ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓥ ꓟ ꓬꓴ‐ꓔ ꓚꓺ ꓟꓲꓽ ( St. Jude Thaddeus)
ꓙꓲꓻ ꓫꓬ ꓢꓴ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓬꓴ‐ꓔ ꓠꓬ ꓢꓲꓺ ꓒ ꓬꓰ‐ꓢꓴ ꓫꓵꓽ ꓤ ꓪꓳꓽ ꓤ ꓥ ꓢꓲ ꓠꓬꓲ ꓝꓲ ꓓꓴ ꓬ‐ꓗꓴ ꓬꓲ ꓠꓬꓲ ꓤ ꓚꓵˍ ꓥ ꓡꓳ꓿ ꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓮ ꓬꓲ ꓠꓬꓲ ꓤ ꓜꓳ ꓢꓴ ꓟꓲ ꓥ ꓡꓳ꓿ ꓙꓲꓻ ꓫꓬ ꓢꓴ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓬꓴ‐ꓔ ꓠꓬ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓢꓲ‐ꓟꓳ ꓬꓲ ꓠꓬꓲꓽ ꓤ ꓟꓲ ꓟꓲ ꓜꓳ ꓢꓴ ꓥ ꓡꓳ꓿ ꓝꓲ ꓓꓴ ꓢꓲ‐ꓟꓳ ꓠꓬ ꓮꓓ (62) ꓘꓳꓼ ꓗꓪ ꓙꓱ‐ꓣꓴ‐ꓢ‐ꓡꓱ ꓗꓪ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓠ, ꓟ ꓬꓰ ꓟ ꓙꓵ, ꓕꓯ ꓙꓲꓻ ꓫꓬ ꓢꓴ ꓝꓲ ꓓꓴ ꓬꓴ‐ꓔ ꓠꓬ ꓮ ꓘꓶ. ꓛꓲ ꓬꓲ ꓔꓯ ꓬꓰ ꓙ ꓗꓷꓳ꓿
ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓥ ꓟ ꓬꓴ‐ꓔ ꓠꓬ ꓙꓴꓓꓰꓬꓮ ꓟꓵꓽ ꓢ‐ꓟ‐ꓡꓲ ꓟꓵꓽ꓾ ꓢꓲꓣꓲꓬꓮ ꓟꓵꓽ꓾ ꓟꓰꓢꓳꓑꓳꓔꓰꓟꓲꓬꓮ ꓟꓵꓽ ꓡꓲꓐꓬꓮ ꓟꓵꓽ ꓗꓪ ꓛꓲ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓚꓺ ꓟ. ꓖꓶ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓬꓴ‐ꓔ ꓙꓵꓻ ꓠꓲ, ꓔꓯ ꓘꓳ, ꓣꓴ ꓢꓴ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓛꓳꓽ ꓢꓴ ꓒꓬꓱꓽ ꓡ ꓗ. ꓠꓯ, ꓙꓲ‐ꓢꓴ ꓢꓲꓺ ꓤ ꓒꓬꓱꓼ ꓡ ꓢꓴ ꓥ ꓡꓳ꓿
ꓝꓮꓲ ꓬꓲ ꓠꓬ ꓬꓴ‐ꓔ ꓙꓵꓻ ꓠꓲ, ꓗꓪ ꓐꓰ ꓙꓲ‐ꓢꓴ ꓢꓲꓺ ꓤ ꓒꓬꓱꓼ ꓡ ꓢꓴ ꓐꓴ ꓔꓯ ꓕꓳ ꓶ ꓕꓲ ꓑꓬ ꓐꓳ ꓢꓲ ꓠꓬꓲ ꓢꓯꓼ ꓖꓶ ꓪ ꓖꓶ ꓗꓷꓳ꓿
ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓥ ꓟ ꓬꓴ‐ꓔ ꓠꓬ ꓝꓲ ꓓꓴ (12) ꓣꓳ ꓗꓪ ꓐꓰ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓮ ꓟꓬ, ꓔꓯ ꓚꓺ ꓟ. ꓖꓶ ꓗꓷ ꓢꓴ ꓥ ꓡꓳ꓿ ꓝꓮꓲ ꓬꓲ ꓠꓬ ꓑꓰꓣꓢꓲꓮ ꓟꓵꓽ ꓮꓣꓟꓰꓠꓲꓮ ꓟꓵꓽ ꓗꓪ ꓛꓲ ꓪꓴ‐ꓢ ꓟꓬꓱꓽ ꓬꓰ ꓢꓴ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓥ ꓟ ꓬꓴ‐ꓔ ꓟ. ꓟꓲꓽ ꓚꓺ ꓟ ꓙꓵ, ꓕꓯ ꓟꓽ ꓔꓱ ꓟꓽ ꓜꓳ ꓟ ꓟ. ꓟꓲꓽ ꓚꓺ ꓢꓴ ꓔꓯ ꓗꓽ ꓕꓽ ꓖꓶ ꓢꓲ ꓠꓬꓲ ꓔꓱ ꓚꓵˍ ꓟ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓚꓺ ꓟ. ꓖꓶ ꓗꓷꓳ꓿ ꓬꓲ ꓡꓰ ꓮ ꓠꓱ ꓟ ꓘꓴ ꓜꓲꓼ ꓞꓳ ꓐꓴ ꓔꓯ ꓙꓵꓻ ꓠꓲ, ꓚꓱ, ꓐꓱ ꓶ ꓔꓳ, ꓡꓯ ꓘꓳˍ ꓟ ꓗꓪ ꓠꓲ, ꓡꓱ ꓡꓱ ꓡꓰꓽ ꓢꓯꓼ ꓕꓵꓼ ꓠ, ꓟ ꓐꓯ ꓖꓶ ꓗꓷꓳ꓿ ꓝꓮꓲ ꓕꓱ ꓟ ꓠꓬ ꓟꓽ ꓔꓱ ꓟ ꓟ. ꓒ ꓐꓴ ꓐꓰ ꓬꓲ ꓪ ꓟ. ꓟꓲꓽ ꓔꓯ ꓔꓳ, ꓟ ꓔꓯ ꓐꓯ ꓟ ꓥ ꓡꓳ꓿
ꓬꓲ ꓠꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓐꓴ ꓠꓯ, ꓗꓪ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓗꓷ ꓟ ꓪꓴ. ꓠꓬꓲ ꓟꓽ ꓙꓲ ꓢꓴ ꓐꓴ ꓡꓰ ꓢꓰꓼ ꓗꓷ ꓟ ꓥ ꓡꓳ꓿ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓐꓴ ꓗꓴꓷꓼ ꓥ ꓟ ꓮꓟꓲꓠꓲꓮ ꓗꓴꓷꓼ ꓠꓬ ꓮꓓ (300) ꓘꓳꓼ ꓛꓲ ꓡ ꓕꓯ ꓕꓲ ꓗꓴꓷꓼ ꓡꓱ ꓪꓴ‐ꓢ ꓦꓻ ꓡꓱ ꓡ ꓢꓴ ꓐꓴ ꓒꓬꓱꓼ ꓡ ꓪ꓿ ꓕꓱ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓥ ꓟ ꓬꓴ‐ꓔ ꓡꓰ ꓢꓲ, ꓓꓳ ꓢꓲ ꓠꓬꓲ ꓫꓵꓻ ꓗꓪ ꓛꓲ ꓪꓴ‐ꓢ ꓟꓬꓱꓽ ꓬꓰ ꓗꓷ ꓟ ꓪꓴ. ꓠꓬꓲ ꓬꓲ ꓢꓶ ꓥ ꓡꓳ꓿
ꓙꓲꓻ ꓫꓬ ꓢꓴ ꓬꓴ‐ꓔ ꓠꓬ ꓥꓳꓽ ꓡꓳ. ꓖꓴ ꓟꓽ ꓙꓳ ꓡꓰ ꓢꓴ ꓐꓴ ꓠꓲ, ꓟ ꓮ ꓘꓶ. ꓫ. ꓢꓴ ꓐꓴ ꓔꓯ ꓥꓳꓽ ꓡꓳ ꓓꓴ ꓝꓮꓲ ꓪ ꓠ, ꓟ ꓬꓰ ꓙ ꓢꓴ ꓙꓲꓻ ꓫꓬ ꓢꓴ ꓥ ꓡꓳ꓿ ꓬꓲ ꓠꓬ ꓣꓳ ꓐꓱ ꓶ ꓥꓳꓽ ꓡꓳꓽ ꓓꓴ ꓝꓮꓲ ꓪ ꓠ, ꓟ ꓪꓽ ꓘꓴ ꓙ ꓖꓶ ꓓꓽ ꓢꓴ ꓙꓲꓻ ꓫꓬ ꓢꓴ ꓥ ꓡꓳ꓿ ꓬꓲ ꓠꓬ ꓮ ꓓ (65) ꓗꓴꓷꓼ ꓕꓯ ꓢꓲꓺ ꓒ ꓠꓯ, ꓗꓪ ꓬꓲ ꓟꓶ ꓡꓰ ꓢꓴ ꓥ ꓡꓳ꓿
ꓣꓳ ꓥ ꓟꓲ ꓙꓲꓻ ꓫꓬ ꓢꓴ ꓬꓴ‐ꓔ ꓔꓯ ꓢꓳ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓗꓪ ꓐ ꓡ ꓟ ꓕꓲ ꓒꓳ, ꓗꓪ ꓐꓰ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓐꓴ ꓔꓯ ꓶꓻ ꓓꓳꓽ ꓫꓱ, ꓓꓳ ꓚꓺ ꓟ. ꓖꓶ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓣꓳ ꓙꓵꓻ ꓠꓲ, ꓔꓯ ꓝꓲ ꓓꓴ ꓬꓴ‐ꓔ ꓡꓰ ꓡꓰ ꓐꓰ ꓙꓳ ꓠ, ꓟ ꓢꓯꓼ ꓕꓵꓼ ꓡꓯ꓿ ꓫ. ꓟꓳ ꓪ꓿
