ꓠꓲꓖꓰꓣꓲꓮ ꓐꓰ ꓚꓮꓟꓰꓣꓳꓳꓠ ꓗꓪ ꓐꓰ ꓣꓴ ꓔꓯ, ꓔ ꓢꓴ ꓐꓴ ꓔꓯ ꓡꓲ, ꓖꓶ ꓠ, ꓟ ꓔꓲꓺ ꓒ ꓪ ꓔꓲ ꓡꓰ ꓶꓽ ꓓꓰ_ ꓟ꓾
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓡꓳ, ꓬꓰ ꓟ ꓙꓵ, ꓗꓪ ꓠꓲꓖꓰꓣꓲꓮ ꓐꓰ ꓚꓮꓟꓰꓣꓳꓳꓠ ꓗꓪ ꓐꓰ ꓣꓴ ꓔꓯ ꓗꓷ ꓟ ꓕꓳ ꓶ ꓢꓳꓺ ꓙꓳ ꓟ ꓐꓰ ꓔꓲꓺ ꓒ ꓐꓴ ꓔꓯ ꓡꓲ, ꓖꓶ ꓠ, ꓟ ꓶꓽ ꓓꓰ ꓗꓷ ꓟ ꓥꓳ꓿
ꓠꓽ ꓥꓪꓽ ꓠꓬꓲ ꓕꓯ ꓠꓲꓖꓰꓣꓲꓮ ꓗꓴꓷꓼ꓾ ꓠꓲꓖꓰꓣ ꓗꓪ ꓔꓬ ꓟ ꓢꓔ. ꓟꓮꓣꓬ ꓕꓳ ꓶ ꓢꓳꓺ ꓔꓶ. ꓗꓪ ꓐꓰ ꓤ ꓠꓱ ꓐꓴ ꓐꓰ ꓟ. ꓒ 315 ꓣꓳ ꓔꓯ ꓣꓴ ꓔꓯ, ꓙꓰ ꓟ ꓥꓳ꓿ ꓖꓳ ꓟ ꓡꓰ ꓐꓰ ꓖꓳ ꓕꓲ ꓫꓵ ꓠꓽ ꓗꓪ ꓚꓮꓟꓰꓣꓳꓳꓠ ꓗꓴꓷꓼ ꓠꓓꓳꓑ ꓗꓪ ꓐꓮꓟꓰꓠꓓꓮ ꓔꓲꓺ ꓒ ꓓꓽ ꓙꓵꓽ ꓔꓶ. ꓗꓪ ꓐꓰ ꓗ‐ꓕꓳ‐ꓡꓲꓗ ꓔꓲꓺ ꓒ 6 ꓣꓳ ꓔꓯ ꓥ ꓟꓲ ꓣꓴ ꓔꓯ, ꓙꓰ ꓟ ꓥꓳ꓿ ꓖꓳ ꓟ ꓡꓰ ꓐꓰ ꓘꓴ ꓜꓲꓼ ꓞꓳ ꓟ. ꓒꓽ ꓕꓲ ꓣꓳ ꓔꓯ ꓥ ꓟꓲ ꓣꓴ ꓔꓯ, ꓗꓷ ꓟ ꓥꓳ꓿
ꓠꓽ ꓦꓬꓼ ꓠꓬꓲ ꓪꓽ ꓘꓴ ꓓꓳ ꓡꓰ ꓗ. ꓠꓯ. ꓙꓲ ꓢꓴ ꓢꓲ ꓤ ꓐꓴ ꓔꓯ ꓔꓲꓺ ꓒ ꓪ ꓔꓲ ꓡꓰ ꓠꓲꓖꓰꓣꓲꓮ ꓐꓰ ꓚꓮꓟꓰꓣꓳꓳꓠ ꓗꓪ ꓔꓲꓺ ꓒ ꓐꓴ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓕꓳ ꓶ ꓢꓳꓺ ꓙꓳ ꓟ ꓐꓴ ꓔꓯ ꓣꓴ ꓔꓯ, ꓙꓰ_ ꓟ ꓓꓳꓽ ꓔꓯ ꓮ ꓘꓶ. ꓛꓲ ꓠꓲ, ꓟ ꓟꓽ ꓢ ꓠ ꓑ ꓙ ꓪ_ ꓡꓳ꓾ ꓐꓰ ꓐꓯ ꓔ ꓢꓲ ꓠꓬꓲ ꓬꓲ ꓪ ꓔꓯ ꓡꓲ, ꓖꓶ ꓠ, ꓟ ꓟꓲ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓶ ꓓꓰ ꓗꓷ ꓟ ꓥꓳ꓿
“ꓮ ꓘꓶ. ꓠꓲ, ꓟ ꓟꓽ ꓢ ꓡꓳ꓾” ꓟꓬ ꓠꓬꓲ ꓠꓬ ꓣꓴ ꓔꓯ, ꓟꓶ ꓡꓰ ꓟ ꓤ ꓠꓱ ꓤ ꓐꓴ ꓬꓲ ꓪ ꓐꓱ ꓶ ꓠꓲ, ꓫ ꓟꓬ ꓫ. ꓔꓬ ꓟ ꓕꓲ ꓦꓲꓻ ꓢꓴ ꓐꓴ ꓐꓱ ꓶ ꓥ ꓡꓳ꓾ ꓬꓲ ꓪ ꓔꓯ ꓡꓲ, ꓖꓶ ꓠ, ꓟ ꓠꓲ, ꓟ ꓘꓴꓽ ꓗꓪ ꓶ ꓓꓰ ꓡꓳ꓾ ꓬꓲ ꓙꓵ, ꓟꓽ ꓞꓰ ꓓꓵꓽ ꓙ ꓞꓷ, ꓐ ꓡ ꓠ, ꓟ ꓙꓵ ꓪ ꓙꓳ ꓢꓴ ꓐꓴ ꓔꓯ ꓶ ꓓꓰ ꓡꓳ꓾” ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴ ꓦꓲꓻ꓾ ꓕꓳ ꓶ ꓢꓳꓺ ꓙꓳ ꓔꓯ ꓕꓱ ꓡꓱ ꓜꓲ ꓜꓲ ꓟꓴ ꓟꓴ ꓟꓽ ꓬꓰ ꓠ, ꓟ ꓙꓲ ꓢꓴ ꓢꓲ ꓤ ꓐꓴ ꓔꓯ ꓪꓽ ꓘꓴ ꓙ ꓖꓶ ꓠ, ꓟ ꓘꓴ ꓔ ꓡꓳ꓾ “ꓣꓴ ꓔꓯ, ꓡꓰ ꓢꓴ ꓐꓴ ꓐꓱ ꓶ ꓪꓽ ꓘꓴ ꓙ ꓓꓴ ꓬꓰ ꓡꓯ꓾ ꓪꓽ ꓘꓴ ꓦꓲꓻ ꓕꓳ ꓶ ꓢꓳ ꓙꓳ ꓦꓲꓻ ꓐꓴ ꓮ ꓡꓰ ꓕꓲ ꓖ ꓗꓪ ꓥ ꓟꓲ ꓕꓱ ꓡꓱ ꓟꓽ ꓔꓳ, ꓜꓳ ꓠ, ꓟ ꓪꓽ ꓘꓴ ꓓꓴ ꓬꓰ ꓡꓯ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ꓿
