ꓟꓵꓽ ꓘꓳꓼ ꓕꓲ ꓟ ꓘꓴꓽ ꓗꓪ (20) ꓧꓪꓹ ꓟ Typhoon ꓟꓲꓽ ꓦꓲ ꓕꓳꓽ ꓥꓳꓽ ꓠꓬ Philippines ꓗꓴꓷꓼ ꓗꓪ ꓙꓱꓼ ꓡ ꓗꓷ ꓕꓯ꓾ Cebu ꓔꓲꓺ ꓒ ꓓꓽ ꓠꓬ ꓗ-ꓔꓳ-ꓡꓲꓗ ꓢꓲ ꓤ ꓐꓴ ꓔꓯ꓾ ꓫꓸ ꓙꓵ ꓓꓴ ꓔꓳꓹ ꓜꓳꓽ ꓔꓬꓹ ꓢꓴ ꓐꓴ ꓔꓯ ꓚꓲꓸ ꓛꓬ ꓦꓲꓻ꓾ ꓪꓽ ꓘꓴ ꓦꓲꓻ ꓐꓰ ꓜꓴꓻ ꓗꓹ ꓘꓶꓽ ꓔꓯ ꓒꓴ ꓔˍ ꓢꓲ ꓘꓳ ꓣꓴ ꓖꓶ ꓠ ꓗꓹ ꓡꓳ꓾ ꓐꓰ ꓕꓵꓼ ꓪ ꓖꓶ ꓗꓷꓳ=
ꓔꓲꓠꓳ ꓐꓰ ꓘꓴˍ ꓟ Typhoon ꓟꓲꓽ ꓦꓲ ꓕꓳꓽ ꓥꓳꓽ ꓠꓬ 11ꓦ 3 ꓠꓬꓲ 2025꓾ ꓟꓳꓼ ꓡꓳ ꓙꓵꓹ ꓕꓯ ꓙꓱꓼ ꓡ ꓗꓷ ꓟ ꓪꓴꓸ ꓠꓬꓲ꓾ Philippines ꓗꓴꓷꓼ ꓔꓱꓹ ꓫꓵ ꓐꓰ Cebu ꓬꓲꓻ ꓗꓳ ꓡꓳ (Cebu Island) ꓗꓪ ꓑ ꓫꓬꓼ 90 ꓣꓳ ꓟꓽ ꓞꓲ ꓫꓵꓻ ꓗꓷꓳ= ꓕꓱ ꓟ ꓠꓬ ꓟꓵꓽ ꓘꓳꓼ ꓕꓱ ꓕꓲ ꓟ ꓘꓴꓽ ꓠꓯꓸꓼ ꓗꓪ 20 ꓧꓪꓹ ꓕꓲ ꓧꓪꓹ ꓙꓱꓼ ꓡ ꓗꓷ ꓟ ꓟꓲꓽ ꓦꓲ ꓕꓳꓽ ꓥꓳꓽ ꓥ ꓡꓳ=
Cebu ꓗꓪ ꓬꓲꓻ ꓙꓬ ꓮ ꓟꓬꓹ ꓙꓵꓽ ꓟꓶꓸ ꓡꓰ ꓢꓲ ꓠꓬꓲ ꓕꓱ ꓟ ꓠꓬ ꓧꓶꓸ ꓕꓯ ꓟ ꓕꓯꓽ ꓢꓲ ꓮ ꓘꓶꓸ ꓪꓽ ꓠꓬꓲ ꓡꓰ ꓟ ꓥ ꓡꓳ= ꓝꓮꓲ ꓑ ꓫꓬꓼ 400ꓹ000 ꓣꓳ ꓛꓲ ꓠꓬ ꓔꓬꓹ ꓖꓴ ꓦꓲꓻ ꓟꓽ ꓙꓳ ꓗꓷ ꓡꓰꓳ꓾ ꓐꓰ ꓢꓷꓸ ꓪ ꓡꓳ=
Cebu ꓔꓲꓺ ꓒ ꓓꓽ Archbishop Alberto S.Uy ꓡꓰ꓾ ꓫꓸ ꓙꓵ ꓟꓶ ꓙꓵ ꓔꓬ ꓢꓴ ꓐꓴ ꓐꓱ ꓶ ꓑ ꓫꓬ ꓐꓴ꓾ ꓪꓽ ꓘꓴ ꓦꓲꓻ ꓐꓰ ꓜꓴꓻ ꓐꓴ ꓠꓬ ꓬꓲ ꓪ ꓦꓲꓻ ꓗ ꓘꓶꓽ ꓔꓯ ꓒꓴ ꓔ ꓖꓶ ꓠꓹ ꓟ ꓕꓵꓼ ꓪ ꓖꓶ ꓗꓷꓳ= ꓔꓲꓺ ꓒ ꓓꓽ ꓡꓰ ꓫꓵꓽ ꓪꓴ ꓕꓱ ꓟ ꓐꓰ ꓗꓴꓸ ꓙꓲꓽ ꓙꓳ ꓢꓲ ꓠꓬꓲ “ꓕꓱ ꓟ ꓠꓬ ꓟꓲ ꓠꓯ ꓦꓲꓻ ꓕꓱ ꓟ ꓐꓱ ꓶ ꓣꓳ ꓬꓰ ꓓꓳ ꓡꓰ ꓗꓷ ꓟ꓾ ꓥ ꓠꓬ ꓬꓰ ꓟꓽ ꓑꓰ ꓟ ꓔꓯ ꓟꓳꓸ ꓖꓶ ꓡ ꓔꓬ ꓡꓳ” ꓐꓰ ꓬꓲ ꓡꓰ ꓖꓴ ꓟꓳꓸ ꓖꓶ ꓔˍ ꓡꓳ=
“ꓪꓴ-ꓢ ꓠꓬ ꓟꓲꓽ ꓦꓲ ꓐꓰ ꓬꓲꓻ ꓙꓬ ꓗꓪ ꓐꓰ ꓕꓲ ꓝꓸ ꓣꓳ ꓔꓯ ꓫꓸ ꓕꓱ ꓡ ꓗꓷꓳ= ꓣꓳ ꓐꓴ ꓔꓯ ꓬꓲ ꓢꓲꓺ ꓒꓽˍ ꓡꓰ ꓐꓰ ꓟꓲ ꓠꓯ ꓔꓯ ꓝꓮꓲ ꓫꓬꓹ ꓔꓱꓹ ꓠꓹ ꓟ ꓘꓴꓻ ꓔꓬ ꓡꓳ” ꓐꓰ ꓔꓲꓺ ꓒ ꓓꓽ ꓡꓰ ꓝꓸ ꓢꓲ ꓐꓯˍ ꓡꓳ=
Cebu ꓬꓲꓻ ꓗꓳ ꓡꓳ ꓟꓵꓽ ꓠꓬ ꓕꓱ ꓕꓲ ꓘꓳꓼ ꓘꓴꓽ ꓗꓪ ꓠꓬꓲꓽ ꓧꓪꓹ ꓕꓲ ꓧꓪꓹ ꓕꓱ ꓡꓱ ꓬꓲ ꓓꓽ ꓟ ꓔꓳꓹ ꓜꓳꓽ ꓡ ꓟ ꓥ ꓡꓳ= ꓗꓳꓸ ꓡ ꓟ ꓕꓲ ꓦ ꓗꓪ ꓟꓵꓽ ꓙꓴꓽ ꓓꓽ ꓟ ꓚꓵꓹ ꓗꓷ ꓟ ꓪꓴꓸ ꓠꓬꓲ ꓡ ꓞꓳ (70) ꓣꓳ ꓟꓽ ꓛꓲ ꓫꓵꓻ ꓗꓷ ꓢꓲ ꓠꓬꓲ꓾ ꓦꓲꓻ ꓐꓰ ꓪꓽ ꓘꓴ ꓦꓲꓻ ꓐꓴ ꓐꓬ ꓡꓰ ꓗꓷ ꓟ ꓥ ꓡꓳ=
ꓟꓵꓽ ꓙꓴꓽ ꓚꓵꓹ ꓓꓳ ꓡꓰ ꓗ ꓠꓯꓸ꓾ “Give Hope” ꓐꓰ ꓟꓬꓱ ꓔˍ ꓟ ꓬꓰ ꓙ ꓔꓳꓹ ꓙ ꓟꓬꓱꓽ ꓬꓰ ꓜꓴꓻ ꓔꓯ ꓘꓴ ꓜꓲꓼ ꓞꓳ ꓗꓪ ꓐꓰ ꓪꓴꓸ ꓔꓴ ꓔꓶꓺ ꓗꓷ ꓟ ꓥ ꓢꓲ ꓠꓬꓲ꓾ ꓮ ꓟꓶ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼ ꓗꓷ ꓕꓯ ꓥˍ ꓟꓲ ꓬꓰ ꓙ ꓟꓬꓱꓽ ꓖꓳ ꓟ ꓔꓯ ꓝꓮꓲ ꓬꓰ ꓓꓴ ꓥꓳ꓾ ꓐꓰ ꓢꓷꓸ ꓪˍ ꓡꓳ=
News and Photo Credit to Vatican News
