ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓔꓬ ꓟ ꓟꓲ ꓠꓯ ꓕꓱ ꓟ ꓗꓪ ꓣꓳ ꓞꓳ ꓙꓳ ꓢꓯꓸ ꓔꓬ ꓕ ꓑꓳꓸꓼ ꓠꓬ ꓠꓱꓸ ꓐꓯ ꓢꓴ ꓕꓯꓽ ꓢꓲ ꓟꓽ ꓙꓺ ꓙꓰ ꓥ ꓡꓰꓸ꓾ ꓠꓱꓸ ꓐꓯ ꓢꓴ ꓐꓰ ꓕꓲ ꓡꓰꓹ ꓒꓬꓱꓼ ꓡ ꓠꓹ ꓟ ꓠꓽ ꓢꓯꓼ ꓕꓵꓼ ꓠ ꓔˍ ꓟ ꓥ ꓡꓳ= ꓖꓳ ꓡꓱ ꓢꓯꓼ ꓕꓵꓼˍ ꓟ ꓗꓪˍ ꓟꓲ ꓚꓲꓸ ꓛꓬ ꓐꓱ ꓶ ꓔꓶ ꓙꓱꓼ ꓙꓳ ꓠ ꓗꓹ ꓟ ꓥ ꓡꓳ= ꓞꓲꓼ ꓪꓴꓽ ꓢꓴ ꓥˍ ꓟꓲ꓾ ꓞꓳ ꓡꓯꓸ ꓐꓴ ꓥˍ ꓟꓲ꓾ ꓤ ꓠꓱ ꓤ ꓐꓴ ꓥ ꓟꓲ ꓔꓶ ꓙꓱꓼ ꓙꓳ ꓠ ꓔˍ ꓟ ꓥ ꓡꓳ=
“ꓔꓶ ꓙꓱꓼ ꓐꓯˍ ꓟ ꓠꓬ ꓢꓯꓸ ꓔꓬ ꓟ ꓬꓲꓼ ꓟꓬ ꓕꓲꓽ ꓟ ꓥ ꓡꓳ” ꓐꓰ ꓮ-ꓣꓲ-ꓮ-ꓔꓳ-ꓔꓯ ꓡꓰ ꓐꓯ ꓔˍ ꓡꓳ= ꓞꓳ ꓤ ꓮ ꓙꓵꓽ ꓠꓬ ꓚꓲꓸ ꓛꓬ ꓤꓶꓻ ꓗꓪ ꓧꓪꓸ ꓡꓰ ꓠꓹ ꓟ ꓐꓰ ꓶ ꓥꓳ ꓡꓳꓸ ꓓꓴ꓾ ꓬꓲꓼ ꓟꓬ꓾ ꓥ ꓠꓬ ꓦ ꓐꓬꓱꓽ ꓙꓳˍ ꓡꓳ= ꓣꓳ ꓒꓬꓱꓼ ꓠꓲꓹ ꓫꓵˍ ꓟ ꓔꓯ ꓓꓵꓽ ꓙꓽ ꓔꓬ ꓕꓲꓽ ꓖꓼ ꓠꓬ ꓣꓳ ꓔꓶ ꓙꓱꓼ ꓠꓬ ꓚꓵ ꓚꓵ ꓒꓬꓱꓼ ꓡ ꓟꓽ ꓓꓻ=
ꓣꓳ ꓓꓵꓽ ꓙꓽ ꓥꓳ ꓡꓳꓸ ꓔ ꓟ ꓡꓰ ꓚꓵ ꓚꓵ ꓒꓬꓱꓼ ꓡ ꓠꓹ ꓟ ꓐꓱ ꓶ ꓠꓬ ꓔꓶ ꓙꓱꓼ ꓖꓳ ꓟ ꓗꓪ ꓛꓲ ꓬꓰ ꓠꓹ ꓟ ꓐꓱ ꓶ ꓢꓯꓼ ꓕꓵꓼˍ ꓕꓯ ꓡꓰꓽ ꓧꓪꓸ ꓡꓰ ꓐ ꓡˍ ꓟ ꓥ ꓡꓳ= ꓣꓳ ꓠꓲꓹ ꓟ ꓗꓪ ꓒꓬꓱꓼ ꓡ ꓠꓲꓹ ꓫꓵˍ ꓟ ꓔꓶ ꓙꓱꓼ ꓕꓲ ꓟ ꓔꓯ ꓕꓳꓽ ꓶ ꓗꓪ ꓧꓶꓸ ꓕꓯ ꓐꓳ ꓝꓲꓸ ꓠ ꓗꓹ ꓡꓳ= ꓔꓶ ꓙꓱꓼ ꓖꓳ ꓟ ꓣꓳ ꓠꓲꓹ ꓟ ꓗꓪ ꓡꓰꓽ ꓗꓷ ꓔ ꓕꓯ ꓠꓽ ꓔꓶ ꓙꓱꓼ ꓗꓪ ꓟꓽ ꓛꓲ ꓬꓰ ꓕꓯ ꓡꓰ ꓣꓳ ꓢꓯꓼ ꓕꓵꓼˍ ꓟ ꓗꓪ ꓐꓰ ꓠꓽ ꓗꓷ ꓗꓴꓸˍ ꓟ ꓪꓴꓸ ꓠꓬꓲ ꓥ ꓡꓳ=
ꓔꓶ ꓙꓱꓼ ꓐꓯ ꓗꓷˍ ꓕꓯ ꓕꓲ ꓣꓳ ꓐꓰ ꓕꓲ ꓣꓳ ꓠꓽ ꓟꓽ ꓫꓱꓸ ꓡꓯ ꓘꓳ= ꓢꓷꓸ ꓠꓲꓹ ꓔꓶ ꓙꓱꓼ꓾ ꓧꓪꓽ ꓖꓳ ꓓꓱꓽ ꓔꓬꓹ ꓢꓻ ꓠꓲꓹ ꓫꓵˍ ꓟ ꓔꓶ ꓙꓱꓼ꓾ ꓶꓻ ꓡꓯꓼ ꓟꓬꓱꓽ ꓗꓪ ꓪꓴꓽ ꓟꓴ ꓡ ꓠꓲꓹ ꓫꓵˍ ꓟ ꓔꓶ ꓙꓱꓼ꓾ ꓙꓲˍ ꓟ ꓞꓳ ꓤ ꓕꓲ ꓣꓳ ꓒꓬꓱꓼ ꓡꓰ ꓠꓲꓹ ꓫꓵˍ ꓟ ꓔꓶ ꓙꓱꓼ꓾ ꓧꓪꓽ ꓖꓳ ꓓꓱꓽ ꓚꓱ ꓡꓰ ꓠꓲꓹ ꓫꓵˍ ꓟ ꓔꓶ ꓙꓱꓼ ꓕꓱ ꓡꓱ ꓮ ꓟꓬꓹ ꓫꓵꓽ ꓙꓳˍ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓲꓹ ꓫꓵˍ ꓟ ꓔꓶ ꓙꓱꓼ ꓕꓲ ꓟ ꓔꓯ ꓕꓳꓽ ꓶ ꓒꓬꓽ ꓗꓪ ꓧꓶꓸ ꓕꓯ ꓐꓳ ꓝꓲꓸ ꓔ=
ꓔꓶ ꓙꓱꓼ ꓗꓪ ꓛꓲ ꓬꓰ ꓠꓹ ꓟ ꓐꓱ ꓶ ꓛꓳ ꓫꓱꓽ ꓠ ꓔˍ ꓟ ꓚꓱꓹ (5) ꓚꓱꓹ ꓔꓯ ꓐꓯ ꓟꓸ ꓖꓶ ꓩꓴ ꓡˍ ꓥꓳ=
ꓠꓴ ꓬꓰˍ ꓟ ꓗꓪ ꓠꓴ ꓗꓹ ꓛꓲꓽ ꓠ ꓔˍ ꓡꓳ꓾
ꓣꓳ ꓗꓷ ꓔ ꓟ ꓔꓶ ꓙꓱꓼ ꓗꓪ ꓣꓳ ꓛꓲ ꓬꓰˍ ꓟ ꓔꓯ ꓦ ꓐꓬꓱꓽ ꓟꓳꓻ ꓠꓬꓲ꓾
ꓔꓶ ꓙꓱꓼ ꓖꓳ ꓟ ꓗꓪ ꓢꓯꓼ ꓕꓵꓼ ꓐ ꓡ ꓠꓹ ꓟ ꓐꓱ ꓶ ꓣꓳ ꓔꓯ ꓓꓱꓽ ꓖꓶ ꓓꓴ ꓕꓲ ꓟ ꓫꓬꓹ ꓠ ꓔˍ ꓡꓳ꓾
ꓔꓶ ꓙꓱꓼ ꓕꓲ ꓟ ꓔꓯ ꓬꓲ ꓙꓵꓹ꓾ ꓬꓲ ꓦꓬꓼ ꓠꓬꓲ ꓝꓲꓸ ꓔ꓾
21 ꓠꓬꓲ ꓬꓲꓸ ꓡꓲꓽ꓾ 21 ꓠꓬꓲ ꓙꓵꓽ ꓗ ꓔꓯ ꓛꓳꓻ
