ꓔꓲꓺ ꓒ ꓪ ꓔꓲ ꓡꓰꓳ (14) ꓚꓺ ꓟꓲꓽ ꓕꓳ ꓶ ꓔꓯ ꓟꓽ ꓟꓶ ꓫꓵˍ ꓟ ꓙꓵ, ꓕꓯ ꓢꓯ. ꓐꓬꓱ ꓐꓰ ꓕꓲ ꓧꓪ, ꓓꓳ ꓡ ꓓꓴ ꓙꓳ ꓟ ꓓꓳꓽ
11 ꓦ ꓟ 17 ꓠꓬꓲ 2025 ꓘꓳꓼ ꓕꓯ ꓦꓮꓔꓲꓚꓮꓠ ꓗꓴꓷꓼ ꓔꓬ ꓢꓲ ꓠꓬꓲ ꓟꓵꓽ ꓗꓳ, ꓓꓵ ꓓꓵ ꓗꓪ ꓔꓬ ꓟ ꓗ‐ꓔꓳ‐ꓡꓲꓗ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓔꓲꓺ ꓒ ꓪ ꓔꓲ ꓡꓰꓳ (14) ꓚꓺ ꓟꓲ ꓕꓳ ꓶ ꓐꓰ ꓢꓯ. ꓐꓬꓱ ꓔꓯ ꓟꓽ ꓟꓶ ꓫꓵˍ ꓟ ꓙꓵ, ꓕꓯ ꓓꓳ ꓡ ꓓꓴ ꓙꓳ ꓡꓳ ꓐꓰ ꓐꓯ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰꓳ ꓠꓬ ꓪꓴ‐ꓢ ꓟꓬꓱꓽ ꓟꓯ ꓗꓷ ꓟ ꓦ ꓐ (6) ꓟ ꓙꓳ ꓡꓰ ꓟ ꓥ ꓡꓳ꓿ ꓬꓲ ꓠꓬ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓙꓵ, ꓕꓯ ꓙꓲ‐ꓢꓴ ꓢꓲꓺ ꓤ ꓐꓴ ꓙꓵꓻ ꓠꓲ, ꓔꓯ ꓟꓽ ꓥꓳꓽ ꓡꓰ ꓟꓽ ꓐꓬ ꓡꓰ ꓔꓱ, ꓚꓵ ꓟ ꓚꓱ, ꓗꓪ ꓐꓰ ꓧꓳꓽ ꓪꓴ. ꓟꓴ ꓔꓬ ꓟ ꓥ ꓡꓳ꓿ ꓝꓮꓲ ꓟꓽ ꓟꓶ ꓫꓵˍ ꓟ ꓙꓵ, ꓕꓯ ꓓꓳ ꓡ ꓟ ꓕꓳ ꓶ ꓗꓪ ꓔꓲꓺ ꓒ ꓪ ꓔꓲ ꓠꓬ ꓗꓳ. ꓗꓷ ꓟ ꓙꓵ, ꓕꓯ ꓪꓽ ꓚꓲ ꓪꓽ ꓐ ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓟꓬꓱ ꓬꓰ ꓗꓷ ꓟ ꓚꓱ, ꓐꓰ ꓝꓮꓲ ꓬꓲ ꓠꓬ ꓮ ꓡꓰ ꓐꓰ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓚꓱ, ꓔꓯ ꓕꓳ ꓶ ꓗꓪ ꓐꓳ ꓔ ꓟ ꓥ ꓡꓳ꓿
ꓝꓮꓲ ꓕꓱ ꓕꓳ ꓶ ꓗꓪ ꓟꓲ ꓠꓯ ꓗꓪ ꓒꓴ ꓫꓵꓺ ꓙꓳ ꓢꓴ ꓐꓴ ꓠꓬ ꓮ ꓘꓶ. ꓛꓲ ꓒꓴ ꓫꓵꓺ ꓙꓳ ꓟ ꓚꓱ, ꓐꓰ ꓞꓳ ꓫ. ꓐꓴ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓮ ꓘꓶ. ꓛꓲ ꓫ. ꓔꓬ ꓟ ꓚꓱ, ꓔꓯ ꓕꓳ ꓶ ꓗꓪ ꓐꓳ ꓔ ꓟ ꓥ ꓡꓳ꓿ ꓘꓴ ꓜꓲꓼ ꓞꓳ ꓠꓯ, ꓗꓪ ꓪꓽ ꓡꓯꓽ ꓘꓳ ꓚꓱ, ꓟꓲ ꓠꓯ ꓢꓲ ꓡꓲ, ꓟꓶ ꓠ, ꓟ ꓚꓱ, ꓐꓰ ꓫ. ꓓꓴ ꓟꓷꓼ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓟ ꓚꓱ, ꓔꓯ ꓕꓳ ꓶ ꓗꓪ ꓐꓳ ꓔ ꓢꓲ ꓠꓬꓲ ꓟꓽ ꓟꓶ ꓫꓵˍ ꓟ ꓙꓵ, ꓕꓯ ꓓꓳ ꓡ ꓓꓴ ꓙꓳ ꓡꓳ ꓐꓰ (Rva Myanmar) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿
