ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓠꓬ ꓠꓯꓻ ꓞꓲ, ꓟ ꓗꓪ ꓐꓰ ꓟꓲ ꓠꓯ ꓡ ꓞꓳ ꓐꓴ ꓔꓯ ꓥꓳ ꓡꓳ. ꓓꓴ ꓖꓶ_ ꓡꓳ꓾
11 ꓦ 5 ꓠꓬꓲ ꓠꓽ ꓢ ꓠꓬꓲ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓜꓲ ꓟ ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓠꓬ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯ. ꓔꓬ ꓟ ꓤꓶꓻ ꓗꓪ ꓙ ꓖꓴ ꓧꓳꓽ ꓟꓳ. ꓖꓶ_ ꓡꓳ꓾ ꓣꓳ ꓤꓶꓻ ꓬꓲ ꓚꓱ, ꓒꓬꓱꓼ ꓠꓲ, ꓫꓵ ꓟ ꓔꓯ ꓖꓶ ꓐ ꓡ ꓡꓳ꓾ ꓟꓲ ꓠꓯ ꓥꓳ ꓡꓳ. ꓓꓴ ꓔꓯ ꓖꓶ ꓐ ꓡ ꓟ ꓔꓯ ꓐꓯ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓙꓵꓻ ꓠꓲ, ꓚꓱ, ꓟ. ꓖꓶ_ ꓟ ꓗꓪ ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓠꓬ ꓓꓵꓽ ꓙ ꓚꓱ, ꓟꓽ ꓥ꓾ ꓔꓧꓰꓳꓣꓬ ꓟꓽ ꓥ꓾ ꓙꓵꓻ ꓠꓲ, ꓚꓱ, ꓔꓯ ꓬꓲ ꓚꓰ ꓕꓲ ꓟ ꓥ ꓟ ꓔꓯ ꓐꓯ ꓔ ꓡꓳ꓾
ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯ. ꓔꓬ ꓟ ꓗꓪ ꓢꓯ. ꓬꓲꓼ ꓡ ꓟ ꓔꓯ ꓚꓵ ꓚꓵ ꓙꓵꓻ_ ꓟ ꓠꓬ ꓣꓳ ꓢꓯ. ꓔꓬ ꓟ ꓤꓶꓻ ꓔꓯ ꓒꓳ, ꓡꓶ. ꓐ ꓡ ꓟ ꓚꓱ, ꓥ ꓡꓳ꓾ ꓐꓰ ꓐꓯ ꓔ ꓡꓳ꓾ ꓕꓱ ꓒꓳ, ꓡꓶ. ꓟ ꓠꓬ꓾ ꓙꓲ ꓢꓴ ꓢꓲ ꓤ ꓐꓴ ꓥꓳ ꓡꓳ. ꓓꓴ ꓢꓯꓼ ꓪ ꓐꓰ ꓟꓲ ꓠꓯ ꓔꓯ ꓒꓳ, ꓡꓶ. ꓖꓶ ꓐ ꓡ ꓡꓳ꓾ ꓣꓳ ꓟꓲ ꓠꓯ ꓡ ꓞꓳ ꓚꓺ ꓟꓲꓽ ꓗꓪ ꓠꓬꓲ ꓟꓳ ꓓꓴ ꓟꓽ ꓪ ꓟ ꓔꓶ. ꓗꓪ ꓥ ꓟꓲ ꓣꓳ ꓠꓬ ꓢꓲ ꓒꓽ ꓢꓷ. ꓙ ꓟꓳ ꓙ ꓢꓴ ꓒꓬꓱꓼ ꓡ ꓠ, ꓟ ꓥꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓾ ꓑꓮꓢꓮꓚꓮ ꓥꓳ ꓡꓳ. ꓓꓴ ꓠꓬ ꓣꓳ ꓔꓯ ꓠꓲ, ꓟ ꓟꓽ ꓐꓬ ꓝꓲ ꓡꓰ꓾
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓞꓳ ꓤ ꓤꓶꓻ ꓗꓪ ꓔꓳ, ꓜꓳ ꓡ ꓟ ꓠꓲ, ꓫ. ꓟꓬ ꓫ ꓓꓴ꓾ ꓘꓶ ꓡꓶ ꓗ ꓔ ꓓꓴ꓾ ꓠꓲ, ꓟ ꓐꓬ ꓡꓰ ꓓꓴ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓠꓬ ꓣꓳ ꓔꓯ ꓥꓳ ꓡꓳ. ꓓꓴ ꓖꓶ_ ꓟ ꓥ ꓡꓳ꓾ ꓬꓲ ꓠꓬ ꓬꓰ‐ꓢꓴ ꓔꓯ “ꓡꓳꓓꓰꓢꓔꓮꓣ” ꓐꓰ ꓐꓯ ꓔ ꓡꓳ꓾ ꓟꓽ ꓙꓲ_ ꓟ ꓘꓶꓽ ꓡꓶꓽ ꓓꓴ ꓗꓪ ꓐꓰ ꓣꓳ ꓔꓯ ꓙ ꓖꓴ ꓧꓳꓽ ꓟꓳ ꓖꓶ_ ꓡꓳ꓾ ꓥꓳ ꓡꓳ. ꓓꓴ ꓖꓶ_ ꓡꓳ꓾ ꓠꓻ ꓫꓬ, ꓖꓶ_ ꓡꓳ꓾ ꓝꓮꓲ ꓫꓬ, ꓔꓱ, ꓖꓶ_ ꓟ ꓥꓳ꓿
ꓢꓯ. ꓬꓲꓼ ꓡ ꓟ ꓠꓬ ꓡꓳ, ꓬꓰ ꓟ ꓙꓵ, ꓗꓪ ꓐꓰ ꓒꓬꓱꓼ ꓡꓰ ꓟ ꓡꓰ ꓟꓽ ꓥ꓾ ꓐꓲ ꓜꓲꓼ ꓟ ꓔꓱ, ꓟ ꓥ ꓢꓲ ꓠꓬꓲ ꓕꓲ ꓘꓳꓼ ꓡꓲ ꓕꓲ ꓘꓳꓼ ꓰꓮꓢꓔꓰꓣ ꓑꓮꓲ ꓐꓰ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓛꓴ ꓔꓲ_ ꓟ ꓢꓲ ꓫꓬ ꓑ ꓑ ꓗꓪ ꓐꓰ ꓘꓳ, ꓣꓴ ꓟꓶ_ ꓟ ꓥꓳ꓿ ꓡꓯ ꓐꓳ ꓔꓶ. ꓓꓴ ꓚꓱ, ꓔꓯ ꓠꓬꓲ ꓟꓳ ꓓꓴ ꓚꓱ, ꓐꓰ ꓒꓳ, ꓡꓶ. ꓗꓷ ꓢꓲ ꓠꓬꓲ ꓙꓲ ꓢꓴ ꓢꓲ ꓤ ꓐꓴ ꓔꓯ ꓠꓻ ꓓꓴ ꓔꓳ, ꓜꓳ ꓗꓷ ꓗ. ꓠꓯ. ꓗ, ꓛꓲ_ ꓟ ꓠꓯꓼ ꓔꓯ ꓧꓪ ꓠ, ꓟ ꓐꓱ ꓶ ꓐꓯ ꓔ ꓡꓳ꓿
ꓢꓲ ꓫꓬ ꓢꓴ ꓔꓰꓣꓰꓢꓮ ꓐꓰꓠꓰꓓꓲꓚꓔꓮ ꓐꓯ ꓘꓶꓽ ꓗꓪ ꓐꓰ ꓟꓲ ꓠꓯ ꓡ ꓞꓳ ꓠꓬ ꓮ ꓕꓯ ꓥ ꓟꓲ “ꓐꓲ ꓜꓲꓼ ꓟ ꓐꓰ ꓠꓲ, ꓡꓱ ꓗ, ꓛꓲ ꓟ ꓔꓯ ꓧꓪ_ ꓡꓳ꓾ ꓬꓲ ꓙꓵ, ꓛꓲ ꓡꓰ ꓟ ꓗꓪ ꓐꓰ ꓙ ꓡꓰ ꓢꓲ ꓪ ꓠꓲ, ꓫꓵ_ ꓟ ꓔꓯ ꓐꓯ ꓔ ꓡꓳ꓿ ꓑꓮꓢꓮꓗꓮ ꓓꓳꓽ “ꓫ. ꓙꓵ ꓓꓴ ꓔꓯ ꓠꓵꓻ ꓠꓲ, ꓐꓰ ꓫꓵꓻ ꓟ ꓔꓯ ꓧꓪ. ꓡꓰꓳ꓾” ꓕꓱ ꓟ ꓠꓬ ꓚꓺ ꓟꓲꓽ ꓠꓯꓼ ꓗꓪ ꓪꓴꓽ ꓓꓰ ꓡꓰ ꓟ ꓠꓲ, ꓠꓵꓻ ꓟ ꓐꓰ ꓒꓳ, ꓡꓶ. ꓠ, ꓟ ꓥ ꓢꓲ ꓠꓬꓲ ꓟꓲ ꓠꓯ ꓞꓳ ꓤ ꓤꓶꓻ ꓠꓯꓼ ꓗꓪ ꓠꓲ, ꓫꓵ_ ꓟ ꓮ ꓫꓵ ꓕꓲ ꓟ ꓡꓲ ꓠꓲ, ꓘꓪ ꓫꓵ ꓓꓴ ꓖꓶ ꓟꓽ ꓐ ꓡ ꓟ ꓥꓳ꓿
ꓢꓯ. ꓬꓲꓼ ꓡ ꓟ ꓠꓬ ꓞꓳ ꓤ ꓤꓶꓻ ꓔꓯ ꓒꓳ, ꓡꓶ. ꓖꓶ_ ꓡꓳ꓾ ꓠꓲ, ꓟ ꓐꓬ ꓡꓰ ꓓꓴ ꓔꓯ ꓥꓳ ꓡꓳ. ꓓꓴ ꓬꓲ ꓔꓶ. ꓐꓰ ꓒꓳ. ꓖꓶ_ ꓡꓳ꓾ ꓡꓱꓼ ꓜꓴ ꓗꓪ ꓬꓲ. ꓪꓴ. ꓟꓳ ꓡꓰ ꓟ ꓤ ꓟꓶ ꓤ ꓖꓳ ꓕꓲ ꓣꓳ ꓔꓯ ꓢꓲ‐ꓫꓬ‐ꓟ‐ꓦ ꓡꓰ ꓐꓯ ꓔ ꓟ ꓐꓯ ꓘꓶꓽ ꓠꓬ ꓢꓷ. ꓙ ꓟꓳ ꓙ ꓟ ꓘꓶꓽ ꓥ ꓡꓳ꓾ “ꓬꓲ ꓢꓯ. ꓬꓲꓼ ꓡꓰꓳ꓾ ꓬꓲ ꓕꓱ ꓗꓪ ꓟꓽ ꓔꓬ꓾” ꓐꓰ ꓥ ꓡꓳ꓿
