ꓦꓲ., ꓘꓴ ꓐꓰ ꓕꓲ ꓦꓲ., ꓡ ꓞꓳ ꓐꓯˍꓟ ꓠꓬ ꓠꓵ., ꓠꓲ, ꓐꓲ ꓞˍꓟ ꓦꓲ., ꓕꓲ ꓦꓲ., ꓥ ꓡꓳ꓾ ꓟꓽ ꓞꓲ ꓪꓽ ꓡꓯꓼ ꓘꓳ, ꓧꓳꓼ ꓡꓯꓼ ꓘꓳ, ꓢꓲ꓾ ꓕꓲ ꓣꓳ ꓫ. ꓓꓴ ꓙꓳ ꓡ ꓠꓬꓲ ꓬꓰ ꓙ ꓠꓬꓲꓽ ꓙ ꓡꓯꓼ ꓘꓳ, ꓠꓽ ꓗ, ꓟ ꓥ ꓡꓳ꓿
ꓶꓼ ꓤ ꓟꓵꓽ ꓟ ꓥ ꓠꓬ ꓠꓱ. ꓐꓯ ꓕꓲ ꓖ ꓗꓪ ꓙꓰ ꓢꓲ꓾ ꓦꓲ., ꓘꓴ ꓗꓪ ꓡꓽ ꓡ ꓕꓯ ꓣꓳ ꓔꓬ ꓦꓲ., ꓔꓯ ꓡꓳ. ꓟꓳ ꓪ ꓠꓬ ꓮ ꓘꓶ. ꓠꓲ, ꓟ ꓗ,ꓛꓲ ꓓꓴ ꓙꓳˍꓟ ꓠꓬ ꓪꓴ‐ꓢ ꓡꓰ ꓖꓶ ꓡ ꓟ ꓡꓯꓼ ꓫꓴ..ꓓ ꓦ ꓡꓱ ꓓꓴ ꓕꓲ ꓟ ꓥ ꓡꓳ꓿
ꓣꓳ ꓞꓲ ꓣꓳˍꓟ ꓕꓲ ꓙꓵꓽ ꓗꓪ ꓥꓳꓽ ꓢꓯ꓾ ꓟꓴ ꓖꓪ ꓖꓪꓼ ꓢꓯ꓾ ꓡꓳ ꓖꓪ ꓢꓯꓼ ꓡꓰ ꓐꓲ ꓞˍꓟ ꓦꓲ., ꓕꓲ ꓦꓲ., ꓥ ꓡꓳ꓿ ꓮ ꓘꓶ. ꓗ, ꓛꓲ ꓓꓴ ꓙꓳˍꓟ ꓡꓰ ꓐꓰ ꓠꓲ., ꓟ ꓫ. ꓓꓴ ꓐꓯ ꓡꓯꓼ ꓘꓳ, ꓓꓴ ꓥˍꓟꓲ ꓙꓳ ꓥ ꓡꓳ꓿ ꓖꓳ ꓡꓰ ꓐꓯ ꓥˍꓟꓲ ꓣꓳ ꓞꓲꓼ ꓪꓴ ꓡ ꓢꓲ꓾ ꓶꓼ ꓤ ꓟꓵ ꓗꓪ ꓙꓰ ꓡꓰ ꓕꓯ ꓣꓳ ꓔꓬ ꓖꓴ ꓦꓲ., ꓔꓯ ꓮ ꓘꓶ. ꓢꓲ ꓙꓬ ꓟ ꓥ ꓡꓳ꓿ ꓕꓱ ꓟ ꓠꓬ ꓶꓼ ꓤ ꓟꓵ ꓗꓪ ꓙꓰ ꓠꓬꓲ ꓢꓴ ꓐꓴ ꓮ ꓘꓶ. ꓕꓳꓼ ꓜꓳꓼ ꓠꓬꓲˍꓟ ꓥ ꓡꓳ꓿ ꓕꓱ ꓕꓲ ꓙꓵꓽ ꓗꓪ ꓦꓲ., ꓔꓯ ꓟꓳˍꓪ ꓕꓯ ꓕꓲ ꓦꓲ., ꓡ ꓞꓳ ꓮꓽ ꓐ ꓮꓽ ꓟ ꓐꓴ ꓐꓰ ꓠꓬꓲꓽ ꓤ ꓠꓬꓲꓽ ꓟ ꓐꓴ ꓐꓰ ꓟꓳ ꓡꓯꓼ ꓘꓳ, ꓪ ꓕꓯ ꓮ ꓘꓶ. ꓠꓲ, ꓟ ꓗ, ꓟ ꓔꓯ ꓣꓳ ꓘꓴꓽ ꓣꓴ ꓪꓽ ꓡꓳ꓾ ꓕꓱ ꓟ ꓠꓬ ꓦꓲ., ꓐꓯˍꓟ ꓔꓯ ꓦ ꓡꓱ ꓗꓴ ꓥꓳ꓿
ꓦꓲ., ꓐꓰ ꓕꓲ ꓦꓲ., ꓡ ꓞꓳ ꓔꓯ ꓠꓲ., ꓠꓵ ꓟ ꓠꓬ ꓮ ꓘꓶ. ꓛꓲ ꓪꓴˍꓟ ꓦꓲ., ꓕꓲ ꓦꓲ., ꓔꓯ ꓫꓬ ꓓꓽ ꓟ ꓡꓰ ꓐꓰ ꓟ ꓥ꓾ ꓠꓵ., ꓠꓲ,꓾ ꓘꓪ ꓫꓵꓽ_ꓟ꓾ ꓙꓼ ꓟꓶ ꓗꓴ. ꓔˍꓟ ꓬꓰ ꓙ ꓡꓯꓼ ꓘꓳ, ꓟ ꓕꓱ ꓡꓱ ꓫꓵꓽ ꓐꓰ ꓫꓬ ꓔꓽ ꓟ ꓥ ꓡꓳ꓿ ꓕꓲ ꓦꓲ., ꓡ ꓞꓳ ꓢꓴ ꓕꓲ ꓣꓳ ꓡꓲꓽ ꓕꓲ ꓣꓳ ꓠꓬ ꓬꓲ ꓒꓴꓽ ꓙꓳˍꓟ ꓔꓯ ꓢꓷ. ꓠꓽ ꓗ. ꓡꓳ꓾ ꓕꓱ ꓡꓱ ꓘꓴꓽ ꓣꓴ ꓗꓴ. ꓕꓯ ꓠꓬ ꓮ ꓘꓶ. ꓗ, ꓛꓲˍꓟ ꓦꓲ., ꓒꓬꓱꓼ ꓡ ꓥꓳ꓿ ꓕꓲ ꓦꓲ., ꓘꓴ ꓗꓪ ꓕꓲ ꓣꓳ ꓣꓳ ꓡꓰ ꓬꓰ ꓥꓳ ꓩꓴ ꓡ ꓕꓯ ꓝꓴꓲ ꓓꓰ ꓓꓴ ꓟꓽ ꓥ꓾ ꓕꓲ ꓠꓲ, ꓕꓲ ꓪꓽ ꓪ ꓡꓯꓼ ꓘꓳ, ꓠꓲ, ꓟ ꓗꓪ ꓐꓰ ꓬꓰ ꓥꓳ ꓡꓰ ꓟ ꓠꓬ ꓟ. ꓡꓯꓼ ꓘꓳ, ꓠˍꓟ ꓬꓰ ꓙ ꓡꓯꓼ ꓘꓳ, ꓗꓴ. ꓠꓽ ꓟ. ꓖꓶ ꓟ ꓦꓲ., ꓥ ꓡꓳ꓿ ꓪꓴ‐ꓢ ꓬꓲ ꓠꓵ., ꓠꓲ, ꓠꓬ ꓦꓲ., ꓘꓴꓽ ꓗꓪ ꓐꓰ ꓪꓴ. ꓓꓵ ꓟ ꓥ ꓡꓳ꓿ ꓦꓲ., ꓘꓴ ꓐꓯˍꓟ ꓠꓬ ꓪꓴ‐ꓢ ꓐꓰ ꓙ ꓡꓯꓼ ꓘꓳ, ꓠˍꓟ ꓓꓽ ꓪꓴ ꓦꓲ., ꓥ ꓡꓳ꓿ ꓦꓲ., ꓘꓴ ꓕꓱ ꓟ ꓔꓯ ꓪꓽ ꓘꓴ ꓢꓯꓼ ꓐꓰ ꓫꓬ ꓔꓬ ꓐꓲ ꓔꓬˍꓥꓳ ꓐꓯ ꓠꓬ ꓕꓱ ꓕꓲ ꓦꓲ., ꓠꓬ ꓢꓲ ꓡꓲꓽ ꓗ, ꓛꓲ ꓟ ꓮ ꓕꓯ ꓥˍꓟꓲ ꓑꓮꓲ ꓟꓶ ꓡ ꓡꓳ꓿ ꓖꓳ ꓟ ꓑꓶ. ꓓꓴ ꓠꓲ., ꓠꓵ ꓟ ꓬꓲ ꓤ ꓠꓬꓲ ꓤ ꓐꓴ ꓢꓲ ꓡꓲ, ꓗ. ꓛꓲˍꓟ ꓦꓲ., ꓒꓬꓱꓼ ꓡ ꓠꓽ ꓕꓲ ꓣꓳ ꓡꓲ ꓕꓲ ꓣꓳ ꓪꓽ ꓡꓯꓼ ꓘꓳ, ꓠꓲ, ꓟ ꓗꓪ ꓐꓰ ꓪꓽ ꓘꓴ ꓢꓲ꓾ ꓢꓯꓼ ꓔꓬ ꓓꓴ ꓬꓰ ꓡꓯ ꓐꓰ ꓮ ꓙꓵꓽ ꓢꓴ ꓔꓯ ꓢꓯꓼ ꓖꓶ ꓩꓴ ꓡ ꓥꓳ꓿ ꓢꓲ ꓡꓲ ꓗ, ꓛꓲˍꓟ ꓦꓲ., ꓘꓴ ꓔꓯ ꓑꓮꓲ ꓟꓶ ꓪ ꓡꓰ ꓝꓲ ꓐꓰ ꓮ ꓙꓵꓽ ꓢꓴ ꓔꓯ ꓥꓪ ꓗꓪ ꓐꓰ ꓪꓽ ꓘꓴ ꓙ ꓖꓶ ꓩꓴ ꓡ ꓥꓳ=
