬꓲꓔꓗꓬꓲꓠꓮ ꓬꓰ ꓙ ꓜꓴꓻ ꓒꓴ ꓗꓷ ꓟ (25) ꓘꓳꓼ ꓐꓲ ꓒꓴ ꓙꓴꓐꓲꓡꓰꓰ ꓑꓮꓲꓽ ꓐꓰ ꓢꓔꓸꓝꓣꓮꓠꓚꓲꓢ ꓙꓴꓐꓲꓡꓰꓰ ꓧꓮꓡꓡ ꓜꓲꓼ ꓦꓲꓻ ꓔꓯ ꓶꓻ ꓥꓳꓽ ꓙꓱꓽ ꓖꓶˍ ꓟ ꓑꓮꓲꓽ ꓔꓯ ꓗꓹ ꓛꓲ ꓛꓲ ꓬꓰ ꓗꓷꓳ=
ꓙꓴꓐꓲꓡꓰꓰ ꓑꓮꓲꓽ ꓗꓪ ꓟꓲ-ꓚꓲ-ꓠ ꓔꓲꓺ ꓒ ꓓꓽ ꓙꓳꓧꓠ ꓡꓮ-ꓢꓮꓟ ꓡꓰ ꓧꓳꓽ ꓪꓴꓸ ꓟꓴ ꓢꓲ ꓠꓬꓲ ꓟꓲ-ꓢ ꓔꓲ ꓓꓴ ꓪꓽ ꓘꓴ ꓙꓵꓹ ꓔꓯ ꓧꓳꓽ ꓪꓴꓸ ꓟꓴ ꓗꓷꓳ= ꓓꓽ ꓪꓴꓸ ꓕꓯ ꓢꓔꓸꓝꓝꓣꓮꓠꓚꓲꓢ ꓙꓴꓐꓲꓡꓰꓰ ꓧꓮꓡꓡ ꓜꓲꓻ ꓦꓲꓻ ꓔꓯ ꓶꓼ ꓥꓳꓽ ꓙꓱꓽ ꓖꓶ ꓗꓷ ꓟ ꓥ ꓡꓳ=
ꓔꓲꓺ ꓒ ꓓꓽ ꓡꓰ ꓟꓲ-ꓢ ꓔꓲ ꓪꓽ ꓘꓴ ꓙꓵꓹ ꓗꓪ ꓟꓸ ꓟꓲꓽ ꓚꓺ ꓗꓷ ꓟ ꓠꓬ ꓬꓰ ꓙ ꓔꓳꓹ ꓙ ꓟ ꓟꓬꓱꓽ ꓠꓬ ꓪꓴ-ꓢ ꓡꓰ ꓟꓲ ꓠꓯ ꓗꓪ ꓫꓸ ꓢꓴ ꓟꓷꓼ ꓢꓴ ꓐꓴ ꓐꓱ ꓶ ꓬꓰ ꓙ ꓔꓳꓹ ꓙ ꓠꓹ ꓟ ꓬꓰ ꓝꓲˍ ꓟ ꓟꓬꓱꓽ ꓥ ꓡꓳ= ꓝꓮꓲ ꓫꓸ ꓢꓴ ꓟꓷꓼ ꓢꓴ ꓐꓴ ꓔꓯ ꓬꓰ ꓙˍ ꓟ ꓙꓵꓹ ꓕꓯ ꓠꓵꓻ ꓠꓲꓹ ꓗꓪ ꓐꓰ ꓬꓰ ꓙ ꓠꓹ ꓟ ꓣꓳꓸ ꓚꓵˍ ꓟ ꓚꓱꓹ ꓔꓯ ꓟꓸ ꓟꓲꓽ ꓚꓺ ꓗꓷꓳ=
ꓫꓸ ꓢꓴ ꓟꓷꓼ ꓢꓴ ꓐꓴ ꓔꓯ ꓬꓰ ꓙ ꓟꓬꓱꓽ ꓬꓰˍ ꓟ ꓙꓵꓹ ꓕꓯ ꓪꓴ-ꓢ ꓠꓵꓻ ꓠꓲꓹ ꓗꓪ ꓐꓰ ꓬꓰ ꓙ ꓠꓹ ꓟ ꓝꓮꓲ ꓪꓴ-ꓢ ꓒꓬꓱꓽ ꓟꓬ ꓔꓯ ꓡꓳꓸ ꓠꓹ ꓟ ꓣꓳꓸ ꓚꓵˍ ꓟ ꓚꓱꓹ ꓔꓯ ꓟꓸ ꓟꓲꓽ ꓚꓺ ꓗꓷꓳ=
ꓗꓟꓢꓢ-ꓟꓬꓲꓔꓗꓬꓲꓠꓮ ꓜꓴꓻ ꓔꓯ 2000 ꓘꓳꓼ ꓕꓯ ꓓꓽ ꓪꓴꓸ ꓒꓴ ꓗꓷ ꓢꓲ ꓠꓬꓲ ꓫꓸ ꓢꓴ ꓟꓷꓼ ꓢꓴ ꓐꓴ ꓐꓰ꓾ ꓟꓲ ꓠꓯ ꓢꓷꓸ ꓠꓲꓹ ꓢꓳꓻ ꓣꓴ ꓔꓬ ꓢꓴ ꓐꓴ ꓔꓯ ꓬꓰ ꓙ ꓗꓷ ꓟ ꓥ ꓡꓳ= ꓗꓳꓸ ꓗꓷ ꓟ ꓙꓵꓹ ꓕꓯ Caritas ꓟꓬꓱꓺ ꓔꓯ ꓣꓱꓽ ꓗꓷꓳ= Caritas ꓔꓯ ꓓꓽ ꓪꓴꓸ ꓧꓳꓽ ꓪꓴꓸ ꓟꓴ ꓢꓴ ꓠꓬ ꓔꓲꓺ ꓒ Gregory Lazum Naw Din ꓥ ꓡꓳ=
ꓗꓳꓸ ꓗꓷ ꓟ ꓙꓵꓹ ꓗꓪ ꓐꓰ ꓮ ꓟꓶ ꓟ ꓙꓵꓹ ꓗꓪ ꓛꓲ ꓪꓴ-ꓢ ꓡꓰ ꓡꓳꓸ ꓙ ꓟ ꓪꓴꓸ ꓠꓬꓲ KMSS-MYITKYINA ꓗꓪ ꓟꓬꓱꓽ ꓬꓰ ꓢꓴ ꓮ ꓙꓵꓽ ꓥ ꓟꓲ ꓧꓪꓸ ꓧꓪꓸ ꓐꓰ ꓢꓯꓼ ꓕꓵꓼ ꓔꓬ ꓟ ꓚꓱꓹ ꓔꓯ ꓗꓟꓢꓢ-ꓟꓬꓲꓔꓗꓬꓲꓠꓮ ꓔꓯ ꓧꓳꓽ ꓪꓴꓸ ꓟꓴ ꓢꓴ ꓔꓲꓺ ꓒ ꓑꓮꓴꓡ ꓔꓴ ꓮꓪꓠꓖ ꓗꓪ ꓐꓰ ꓫꓸ ꓕꓱ ꓗꓷꓳ=
2026 ꓘꓳꓼ ꓗꓪ ꓐꓰ ꓗꓟꓢꓢ-ꓟꓬꓲꓔꓗꓬꓲꓠꓮ ꓬꓰ ꓙ ꓢꓴ ꓜꓴꓻ ꓔꓯ ꓔꓲꓺ ꓒ ꓑꓮꓴꓡ ꓜꓮꓪ ꓢꓧꓮꓠꓖ ꓡꓰ ꓧꓳꓽ ꓪꓴꓸ ꓟꓴ ꓠꓹ ꓟ ꓥ ꓡꓳ ꓐꓰ ꓢꓷꓸ ꓪ ꓡꓳ=
ꓗꓟꓢꓢ ꓟꓬꓲꓔꓗꓬꓲꓠꓮ ꓜꓴꓻ ꓠꓬ ꓗ-ꓔꓳ-ꓡꓲꓗ ꓘꓴ ꓜꓲꓼ ꓞꓳ ꓡꓰ ꓒꓴ ꓔ ꓟ ꓫ ꓢꓴ ꓟꓷꓼ ꓢꓴ ꓐꓴ ꓔꓯ ꓬꓰ ꓙ ꓔꓳꓹ ꓙ ꓠꓹ ꓟ ꓜꓴꓻ ꓥ ꓡꓳ= ꓗꓟꓢꓢ-ꓟꓬꓲꓔꓗꓬꓲꓠꓮ ꓜꓴꓻ ꓠꓬ ꓣꓱꓽ ꓬꓯꓼ ꓣꓱꓽ ꓞꓹ ꓔꓬ ꓢꓴ ꓐꓴ ꓔꓯ ꓞꓳ ꓫꓵꓽ ꓟꓽ ꓘꓶꓽ ꓘꓴ ꓜꓲꓼ ꓞꓳ ꓟꓽ ꓘꓶꓽ ꓬꓰ ꓙ ꓔꓬ ꓟ ꓜꓴꓻ ꓥ ꓡꓳ=
