ꓚꓲ ꓛꓬ ꓛꓬ ꓥꓳꓽ ꓡꓰ ꓟ ꓔꓯ ꓣꓷꓠ. ꓠ, ꓟ ꓕꓽ ꓙꓳꓺ꓾

ꓕꓱ ꓕꓲ ꓫꓵ ꓠꓽ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓒ‐ꓡꓲ‐ꓢꓷ ꓐꓰ ꓝꓲ. ꓫ ꓢꓴ ꓔꓯ ꓥꓳꓽ ꓗꓪ ꓐꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓪꓴ‐ꓢ ꓐꓰ ꓙꓻ ꓡꓯ ꓘꓳ ꓟ ꓗꓪ ꓙꓽ ꓣꓳꓺ ꓠꓲ, ꓟ꓾ ꓔꓱ, ꓟ ꓠꓲ, ꓟ ꓙꓳ ꓠ, ꓟ ꓢꓯꓼ ꓖꓶ ꓔ ꓡꓳ꓿

ꓔꓲꓺ ꓒ ꓪ ꓔꓲ ꓡꓰ ꓘꓶ ꓘ, ꓔ ꓟ ꓐꓰ ꓦ ꓡꓱ ꓚꓱ, ꓗꓪ ꓔꓱ, ꓡꓳ ꓐꓰ ꓫꓱ. ꓖꓶ ꓢꓴ ꓒ‐ꓡꓲ‐ꓢꓷ ꓬꓲ ꓪꓽ ꓘꓴ ꓘꓶꓽ ꓠꓬ ꓙꓵꓽ ꓗ ꓔꓯ ꓛꓳ ꓫꓱ ꓔꓬ ꓥ ꓟꓲ ꓫꓱ. ꓤ ꓠꓲ, ꓟꓽ ꓙꓳ꓾ ꓖꓶ_ ꓟ꓾ ꓠꓵꓻ ꓠꓲ, ꓥ ꓟꓲ ꓟꓽ ꓙꓳ ꓟ ꓥ ꓡꓳ꓿ ꓕꓱ ꓟ ꓗꓪ ꓐꓰ ꓝꓲ. ꓫ ꓢꓴ ꓠꓬ ꓣꓱ ꓛꓰ ꓐꓰ ꓠꓲ, ꓟ ꓔꓯ ꓒꓴ ꓔ ꓢꓲ ꓐꓯ ꓟ ꓠꓬ꓾ ꓪꓴ‐ꓢꓺꓳ꓾ ꓝꓴꓲ ꓙꓳ ꓢꓴ ꓥꓪ ꓔꓯ ꓫꓱ. ꓤ ꓡꓯ꓾ ꓐꓰ ꓥ ꓡꓳ꓿

ꓡꓳ, ꓬꓰ ꓟ ꓙꓵ, ꓐꓰ ꓟꓬꓱ ꓓꓳꓽ ꓗꓪ ꓐꓰ ꓪꓴ‐ꓢ ꓟꓲ ꓕꓯ ꓗꓪ ꓑꓶ ꓑꓶ ꓡꓰ ꓔꓬ ꓟ ꓝꓲ. ꓫ ꓢꓴ ꓢꓯꓼ ꓪ ꓔꓯ ꓐꓯ ꓔ ꓡꓳ꓾ ꓬꓲ ꓠꓬ ꓚꓲ ꓛꓬ ꓠꓯꓼ ꓘꓴꓽ ꓗꓪ ꓚꓲ ꓛꓬ ꓔꓱ, ꓚꓲ ꓛꓬ ꓐꓲ. ꓞ, ꓢꓲ ꓟꓽ ꓔꓬ꓾ ꓬꓲ ꓬꓰ ꓔ ꓟ ꓟꓽ ꓙꓲ_ ꓟ ꓐꓱ ꓶ ꓬꓲ ꓢꓯꓼ ꓕꓵꓽ_ ꓡꓳ꓾ ꓐꓰ ꓐꓯ ꓔ ꓡꓳ꓿

ꓬꓲ ꓠꓬ ꓠꓱ. ꓐꓯꓼ ꓢꓴ ꓡꓰ ꓬꓲ ꓔꓯ ꓙꓳꓺ ꓠ ꓔ ꓟ꓾ ꓬꓲ ꓙꓵꓽ ꓪ ꓗꓪ ꓐꓰ ꓗꓽ ꓔ ꓖꓶ_ ꓟ ꓬꓲ ꓔꓶ. ꓔꓯ ꓒꓰ, ꓗꓷ ꓢꓴ ꓥ ꓡꓳ꓾ ꓬꓲ ꓔꓯ ꓐꓯ ꓔꓳ, ꓡ ꓟ ꓔꓯ ꓬꓲ ꓟꓽ ꓚ ꓚꓺ꓾ ꓡꓳ. ꓙ ꓠꓬꓲ ꓙ ꓢꓴ ꓟꓽ ꓐ ꓢꓲ ꓫꓬ ꓦꓲꓻ ꓗꓪ ꓓꓵ ꓡ ꓟ ꓥꓳ꓾ ꓪꓴ. ꓓꓵ ꓥꓷꓼ ꓢꓲ ꓪꓴ‐ꓢ ꓟꓲ ꓙꓬ ꓗꓪ ꓦꓬꓼ ꓞ, ꓢꓴ ꓥ ꓡꓳ꓿

ꓝꓮꓲ ꓔꓲꓺ ꓒ ꓪ ꓔꓲ ꓡꓰ ꓚꓲ ꓛꓬ ꓟꓬꓱ ꓓꓳꓽ ꓔꓯ ꓫꓱ. ꓖꓶ ꓟ ꓗꓪ ꓐꓰ ꓚꓬꓴ ꓙ ꓟꓽ ꓟꓶ ꓟ ꓡꓰ ꓐꓰ ꓚꓲ ꓛꓬ ꓝꓴꓲ ꓔꓯ ꓐꓲ. ꓞ, ꓢꓴ ꓥ ꓟꓲ ꓚꓬꓴ ꓙ ꓟꓽ ꓟꓶ꓾ ꓪꓴ‐ꓢ ꓟꓲ ꓙꓬ ꓚꓲ ꓛꓬ ꓟꓲ ꓙꓬ ꓐꓰ ꓠꓱ. ꓐꓯꓼ ꓢꓴ ꓟꓲ ꓕꓯ ꓗꓪ ꓚꓲ ꓛꓬ ꓠꓯꓼ ꓗꓪ ꓙꓳ ꓟ ꓔꓬ ꓟ ꓔꓯ ꓡꓰ ꓒꓴ ꓒꓴ ꓡꓯ ꓡꓯ ꓟ. ꓖꓶ ꓟ ꓗꓪ ꓐꓰ ꓡꓰ ꓚꓬꓴ ꓙ ꓟꓶ ꓡ ꓥꓳ꓾ ꓐꓰ ꓐꓯ ꓔ ꓡꓳ꓿

ꓢꓲ ꓫꓬ ꓢꓴ ꓮꓴꓖꓴꓢꓔꓲꓠꓰ ꓬꓲ ꓐꓯ ꓘꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓒ‐ꓡꓲ‐ꓢꓷ ꓔꓯ ꓦꓶ_ ꓟ ꓑꓶ ꓓꓴ ꓬꓲ ꓠꓻ ꓓꓴ ꓔꓯ ꓐꓲ. ꓞ, ꓔꓬ ꓟ ꓠꓻ ꓢꓴ ꓐꓰ ꓔꓯ ꓢꓲ ꓠꓬꓲ ꓝꓲ. ꓫ ꓢꓴ ꓔꓯ ꓠꓬ ꓠꓻ ꓫꓬ, ꓠ, ꓟ ꓐꓱ ꓶ ꓬꓲ ꓠꓻ ꓓꓴ ꓔꓯ ꓙꓽ ꓣꓳꓺ ꓠꓲ, ꓟ ꓐꓰ ꓟ. ꓖꓶ ꓢꓴ ꓐꓰ ꓔꓯ ꓢꓲ ꓠꓬꓲ ꓬꓲ ꓠꓻ ꓓꓴ ꓔꓯ ꓟ. ꓖꓶ ꓠ, ꓟ ꓟꓽ ꓫ. ꓔꓳ ꓟ ꓕꓱ ꓝꓲ. ꓫ ꓢꓴ ꓠꓬ ꓠꓻ ꓫꓬ, ꓓꓳ ꓡꓰ ꓢꓲ ꓔꓬ ꓦꓲꓻ ꓗꓪ ꓡ ꓙꓰ ꓟ ꓔꓯ ꓣꓳ ꓓꓵ ꓙ ꓟꓶ ꓓꓴ ꓟꓽ ꓙꓳ꓿

ꓙꓲ ꓢꓴ ꓢꓲ ꓤ ꓐꓴ ꓔꓯ ꓝꓲ. ꓫ ꓢꓴ ꓔꓯ ꓥꓳ ꓡꓰ ꓐꓰ ꓚꓲ ꓛꓬ ꓢꓯꓼ ꓐ ꓟ ꓔꓯ ꓣꓷꓠ. ꓠ, ꓟ ꓕꓽ ꓙꓳꓺ ꓐꓰ ꓢꓯꓼ ꓖꓶ ꓔ ꓡꓳ꓿ ꓚꓲ ꓛꓬ ꓥꓳꓽ ꓡꓰ ꓟ ꓔꓯ ꓣꓷꓠ. ꓠ, ꓟ꓾ ꓕꓱ ꓛꓬ ꓥꓳꓽ ꓡꓰ ꓟ ꓔꓯ ꓙꓵꓽ ꓪ ꓣꓴ ꓢꓲ ꓪꓴ‐ꓢ ꓠꓯꓼ ꓗꓪ ꓡꓯꓼ ꓙꓱ ꓢꓲ ꓠꓬꓲ ꓕꓱ ꓟ ꓔꓯ ꓣꓷꓠ. ꓠ, ꓟ ꓕꓽ ꓙꓳꓺ ꓐꓰ ꓥ ꓡꓳ꓿ ꓔꓲꓺ ꓒ ꓪ ꓔꓲ ꓡꓰꓳ ꓡꓰ ꓕꓱ ꓙꓽ ꓣꓳꓺ_ ꓟ ꓚꓱ, ꓠꓬ ꓠꓲ, ꓟ ꓘꓴꓽ ꓗꓪ ꓫꓬ, ꓠ, ꓟ ꓐꓰ ꓪꓴ‐ꓢ ꓗꓴꓷꓼ ꓛꓱꓺ ꓓꓳ ꓠ, ꓟ ꓠꓬꓲꓽ ꓟ ꓡꓱꓼ ꓔꓯ ꓒꓬꓱꓼ ꓡꓰ ꓝꓲ_ ꓡꓳ꓾ ꓐꓰ ꓐꓯ ꓢꓲ ꓠꓬꓲ ꓪꓴ‐ꓢ ꓟꓴ ꓗꓪ ꓗꓴꓷꓼ ꓠꓬ ꓦꓶ_ ꓟ ꓠꓲ, ꓟ ꓙꓳ ꓢꓴ ꓐꓱ ꓶ ꓟꓽ ꓥ꓾ ꓙꓽ ꓣꓳꓺ ꓠꓲ, ꓙꓳ ꓢꓴ ꓐꓱ ꓶ ꓥ ꓡꓳ꓾ ꓐꓰ ꓢꓯꓼ ꓖꓶ ꓔ ꓡꓳ꓿