ꓬ˗ꓖꓳꓥ ꓡꓳ ꓒꓱ ꓘꓴꓽ ꓗꓪ ꓪꓴ˗ꓢ ꓟꓬꓱꓽ ꓟꓯ ꓔꓬ ꓢꓴ ꓐꓴ ꓔꓯ ꓟꓰꓓꓲꓮ ꓗꓪ ꓐꓰ ꓪꓴ˗ꓢ ꓟꓬꓱꓽ ꓬꓰ ꓠꓹ ꓟ ꓢꓳꓻ ꓜꓲꓼ ꓓꓴ ꓟꓸ ꓖꓶ ꓟ ꓓꓳꓽ
10 ꓦ ꓟ 21 ꓠꓬꓲ ꓗꓪ ꓐꓰ 24 ꓠꓬꓲ 2025 ꓘꓳꓼ ꓗꓪ ꓛꓲ ꓬ˗ꓖꓳꓥ ꓚꓐꓚꓟ ꓔꓲꓺ ꓒ ꓓꓽ ꓐꓴ ꓜꓴꓻ ꓡꓰ ꓧꓳꓽ ꓪꓴꓸ ꓟꓴ ꓢꓲ ꓠꓬꓲ ꓬ˗ꓖꓳꓥ ꓡꓳ ꓒꓱ ꓘꓴꓽ ꓗꓪ ꓪꓴ˗ꓢ ꓟꓬꓱꓽ ꓟꓯ ꓔꓬ ꓢꓴ ꓐꓴ ꓔꓯ ꓟꓰꓓꓲꓮ ꓗꓪ ꓐꓰ ꓪꓴ˗ꓢ ꓟꓬꓱꓽ ꓬꓰ ꓠꓹ ꓟ ꓢꓳꓻ ꓜꓲꓼ ꓓꓴ ꓔꓯ ꓧꓪꓸ ꓧꓪ ꓐꓰ ꓬꓰ ꓓꓳ ꓡꓰ ꓐꓰ ꓢꓷꓸ ꓪ ꓡꓳ꓿
ꓪꓴꓽ ꓟꓴ ꓡ ꓟ ꓤꓶꓻ ꓦꓬꓼ ꓠꓬꓲ ꓔꓯ ꓟꓳꓸ ꓘꓴ ꓜꓲꓼ ꓞꓳ ꓗꓪ ꓪꓴ˗ꓢ ꓟꓬꓱꓽ ꓟꓯ ꓔꓬ ꓢꓴ ꓐꓴ ꓔꓯ ꓟꓰꓓꓲꓮ ꓗꓪ ꓐꓰ ꓪꓴ˗ꓢ ꓟꓬꓱꓽ ꓮ ꓡꓰ ꓬꓰ ꓠꓹ ꓟ ꓚꓱꓹ ꓔꓯ ꓢꓳꓻ ꓜꓲꓼ ꓓꓴ ꓬꓰ ꓖꓶ ꓗꓷ ꓟ ꓥ ꓡꓳ꓿ ꓕꓱ ꓢꓳꓻ ꓜꓲꓼ ꓓꓴ ꓬꓰ ꓖꓶ ꓗꓷ ꓟ ꓬꓲ ꓔꓶꓻ ꓙꓱꓼ ꓠꓬ ꓪꓴ˗ꓢ ꓟꓬꓱꓽ ꓟꓯ ꓢꓴ ꓐꓴ ꓔꓯ ꓓꓲꓖꓲꓔꓮꓡ ꓦꓬꓼ ꓠꓬꓲ ꓗꓪ ꓢꓷꓸ ꓠꓲꓹ ꓬꓲ ꓫꓵꓼ ꓔꓯ ꓢꓷꓸ ꓢꓲ ꓠꓬꓲ ꓪꓴ˗ꓢ ꓟꓬꓱꓽ ꓗꓪ ꓮ ꓟꓬꓹ ꓬꓰ ꓐ ꓡ ꓠꓹ ꓟ ꓥ ꓡꓳ꓿
ꓢꓳꓻ ꓜꓲꓼ ꓓꓴ ꓔꓯ ꓟꓸ ꓖꓶ ꓢꓴ ꓠꓬ ꓔꓲꓺ ꓒ ꓐꓳꓢꓚꓳ ꓥ ꓢꓲ ꓠꓬꓲ ꓔꓲꓺ ꓒ ꓡꓰ ꓢꓳꓻ ꓜꓲꓼ ꓓꓴ ꓗꓪ ꓢꓳꓻ ꓡ ꓢꓴ ꓐꓴ ꓔꓯ ꓣꓳ ꓠꓲꓹ ꓟ ꓠꓬ ꓢꓲꓽ ꓫꓬ ꓕꓳ ꓶ ꓐꓱ ꓶ ꓙꓲˍ ꓟ ꓟꓵꓽ ꓛꓵꓽ ꓒꓬꓱꓼ ꓡ ꓠ ꓔ ꓡꓳ ꓐꓰ ꓢꓯꓼ ꓖꓶ ꓔ ꓟ ꓥ ꓡꓳ꓿ ꓝꓮꓲ ꓢꓳꓻ ꓜꓲꓼ ꓓꓴ ꓗꓪ ꓢꓳꓻ ꓢꓴ ꓐꓴ ꓔꓯ ꓪꓴ˗ꓢ ꓶꓼ ꓓꓳꓽ ꓫꓱꓹ ꓓꓳꓽ ꓚꓺ ꓟ ꓙꓵꓹ ꓕꓯ ꓪꓴ˗ꓢ ꓐꓯ ꓘꓶꓽ ꓠꓬ ꓣꓳ ꓠꓲꓹ ꓟ ꓗꓪ ꓧꓶꓸ ꓕꓯ ꓙꓳ ꓠꓯꓹ ꓟ ꓠꓬ ꓮ ꓘꓶꓸ ꓛꓲ ꓣꓳ ꓚꓵˍ ꓟ ꓥ ꓡꓳ ꓐꓰ ꓢꓯꓼ ꓖꓶ ꓗꓷꓳ꓿
ꓢꓳꓻ ꓜꓲꓼ ꓓꓴ ꓢꓳꓻ ꓡ ꓢꓴ ꓐꓴ ꓠꓬ ꓬ˗ꓖꓳꓥ ꓡꓳ ꓒꓱ ꓗꓪ ꓪꓴ˗ꓢ ꓟꓬꓱꓽ ꓟꓯ ꓔꓬ ꓟ ꓔꓲꓺ ꓟ (41) ꓣꓳ ꓐꓰ ꓟꓸ ꓒ (15) ꓣꓳ ꓐꓰ ꓶꓼ ꓓꓳꓽ ꓫꓱꓹ ꓓꓳꓽ ꓟꓬꓱꓽ ꓬꓰ ꓢꓴ (16) ꓣꓳ ꓮ ꓙꓵꓽ ꓠꓬ (58) ꓣꓳ ꓢꓳꓻ ꓜꓲꓼ ꓓꓴ ꓗꓪ ꓐ ꓗꓷꓳ ꓐꓰ ꓐꓯ ꓔ ꓡꓳ꓿
ꓝꓮꓲ ꓢꓳꓻ ꓤ ꓐꓴ ꓡꓰ ꓢꓳꓻ ꓜꓲꓼ ꓓꓴ ꓓꓳ ꓡꓰ ꓗꓸ ꓠꓯ ꓠꓬ ꓤ ꓠꓱ ꓤ ꓐꓴ ꓐꓰ ꓞꓳ ꓡꓯꓸ ꓐꓴ ꓐꓱ ꓶ ꓪꓴ˗ꓢ ꓐꓯ ꓘꓶꓽ ꓔꓯ ꓮ ꓡꓰ ꓐꓰ ꓟꓸ ꓖꓶ ꓠꓹ ꓟ ꓚꓱꓹ ꓔꓯ ꓫꓸ ꓕꓱ ꓖꓶ ꓗꓷ ꓟ ꓥ ꓡꓳ ꓐꓰ ꓢꓷꓸ ꓪ ꓡꓳ꓿ ꓚꓐꓚꓟ ꓜꓴꓻ ꓠꓬ ꓟꓬ˗ꓟ ꓗꓴꓷꓼ ꓔꓲꓺ ꓒ ꓓꓽ ꓐꓴ ꓡꓰ ꓒꓴ ꓔ ꓟ ꓜꓴꓻ ꓥ
