ꓔꓲꓺ ꓒ ꓪ ꓔꓲ ꓡꓰ ꓟꓬ‐ꓟ ꓗꓴꓷꓼ ꓘꓴꓽ ꓗꓪ ꓟꓯꓼ ꓘꓰ, ꓟꓯꓼ ꓑꓬ ꓔꓬ ꓟ ꓑ ꓫꓬ ꓐꓴ ꓔꓯ ꓕꓽ ꓟꓲ ꓡꓰ ꓠ, ꓟ ꓞꓳ ꓜꓴꓻ ꓗꓴꓷꓼ ꓔꓯ ꓐꓯ ꓔ ꓟ꓾
11 ꓦ ꓟ 6 ꓠꓬꓲ 2025 ꓘꓳꓼ ꓕꓯ ꓔꓲꓺ ꓒ ꓪ ꓔꓲ ꓡꓰꓳ (14) ꓠꓬ ꓮ ꓟꓶ ꓟ ꓙꓵ, ꓗꓪ ꓟꓬ‐ꓟ ꓗꓴꓷꓼ ꓘꓴꓽ ꓗꓪ ꓟꓯꓼ ꓘꓰ, ꓟꓯꓼ ꓑꓬ ꓔꓬ ꓢꓴ ꓐꓴ ꓔꓯ ꓟꓽ ꓟꓲ ꓡꓰ ꓠ, ꓟ ꓞꓳ ꓜꓴꓻ ꓗꓴꓷꓼ ꓔꓯ ꓔꓲꓺ ꓒ ꓪ ꓔꓲ ꓡꓰ ꓫ. ꓕꓱ ꓗꓷ ꓟ ꓥ ꓡꓳ꓿ ꓔꓲꓺꓒ ꓪ ꓔꓲ ꓠꓬ ꓠꓽ ꓢꓽ ꓠꓬꓲ ꓗꓪ ꓟꓵꓽ ꓗꓳ, ꓓꓵ ꓓꓵ ꓗꓪ ꓐꓰ ꓦꓮꓔꓲꓚꓮꓠ ꓗꓴꓷꓼ ꓗꓪ ꓚꓳꓻ ꓡ ꓢꓴ ꓐꓴ ꓙꓲ‐ꓢꓴ ꓢꓲꓺ ꓤ ꓐꓴ ꓐꓰ ꓜꓲꓼ ꓗꓷ ꓟ ꓙꓵ, ꓕꓯ ꓟꓬ‐ꓟ ꓗꓴꓷꓼ ꓗꓪ ꓔꓬ ꓟ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓟ ꓑ ꓫꓬ ꓐꓴ ꓐꓱ ꓶ ꓫ. ꓕꓱ ꓖꓶ ꓗꓷ ꓟ ꓥ ꓡꓳ꓿
ꓔꓲꓺ ꓒ ꓪ ꓔꓲ ꓠꓬ ꓟꓲ ꓠꓯ ꓗꓪ ꓢꓰꓼ ꓡꓯꓽ ꓘꓳ ꓔꓬ ꓟ ꓗꓴꓷꓼ ꓮ ꓟꓬ, ꓒꓬꓱꓼ ꓔꓬ ꓟ ꓪꓴ. ꓠꓬꓲ ꓟꓲ ꓠꓯ ꓢꓲ ꓡꓲ, ꓟꓶ ꓠ, ꓟ ꓪꓽ ꓘꓴ ꓙ ꓖꓶ ꓗꓷꓳ꓿ ꓝꓮꓲ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓪꓴ. ꓠꓬꓲ ꓝꓴꓲ. ꓟꓽ ꓙꓲ ꓟ ꓤ ꓠꓱ ꓤ ꓐꓴ ꓐꓰ ꓞꓲꓼ ꓪꓴꓽ ꓡꓰ ꓢꓴ ꓐꓴ ꓥ ꓟꓲ ꓮ ꓘꓶ. ꓛꓲ ꓔꓬ ꓫ. ꓔꓬ ꓟ ꓔꓯ ꓫ. ꓕꓱ ꓗꓷꓳ꓿
ꓟꓬ‐ꓟ ꓗꓴꓷꓼ ꓘꓴꓽ ꓗꓪ ꓔꓬ ꓟ ꓑ ꓫꓬ ꓐꓴ ꓐꓱ ꓶ ꓥ ꓟꓲ ꓞꓳ ꓜꓴꓻ ꓗꓴꓷꓼ ꓠꓬ ꓕꓽ ꓟꓲ ꓡꓰ ꓠ, ꓟ ꓔꓲꓺ ꓒ ꓪ ꓔꓲ ꓡꓰ ꓫ. ꓕꓱ ꓗꓷꓳ꓿ ꓝꓮꓲ ꓜ ꓓꓴ ꓓꓳ ꓓꓴ ꓣꓱ ꓬꓯꓼ ꓔꓬ ꓢꓴ ꓐꓴ ꓔꓯ ꓬꓰ ꓙ ꓠ, ꓟ ꓥ ꓟꓲ ꓓꓰꓽ ꓗꓷꓳ꓿ ꓝꓮꓲ ꓟꓲ ꓠꓯ ꓢꓲ ꓡꓲ, ꓟꓶ ꓠ, ꓟ ꓪꓽ ꓘꓴ ꓠ, ꓟ ꓥ ꓟꓲ ꓐꓯ ꓗꓷ ꓟ ꓥ ꓡꓳ꓿
ꓟꓬ‐ꓟ ꓗꓴꓷꓼ ꓗꓪ ꓗꓴꓷꓼ ꓢꓲ ꓡꓲ, ꓓꓴ ꓟꓽ ꓙꓳ ꓟ ꓪꓴ. ꓠꓬꓲ ꓝꓴꓲ. ꓟꓽ ꓙꓳ ꓟ ꓑ ꓫꓬ ꓐꓴ ꓮ ꓘꓶ. ꓛꓲ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓟ ꓐꓰ ꓫꓵꓻ ꓡꓰ ꓢꓴ ꓐꓴ ꓮ ꓟꓬ, ꓙꓳ ꓟ ꓚꓱ, ꓔꓯ ꓠꓽ ꓗꓷ ꓠ, ꓟ ꓮ ꓘꓶ. ꓛꓲ ꓪꓽ ꓘꓴ ꓙ ꓠ, ꓟ ꓔꓲꓺ ꓒ ꓪ ꓔꓲ ꓡꓰꓳ (14) ꓡꓰ ꓫ. ꓕꓱ ꓗꓷꓳ ꓐꓰ (Vatican ) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿
