ꓟꓵꓽ ꓘꓳꓼ ꓦꓬꓼ ꓠꓬꓲ ꓒꓳ, ꓡ ꓟ ꓑꓶ. ꓓꓴ ꓞꓳ ꓫꓵꓽ ꓡꓲꓽ ꓒꓰꓼ ꓟꓶ ꓡꓰˍ ꓟ ꓚꓱ, (Climate change) ꓥ ꓡꓳ꓿ ꓟꓲ ꓠꓯ ꓗꓪ ꓟꓵꓽ ꓘꓳꓼ ꓦꓬꓼ ꓠꓬꓲ ꓒꓳ, ꓡꓶ. ꓡꓰ ꓟ ꓪꓴ. ꓠꓬꓲ ꓞꓳ ꓫꓵꓽ ꓕꓲ ꓫꓵꓽ ꓐꓰ ꓕꓲ ꓫꓵꓽ ꓞꓳ ꓙꓳ ꓚꓱ, ꓒꓳ, ꓡꓶ. ꓡꓰ ꓟ ꓮ ꓟꓬ, ꓙꓳ ꓟ ꓥ ꓡꓳ꓿ ꓕꓱ ꓟ ꓠꓬ ꓚꓲ. ꓛꓬ ꓡꓲꓽ ꓒꓰꓼ ꓐꓰ ꓫ. ꓕꓱ ꓟ ꓚꓱ, ꓮ ꓟꓬ, ꓫꓵꓽ ꓟꓶ ꓡꓰ ꓟ ꓑꓲ ꓡꓰ ꓟ ꓮ ꓟꓬ, ꓙꓳ ꓡꓰ ꓟ ꓥ ꓡꓳ꓿
ꓟꓲ ꓠꓯ ꓡ ꓞꓳ ꓐꓴ ꓠꓬ ꓟꓵꓽ ꓘꓳꓼ ꓦꓬꓼ ꓠꓬꓲ ꓙꓲ꓾ ꓝꓮꓲ ꓚꓲ. ꓛꓬ ꓗꓴꓷꓼ ꓘꓴꓽ ꓗꓪ ꓫꓵꓽ ꓪꓴꓽ ꓟꓽ ꓙꓳ ꓠꓬ ꓗ, ꓛꓲ ꓛꓲ ꓡꓰ ꓞꓳ ꓙꓳ ꓔꓬ ꓥ ꓟꓲ꓾ ꓗꓴꓷꓼ ꓘꓴꓽ ꓗꓪ ꓟꓵꓽ ꓘꓳꓼ ꓒꓳ, ꓝꓮꓲ ꓗꓴꓷꓼ ꓘꓴꓽ ꓗꓪ ꓢꓰꓼ ꓡꓯꓽ ꓘꓳ, ꓓꓴ ꓫꓵꓽ ꓪꓴꓽ ꓮ ꓟꓬ, ꓙꓳ ꓠꓬ ꓑ ꓫꓬ ꓐꓴ ꓗ, ꓛꓲ ꓛꓲ ꓡꓰ ꓔꓬ ꓟꓽ ꓪ꓿
ꓠꓱ. ꓐꓯꓼ ꓗꓴꓷꓼ ꓠꓱ. ꓐꓯꓼ ꓟꓵꓽ ꓗꓪ ꓔꓬ ꓙꓰ ꓠ, ꓗꓷ ꓡꓰ ꓟ ꓥ ꓡꓳ꓿ ꓚꓲ. ꓛꓬ ꓟꓵꓽ ꓚꓲ. ꓛꓬ ꓗꓴꓷꓼ ꓗꓪ ꓗ, ꓛꓲ ꓛꓲ ꓡꓰ ꓞꓳ ꓙꓳ ꓔꓬ ꓠꓬ ꓚꓲ. ꓛꓬ ꓡꓲꓽ ꓒꓰꓼ ꓐꓰ ꓥꓳꓽ ꓔꓯ ꓕꓲ ꓠꓲ, ꓕꓲ ꓪ ꓫ. ꓕꓱ ꓟ ꓪꓴ. ꓠꓬꓲ ꓡꓲꓽ ꓒꓰꓼ ꓐꓰ ꓥꓳꓽ ꓫꓵꓽ ꓠꓬ ꓟꓽ ꓟꓶ ꓡꓰ ꓟꓽ ꓑꓲ ꓡꓰ ꓓꓽ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓢꓴ ꓟꓵꓽ ꓗꓪ ꓔꓬ ꓢꓲ ꓠꓬꓲ ꓟꓬꓱꓽ ꓬꓰ ꓜꓽ ꓠꓬ ꓢꓴ ꓥꓳꓽ ꓢꓴ ꓡꓲꓽ ꓒꓰꓼ ꓔꓯ ꓣꓱ ꓡ ꓟ ꓪꓴ. ꓠꓬꓲ ꓚꓲ. ꓛꓬ ꓥꓳꓽ ꓫꓵꓽ ꓠꓬ ꓮꓽ ꓤ ꓤ ꓟꓶ ꓡꓰ ꓐꓬ ꓡꓰ ꓡ ꓟ ꓥ ꓡꓳ꓿
ꓠꓬꓲ. ꓠꓬꓲ ꓟ ꓣꓳ ꓟꓵꓽ ꓣꓳ ꓔꓬ ꓟ ꓗꓴꓷꓼ ꓗꓪ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓔꓶ ꓜꓽ ꓔꓶ ꓓꓳ ꓚꓱ, ꓬꓰ ꓟꓽ ꓙꓲ ꓮ ꓘꓶ. ꓛꓲ ꓫ. ꓡ ꓟ ꓙꓵ, ꓔꓳ, ꓜꓳ ꓡ ꓟ ꓥ ꓡꓳ꓿ ꓕꓱ ꓟ ꓮ ꓙꓵꓽ ꓠꓬ ꓣꓳ ꓟꓵꓽ ꓗꓪ ꓢꓲ, ꓜꓲ ꓡꓳ ꓜꓲ ꓐꓬ ꓡꓰ ꓝꓲ. ꓪꓴ. ꓠꓬꓲ ꓥ ꓡꓳ꓿ ꓝꓮꓲ ꓫꓵꓺ ꓚꓴꓺ ꓟ ꓪꓴ. ꓠꓬꓲ ꓟꓲ ꓥ ꓡꓳ꓿ ꓬꓲꓻ ꓙꓬ ꓡꓳ ꓗ, ꓠꓬ ꓬꓲ. ꓬꓲꓻ ꓔꓬ ꓟ ꓔꓶ. ꓗꓪ ꓟꓽ ꓬꓲ ꓟ ꓪꓴ. ꓠꓬꓲ ꓮ ꓘꓶ. ꓛꓲ ꓫ. ꓓꓴ ꓒꓬꓱꓼ ꓡ ꓝꓲ. ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓔꓬ ꓟ ꓟꓵꓽ ꓗꓪ ꓙꓳ ꓟ ꓢꓲ, ꓜꓲ ꓡꓳ ꓜꓲ ꓐꓰ ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓔꓯ ꓠꓵꓻ ꓠꓲ, ꓞꓳ ꓒꓵꓽ ꓓꓴ ꓬꓰ ꓡꓯ꓿ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓐ ꓡ ꓠ, ꓟ ꓢꓲ, ꓜꓲ ꓔꓶ ꓓꓴ ꓬꓰ ꓡꓯ꓿ ꓫ. ꓟꓳ ꓪ
