ꓡꓴ-ꓘ= 17ꓽ7-10
ꓠꓴ ꓪꓽ ꓗꓪ ꓟ ꓕꓲ ꓣꓳ ꓠꓬ ꓚꓳ ꓑꓸ ꓙꓳ ꓢꓲ꓾ ꓚꓳ ꓑꓸ ꓠꓬ ꓦꓻ ꓟꓲ ꓟꓽ꓾ ꓥ ꓠꓬ ꓮ ꓣꓳ ꓡꓳꓸ ꓢꓲ ꓬꓲꓼ ꓡ ꓠꓬ꓾ ꓮꓽ ꓟ ꓡꓰ ꓬꓲ ꓔꓯ꓾ ꓮꓸ ꓟꓲꓸ ꓗꓳꓺ ꓢꓲ ꓜ ꓜꓽ ꓡꓯ꓾ ꓐꓰ ꓐꓯ ꓖꓶ ꓢꓴ ꓙꓳˍ ꓥꓳ ꓪ? ꓪꓻ ꓜꓲ ꓠꓴ ꓠꓽ ꓬꓲ ꓔꓯ꓾ ꓙꓽ ꓧꓷꓹ ꓧꓷꓹ ꓢꓲ ꓥꓪ ꓔꓯ ꓟꓶꓼ ꓘꓶꓼ ꓜꓻ ꓫꓬꓹ ꓖꓶ ꓜꓽ ꓡꓯ꓿ ꓥꓪ ꓜꓽ ꓐꓳ ꓓꓳꓻ ꓐꓳ ꓡꓰ ꓕꓯꓽ ꓢꓲˍ ꓡꓰ ꓠꓴ ꓜꓽ ꓓꓳ ꓛꓵˍ ꓡꓳ꓾ ꓐꓰ ꓐꓯˍ ꓥꓳ꓾ ꓟꓽ ꓥ ꓡ? ꓬꓲ ꓚꓳ ꓑꓸ ꓠꓬ ꓬꓲ ꓢꓲ ꓒꓽ ꓡꓰ ꓝꓲ ꓔ ꓟ ꓮꓽ ꓙꓵ ꓬꓰ ꓓꓳ ꓡꓰˍ ꓟꓲ꓾ ꓬꓲ ꓢꓲ ꓒꓽ ꓠꓬ ꓬꓲ ꓔꓯ ꓫꓸ ꓟꓳ꓾ ꓟꓽ ꓐꓯ꓿ ꓖꓳ ꓟ ꓡꓰ ꓐꓰ ꓠꓴ ꓪꓽ ꓔꓯ ꓝꓲ ꓔ ꓟ ꓮꓽ ꓙꓵ ꓬꓰ ꓓꓳ ꓡꓰˍ ꓟꓲ ꓠꓴ ꓪꓽ ꓠꓽ꓾ ꓥꓪ ꓠꓴꓽ ꓠꓬ ꓟꓽ ꓒꓵ ꓟ ꓚꓳ ꓑꓸ ꓐꓴ ꓥꓳ꓿ ꓥꓪ ꓠꓴꓽ ꓬꓰ ꓗꓷ ꓟ ꓠꓬ ꓥꓪ ꓠꓴꓽ ꓬꓰ ꓙꓲꓽ ꓙꓳˍ ꓡꓳ ꓫꓵꓽˍ ꓡꓰꓽ ꓥꓳ꓾ ꓐꓰ ꓐꓯ ꓠ ꓗꓹ ꓡꓳ꓾ ꓐꓯˍ ꓡꓳ꓿
ꓠꓬꓲꓸ ꓠꓬꓲ ꓟ ꓔꓯꓺ ꓥꓳꓽ ꓠꓬ ꓬꓰ-ꓢꓴ ꓙꓲ-ꓢꓴ ꓔꓯ ꓣꓳ ꓮ ꓡꓲ ꓣꓱꓽ ꓙ ꓠꓹ ꓟ ꓔꓯ ꓟꓸ ꓖꓶ ꓔ ꓡꓳ= ꓢꓲ ꓒ ꓬꓰ-ꓢꓴ ꓐꓯ ꓔˍ ꓟ ꓡꓰ ꓣꓳ ꓠꓬ ꓠꓱꓸ ꓐꓯ ꓢꓴ ꓔꓯ ꓠꓵꓻ ꓠꓲꓹ ꓟꓳꓸ ꓖꓶˍ ꓕꓯ꓾ ꓫꓱꓸ ꓤ ꓟꓬꓱꓽ ꓣꓱꓽ ꓙˍ ꓟ ꓟꓬꓱꓽ ꓬꓰˍ ꓕꓯ꓾ ꓟꓬꓱ ꓓꓳꓽ ꓟꓶ ꓠꓲꓹ ꓫꓵ ꓢꓴ꓾ ꓢꓴ ꓡꓰ ꓫꓱꓸ ꓖꓶˍ ꓟ ꓔꓯ ꓟꓶ ꓠꓲꓹ ꓫꓵ ꓢꓴ꓾ ꓪꓴ-ꓢ ꓡꓰ ꓝꓮꓲ ꓶꓼ ꓤ ꓫꓱꓹ ꓤ ꓡꓲꓸ ꓖꓶ ꓡˍ ꓟ ꓟꓶ ꓠꓲꓹ ꓫꓵ ꓢꓴ ꓕꓽ ꓗꓷ ꓡꓰ ꓝꓲ=
ꓫꓱꓸ ꓤ ꓟꓬꓱꓽ ꓣꓱꓽ ꓙ ꓟꓬꓱꓽ ꓠꓬ ꓢꓴ ꓟꓳꓻ ꓡꓰ ꓠ ꓡꓰꓽ ꓬꓰˍ ꓟ꓾ ꓢꓴ ꓟꓲꓽ ꓙꓬ ꓗꓪ ꓡꓰꓽ ꓬꓰ ꓟꓳꓸ ꓖꓶˍ ꓟ ꓟꓽ ꓥ ꓥ꓾ ꓢꓲ ꓒ ꓬꓰ-ꓢꓴ ꓔꓯ ꓣꓱꓽ ꓙ ꓢꓴ꓾ ꓬꓲ ꓔꓯ ꓛꓳꓻ ꓢꓴ ꓬꓰˍ ꓟ ꓙꓲ-ꓢꓴ ꓢꓲ ꓤ ꓤꓶꓻ ꓔꓯ ꓬꓲ ꓚꓰꓺ ꓣꓴ ꓠ ꓔˍ ꓡꓳ= ꓙꓽ ꓣꓳ ꓠꓲꓹ ꓡꓰ ꓙꓲ-ꓢꓴ ꓢꓲ ꓤ ꓕꓲ ꓣꓳ ꓬꓰ ꓠ ꓔ ꓟ ꓔꓯ ꓬꓰˍ ꓟ ꓐꓯˍ ꓟ ꓠꓬ꓾ ꓠꓱꓸ ꓐꓯ ꓢꓴ ꓔꓯ ꓣꓱꓽ ꓙˍ ꓟ ꓗꓪ ꓐꓰ ꓬꓰ-ꓢꓴ ꓔꓯ ꓣꓱꓽ ꓙˍ ꓟ ꓥ ꓡꓳ= ꓠꓱꓸ ꓐꓯ ꓢꓴ ꓐꓴ ꓗꓪ ꓐꓰ ꓕꓲ ꓝꓸ ꓬꓰ-ꓢꓴ ꓢꓲ ꓒ ꓔꓯ ꓣꓱꓽ ꓙˍ ꓟ ꓤꓶꓻ ꓔꓯ ꓠꓬ ꓙꓲꓻ ꓫꓬ ꓢꓴ Martin ꓬꓲ ꓤꓶꓻ ꓗꓪ ꓐꓰ ꓔꓯꓺ ꓢꓳ ꓐ ꓡˍ ꓡꓳ=
ꓬꓲ ꓠꓬ ꓟꓯꓼ ꓣꓱꓽ ꓔꓬ ꓕꓯ ꓖꓳ ꓓꓱꓽ ꓔꓲꓹ ꓟꓶ ꓠꓹ ꓟ ꓙꓽ ꓖꓶ ꓔꓬ ꓟ ꓙꓵꓹ ꓗꓪ꓾ ꓬꓲ ꓠꓬ ꓐꓵꓻ ꓞꓶꓽ ꓟꓽ ꓖꓪꓽ ꓔ ꓟ ꓓꓰꓽ ꓜꓽ ꓢꓴ ꓕꓲ ꓣꓳ ꓐꓰ ꓜꓲ ꓡꓯ ꓘꓳ ꓗꓷꓳ= ꓖꓳ ꓕꓯ ꓬꓲ ꓠꓬ ꓞꓼ ꓞꓼ ꓐꓰ ꓬꓲ ꓕꓯꓽ ꓢꓲ ꓗꓪ ꓟ ꓐꓵꓻ ꓞꓶꓽ ꓔꓯ ꓓꓶ ꓗꓷ ꓢꓲ ꓜꓻ ꓓꓰꓽ ꓔꓯ ꓖꓶ ꓖꓪꓽ ꓗꓷꓳ= ꓖꓳ ꓕꓲ ꓦꓬꓼ ꓗꓪ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓔꓯ “ꓘꓴ ꓜꓲꓼ ꓞꓳ ꓗꓪ ꓓꓵꓽ ꓡ ꓠꓹ ꓟ ꓙꓽ ꓖꓶ ꓔꓬ ꓢꓴ Martin ꓡꓰ ꓥꓪ ꓔꓯ ꓖꓪꓽ ꓓꓴ ꓕꓲ ꓘꓳꓹ ꓖꓶ ꓗꓷꓳ”꓾ ꓐꓰ ꓐꓯˍ ꓟ ꓬꓲ ꓑ ꓙꓽˍ ꓡꓳ=
ꓖꓳ ꓗ ꓠꓯꓸ ꓟꓽ ꓔꓱꓹ ꓟꓽ ꓜꓳꓽ ꓟ ꓫꓵꓽ ꓪꓴ ꓕꓲ ꓟ ꓐꓱ ꓶ ꓢꓰꓼ ꓡꓯ ꓘꓳ ꓓꓴ ꓓꓳ ꓡˍ ꓕꓯ ꓬꓲ ꓡꓰ “ꓥꓪ ꓠꓬ ꓬꓰ-ꓢꓴ ꓙꓲ-ꓢꓴ ꓬꓲ ꓟꓯꓼ ꓥ ꓠꓬꓲ ꓓꓶꓽ ꓡꓯ ꓘꓳ꓾ ꓢꓰꓼ ꓡꓯ ꓘꓳˍ ꓟ ꓠꓬ ꓟꓽ ꓜꓳꓽ” ꓐꓰ ꓒꓳꓹ ꓖꓶ ꓗꓷꓳ= ꓗ ꓠꓯꓸ ꓔꓲꓺ ꓒ ꓓꓽ ꓟ ꓒꓬꓱꓼ ꓡ ꓗꓷ ꓟ Martin ꓠꓬ ꓫꓱꓸ ꓤ ꓙꓽ ꓗꓳˍ ꓟ ꓔꓯ ꓟꓳꓸ ꓖꓶˍ ꓟ ꓐꓰ ꓙꓵꓻ ꓠꓲꓹ ꓠꓯꓸꓼ ꓗꓪ ꓪ ꓜꓲ ꓪꓽ ꓠꓬꓲ ꓡꓰꓳ= ꓕꓱ ꓕꓲ ꓚꓱꓹ ꓗꓪ ꓐꓰ ꓙꓲꓻ ꓫꓬ ꓢꓴ Martin ꓠꓬ ꓣꓱꓽ ꓙ ꓟꓬꓱꓽ ꓔꓯ ꓬꓰ ꓐ ꓡ ꓗꓷꓳ= ꓣꓳ ꓐꓴ ꓥˍ ꓟꓲ ꓠꓱꓸ ꓐꓯ ꓢꓴ ꓗꓪ ꓐꓰ ꓕꓲ ꓝꓸ ꓬꓰ-ꓢꓴ ꓙꓲ-ꓢꓴ ꓔꓯ ꓣꓱꓽ ꓙ ꓢꓴ ꓬꓰ ꓡꓯ=
