ꓢꓲ, ꓜꓲꓻ ꓡꓳ ꓜꓲꓻ ꓔꓯ ꓐꓬ ꓡꓰ ꓝꓲˍ ꓟ (Ecocide climate change)
ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓚꓱ, ꓗꓪ ꓐꓰ ꓢꓲ, ꓜꓲꓻ ꓡꓳ ꓜꓲꓻ ꓔꓯ ꓐꓬ ꓡꓰ ꓝꓲˍ ꓟ ꓚꓱ, ꓔꓯ ꓐꓯ ꓟ. ꓖꓶ ꓠ, ꓟ ꓥ ꓡꓳ꓿ ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓢꓲ, ꓜꓲꓻ ꓡꓳ ꓜꓲꓻ ꓔꓯ ꓐꓬ ꓡꓰ ꓝꓲˍ ꓟ ꓡ ꓞꓳ ꓕꓲ ꓣꓳ ꓟꓽ ꓥ ꓠꓬ ꓡ ꓞꓳ ꓜꓴꓻ ꓐꓴ ꓔꓯ ꓙꓵꓽ ꓗꓽ ꓛ ꓢꓲ ꓠꓬꓲ ꓜꓲ ꓞꓳ ꓠ, ꓟ ꓐꓯ ꓟ ꓥ ꓡꓳ꓿ ꓟꓲ ꓠꓯ ꓗꓪ ꓟꓵꓽ ꓘꓳꓼ ꓦꓬꓼ ꓠꓬꓲ ꓒꓳ, ꓡꓶ. ꓔ ꓟ ꓟꓬꓽ ꓡ ꓟ ꓪꓴ. ꓠꓬꓲ. ꓢꓲ, ꓜꓲꓻ ꓡꓳ ꓜꓲꓻ ꓔꓯ ꓝꓮꓲ ꓣꓳ ꓟꓽ ꓘꓴ ꓗꓪ ꓛꓲ ꓘꓶˍ ꓔ ꓟ ꓐꓬ ꓡꓰ ꓢꓴ ꓐꓴ ꓔꓯ ꓰꓚꓳꓚꓲꓓꓰ ꓐꓰ ꓐꓯ ꓟ ꓥ ꓡꓳ꓿
ꓗꓴꓷꓼ ꓕꓲ ꓗꓴꓷꓼ ꓐꓰ ꓕꓲ ꓗꓴꓷꓼ ꓢꓲ, ꓜꓲꓻ ꓘꓶ ꓢꓴ ꓐꓬ ꓡꓰ ꓝꓲ ꓢꓴ ꓐꓴ ꓔꓯ ꓙꓵꓽ ꓗꓽ ꓛ ꓢꓲ ꓠꓬꓲ ꓝꓴꓲ ꓖꓶ ꓠ, ꓟ ꓖꓪꓽ ꓙꓱ ꓪ ꓡꓰ ꓠꓬ ꓠꓬꓲ. ꓠꓬꓲ ꓣꓳ ꓟꓵꓽ ꓣꓳ ꓡꓳ ꓗꓪ ꓢꓲ, ꓜꓲꓻ ꓘꓶ ꓢꓲ ꓠꓬꓲ ꓶꓻ ꓡꓯꓼ ꓬꓰ ꓔꓬ ꓢꓴ ꓐꓴ ꓠꓬ ꓤ ꓟꓳ ꓠ, ꓟ ꓙꓳ ꓟ ꓥ ꓡꓳ꓿ ꓟꓵꓽ ꓕꓲ ꓟꓵꓽ ꓡꓱ ꓔꓯ ꓢꓲ, ꓜꓲꓻ ꓟꓽ ꓣꓳ ꓡ ꓠ, ꓟ ꓬꓰ ꓢꓴ ꓐꓴ ꓔꓯ ꓠꓬ ꓰꓚꓳꓚꓲꓓꓰ ꓐꓯ ꓟ ꓗꓪ ꓓꓵ ꓡꓰ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓟꓵꓽ ꓗꓪ ꓢꓲ, ꓜꓲꓻ ꓔꓯ ꓟꓳ ꓙꓵꓽ ꓗ ꓔꓯ ꓟꓽ ꓛꓳ ꓠꓬ ꓟꓽ ꓟꓶ ꓫꓵˍ ꓟ ꓙꓵ, ꓕꓯ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓳ. ꓗꓷ ꓟ ꓕꓯ ꓢꓲ ꓔꓳ, ꓜꓳ ꓡ ꓓꓴ ꓥ ꓡꓳ꓿ ꓰꓚꓳꓚꓲꓓ ꓙꓵꓽ ꓗꓽ ꓔꓯ ꓗꓴꓷꓼ ꓮ ꓟꓬ, ꓖꓪꓽ ꓙꓱ ꓪꓽ ꓡꓰ ꓠꓬ ꓢꓲ, ꓜꓲꓻ ꓔꓯ ꓣꓳꓽ ꓟꓽ ꓘꓴ ꓠ, ꓛꓲ ꓬꓰ ꓢꓴ ꓐꓴ ꓔꓯ ꓝꓴꓲ. ꓓꓽ ꓟ ꓖꓶ ꓡ ꓓꓴ ꓙꓳ ꓟ ꓥ ꓡꓳ꓿ ꓗꓳ. ꓗꓷ ꓟ 2007 ꓘꓳꓼ ꓗꓪ ꓛꓳ ꓪꓴ. ꓕꓴ ꓢꓲ ꓠꓬꓲ ꓕꓱ ꓟ ꓔꓯ ꓬꓰ ꓔꓬ ꓟ ꓥ ꓡꓳ꓿
ꓠꓬꓲ ꓠꓬꓲ ꓟꓲ ꓠꓯ ꓗꓪ ꓢꓲ, ꓜꓲꓻ ꓟꓽ ꓙꓳ ꓗꓷ ꓡꓰ ꓟ ꓪꓴ. ꓠꓬꓲ ꓮꓽ ꓟꓴꓽ ꓗꓪ ꓐꓰ ꓐꓬꓱ ꓓꓱ ꓕꓯ ꓠꓲ, ꓛꓵꓽ ꓟ ꓟꓽ ꓙꓳ ꓗꓷ ꓡꓰ ꓟ ꓔꓯ ꓡꓳ. ꓟꓳ ꓓ ꓟ ꓥ ꓡꓳ꓿ ꓟꓲ ꓠꓯ ꓞ ꓡ ꓟ ꓠꓬ ꓢꓲ, ꓜꓲꓻ ꓡꓳ ꓜꓲꓻ ꓔꓯ ꓬꓲ ꓙꓵ, ꓟꓽ ꓙꓳ ꓘꓶꓻ ꓔ ꓟ ꓐꓬ ꓡꓰ ꓝꓲ ꓟ ꓪꓴ. ꓠꓬꓲ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ ꓡ ꓟ ꓥ ꓡꓳ꓿
ꓕꓱ ꓟ ꓔꓯ ꓟꓳˍ ꓣꓳ ꓠꓬꓲ. ꓠꓬꓲ ꓟꓬꓱꓽ ꓟꓽ ꓬꓰ ꓠꓬ ꓛꓲ ꓡ ꓞꓲ (50) ꓘꓳꓼ ꓗꓪ ꓠꓬ ꓬꓲꓻ ꓡꓳ ꓐꓱ ꓓꓽ ꓒ ꓕꓲ ꓗꓪ ꓙꓳ ꓟ ꓡꓳ ꓒꓱ ꓓꓽ ꓐꓴ ꓠꓬ ꓟꓶ ꓡꓰ ꓡ ꓓꓴ ꓙꓳ ꓟ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓔꓬ ꓟ ꓙꓵ, ꓕꓯ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓟꓬꓱꓽ ꓟꓽ ꓬꓰ ꓠꓬ ꓣꓳ ꓔꓬ ꓟ ꓗꓴꓷꓼ ꓗꓪ ꓐꓰ ꓢꓴ ꓗꓴꓷꓼ ꓗꓪ ꓔꓬ ꓠ, ꓗꓷ ꓡꓰ ꓡ ꓓꓴ ꓙꓳ ꓟ ꓥ ꓡꓳ꓿ ꓮ ꓫꓵꓽ ꓥ ꓐꓯ ꓠꓬ ꓣꓳ ꓔꓬ ꓟ ꓟꓵꓽ ꓗꓪ ꓔꓬ ꓟꓽ ꓙꓰ ꓗꓷ ꓡꓰ ꓟ ꓪꓴ. ꓠꓬꓲ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓠꓵꓻ ꓠꓲ, ꓟ ꓬꓲꓼ ꓤ ꓠꓬꓲ ꓤ ꓐꓴ ꓢꓲ, ꓜꓲꓻ ꓡꓳ ꓜꓲꓻ ꓔꓯ ꓔꓶ ꓓꓴ ꓬꓰ ꓡꓯ꓿ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓢꓲ, ꓜꓲꓻ ꓔꓯ ꓮ ꓟꓬ, ꓔꓶ ꓢꓲ ꓠꓬꓲ ꓢꓲ, ꓜꓲꓻ ꓡꓳ ꓜꓲꓻ ꓔꓯ ꓒꓵꓽ ꓓꓴ ꓬꓰ ꓡꓯ꓿ ꓟꓵꓽ ꓘꓳꓼ ꓠꓬ ꓣꓳ ꓟꓲ ꓠꓯ ꓡ ꓞꓳ ꓔꓯ ꓙꓲ ꓖꓴ ꓙꓳ ꓟ ꓮ ꓟꓬ, ꓖꓶ ꓔꓬ ꓟ ꓥ ꓡꓳ꓿ ꓢꓲ, ꓜꓲꓻ ꓠꓬ ꓟꓲ ꓠꓯ ꓡ ꓞꓳ ꓔꓯ ꓢꓯꓼ ꓦꓻ ꓠ, ꓟ ꓟꓲ ꓦꓲꓻ ꓖꓶ ꓔꓬ ꓟ ꓥ ꓡꓳ꓿ ꓫ. ꓟꓳ ꓪ꓿
