ꓞꓳ ꓡꓯ. ꓐꓴ ꓐꓰ ꓤ ꓠꓱ ꓤ ꓐꓴ ꓔꓯ (Ai) ꓙꓼ ꓪꓴ. ꓠꓶ. ꓡꓰ ꓗꓪ ꓫꓵꓽ ꓟ ꓔꓯ ꓔꓳ, ꓜꓳ ꓔꓬ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓟ ꓓꓳꓽ
11 ꓦ ꓟ 14 ꓠꓬꓲ 2025 ꓘꓳꓼ ꓔꓯ ꓦꓮꓔꓲꓚꓮꓠ ꓗꓴꓷꓼ ꓗꓪ ꓔꓬ ꓢꓲ ꓠꓬꓲ ꓟꓵꓽ ꓗꓳ, ꓓꓵ ꓓꓵ ꓗꓪ ꓔꓬ ꓟ ꓗ‐ꓔꓳ‐ꓡꓲꓗ ꓙꓲ‐ꓢꓴ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓔꓲꓺ ꓒ ꓪ ꓔꓲ ꓡꓰꓳ (14) ꓡꓰ ꓮ ꓟꓶ ꓟ ꓙꓵ, ꓗꓪ ꓞꓳ ꓡꓱ ꓞꓳ ꓡꓯ. ꓐꓴ ꓐꓰ ꓤ ꓠꓱ ꓤ ꓐꓴ ꓔꓯ (Ai) ꓙꓼ ꓪꓴ. ꓠꓶ. ꓡꓰ ꓗꓪꓽ ꓫꓵꓽ ꓟ ꓔꓯ ꓔꓳ, ꓜꓳ ꓔꓬ ꓡꓳ ꓐꓰ ꓐꓯ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓞꓳ ꓡꓱ ꓞꓳ ꓡꓯ. ꓐꓴ ꓐꓰ ꓤ ꓠꓱ ꓤ ꓐꓴ ꓤꓶꓻ ꓔꓯ ꓒꓵꓽ ꓠ, ꓟ ꓗ ꓫꓵˍ ꓙꓵꓽ ꓗ ꓫꓬ, ꓖꓶ ꓠ, ꓟ ꓐꓯ ꓗꓷ ꓟ ꓥ ꓡꓳ꓿
(Ai) ꓙꓼ ꓪꓴ. ꓠꓶ. ꓠꓬ ꓮ ꓟꓶ ꓟ ꓙꓵ, ꓗꓪ ꓟꓴ ꓖꓪ꓾ ꓢꓯ. ꓐꓬꓱ꓾ ꓟꓲ ꓠꓯ ꓢꓷ. ꓠꓲ, ꓚꓱ, ꓬꓲ ꓒꓳ, ꓒꓳ, ꓗꓪ ꓮ ꓘꓶ. ꓛꓲ ꓣꓱ ꓔꓬ ꓟ ꓥ ꓟꓲ ꓕꓱ ꓟ ꓔꓯ ꓙꓲ ꓖꓴ ꓙꓳ ꓙꓳ ꓡꓰ ꓣꓱ ꓠ, ꓟ ꓐꓯ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓠꓬ ꓞꓳ ꓡꓱ ꓞꓳ ꓡꓯ. ꓐꓴ ꓐꓰ ꓤ ꓠꓱ ꓤ ꓐꓴ ꓞꓳ ꓙꓳ ꓚꓱ, ꓗꓪ ꓮ ꓘꓶ. ꓛꓲ ꓙ ꓫ. ꓓꓴ ꓓꓽ ꓟ ꓒꓬꓱꓼ ꓡ ꓓꓴ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓞꓲꓼ ꓣꓳ ꓟ ꓤ ꓠꓱ ꓤ ꓐꓴ ꓐꓰ ꓞꓳ ꓡꓯ. ꓐꓴ ꓔꓯ ꓟꓽ ꓙꓲ ꓢꓴ ꓐꓴ ꓡꓰ (Ai) ꓣꓱ ꓢꓲ ꓠꓬꓲ ꓟꓽ ꓙꓲ ꓟ ꓚꓱ, ꓗꓪ ꓐꓰ ꓧꓳꓽ ꓙꓰ ꓟ ꓟꓽ ꓗꓷ ꓡꓰ ꓠ, ꓟ ꓗꓽ ꓕ ꓠ, ꓟ ꓟꓬꓱꓽ ꓔꓯ ꓬꓰ ꓠ, ꓟ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓟ ꓥ ꓡꓳ꓿
ꓟꓵ ꓗꓳ, ꓓꓵ ꓓꓵ ꓗꓪ ꓔꓬ ꓟ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓥ ꓟꓲ (Ai) ꓦꓬꓼ ꓠꓬꓲ ꓗꓪ ꓤ ꓠꓱ ꓤ ꓐꓴ ꓐꓰ ꓞꓳ ꓡꓯ. ꓐꓴ ꓞꓳ ꓙꓳ ꓚꓱ, ꓗꓪ ꓫꓵꓽ ꓪꓴ ꓓꓽ ꓟ ꓟꓽ ꓒꓬꓱꓼ ꓠ, ꓟ ꓗ ꓫꓵˍ ꓛ ꓢꓲ ꓠꓬꓲ ꓬꓰ ꓙ ꓠ, ꓟ ꓐꓯ ꓔ ꓟ ꓥ ꓡꓳ꓿
(Ai) ꓣꓱ ꓢꓲ ꓠꓬꓲ ꓡ ꓞꓳ ꓔꓯ ꓗꓶ. ꓟ꓾ ꓟꓽ ꓙꓲ_ ꓟ ꓟꓬꓱꓽ ꓬꓰ ꓟ꓾ ꓟꓽ ꓒꓬꓱꓼ ꓡꓰ ꓠ, ꓟ ꓤ ꓟꓳ ꓠ, ꓟ ꓐꓯ ꓔ ꓡꓳ꓿ ꓟꓲ ꓠꓯ ꓢꓷ. ꓠꓲ, ꓚꓱ, ꓘꓴ ꓜꓲꓼ ꓞꓳ ꓗꓪ ꓝꓮꓲ ꓙꓵꓻ ꓠꓲ, ꓚꓱ, ꓥ ꓟꓲ ꓙꓲ_ ꓟ ꓚꓱ, ꓗꓪ ꓮ ꓡꓰ ꓐꓰ ꓟꓬꓱꓽ ꓬꓰ ꓠ, ꓟ ꓔꓲꓺ ꓒ ꓪ ꓔꓲ ꓡꓰ ꓞꓳ ꓡꓯ. ꓐꓴ ꓐꓰ ꓤ ꓠꓱ ꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓐꓴ ꓖꓪꓽ ꓙꓱ ꓜꓲꓼ ꓓꓴ ꓓꓽ ꓟ ꓗꓪ ꓫ. ꓕꓱ ꓗꓷꓳ ꓐꓰ (Vatican News) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿
