ꓙꓲˍ ꓟ ꓤꓶꓻ ꓗꓪ ꓞꓳ ꓙꓳ ꓔꓬ ꓡꓳ ꓐꓯˍ ꓟ ꓬꓲ ꓟꓸ ꓟꓲꓽ꓾ ꓬꓲꓸ ꓬꓲ ꓢꓲ ꓠꓬ ꓮ ꓡꓲ ꓥ ꓡ? ꓟꓲ ꓠꓯ ꓞꓳ ꓤ ꓮ ꓙꓵꓽ ꓡꓱꓸꓼ ꓐꓱ ꓶ ꓕꓲꓺ ꓡꓰˍ ꓟ ꓫꓱꓸ ꓡꓯ ꓘꓳˍ ꓟ ꓒꓳꓹ ꓖꓶ ꓓꓴ ꓠꓽ ꓟꓽ ꓙꓳ ꓐꓯˍ ꓥ ꓟꓲ꓾ ꓮ ꓡꓲ ꓕꓲ ꓙꓰꓽ ꓠꓬ ꓙꓲˍ ꓟ ꓤꓶꓻ ꓔꓯ ꓒꓬꓱꓼ ꓡꓰ ꓝꓲˍ ꓡ ꓐꓯˍ ꓕꓯ ꓠꓽ ꓫꓱꓸ ꓡꓯ ꓘꓳˍ ꓟ ꓕꓲ ꓐꓱ ꓙꓳˍ ꓡꓳ=
ꓕꓲ ꓐꓱ ꓠꓬ ꓙꓲˍ ꓟ ꓤꓶꓻ ꓐꓯˍ ꓟ ꓠꓬ ꓗꓹ ꓛꓲꓽ ꓓꓴ ꓐꓲ ꓞꓹˍ ꓟ ꓤꓶꓻ ꓥ ꓡꓳ ꓐꓰ ꓐꓯ ꓔꓬ ꓡꓳ= ꓕꓲ ꓐꓱ ꓠꓽ ꓬꓲꓸ ꓬꓲ ꓢꓲ ꓙꓳˍ ꓟ ꓤꓶꓻ ꓐꓰ ꓐꓯ ꓔꓬ ꓖꓴˍ ꓡꓳ= ꓝꓮꓲ ꓕꓲ ꓐꓱ ꓠꓽ ꓚꓲꓸ ꓛꓬ ꓓꓵꓽ ꓙ ꓞꓷꓹ ꓔ ꓟ ꓚꓱꓹ꓾ ꓚꓲꓸ ꓛꓬ ꓔꓶ ꓙꓱꓼ ꓗꓶ ꓔ ꓟ ꓚꓱꓹ ꓗꓪ ꓙ ꓫꓱꓽ ꓐ ꓡ ꓢꓴ ꓐꓴ꓾ ꓐꓰ ꓐꓯ ꓔꓬ ꓖꓴˍ ꓡꓳ= ꓮꓽ ꓟ ꓮ ꓡꓲ ꓐꓰ ꓐꓯ ꓔꓬ ꓥˍ ꓟꓲ ꓙꓲˍ ꓟ ꓤꓶꓻ ꓗꓪ ꓞꓳ ꓙꓳ ꓢꓯꓸ ꓔꓬ ꓐ ꓡ ꓠꓹ ꓟ ꓔꓯ ꓠꓬ ꓮꓽ ꓟ ꓥˍ ꓟꓲ ꓒꓬꓱꓼ ꓡꓰ ꓠꓲꓹ ꓫꓵˍ ꓟ ꓥ ꓡꓳ=
(1) ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓠ-ꓐ (1) ꓗꓪ ꓗꓶ ꓔ ꓠꓬꓲ꓾
ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓬꓲ ꓪꓴꓸ ꓗꓶ ꓢꓲ ꓞꓳ ꓙꓳˍ ꓟ ꓠꓬ ꓙꓲˍ ꓟ ꓔꓯ ꓟꓶ ꓡꓰ ꓠꓹ ꓟ ꓐꓱ ꓶ ꓬꓲ ꓪꓴꓸ ꓟ ꓛꓲ ꓦꓽ ꓕꓲ ꓦꓽ ꓥ ꓡꓳ= ꓧꓶꓸ ꓕꓯ ꓚꓲꓸ ꓛꓬ ꓖꓳ ꓓꓱꓽ ꓐꓰ ꓠꓲꓹ ꓟ ꓔꓬꓹ ꓢꓻ ꓡꓰ ꓓꓴ ꓐꓱ ꓶ ꓗꓪꓽ ꓫꓵꓼ= ꓕꓱ ꓡꓱ ꓗꓪꓽ ꓫꓵꓼ ꓠꓹ ꓟ ꓐꓱ ꓶ ꓠꓬ ꓬꓲ ꓙꓵꓹ ꓙꓳ ꓙꓳˍ ꓡꓰꓽ ꓖꓳ ꓓꓱꓽ ꓡꓵ ꓖꓶˍ ꓟ꓾ ꓢꓯꓼ ꓙꓳ ꓡꓰ ꓠ ꓜꓽˍ ꓟ ꓐꓰ ꓢꓲ ꓡꓲ ꓐꓰ ꓔꓬ ꓟ ꓕꓱ ꓡꓱ ꓬꓰˍ ꓠꓬ꓾ ꓚꓲꓸ ꓛꓬ ꓤꓶꓻ ꓗꓪ ꓧꓶꓸ ꓕꓯ ꓟ ꓕꓯꓽ ꓢꓲꓽ ꓔꓬꓹ ꓗꓹ ꓛꓲꓽ ꓡˍ ꓥꓳ=
(2) ꓒꓴ ꓫ ꓔ꓾ ꓒꓴ ꓠꓸ ꓔ
ꓗꓹ ꓛꓲꓽ ꓓꓴ ꓔꓯ ꓠꓬ ꓒꓴ ꓗꓪ ꓐꓰ ꓪꓴꓻ ꓟꓶ ꓟꓽ ꓓꓻ ꓐꓯˍ ꓥ ꓟ ꓒꓴ ꓔꓯ ꓬꓲ ꓖ ꓙꓳ ꓙꓳˍ ꓡꓰꓽ ꓣꓱꓽˍ ꓟ ꓠ ꓣꓳ ꓠꓲꓹ ꓟ ꓔꓯ ꓠꓲꓹ ꓘꓪꓽ ꓫꓵ ꓓꓴ ꓖꓶ ꓐ ꓡˍ ꓟ ꓡꓰꓽ ꓟꓽ ꓞꓲꓺ ꓠꓲꓹ ꓟ ꓓꓵꓽ ꓙꓽ ꓪꓴꓽ ꓧꓶˍ ꓟ ꓔꓯ ꓥˍ ꓟꓲ ꓠꓲꓸ ꓡꓰ ꓝꓲˍ ꓡꓳ= ꓧꓪ ꓟꓶˍ ꓟ ꓒꓴ ꓗꓪ ꓐꓰ ꓕꓲ ꓐꓱ ꓔꓯ ꓟꓲꓽ ꓕꓯꓽ ꓢꓲ ꓟ ꓤꓶꓻ ꓐꓱ ꓶ ꓫꓺ ꓗꓷ= ꓝꓮꓲ ꓡꓯꓽ ꓒꓯꓹ ꓗꓪ ꓤꓰꓻ ꓞꓹ ꓟ ꓔꓯ ꓡꓰꓽ ꓡꓳꓼ ꓠ ꓛꓲ ꓣꓱꓽ= ꓒꓴ ꓚꓱꓹ ꓔꓯ ꓟꓳꓸ ꓖꓶ ꓙꓱꓼ ꓗꓶ ꓔ ꓟ ꓠꓬ ꓡ ꓠꓹ ꓟ ꓦꓬꓼ ꓠꓬꓲ ꓗꓪ ꓣꓳ ꓒꓬꓱꓼ ꓡ ꓠꓲꓹ ꓫꓵˍ ꓟ ꓚꓱꓹ ꓐꓴ ꓔꓯ ꓡꓯꓼ ꓛꓲ ꓬꓰ ꓐ ꓡ ꓠꓹ ꓟ ꓕꓲ ꓛꓱꓽ ꓕꓲ ꓑꓶꓸ ꓗꓪ ꓐꓰ ꓬꓰ ꓙ ꓖꓶ ꓐ ꓡˍ ꓡꓳ=
(3) ꓠꓱꓸ ꓐꓱ ꓢꓴ ꓐꓰ ꓙ ꓡꓯ ꓘꓳˍ ꓟ ꓗꓪˍ ꓟꓲ ꓢꓯꓼ ꓕꓵꓼ꓾
ꓕꓲ ꓦꓲꓻ ꓢꓴ꓾ ꓛꓳꓽ ꓒꓯꓹ ꓐꓴ ꓗꓪ ꓛꓳꓽ ꓐꓴ ꓣꓳ ꓠꓲꓹ ꓠꓵ ꓢꓴ ꓐꓴ ꓐꓰ ꓬꓲ ꓙꓵꓹ ꓖꓴ ꓡꓰ ꓝꓲˍ ꓟ ꓠꓬ ꓬꓲ ꓒꓵꓽ ꓞꓷꓹ ꓟꓽ ꓓꓻ ꓠ ꓛꓲ ꓒꓵꓽˍ ꓟ ꓥ ꓡꓳ= ꓬꓲ ꓪ ꓠꓬ ꓢꓯꓼ ꓖꓶˍ ꓟ꓾ ꓛꓳꓽ ꓒꓯꓹ ꓬꓰ ꓖꓶˍ ꓟ꓾ ꓣꓳ ꓔꓯ ꓗꓪꓽ ꓫꓵꓼ ꓖꓶˍ ꓟ ꓕꓱ ꓡꓱ ꓫꓵꓽ ꓖꓶ ꓐ ꓡˍ ꓡꓳ= ꓣꓳ ꓒ ꓕꓲꓺ ꓗꓪ ꓙꓲˍ ꓟ ꓛꓳꓽ ꓒꓯꓹ ꓙꓳˍ ꓟ ꓠꓬ ꓣꓳ ꓤꓶꓻ ꓔꓯ ꓗꓹ ꓛꓲꓽ ꓡꓰ ꓝꓲˍ ꓡꓳ=
(4) ꓚꓲꓸ ꓛꓬ ꓐꓱ ꓶˍ ꓟꓲ ꓬꓲ ꓙꓵꓹ ꓖꓶ꓾
ꓟꓬꓱꓽ ꓬꓰ ꓙꓵꓹ꓾ ꓪꓴꓽ ꓧꓶ ꓠꓽ ꓙꓵꓹ ꓐꓰ ꓚꓲꓸ ꓛꓬ ꓙꓵꓹ꓾ ꓕꓱ ꓡꓱ ꓬꓲ ꓙꓵꓹ ꓘꓶꓽ ꓔ ꓠ ꓗꓹ ꓡꓳ= ꓪꓴꓽ ꓧꓶ ꓠꓽ ꓙꓵꓹ꓾ ꓬꓲ ꓫꓵꓼ ꓫꓬꓹ ꓙꓵꓹ ꓐꓰ ꓣꓳ ꓔꓯ ꓗꓹ ꓛꓲꓽ ꓡꓰ ꓝꓲˍ ꓟ ꓕꓲ ꓫꓵꓽ ꓫꓵꓽ ꓔꓯ ꓬꓰˍ ꓟ ꓙꓵꓹ ꓐꓯ ꓢꓲ ꓬꓲ ꓙꓵꓹ ꓘꓶꓽ ꓔ ꓠ ꓗꓹ ꓡꓳ= ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓬꓲ ꓙꓵꓹ ꓖꓶ ꓗꓷˍ ꓕꓯ ꓣꓳ ꓠꓯꓸꓼ ꓗꓪ ꓪꓽ ꓠꓬꓲˍ ꓟ ꓢꓯꓼ ꓬꓲ ꓫꓵꓼ ꓡꓰ ꓣꓳ ꓤꓶꓻ ꓔꓯ ꓡꓳꓻ ꓡꓳꓻ ꓡꓰꓽ ꓞꓳ ꓙꓳ ꓐ ꓡ ꓝꓲˍ ꓡꓳ=
(5) ꓣꓳ ꓔꓯ ꓙꓳˍ ꓟ ꓗꓪ ꓠꓲꓹ ꓘꓪꓽ ꓫꓵ ꓢꓲ ꓫꓸ ꓟꓳ ꓗꓴꓸ ꓝꓲ꓾
ꓣꓳ ꓔꓯ ꓙꓳˍ ꓟ ꓔꓯ ꓠꓲꓹ ꓘꓪꓽ ꓫꓵ ꓐꓯˍ ꓟ ꓠꓬ ꓬꓲ ꓫꓵꓼ ꓬꓲ ꓫꓵꓼ ꓔꓯ ꓕꓲ ꓟ ꓗ ꓠꓯꓸ ꓕꓲ ꓟ ꓧꓪˍ ꓟ ꓟꓽ ꓥ ꓥ꓾ ꓣꓳ ꓔꓯ ꓙꓳˍ ꓟ ꓔꓯ ꓒꓵꓽ ꓗꓴꓸˍ ꓟ ꓔꓯ ꓐꓯˍ ꓟ ꓥ ꓡꓳ= ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙꓳˍ ꓟ ꓗꓪ ꓣꓳ ꓔꓯ ꓙꓳˍ ꓟ ꓮ ꓙꓵꓽ ꓐꓱ ꓶ ꓫꓸ ꓟꓳˍ ꓟ ꓔꓯ ꓬꓰ ꓠꓬꓲ= ꓕꓱ ꓡꓱ ꓬꓰˍ ꓟ ꓥˍ ꓟꓲ ꓗꓹ ꓛꓲꓽ ꓠꓲꓹ ꓔꓯ ꓖꓶ ꓐ ꓡˍ ꓟ ꓚꓱꓹ ꓥ ꓡꓳ=
(6) ꓙꓲˍ ꓟ ꓟꓬꓱꓽ ꓗꓪ ꓬꓰˍ ꓟ ꓔꓯˍ ꓟꓲ ꓬꓰ ꓠꓬꓲ꓾
ꓣꓳ ꓠꓲꓹ ꓟ ꓙꓳˍ ꓟ ꓟꓬꓱꓽ ꓕꓲ ꓟ ꓔꓯ ꓬꓰ ꓠꓬꓲ= ꓔꓯ ꓥꓳꓽ ꓜꓴ ꓕꓲ ꓟ ꓟ ꓗꓪ ꓓꓵꓽ ꓢꓲ ꓦꓳꓡꓴꓠꓔꓰꓰꓣ꓾ ꓬꓲ ꓒꓵꓽ ꓟꓽ ꓣꓴ ꓣꓴ ꓬꓰ ꓙˍ ꓟ ꓟꓬꓱꓽ ꓬꓰˍ ꓟ꓾ ꓚꓲ ꓸ ꓛꓬ ꓐ ꓡˍ ꓟ ꓗꓪ ꓐꓰ ꓢꓴ ꓔꓯ ꓬꓰ ꓙˍ ꓟ꓾ ꓥ ꓠꓬ ꓙꓲˍ ꓟ ꓟꓬꓱꓽ ꓒꓬꓱꓼ ꓡ ꓠ ꓟ ꓐꓱ ꓶ ꓔꓳꓹ ꓙ ꓖꓶˍ ꓟ ꓕꓱ ꓡꓱ ꓫꓵꓽ ꓠꓬ ꓣꓳ ꓠꓲꓹ ꓟ ꓔꓯ ꓠꓲꓹ ꓘꓪꓽ ꓫꓵ ꓡꓰ ꓝꓲˍ ꓡꓳ=
(7) ꓚꓲꓸ ꓛꓬ ꓪꓴꓽ ꓡ ꓟꓴ ꓡ ꓚꓱꓹ ꓔꓯ ꓮ ꓕꓯ ꓟꓲ ꓧꓪ꓾
ꓣꓳ ꓢꓷꓸ ꓠ ꓔˍ ꓟ ꓚꓱꓹ ꓬꓲ ꓫꓵꓽ ꓬꓲ ꓙꓰꓽ ꓔꓯ ꓮ ꓕꓯ ꓟꓲ ꓧꓪ ꓔꓬ ꓟ ꓠꓬ ꓚꓲꓸ ꓛꓬ ꓪꓴꓽ ꓡ ꓟꓴ ꓡ ꓠꓹ ꓟ ꓐꓱ ꓶ ꓬꓲ ꓚꓱꓹ ꓕꓲ ꓟ ꓥ ꓡꓳ= ꓧꓪ ꓢꓳ ꓣꓴˍ ꓟ꓾ ꓚꓲꓸ ꓛꓬ ꓬꓰ ꓠꓲꓹ ꓫꓵˍ ꓟ ꓐꓰ ꓗꓴꓸ ꓙꓲꓽ ꓙꓳˍ ꓟ ꓕꓲ ꓫꓵꓽ ꓫꓵꓽ ꓔꓯ ꓢꓳ ꓣꓴˍ ꓟ ꓔꓯ ꓬꓰ ꓠꓬꓲ= ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓪꓴꓽ ꓡ ꓟꓴ ꓡ ꓠꓹ ꓟ ꓮ ꓕꓯ ꓟꓲ ꓬꓰ ꓔꓬ ꓕꓯ ꓣꓳ ꓤꓶꓻ ꓐꓱ ꓶ ꓙꓲˍ ꓟ ꓚꓱꓹ ꓮ ꓟꓬꓹ ꓔꓯ ꓢꓷꓸ ꓡˍ ꓥꓳ=
ꓖꓳ ꓡꓱ ꓠꓬꓲ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓗꓪ ꓣꓳ ꓬꓰ ꓔ ꓟ ꓓꓴꓽ ꓙ ꓫꓪꓸ ꓞꓷꓹˍ ꓟ ꓕꓲ ꓟ ꓡꓰ ꓕꓲ ꓟ ꓠꓬ ꓒꓳꓹ ꓡꓶꓸ ꓓꓴ ꓮ ꓟꓬꓹ ꓔꓯ ꓒꓬꓱꓼ ꓡ ꓝꓲˍ ꓡꓳ꓾ ꓐꓯˍ ꓟ ꓔꓯ ꓥˍ ꓟꓲ ꓢꓷꓸ ꓔ ꓠ ꓗꓹ ꓡꓳ=
