ꓢꓲ ꓒ ꓬꓰ‐ꓢꓴ ꓠꓬ ꓮ ꓙꓵ ꓟ ꓕꓯ ꓢꓲ ꓗꓪ ꓐꓰ ꓣꓳ ꓔꓯ ꓔꓳ, ꓙ ꓖꓶ_ ꓡꓳ꓾

10 ꓦ ꓟ 15 ꓠꓬꓲ ꓕꓲ ꓠꓽ ꓡꓲ ꓕꓲ ꓠ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓜꓲ ꓡꓯ ꓘꓳ ꓟ ꓙꓵ, ꓗꓪ ꓬꓲ ꓚꓱ, ꓮ ꓟꓬ, ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓮ ꓡꓰ ꓐꓰ ꓬꓰ ꓙ ꓔꓳ, ꓙ ꓟ ꓔꓯ ꓓꓵꓽ ꓙ ꓢꓲ ꓠꓬꓲ ꓣꓳ ꓤꓶꓻ ꓗꓪ ꓪꓴꓽ ꓡ ꓟꓴ ꓡ ꓟ꓾ ꓞꓳ. ꓡꓰ ꓔꓬ ꓟ ꓔꓳ, ꓜꓳ ꓟ ꓙꓵ, ꓗꓪ ꓣꓳ ꓔꓯ ꓬꓰ ꓙ ꓢꓲ ꓧꓳꓽ ꓪꓴ. ꓟꓴ ꓔꓬ ꓡꓳ ꓐꓰ ꓐꓯ ꓔ ꓡꓳ꓿

ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ “ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓥꓳ ꓡꓳ. ꓓꓴ” ꓐꓯ_ ꓟ ꓬꓲ ꓕꓲ ꓟꓴ ꓐꓰ ꓬꓰ‐ꓢꓴ ꓐꓰ ꓕꓲ ꓪ ꓛꓳ ꓫꓱꓽ_ ꓟ ꓠꓬ꓾ ꓣꓳ ꓤꓶꓻ ꓗꓪ ꓔꓳ, ꓜꓳ ꓡ ꓟ ꓫ. ꓓꓴ ꓗꓪ ꓐꓰ ꓢꓯꓼ ꓪ ꓫꓵꓼ ꓪ ꓟꓶ ꓡ ꓟ ꓔꓯ ꓐꓯ ꓔ ꓡꓳ꓾ ꓟꓲ ꓠꓯ ꓡ ꓞꓳ ꓤꓶꓻ ꓗꓪ ꓠꓲ, ꓟ ꓘꓴꓽ ꓗꓪ ꓪꓴ ꓡ ꓟꓴ ꓡ ꓟ ꓚꓱ, ꓔꓯ ꓠꓲ, ꓥꓳ_ ꓡꓳ꓾ ꓣꓳ ꓗ, ꓛꓲ_ ꓟ ꓔꓯ ꓠꓲ, ꓫꓵ_ ꓟ ꓠꓬ ꓠꓲ, ꓟ ꓫ. ꓓꓴ꓾ ꓘꓳ, ꓣꓴ ꓟꓽ ꓠꓲ, ꓫꓵ ꓟ꓾ ꓟꓽ ꓐꓲꓼ ꓜꓲꓼ_ ꓟ ꓚꓱ, ꓔꓯ ꓔꓳ, ꓜꓳ ꓡ ꓥ ꓟꓲ ꓘꓳ, ꓣꓴ ꓠ ꓔ ꓡꓳ꓾ ꓮ ꓘꓶ. ꓛꓲ ꓠꓲ, ꓟ ꓫ. ꓓꓴ ꓔꓳ, ꓜꓳ ꓕꓯ ꓥ ꓟꓲ ꓕꓱ ꓟ ꓔꓯ ꓣꓳ ꓫꓬ ꓡꓰ ꓠ ꓢꓯꓼ ꓕꓵꓼ ꓟ ꓐꓰ ꓟꓬ ꓠꓬꓲ ꓪꓴ_ ꓟ ꓗꓳ. ꓙꓰ ꓐ ꓡ ꓠ, ꓟ ꓕꓲ ꓫꓵ ꓫꓵ ꓔꓯ ꓠꓲ, ꓫꓵ_ ꓟ ꓚꓱ, ꓠꓬꓲꓽ ꓟ ꓔꓯ ꓐꓯ ꓔ ꓡꓳ꓿

ꓕꓱ ꓠꓲ, ꓫꓵ_ ꓟ ꓠꓬ ꓟꓽ ꓙꓲ_ ꓟ ꓟꓽ ꓥ ꓥ꓾ ꓢꓯꓼ ꓪ ꓣꓴ ꓠ, ꓟ ꓥ ꓡꓳ꓾ ꓣꓳ ꓔꓯ ꓢꓯꓼ ꓐꓽ ꓡꓰ ꓠ, ꓟ ꓟꓽ ꓥ꓾ ꓐꓲ ꓜꓲꓼ ꓠ, ꓟ ꓐꓱ ꓶ ꓙ ꓖꓶ ꓔ ꓟ ꓥꓳ꓾ ꓐꓰ ꓐꓯ ꓔ ꓡꓳ꓿ ꓔꓱ, ꓟ ꓥꓳ ꓡꓳ. ꓓꓴ ꓠꓬ ꓧꓪ. ꓡꓰ ꓟ꓾ ꓐꓳ ꓡꓰ ꓟ ꓗꓪ ꓐꓰ ꓟꓽ ꓥ꓾ ꓙꓵꓻ_ ꓟ ꓙꓵꓻ ꓠꓲ, ꓗꓪ ꓐꓰ ꓪ ꓟꓶ ꓡ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ꓿

ꓙꓲ ꓢꓴ ꓢꓲ ꓤ ꓐꓴ ꓥꓳ ꓡꓳ. ꓓꓴ ꓠꓬ ꓠꓱ. ꓐꓯꓼ ꓥꓳ ꓡꓳ. ꓓꓴ ꓐꓰ ꓟꓽ ꓫꓱ. ꓡꓳ, ꓬꓰ ꓟ ꓙꓵ, ꓗꓪ ꓐꓰ ꓔꓳ, ꓜꓳ ꓡꓰ ꓟ ꓕꓲ ꓟ ꓡꓰ ꓟꓽ ꓥ꓾ ꓮ ꓟꓶ ꓙꓵ, ꓗꓪ ꓔꓳ, ꓜꓳ ꓔꓬ ꓟ ꓢꓲ ꓡꓲ, ꓟ ꓐꓰ ꓢꓯꓼ ꓪ ꓥ ꓡꓳ꓾ ꓢꓯ. ꓬꓲꓼ ꓡ ꓟ ꓢꓲ ꓒ ꓬꓰ‐ꓢꓴ ꓠꓬ ꓢꓯ. ꓔꓬ ꓟ ꓬꓲꓻ ꓙꓬ ꓡꓳ ꓥ ꓡꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓢꓯ. ꓬꓲꓼ ꓡ ꓢꓲ ꓣꓳ ꓐꓰ ꓕꓲ ꓪ ꓛꓳ ꓫꓱꓽ_ ꓡꓳ꓾ ꓚꓺ ꓟꓲꓽ ꓔꓯ ꓢꓷ. ꓠ, ꓟ ꓐꓱ ꓶ ꓣꓳ ꓙ ꓜꓲꓼ ꓟ ꓔꓯ ꓫꓬ, ꓔꓱ, ꓙ ꓖꓶ ꓔꓬ ꓡꓳ꓾ ꓣꓳ ꓠꓬ ꓕꓲ ꓣꓳ ꓕꓵꓼ ꓡꓰ ꓟꓽ ꓥ ꓟ ꓔꓯ ꓙꓵꓻ ꓝꓲ_ ꓡꓳ꓿

ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓛꓳ ꓒꓯ, ꓥ ꓡꓳ꓿ ꓝꓴꓲ ꓙꓳ ꓢꓴ ꓥ ꓟ ꓡꓰ ꓐꓰ ꓫ. ꓓꓴ ꓐꓰ ꓐꓲ ꓞ, ꓔꓬ ꓥ ꓟꓲ ꓢꓯ. ꓬꓲꓼ ꓡ ꓟ ꓢꓲ ꓒ ꓬꓰ‐ꓢꓴ ꓠꓯꓼ ꓗꓪ ꓛꓳ ꓫꓱꓽ ꓠ, ꓟ ꓘꓴ ꓟꓶ ꓢꓴ ꓡꓰ ꓥ ꓡꓳ꓿ ꓔꓱ, ꓟ ꓢꓲ ꓡꓲ, ꓗ, ꓛꓲ_ ꓟ ꓐꓰ ꓐꓲ ꓜꓲꓼ ꓟ ꓢꓯꓼ ꓟꓬ ꓠꓯꓼ ꓗꓪ ꓧꓳꓽ ꓪꓴ. ꓔꓬ ꓟ ꓬꓰ‐ꓢꓴ ꓙꓲ ꓢꓴ ꓠꓯꓼ ꓗꓪ ꓛꓳ ꓫꓱꓽ ꓠ, ꓟ ꓐꓱ ꓶ ꓘꓴ ꓔ ꓟ ꓥ ꓡꓳ꓿

ꓢꓲ ꓒ ꓬꓰ‐ꓢꓴ ꓖꓶ ꓡ ꓟ ꓠꓬ ꓢꓲ ꓡꓲ, ꓟ ꓡꓰ ꓟꓽ ꓞꓲ ꓣꓳ ꓔꓯ “ꓝꓮꓲ ꓦꓰꓼ ꓞ, ꓠ, ꓟ” ꓐꓰ ꓚꓲ ꓛꓬ ꓛꓲ ꓒꓯ, ꓓꓰ ꓢ ꓔꓴ ꓐ ꓡꓰ ꓠ, ꓟ” ꓢꓯꓼ ꓪ ꓖꓶ ꓔ ꓡꓳ꓿ ꓮ ꓫꓵ ꓑꓶ ꓓꓴ ꓐꓯ ꓠꓬ꓾ ꓢꓯ. ꓬꓲꓼ ꓡ ꓟ ꓢꓲ ꓒ ꓬꓰ‐ꓢꓴ ꓠꓬ “ꓣꓳ ꓛꓲ ꓠ, ꓟ ꓬꓲ ꓚꓱ, ꓖꓶ ꓟ” ꓐꓰ “ꓣꓳ ꓔꓯ ꓔꓬ ꓦꓲꓻ ꓗꓪ ꓧꓳꓽ ꓖꓶ_ ꓡꓳ꓾ ꓣꓳ ꓔꓯ ꓡꓳ. ꓔꓬ ꓡꓳ꓾ ꓠꓲ, ꓠꓵꓻ_ ꓡꓳ꓾ ꓚꓬꓴ ꓙ ꓟꓶ ꓟ ꓔꓶ. ꓗꓪ ꓧꓳꓽ ꓪꓴ. ꓖꓶ_ ꓡꓳ꓾”